ཁེར་རྐྱང་གི་སེམས་གཏམ། གཅན་ཡུ་མོ།

 ཡིད་སེམས་སྐྱིད་པོ་ཞིག་དང་མཉམ་དུ་ཁེར་རྐྱང་གི་མལ་ས་ནས་བརྩེ་དུང་གི་སྙན་ངག་རེ་འབྲི་རྒྱུའི་སྟ་གོན་བྱེད་སྐབས། ཁ་པར་གྱི་སིལ་སྒྲ་བསྟུན་མར་གྲགས་སོང་། “ཝེ། བདེ་མོ།”ཉམས་འགྱུར་གྱི་ཚིག་རྐང་ལས་ཧ་ལམ་ལྐོག་གྱུར་གྱི་གསང་བའི་ལས་ཀ་ཞིག་ལ་རེ་བཞིན་པ་ཚོར་ཐུབ། “ཨོད། བདེ་མོ།”ཐུག་འཕྲད་རེར་བཅོས་འཛུམ་ཙམ་ཡང་བསྟན་མ་མྱོང་བའི་རྐང་ལམ་ཁྲོད། སྐུད་ལམ་བརྒྱུད་མྱོང་བ་ཟབ་མོ་ཡོད་པའི་ཚོར་སྣང་ཞིག་སྐྱེས་པ་མ་ཟད། ཁོང་གིས་སྐད་ཆ་ལ་ཇི་ལྟར་འཇབ་རྒོལ་བྱེད་དགོས་པའང་མངོན་སུམ་དུ་ཤེས་མ་སོང་། “ཁྱོས་ཅི་ཞིག་བྱེད་ཀི་ཡོད། ངས་ཁྱེད་ཀྱི་སྙན་ངག་ལ་སྒུག་བཞིན་ཁྱེད་ལ་བསམ་བློ་བརྗེ་རེས་བྱ་འདོད་བྱུང་སོང་། ཁ་པར་བཏང་ན་སུན་སྣང་སྐྱེས་སམ།” ལོས་ཡིན། ཁྱོད་མེད་ན་དེ་རིང་དང་མ་འོངས་པ་མི་མཐོང་བའི་ངེས་པ་མེད་ལ། ཚིག་སྙན་མོ་མེད་ན་དེ་རིང་གི་སྙན་ངག་དང་སང་ཉིན་གྱི་གར་སྟེགས་མི་འཚོལ་བའི་ངེས་པ་དེ་བས་ཀྱང་མེད་མོད། གང་ལྟར་ཁ་ཕྱོགས་ངེས་མེད་ཀྱི་སྐད་ཆ་དེས་རླུང་གིས་སྒུལ་བའི་ལོ་མ་ལྟར་ངའི་སེམས་ཀྱང་ཅུང་གཡོ་སོང་། འོན་ཀྱང་རྟོགས་ཐུབ་པ་ནི་རྒྱབ་ལོགས་སུ་འཁྱག་ཤུར་ཤུར་གྱི་མིག་ཟུང་དེའི་རྣམ་འགྱུར་དང་སྟབས་མི་ལེགས་པའི་བར་ཆད་ཀྱི་ཚིག་རྐང་འགའ་གྲལ་བསྟར་བསྒྲིགས་ཡོད་པ་ཤེས་ཐུབ།

 “དེ་ནས་ཤོད་དང་། བུད་མེད་ཅིག་འདི་ལྟར་སྙན་ངག་ལ་འཇུས་པ་ཧ་ལས་པའི་ཡག་པོ་རེད། ལྷག་པར་དུ་བཙན་བྱོལ་བ་དང་བོད་པའི་བུད་མེད་ནང་དེ་བས་ཧང་སངས་དགོས་པ་རེད་ལ། ཁྱེད་ཀྱི་སྙན་ངག་རེ་རེས་ངའི་སེམས་པ་སྒུལ་སོང་། དེ་བས་ངས་འདིར་ཁྱེད་དང་་་་་་་་་་་་་་་་་་་་་་་་་་་།” ང་ཉལ་མཚམས་བཞག་ནས་ཀྲོང་ངེར་ལངས་ཏེ་ལན་ཅི་ཡང་རྒྱག་རྒྱུ་མེད་པར་རེ་ཞིག་ལྷག་སོང་། ལྷིང་འཇགས་ཀྱི་ཉམས་དང་མགོ་བོ་སྨད་དགོས་པའི་དུས་ཤིག་སླེབས་མེད་པར་རང་ཉིད་སྲོག་ཐར་དུ་གཏོང་འདོད་མིན་རང་ཉིད་ལ་རག་ལས་པས་ན།ཕ་རོལ་བས་ཕལ་ཆེར་ངའི་ཉམས་ཚོར་རྟོགས་པར་ངེས་ལ། གློ་བུར་དུ་འཇབ་རྒོལ་ཇི་ལྟར་བྱས་ཏེ་ཁ་གཏད་བཅག་ན་ད་གཟོད་ཉམས་ཚོད་ལོན་པའི་འདུ་ཤེས་གཅོད་ཐུབ་བམ། “ཨོད་རེད། ང་ནི་གཞི་ནས་ཀ་ཁ་སུམ་ཅུ་ཁུར་ཏེ་སེམས་ཚོར་འབྲི་བཞིན་པའི་ཡུ་མོ་ཁེར་འགྲོ་ཞིག་ཡིན་ལ། དེ་ལྟ་བུས་སྤྱི་ཚོགས་ལ་ཕན་ཐོགས་མི་ཐུབ་པའི་མ་ཚད་རིག་གཞུང་ལའང་རྐང་ཟུག་པའི་བྱས་རྗེས་ཤིག་འཇོག་མི་ཐུབ། ང་དེང་གི་གར་སྟེགས་འདིའི་ཐོག་སེམས་ཁོང་གི་སྐྱོ་སྣང་འགོད་ཐུབ་པའི་བཀའ་དྲིན་ནི་ངའི་དགའ་རོགས་ཀྱིས་བསྩལ་བ་ཡིན་པས། ངས་ཕལ་ཆེར་ཁོང་ལ་ཐུགས་རྗེ་ཆེ་ཞུ་ན་འགྲིག” ཅེས་མིག་ཟུང་གིས་མི་མཐོང་བའི་སྐུད་ལམ་ཁྲོད་ཀྱི་མི་བུ་དེར་གསལ་བཤད་བྱས། ང་རང་སྤྱི་དོན་དུ་འགྲོ་རྒྱུགས་བྱས་མྱོང་མེད་ཀྱང་ཁེར་རྐྱང་དང་སུན་སྣང་གི་བུ་ལོན་དེ་དག་གི་ཆེད་དུ་སྨྱུ་གུ་དང་འགྲོགས་ཏེ་གང་སར་ཕྱིན་མྱོང་བས། སེམས་པའི་འགལ་འདུའི་ཛ་དྲག་གི་གནས་སྐབས་འདིར། ཚོར་བ་དམིགས་བསལ་བ་ཞིག་གིས་སྙིང་གི་འཕར་སྒྲ་དང་སེམས་ཀྱི་རླབས་སྒྲ་འཇགས་མི་ཐུབ་རྐྱེན། རེ་ཞིག་ཁ་བཙུམ་ནས་སྡོད་རྒྱུ་ལས་ཐབས་མེད།

རོལ་དབྱངས་ཀྱི་རང་སེམས་གསོ་འདོད་པའི་མཚན་མོ་འདིར། རི་རབ་འདྲ་བའི་སེམས་ཁོང་གི་ན་ཟུག་དེས་ཡང་བསྐྱར་བསྔོགས་བྱུང་བས། ཁྲེལ་གཞུང་དང་བསམ་གཞིགས་མེད་པའི་མི་དེས་ཡང་བསྐྱར” ཁྱེད་ཀྱི་འདས་ཟིན་པའི་འཚོ་བའི་སྐོར་འགྲེལ་བཤད་རྒྱབ་ན་ཅི་འདྲ་འདུག་་་་་་་་་་་་་” རེད་ཡ། ངའི་ཕམ་ཁའི་སེམས་ཚོར་ནི་སྐད་ཅིག་ཙམ་ལའང་སེམས་ཁོང་དང་བྲལ་མྱོང་མེད་པའི་འཇིགས་སྣང་གི་འཚོ་བའི་ཁྲོད་དུ། བདེ་སྐྱིད་ཀྱི་འཛུམ་མདངས་དེར་རེ་སྒུག་ཡང་ཡང་བྱས་པ་མ་གཏོགས་རྒྱུས་ལོན་དང་བསམ་བློ་བརྗེ་རེས་ཀྱི་ཚིག་རྐང་ཞིག་གིས་རྨ་ཐོག་ལ་གྲི་གཙགས་བྱ་དགོས་བའི་རེ་འདུན་ཡེ་ནས་རྒྱབ་མེད་རྐྱེན། ངས་ཕྱིར”ངས་འདས་ཟིན་པའི་འཚོ་བ་རང་ཉིད་ལའང་མི་དབང་བས་ཁྱེད་ལ་ལན་རྒྱག་དགོས་དོན་མི་འདུག དུས་ལ་མི་མཁོ་བའི་དྲི་བ་མ་འདོན་རོགས།”ཞེས་ཐེ་ཚོམ་མེད་པར་བདེ་སྡུག་མི་རྟོགས་ཤིང་འཚོ་ངོས་མི་ཟིན་པའི་འདྲི་པ་པོ་དེར་དེ་ལྟར་བཤད། གང་ལྟར། ཁ་ཕྱོགས་ངེས་མེད་ཀྱིས་དོན་མེད་མི་ལ་རྩད་གཅོད་བྱེད་པ་ནི་མྱོང་བ་ཟབ་མོ་མེད་ཀྱང་གཞན་ཚོར་ལ་འགན་མ་ཁུར་བའི་རྐྱེན་ཡིན་པར་འདོད་པ་བཞིན། མི་ཞིག་ཁོར་ཡུག་ཅིག་ཏུ་གྲག་འགུལ་ཕྲན་བུ་བྱུང་ཚེ་དེའི་རྒྱབ་ལྗོངས་སུ་ལོ་རྒྱུས་འཇོག་པ་དང་མི་གཞི་ལ་བརྩི་སྲུང་མི་བྱེད་པ་ནི་ང་ཚོའི་སྤྱི་ཚོགས་སུ་ཡོད་པའི་གནད་དོན་ཆེ་ཤོས་ཤིག་ཡིན་པར་འདོད།

སྒྲོ་འདོགས་དང་ཀུ་རེའི་གནས་ཚུལ་གང་ཡིན་ཡང་ཁོང་གིས་དོན་དངོས་ཀྱི་དམར་གསོད་དང་བར་ཐག་ཤིན་ཏུ་ཉེ་བའི་དོ་ནུབ། ང་ལ་སྔོན་བརྡ་ཞིག་ཚོར་བ་ནི་གུར་ཁང་ཞིག་ཏུ་སྐད་གདངས་འཇམ་པོས་ལོ་རྒྱུས་ བསྔོགས་པ་དེ་ཡིན་པས། ང་ཧ་ཅང་འཇིགས་སྐྲག་སྐྱེས་པ་ནི་སྐད་ཆ་རེ་རེ་མིད་པ་བརྒྱུད་དེ་ཕོ་བའི་ནང་མི་འཇུ་པ་དེ་རེད། སྐབས་དེར། ཁྱད་རྟགས་ངོ་མཚར་བ་ཞིག་ཡོད་པ་ནི་ངའི་དྲི་ལན་གང་ལའང་ཁོས་དགག་ལན་མེད་ པར་དེ་ལས་ལྡོག་སྟེ་དགོད་སྒྲ་དང་ཡ་ལན་དེ་ཡིས་རང་གཤིས་རྫུན་མ་ཞིག་གི་ཀུན་སློང་ཡོད་པ་བརྡར་ཤ་གཅོད་ཐུབ་པ་དེ་ཡིན་སོང་། ཤ་གཟན་འགར་དོགས་ཟོན་བྱ་དགོས་ས་མང་པོ་ཞིག་ཡོད་པས། དངོས་ཡོད་འཚོ་བའི་ཉམས་མྱོང་ལས་སུན་སྣང་གི་ཚིག་འདི་ཁ་ཐུག་བརྗོད་དགོས་དོན་མི་འདུག་མོད། ཁོར་ཡུག་ཆུང་ཆུང་འདིར་དཀྲོགས་གཏམ་བཟོ་རྒྱུ་ཧ་ཅང་དགའ་བ་རང་གཤིས་སུ་གྲུང་ཡོད་པས། ངས་ཀྱང་དོགས་ཟོན་མཐོར་འདེགས་མི་གཏོང་ཐབས་མེད་དུ་ཆགས། བརྩེ་དུང་ཞིག་གི་ཆེད་དུ་འཆི་ཁར་ཀྱང་ད་དུང་ལངས་འདོད་ཡོད་པ་བཞིན་ངས་རང་དབང་གི་ཁ་ཕྱོགས་ཤིག་གདམ་ཆོག་ལ། བདེ་ཞིང་སྐྱིད་པའི་འཚོ་བ་ཞིག་ཀྱང་འཚོལ་ཆོག་པས་ཉམས་ཚོད་ལེན་འདོད་ཀྱི་གང་ཟག་དེར་བསླུ་བྲིད་གཏོང་མི་འདོད། དེ་ནས་བཟུང་ཁ་པར་གྱི་སིལ་སྒྲ་ཡོད་ཚད་རླུང་འཚུབ་ཀྱི་ཁྲོད་དུ་ལྷུང་བ་བཞིན་བག་ལྷོད་ལྷོད་ཀྱི་གོམས་གཤིས་དེ་རྩ་བ་ནས་བསྒྱུར་སོང་།

_________________________________________________________

གར་སྟེགས་འདི་རྡོག་སྒྲས་སྐྱོང་འདོད་ལ
མྱོང་ཚོར་འདི་སྨྱུ་གུས་འཁྲིད་འདོད་པས
བརྩེ་དུང་ལ་བརྩི་འཇོག་མེད་ན་ང་ལ་ཀུ་རེ་མ་བྱེད
གདོང་འབག་རེ་གོན་ཏེ་ལྐོག་གྱུར་གྱི་སྐད་གདངས་ཤིག་ལས
ཡུ་མོའི་ཚོར་བར་ཧབ་ཆ་རྒྱག་དགོས་དོན་མེད་ལ
གུ་ཡངས་གཏོང་དགོས་བསམ་པའི་འདུ་ཤེས་ཀྱང་འཛིན་མི་དགོས
དེ་བས ངས་དུས་རབས་འདིའི་རླབས་རྩེ་ནས
ཞེ་སྐྱོ་བའི་དངན་པ་རེ་འཐེན་མྱོང་ལ
ཚིག་ངར་མའི་དམ་བཅའ་འང་བཞག་མྱོང་བས
ཁྱོད་སྔར་བཞིན  ཁྱེད་ཀྱི་གོམ་སྟབས་ཁྱེར་ཏེ་བསྐྱོད་ཆོག་ལ
ང་ད་དུང་ཡང་སྒྱུ་རྩལ་གྱི་བུ་ཆུང་འཁྲིད་ཏེ་བཞུད་ཆོག
དེ་རིང་དང་མ་འོངས་པ  མི་ཡུལ་ཞིག་གི་གཏམ་རྒྱུད་དུ་ཆགས་པ་ལས
ཁྱེད་དང་ང་ལ་དབང་བའི་གསང་འཕྲིན་དེ་མ་ཡིན
དེ་བས མི་ཚེ་འདིར
ཇི་སྲིད་བར་བདེ་མོ

2012.11.19    གཅན་ཡུ་མོ།