<>། ཞེས་བྱ་བའི་གསུང་རྩོམ་འདི་ཉིད་མཁས་པའི་དབང་པོ་དགེ་བའི་བཤེས་གཉེན་ཆེན་པོ་གང་ཉིད་ཀྱིས་ལྗགས་རྩོམ་ཇི་ལྟར་མཛད་པ་དང་། རྒྱ་གར་དུ་ཇི་ལྟར་གདན་འདྲེན་ཞུས་པའི་རྒྱུད་རིམ་རགས་ཙམ་ཞུ་ན། དེ་ཡང་ལྗགས་རྩོམ་འདི་བཞིན་དགེ་བའི་བཤེས་གཉེན་དམ་པ་གང་གིས་རྒྱ་ནག་ཁྲོན་ཏུའུ་གྲོང་ཁྱེར་ནས་མོ་ཊ་ཉིན་གཅིག་གིས་ཆོད་པའི་ས་གནས་དར་ཙོང་བཙོན་ཁང་ཟེར་བ། བཙོན་པ་སྟོང་ཕྲག་གཉིས་ལྷག་དང་བཙོན་སྲུང་ལས་བྱེད་ཁོ་ན་སྟོང་ཕྲག་གཅིག་བརྒལ་བ་ཡོད་པའི་བཙོན་ར་དེའི་ནང་དུ་མི་ལོ་ཧྲིལ་པོ་བཞི་མ་ཟིན་ཙམ་བཞུགས་རིང་། ཉེས་རྡུང་དང་དོ་སྒྲགས་གཞན་ལས་རྩུབ་པའི་འོག །བཙོན་ཁང་ནང་ལྐོག་ཏུ་བྲིས་པའི་ལྗགས་རྩོམ་གྱི་ཆ་ཤས་ལེ་ཚན་ཞིག་རེད། བཙོན་ཁང་ནང་དོ་སྒྲགས་ཤིན་ཏུ་ཆེ་ཁར་སྣག་ཤོག་སྨྱུ་གུའི་ཆ་རྐྱེན་ཡང་ཤིན་ཏུ་ཁག་པོ་ཡིན་པ་བཤད་མ་དགོས་པ་རེད། སྟབས་ལེགས་པ་ཞིག་ལ་བཙོན་རོགས་རྒྱ་རིགས་ཁག་གཅིག་དགེ་རྒན་དམ་པའི་མཛད་སྤྱོད་ལ་དད་པ་སྐྱེས་ནས་གསང་བ་དེ་ཙམ་མི་དགོས་པར་ཆགས་པ་དང་། བཙོན་སྲུང་དང་བཙོན་གྲོགས་ཐ་མག་འཐེན་མཁན་ཁག་གཅིག་གི་ཐ་མལ་པགས་པ་བསྒྲུགས་ནས་བསགས་པ་དང་། བཙོན་རོགས་རྒྱ་མི་འགའ་ཞིག་གི་རྒྱུད་ནས་སྐམ་སྨྱུག་ནང་རྙིང་བཅད་གཏུབ་ཀྱིས་ལྐོག་ཉར་བྱས་ནས་ལྐོག་འབྲི་གནང་ཟིན་རིགས་ཧ་ཅང་དམ་པའི་ཤོག་དྲིལ་གནང་ནས་སྦས་ལྐུངས་གནང་པ་ཁག་གཅིག་བཙོན་དུ་གཏུགས་མཇལ་བཅར་མཁན་སློབ་མ་ཚོར་ཕྱག་བཏང་བའི་ཟོལ་གྱིས་ལག་ཏུ་སྤྲོད་པ་དང་། འགའ་ཞིག་ནི་རྒྱ་གཞུང་གིས་བཙོན་སྲུང་ལྐོག་ནས་གསང་སྤྱོད་ལྕགས་ཀྲིས་རྐུབ་ཏུ་སླན་པ་སོགས་ལ་བརྟེན་ནས་བསགས་པ་ཞིག་ཡིན་འདུག །ལྗགས་རྩོམ་ཕྱག་བྲིས་གནང་སྟངས་ཀྱང་། དུར་པགས་ཐོག་ཚིགས་བཅད་གོང་འོག་ཁ་གཏོར་ཡ་གཏོར་བྱས་ནས་རྒྱུས་མེད་ཀྱིས་བཀླགས་ན་གོ་དོན་དང་གོང་འོག་ལྷུར་སྒྲིག་མི་ཤེས་པ་བྱས་ནས་བྲིས་འདུག །བཙོན་གྲོལ་བྱུང་རྗེས་རང་གི་འཁྲུངས་ཡུལ་དར་དགོན་བྱང་ངོས་ཆོས་ས་གྲོང་དུ་ཕེབས་རྗེས་ཚིགས་བཅད་གོང་འོག་ལྷུར་སྒྲིག་དང་ཤོག་དྲིལ་སྔ་ཕྱིར་གུང་སྒྲིག་ནས་དད་ལྡན་སློབ་མ་ཁག་གཅིག་གིས་མ་དཔེ་ལས་བུ་བཤུས་ནས། མ་དཔེ་ཤོག་སྒྲིལ་མང་ཆེ་བ་མེ་བསྲེགས་བཏང་གནང་མཛད་འདུག །སྐབས་དེར་སློབ་མ་ཚོས་ཤོག་དྲིལ་ཁག་གཅིག་མེ་བསྲེགས་བཏང་མ་བཅུག་པར་རང་འཇགས་བཞག་པའི་ནང་ནས་དུར་པགས་ཐོག་བྲིས་པའི་ལྗགས་རྩོམ་ཁག་གཅིག་ནི་༸གོང་ས་མཆོག་གི་ཕྱག་ཏུ་སོན་པར་ཧ་ཅང་ཐུགས་མཉེས་པོ་གནང་འདུག །དཔེ་བཤུས་བྱས་ཟིན་པའི་གསུང་རྩོམ་རྣམས་རྒྱ་གཞུང་གིས་བསྔོགས་གཤེར་འཕྲོག་ཁྱེར་མི་ཡོང་ཆེད། གཟིམ་ཆུང་དུ་ཉར་མ་ཕོད་པར་འབྲོག་སར་འབྲོག་ཁྱི་འདོགས་སའི་འགྲམ་དུ་ས་དོང་བྲུས་ཤིང་གསུང་རྩོམ་རྣམས་འབོག་སྒྲིལ་བྱས་པའི་ཕྱིར་ཆུ་ཤོག་གིས་གཡོགས་ཏེ་སྒམ་ནང་བླུགས་ཏེ་ས་སྦས་བཏང་ནས་བཞག་འདུག །སྐུ་ཉིད་དགོངས་པ་ཞི་བར་གཤེགས་རྗེས་སློབ་མ་ཚོས་གསང་བ་དམ་སྒྲགས་ཀྱི་སྒོ་ནས་སློབ་མ་བསྟན་འཛིན་བདེ་ལྡན་ལགས་ཀྱིས་ལག་སོན་བྱུང་བའི་མ་དཔེ་ཡོངས་རྫོགས་གདན་དྲངས་ནས་ལྷ་སར་བཏང་འདུག །དེ་ནས་ཀྱང་གསུང་རྩོམ་མ་ཕྱི་བོར་བརླག་འཕྲོག་གསུམ་གྱི་ཉེན་ཁ་ཆེ་སྟབས་དད་ལྡན་འབྲེལ་ཡོད་ཀྱི་ཁྱིམ་དུ་མངོན་ཆུང་གིས་སྡོད་ཅིང་། ཕྱིར་བསྐྱོད་ལག་ཁྱེར་མེད་སྟབས་དིང་རི་བ་ཞིག་ལ་རྒྱ་སྒོར་༡༦༠༠༠་སྤྲོད་ནས་བལ་ཡུལ་དུ་འབྱོར་ཐུབ་ཙམ་བྱུང་། རྒྱ་བལ་གྱི་སྣེ་ལེན་ཁང་གི་རྒྱུད་ནས་རྡ་ས་འབྱོར་རྗེ་༸གོང་ས་མཆོག་ལ་སྤྱན་འབུལ་ཞུ་རྒྱུའི་སྐལ་བཟང་ཐོབ་པར་མ་ཟད།ཐུགས་དགྱེས་པ་ཆེན་པོས་ལམ་སྟོན་དང་མ་དཔེ་ཁག་གཅིག་དཔེ་གཟིགས་དགོས་པའི་བཀའ་སློབ་ཀྱང་གནང་། རྒྱ་གར་དུ་གདན་འདྲེན་ཞུས་ཟིན་པའི་གསུང་རྩོམ་སྔ་ཕྱི་ཁག་དཔེ་སྐྲུན་ཆེད། པར་རྩ་སྒྲིག་འཇུག་ཏུ་སེར་བྱེས་ནས་གང་ཉིད་ཀྱི་སློབ་མ་རིན་ཆེན་ཚེ་རིང་རྡ་སར་ཆེད་བཅའ་གྱིས་གློག་ཀླད་དུ་སྒྲིག་འཇུག་ཞུ་བཞིན་པའི་ཁྲོད་ནས། ལྷ་བྱའི་རྟོགས་བརྗོད་འདི་ཉིད་གསུང་རྩོམ་ཀྱི་ཆ་ཤས་ཤིག་ཡིན། གསུང་རྩོམ་འདི་ནི་རྫ་དཔལ་སྤྲུལ་རིན་པོ་ཆེའི་གཏམ་པདྨ་ཚལ་གྱི་ཟློས་གར་དང་འདྲ་བར། བསྡུས་བརྗོད་ཀྱི་རང་བཞིན་ལྡན་པའི་ཆེད་རྩོམ་འགྲན་ཟླ་མེད་པ་ཞིག་ཀྱང་ཡིན། གསུང་རྩོམ་འདིའི་བརྗོད་གཞིའི་ཐད། དཔེ་ཅན་བསྡུས་པའི་དཔེ་ཡི་འདབ་ཆགས་གཙོ་བོ་ལྷ་བྱ་སྤུན་གཉིས་ལས་སྤྱན་ཡངས་ནི་༸གོང་ས་མཆོག་དང་འོད་ལྡན་ནི་༸སྐུ་གཟིགས་པཎ་ཆེན་རིན་པོ་ཆེ་རྣམ་གཉིས་ཡིན། རྩེ་གསུམ་ལྡན་པའི་ས་འཛིན་ནི་བོད་ཡུལ་ལུང་པ་ཡིན། ཁྲ་གླག་འུག་པ་གསུམ་ནི། མའོ་ཙེ་ཏུང་དང་། ཀྲུའུ་ཨེ་ལེ། ཀྲུའུ་ཏེ་གསུམ་ཡིན། ལུང་ཆེན་ནག་པོ་ནི་རྒྱ་ཡུལ་དང་། རྫོང་དམར་ནི་གནམ་སྡེ་སྒོ་མོ་ཆེ་ཡིན། བརྗོད་གཞི་ཧྲུལ་པོ་བསྡུས་ནས་བཤད་ན། གངས་ཅན་མགོན་པོ་རྒྱལ་བ་པཎ་ཆེན་གཉིས་ཀྱི་ཐུགས་བསྐྱེད་སྨོན་ལམ་དང། བོད་རང་གིས་འཚོ་བཞིན་པ་ནས་རྒྱ་དམར་གྱིས་བོད་ལ་ཐོག་མར་བཙན་འཇུག་ཇི་ལྟར་བྱས་པའི་བར་དུ་བོད་མི་རིགས་ལ་མི་བསད་ཁྲག་སྦྱོར་དང་མེ་བསྲེགས་རྒྱུ་འཕྲོག་གི་གནོན་བཙིར་ཇི་ཙམ་བྱས་པ། མཐའ་མར་བོད་སྣོད་བཅུད་ཆ་ལག་དང་ཆོས་རིག་གོམས་སྲོལ་དང་བཅས་པ་གཏོར་བརླགས་ཇི་ལྟར་བཏང་པ་དང་། ༸གོང་ས་ཕྱག་ན་པདྨོ་མི་ཡུལ་ལུང་པར་སྐྱབས་བཅོལ་ཕེབས་དགོས་བྱུང་ཚུལ། པཎ་ཆེན་ཐམས་ཅད་པ་བཙོན་འཇུག་མནར་གཅོད་དང་བཅས་བསྡུས་ནས། བརྗོད་དོན་དངོས་བྱུང་གི་ཡ་ང་བའི་ཉེ་རབས་ཀྱི་ལོ་རྒྱུས་རྣམས་ཆད་ལྷག་ནོར་གསུམ་ཀྱིས་མ་སླད་པར་བརྗོད་བྱེད་ཚིག་སྦྱོར་སྡེབ་ལེགས་ཤིང་འབྲེལ་ཆགས་པའི་ལམ་ནས་བསྟན་འདུག །དམ་པ་གང་གི་ལྗགས་རྩོམ་འདིའི་ནང་ཡིག་ནོར་དང་དོན་ནོར་འདྲ་ཤོར་ཡོད་ན་སྒྲིག་པ་པོ་དང་ཞུ་དག་པས་ནོར་བ་ལས་མཛད་པ་པོ་ནོར་བ་ཞིག་མིན་པའང་གོ་སྐབས་འདི་བརྒྱུད་ནས་གསལ་བཤད་ཞུ་རྒྱུ་ཡིན།
དཔེ་ཅན་བསྡུས་ནས་ཁུ་བྱུག་གི་རྟོགས་པ་བརྗོད་པའི་གཏམ་པདྨ་དཀར་པོའི་སྡོང་པོ་ཡལ་འདབ་སོ་དྲུག་པ།
ནོར་བཅོས། ཁུ་བྱུག་གི་རྟོག་བརྗོད། ཁུ་བྱུག་གི་(རྟོགས་)བརྗོད་ཅེས་བཅོས་རོགས།
བེ་རི་ལགས། ཁྱེད་བོད་མི་རིགས་ནང་ཁུལ་དཀྲུག་ཤིང་བརྒྱབ། ཁམས་པ་ཚང་མ་ཨ་མདོ་བ་ཚོར་དགྲ་ལྟར་འདུ་ཤེས་བཟོ་བའི་མགོ་ཁྲིད། ད་འདིར་ཡོང་ནས་སྤྱང་ཀིས་བོང་ལྤགས་མགྱོན་དགོས་དོན་ཅི།
ཅིའི་ཕྱིར་ངེད་ཚོ་བོད་པའི་ཆིག་སྒྲིལ་ལ་དུག་སྦྱར་བཞིན་ཡོད། ཁྱོད་སྤྱི་འཐུས་ནང་ང་ཚོའི་རྒྱལ་བ་རིན་པོ་ཆེའི་དབུ་ལ་རྒྱོབ་པའི་བྱ་བ་དེ་ངེད་ཚོས་བརྗེད་པ་རེད་སྙམ་མམ།