ཆང་སྐྱེས།
མི་ཞིག་ལ་མཚོན་ན་སོ་སོར་ལྟ་བ་དང་ལངས་ཕྱོགས་མི་འདྲ་བ་རེ་ཡོད་པ་ནི་མི་ཚེ་རིན་ཐང་དང་བསམ་བློ་རིན་ཐང་་གི་ཐད་ལ་ལྟ་ཚུལ་མི་འདྲ་བ་རེ་ཡོད་པས་ཡིན། སོ་སའི་ལྟ་བ་དང་ལངས་ཕྱོགས་བརྟན་པོར་འཛིན་རྒྱུའི་ཕྱོགས་ལ་སོ་སོར་རང་དབང་ཡོད་ལ་ཐོབ་ཐང་ཡང་ཡོད། ཡིན་ན་ཡང་མང་པོ་ཞིག་གིས་རང་ཉིད་ཀྱི་ཁེ་བཟང་དང་དོན་དག་བསྒྲུབ་པའི་ཆེད་དུ་ཐབས་བརྒྱ་ཇུས་སྟོང་གིས་ཕ་རོལ་བ་དེ་ནག་པོ་ནག་རྐྱང་དུ་བཟོས་སྟེ་ཕམ་པར་རྒྱག་མཁན་ནི་ཉུང་ཉུང་ཞིག་མ་ཡིན། ལྷག་པར་ཏུ་ང་ཚོ་བོད་པ་ཚོར་མཚོན་ན་ཁ་ནས་”སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག། སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག། སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག། སེམས་ཅན་ཐམས་ཅད་ཉེ་རིང་་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག”ཅེས་ཞལ་འཛུམ་འཛུམ་དང་མགོ་སྒུར་སྒུར་གྱིས་ཚུགས་ཀ་འཇམ་པོ་རེ་སྟོན་བཞིན་དཀར་ནག་གོ་ཟློག་གི་ལས་ལ་ཞུགས་མཁན་ཡང་ཉུང་ཉུང་འདུག
དཔེར་ན་དམངས་དོན་ཁ་ལ་ཁྱེར་ཏེ་རང་དོན་རུམ་ན་བསྒྲུབ་པའི་དཔོན་པོ། མཐུན་སྒྲིལ་རྨང་ནས་གཏོར་ཏེ་ཕྱི་དཀྲུག་ནང་དཀྲུག་བྱེད་པའི་ཤོག་ཁག རང་ཉིད་མཁས་པར་རློམ་སྟེ་གཞན་རྣམས་རླུན་པོར་བརྩི་བའི་མི་བུ། ལྷག་པར་ཏུ་༧གོང་ས་རྒྱལ་བ་རིན་པོ་མཆོག་གི་མཚན་སྙན་བེད་སྤྱོད་བཏང་སྟེ་སོ་སོའི་ཁེ་བཟང་དང་དོན་དག་བསྒྲུབ་པ་དག་ནི་ཐལ་དྲག་འདུག ཁོ་ཚོས་རྒྱུན་དུ་ཁོས་་༧གོང་ས་མཆོག་ལ་མཚན་སྨད་ཞུས་སོང་དང་མོས་རྒྱལ་བ་ཐམས་ཅད་མཁྱེན་པ་མཆོག་ལ་སྐུར་འདེབས་བྱས་སོང་ཞེས་ས་བསྒྲག་གནམ་སྒྲག་བྱེད་པ་ནི་དོན་དམ་པའི་སོ་སོའི་དོན་གོ་འགྲུབ་པའི་ཆེད་དུ་གཉེར་བའི་ལས་ཀ་རྫོབ་པོ་ཞིག་ལས་ཅི་ཡང་མ་མཆིས། གལ་ཏེ་ཁྱོད་ཚོ་ངོ་མ་སེམས་དང་བསམ་པའི་གཏིང་དང་སྙིང་ཁུང་རུས་པའི་དཀྱིལ་ནས་༧གོང་ས་རྒྱལ་བ་དོན་གྱི་བདག་པོ་མཆོག་ལ་གློ་བ་དཀར་ཞིང་སེམས་པ་ཉེ་ན་དེ་འདྲ་མ་བྱེད་རོགས་དྲིན་ཆེན་ཚོ།
༧གོང་ས་མཆོག་གིས་ང་ཚོ་ཆེན་པོ་བོད་ཀྱི་རྒྱལ་ཁབ་དང་མི་རིགས་ཀྱི་ཆེད་དུ་བློས་བཏང་བ་མང་མེད་ན་ཉུང་མེད། ད་ནི་རིན་པོ་ཆེ་མཆོག་ལ་སྐུ་ངལ་ཅུང་ཙམ་ཅིག་གསོ་རུ་འཇུག་རྒྱུ་ནི་གལ་ཆེན་ནང་གི་འགངས་ཆེན་རེད་བསམ་བྱུང་། ངས་འདི་ལྟར་བཤད་ན་མང་པོ་ཞིག་གིས་སེམས་ལ་མི་དྲན་དགུ་དྲན་དང་ཁ་ནས་མི་བཤད་དགུ་བཤད་ཀྱིས་ངའི་མགོ་ཆུང་ཆུང་རིལ་མ་འདྲ་བོ་འདིའི་སྟེང་ལ་ཞྭ་མོ་ནག་པོ་རི་བོ་འདྲ་ཞིག་གཡོག་རྒྱུ་ཡིན་པ་ནི་ང་ཀུན་མཁྱེན་མིན་རུང་རིག་གིས་འདུག ཡིན་ཡང་ང་རང་སེམས་དཀར་པོ་དུང་ཡིན་པས་འདྲེ་ཡིས་འགྲམ་ལྕག་ལ་འཇིགས་དོན་མེད།
བསམ་ཚུལ་ལེགས་པོ་འདུག