རྔ་རྒོད།
ང་ཚོས་ལྟ་གྲུབ་དང་གྲུབ་མཐའ་ཞེས་ཚིག་དང་ཐ་སྙད་མི་འདྲ་བ་འདི་གཉིས་བསྙད་པའི་དབང་གིས་བརྗོད་བྱ་དོན་ལའང་ཁྱད་པར་ཆེན་པོ་ཡོད་པའི་སྣང་ཚུལ་ཞིག་ང་ཚོར་ཡོད་མོད། རིགས་པས་མཐར་དེད་ན་འདི་གཉིས་དོན་གཅིག་མིང་གི་རྣམ་གྲངས་སུ་འདོད། དེའི་ཕྱིར་ལྟ་གྲུབ་འདི་ལ་རིགས་གསུམ་ཡོད། དབང་འཛིན་ཆབ་སྲིད་ཀྱི་ལྟ་གྲུབ་དང་། ཐར་འདོད་ཆོས་ལུགས་ཀྱི་ལྟ་གྲུབ་དང་། དེ་གཉིས་ལ་མེད་དུ་མི་རུང་བའི་དཔལ་འབྱོར་བཙལ་བའི་ལྟ་གྲུབ་གསུམ་མོ། བྱས་ཙང་། ལྟ་གྲུབ་གང་གི་སྐབས་དང་སྦྱར་ན་ཆོག དོན་དངོས་སུ་ལག་བསྟར་གང་གཙོ་བོ་དང་ཕལ་བ་བགྱིས་ཀྱིན་ཡོད་མེད་ཀྱིས་དེ་ལ་ཁྱད་པར་ཅུང་འབྱེད་དགོས་པ་མ་གཏོགས། ཆོས་སྲིད་གཉིས་གཏན་ཏུ་ཁ་བྲལ་བའི་དངོས་ཡོད་ལོ་རྒྱུས་མང་བོ་ཞིག་འཛམ་གླིང་འདིར་བསྟན་རྒྱུ་མེད་ལ་ཡོད་ཀྱང་མི་སྲིད་སྙམ།
འོན་ཀྱང་མི་རིགས་དང་རྒྱལ་ཁབ་ལ་བསྡུར་ནས་བརྟགས་ན། སྔོན་ཐོན་མི་རིགས་དང་དེའི་རྒྱལ་ཁབ་ཚོས། གཙོ་བོར་ཆབ་སྲིད་ཀྱི་སྟོབས་དང་མཉམ་པོར་དཔལ་འབྱོར་དེ་རྩོད་སྒྲུབ་བྱེད་བཞིན་རང་རྒྱལ་གཞན་ཕམ་གྱི་སྐོར་ལ་བསམ་གཞིགས་ནན་པོར་གཏོང་གིན་ཡོད། རྗེས་ལུས་མི་རིགས་དང་དེའི་རྒྱལ་ཁབ་ཚོས། གཙོ་བོར་ཆོས་ལུགས་དང་མཉམ་པོར་དཔལ་འབྱོར་དང་ཡང་ན་གྲུབ་མཐའི་བར་གྱི་རྩོད་སྒྲུབ་བྱེད་བཞིན། རང་གི་རྒྱབ་ལྗོངས་སུ་རང་གི་གཏན་ཚིགས་དང་ལས་དབང་དཀོན་ཅོག་སོགས་བཟུང་སྟེ་མི་མངོན་པའི་ཁམས་དང་དབྱིངས་ཤིག་ན་རྟག་པར་རེ་བ་བྱེད་ཀྱིན་ཡོད་མེད་ཀྱིས་ཁྱད་པར་ཙམ་མོ། གཞན་ཡང་ལྟ་གྲུབ་ལ་འཕྲལ་ཕུགས་རྒྱང་གསུམ་ལ་བརྟགས་ཤིང་དཔྱད་པའི་སྒོ་ནས་ཀུན་ལ་ཕན་པའི་ལྟ་གྲུབ་གཅིག་དང་གནས་སྐབས་ཀྱི་ཁེ་བཟང་ངམ་ཉི་ཚེ་བའི་ལྟ་གྲུབ་ཙམ་གཉིས་མཆིས།
ལྟ་གྲུབ་འདིའི་གོང་འོག་སྔ་ཕྱི་གཉིས་བསྡུར་ན། སྔ་མའི་རིགས་འདི་གནས་ལུགས་དང་མཐུན་པས། དེ་ཅུང་བརྟན་པོ་དང་དགེ་མཚན་ཡོད་པ་ཆོས་ཉིད་རེད། ཕྱི་མ་དེ་ལ་རེ་ཞིག་ཁེ་བཟང་འདྲ་ཡོད་སྲིད་ཀྱང་དེ་ལ་འགྱུར་བ་དང་ཉེན་ཁ་ཧ་ཅང་མང་བས། མགོ་མཇུག་ལོག་པ་ཤིན་ཏུ་མང་ངོ་། འདི་དག་ཇེ་གསལ་ཡོང་བའི་ཆེད་དུ། ཆབ་སྲིད་པ་དང་ཆོས་པ་ལ་མི་བཞི་ཞིག་འདིར་བརྩིས་ན་ཅུང་རྟོགས་སླ་བར་འདོད། དང་བོ། མའོ་ཙེ་ཏུང་དང་བྷོ་ཤི་ལྟ་བུ། གཉིསཔ། མི་ལ་རས་པ་དང་ཁྲི་རལ་བ་ཅན་ལྟ་བུ། གསུམ་པ། སློབ་དཔོན་གྷན་དྷི་མཆོག་དང་བོད་མིའི་བླ་སྲོག་རྗེ་བླ་མ་༧ གོང་ས་མཆོག་ལྟ་བུ། བཞི་བ། དུད་འགྲོའི་རིགས་དང་ཤེས་རྨོངས་ཐམས་ཅད་ལྟ་བུ།
གཞན་ཡང་འདི་ལ་བརྟགས་ཚུལ་བཞན་པའི་སྒོ་ནས་བསྙད་ན་ནི་དེ་ལ་གཏན་ཚིགས་སམ་རིགས་པ་ལ་བརྟེན་ནས་ཆོས་སྲིད་ཀྱི་ལྟ་གྲུབ་དེ་བཞེས་མཁན་སྐོར་ཅིག་དང་། ལོང་ཙམ་དང་དགེ་རྒན་གྱི་བཀའ་ཙམ་ལ་བརྟེན་ནས་ཆོས་སྲིད་ཀྱི་ལྟ་གྲུབ་བཙན་པོ་འཛིན་མཁན་རིགས་ཤིག་དང་། དེ་མིན་རང་གི་ལས་ཀ་དང་ཡོང་སྒོ་ཙམ་གྱི་ཆེད་དུ་ཆབ་སྲིད་ཀྱི་ལྟ་གྲུབ་དེ་མི་འདོར་མཁན་མང་བོ་ཡོད་ལ། གཞན་ཡང་གང་དྲན་དྲན་དང་ཚོར་བ་ཙམ་གྱིས་རྗེས་སུ་བསྙེགས་ཏེ་རི་བོང་ཅལ་འདྲོགས་བྱེད་མཁན་སོགས་ཧ་ཅང་མང་ངོ་།།
སྤྱིར་ན་ཆབ་སྲིད་ཀྱི་ལྟ་གྲུབ་འདི་ལ་གཏིང་རིང་ཐུང་དང་དགེ་སྐྱོན་གཉིས་ཡོད་པར་ལྟར། ཆོས་ལུགས་ཀྱི་ལྟ་གྲུབ་ལ་ཡང་དཔེ་དེ་བཞིན་རེད། འོན་ཀྱང་དེང་སང་ང་ཚོ་མང་བོ་ཞིག་གིས་ནང་བསྟན་འདི་ཚན་རིག་དང་མཐུན་དགོས་ཤིང་། དེ་དང་མཉམ་པོར་དེ་ནི་དུས་རབས་ཉེ་གཅིག་པའི་འགྲོས་དང་བསྟན་དགོས་ཞེས་གང་དྲན་ཞིག་བསྙད་ཀྱིན་ཡོད། འོན་ཀྱང་དེ་ནི་སྐལ་ལྡན་གདུལ་བྱ་གཞན་འདུལ་བའི་ཆེད་དང་། ལས་དང་བོ་བ་ལ། སྤྲོ་སྣང་ཙམ་འདྲེན་པའི་ཆེད་དུ་ཡིན་ན་འོས་མོད། གལ་ཏེ་ཉམས་ལེན་དང་ལག་ལེན་ངོས་ཀྱི་སྐབས་སུ་༧ རྗེ་བླ་མའི་ལམ་རིམ་སོགས་བསྐྱུར་ཏེ་ཚན་རིག་འདི་ལ་ཧང་སངས་པ་ནི། འབྲི་མར་བཙོང་ནས་ཤིང་མར་ཟོས་པ་དང་རྒྱགས་རྟ་བཙོང་སྟེ་བོང་རྒན་ཉོས་པའི་ལོ་རྒྱུས་དང་ཡང་ན་རྒྱ་མཚོ་རྩིབ་ལ་བཞག་ནས་རྐོ་གྱོང་མཆིལ་མས་མཉེད་ཟེར་བའི་དཔེ་ལས་མ་འདས་སྙམ།
འདིར་ཆེད་དུ་ཡ་མཚན་ཞིག་ལ། དེང་སང་མཁས་པ་དང་ལར་ཞེན་ཅན་ཡིན་པར་རློམ་མཁན་གྱི་དགེ་འདུན་པ་སྐོར་ཅིག་གིས་ཁ་ནས་ནང་བསྟན་དག་ཐེར་དང་ལུས་ལ་སྟོན་པའི་མནའ་བཟའ་བསྐོན་ཏེ་ནང་བསྟན་འཛིན་པའི་དགེ་འདུན་པ་ནི་རང་རིགས་ཀྱི་གཉའ་གནོན་དང་བཀག་རྡོ་ཡིན་པའི་ངེས་འབྱུང་རྙེད་པར་བསྙད་ཀྱང་། དོན་ལ་ནི། མུ་མཐུད་དུ་རང་ཉིད་དཀོར་ཟས་ལ་རོལ་བཞིན་པའི་ངང་དུ་གྲྭ་རྒྱུན་བསྡུ་ལེན་དང་ཆོས་ཀྱི་སློབ་གཉེར་ཆེད་དུ་རྒྱུགས་འདུར་བྱེད་པ་འདི་ནི་ངོ་མཚར་བའི་ལྟ་གྲུབ་ཅིག་མ་ཡིན་ནམ།
འོན་ཀྱང་སྤྱི་བཏང་གི་མི་སྐྱ་རང་འཚོ་བ་དང་རོང་འབྲོག་གི་ངལ་རྩོལ་བ་ཡང་ན་གྲྭ་ལོག་ཚོའོ་ཁྲོད་ནས་དགེ་འདུན་པའི་བཤུ་གཞོག་འདིའི་སྐོར་ལ་རྒོལ་བ་ནན་པོར་གང་མང་རེ་བགྱིས་ན་ཕྱོགས་གཉིས་ཀ་ནས་བསམ་གཞིགས་གཏོང་སྲིད་དམ་སྙམ།
གང་ལྟར་མཐའ་བསྡོམས་བྱས་ན། སྤྱིར་འཛམ་གླིང་འདིར། ཆབ་སྲིད་ཀྱི་སྟོབས་དང་མངའ་ཁོངས་བརྩད་ནས་སྐྱ་སེར་བྱེ་བ་མང་བོའི་ཚེ་སྲོག་དེའི་ཆེད་དུ་བཏངས་ཡོད་པས། རྐྱན་བྱས་ཏེ་ཆུང་བས་ཆེན་པོ་ཟོས་པའི་ལོ་རྒྱུས་དང་། ཆེན་པོས་ཆུང་བ་བསད་པའི་རང་བཞིན་གྱིས་ལོ་རྒྱུས་སམ་ཡང་ན་ཤི་བོ་རོ་ལངས་བརྒྱབ་པའི་ལོ་རྒྱུས་སོགས་བྱུང་དང་འབྱུང་ངེས་རེད། དེ་བཞིན་ཆོས་ལུགས་དང་གྲུབ་མཐའ་མཚོན་ན་རེད། དེའི་མངའ་ཁོངས་བརྩད་དེ་འདིའི་ཆེད་དུ་སྐྱ་སེར་ཁྲི་ཕྲག་མང་བོས་ཀྱང་ཚེ་སྲོག་བཏངས་ཏེ་ཆོས་ལུགས་རྙིང་བ་དག་རྩ་མེད་བཟོས་པའི་ངོས་མཐོང་ལོ་རྒྱུས་དང་ཡང་ན་གསར་བ་རྒྱ་བསྐྱེད་གཏོང་བཞིན་པའི་དོན་ངོས་ཀྱི་ལོ་རྒྱུས་སོགས་ནི་གཟུ་བོ་རྣམས་པས་ངེས་པར་དུ་ཁས་ལེན་དགོས་མོད་ཀྱང་། འོན་ཏེ་འཇིག་རྟེན་མི་ཆོས་དང་མ་འབྲེལ་བར་ལོགས་སུ་ཆོས་དང་སྲིད་ཀྱི་གོ་དོན་ནམ་མཚན་ཉིད་ཟེར་བའི་ཚིག་ཧ་ཅང་སྙན་པོ་རེ་ང་ཚོས་བྲིས་ཀྱང་དོན་དུ་ང་ཚོ་དང་ཁ་ཐག་རིང་ཞིང་འབྲེལ་བ་མེད་ན་སྟོང་བསམ་རང་མ་ཡིན་ནམ་ཞེས།
རྔ་རྒོད་ཀྱིས་༢༠༡༤/༣/༣༠ དབྱིན་ཡུལ་ནས།
ལག་ཐོགས་ཚད་ཀྱིས་ཅིག་འབྲི་བཞིན་པ་འདི་ན་ཚ་གསར་བ་ཞིག་ཡིན་པ་མ་ཟད་ན་ཚ་འདི་ལ་མིང་ཡང་འདོགས་དཀའ་སེ་འདུག་ལོ།
གང་གསུང་འདོད་ཡིན་ན་གོ་རྒྱུ་ཅང་མེད་ཀི་
གོ་བ་ཡག་པོ་ཡོད་མེད་པའི་མི་ལ ཅི་ཡང་གོ་དཀའ