སྤྱི་ཟླ་བཞི་བའི་ཚེས་བཞི་སྟེ་གཟའ་ཉི་མའི་ཉིན་གྱི་སྔ་དྲོར་ང་རང་མལ་དུ་ཉལ་མ་ལངས་ཀྱི་ངང་སྡོད་པའི་སྐབས་ཤིག་ལ། གྲོགས་པོ་ཞིག་གིས་ཁ་པར་ནང་ཁོ་ཚེ་ཚུལ་ཁྲིམས་སླེབས་འདུག་པ་མ་ཟད། ད་ལྟ་ཐེག་ཆེན་གཙུག་ལག་ཁང་དུ་འགྲོ་ཡི་འདུག་ཅེས་བཤད་བྱུང༌། ང་ཧང་སངས་པའི་ངང་མྱུར་དུ་གདོང་དང་སོ་བཀྲུས་ནས་སྦག་སྦག་ལ་ཞོན་ཏེ་བལྟ་རུ་སོང༌། གཙུག་ལག་ཁང་གི་ར་སྐོར་ན་མཐོང་རྒྱུ་མི་འདུག ཉིན་དེར་ྋགོང་ས་མཆོག་དབུ་བཞུགས་ཀྱིས་ཆོས་ལུགས་ཀྱི་ཚོགས་འདུ་ཞིག་འཚོགས་ཀྱིན་འདུག་ལ། གཙུག་ལག་ཁང་དུ་མི་ཚོགས་ཀྱིས་འཚང་ཁ་བྱེད་ཀྱིན་འདུག དེའི་བར་ནས་ང་ཕོ་བྲང་སྒོ་དྲུང་དུ་བཅར་ཏེ་ཅུང་སྒུག་པ་ན། གོས་ཆེན་གྱི་སོག་ལྭ་ཞིག་གྱོན་ཞིང་པཎ་ཞྭ་སྣེ་རིང་ཞིག་གོན་ནས་ཅི་འདྲའི་བླ་ཆེན་ཞིག་མིན་ནམ་སྙམ་པའི་སོག་པོ་ཞིག་སྐུ་སྲུང་འགས་སྐོར་ནས་ཡོང་གི་འདུག ངས་ཞིབ་བལྟ་ཞིག་བྱས་པས་རྦད་དེ་བློ་ཡུལ་ལས་འདས་པའི་རྒྱལ་འཚོང་བ་ཁོ་ཚེ་ཚུལ་ཁྲིམས་ཟེར་བ་དེ་རེད་འདུག ང་མདུན་ཕྱོགས་སུ་བཅར་བ་ན་སྐུ་སྲུང་རྣམས་ཀྱིས་ཁོ་དང་ཁོའི་ཆུང་མ་ཡིན་ནམ་སོག་མོ་ཞིག་དང་སོག་རྒན་ཞིག་བཅས་གཙུག་ལག་ཁང་གི་ཕྱི་ལོགས་ལ་ཕུད་ཀྱིན་འདུག ཅུང་ཙམ་མིན་ན་བོད་གཞུང་བདེ་སྲུང་དང་བཅས་པས་མ་ཤེས་པར་མཇལ་ཁར་བཅར་འདུག་ལ། མཇལ་ཁར་བང་བསྒྲིགས་པའི་སྐབས་སུ་ཧ་གོ་ནས་ཕྱིར་ཕུད་བཏང་འདུག ཁག་ག་ལ་ཡོད་དེ། ཁོས་སོག་པོ་ལ་བརྫུས་ཤིང་མིང་ཡང་རྦད་དེ་བརྗེས་པོ་བརྒྱབ་ནས་སླེབས་འདུག དེའི་རྗེས་སུ་ཞིབ་འཇུག་གནང་གསལ་ལ་ཁོའི་རྗེས་ཀྱི་སོག་རྒན་དེ་ན་ནིང་ཨོ་ལིམ་ཕིག་གི་དཔལ་འབར་འཁྱེར་མཁན་གྱི་དམག་མི་ཞིག་ཡིན་པ་ངོས་ཟིན་འདུག་པ་མ་ཟད། སོག་མོ་དེ་ཡང་དོལ་རྒྱལ་དང་འབྲེལ་བ་ཡོད་མཁན་ཞིག་ཡིན་པ་ར་འཕྲོད་འདུག དེ་ནས་ཁལ་ཁ་རིན་པོ་ཆེར་མཇལ་བར་སོང་འདུག་མོད། རིན་པོ་ཆེའི་རྣམ་མཁྱེན་གྱིས་རྟོགས་པ་ཡིན་ནམ། གང་ལྟར་ཁྱོད་ཚོ་དོལ་རྒྱལ་བསྟེན་མཁན་དེ་འདྲ་མིན་པ་ཞེས་བཀའ་འདྲི་གནང་འདུག ཡར་མཆོད་རྟེན་ཞིག་ཕུལ་འདུག་པ་ཁོ་ཚོ་སོང་མ་ཐག་མཆོད་རྟེན་དེ་ག་རང་ནས་འདུག་པ་གསལ་བོ་ཡིན། དེ་ནས་ཁོ་ཚོར་ཕྱོགས་མང་བོ་ནས་དོགས་ཞིབ་བྱེད་ཀྱིན་པ་ཚོར་ནས་གློ་བུར་དུ་སྒེར་གྱི་རླངས་འཁོར་ཞིག་གླས་ནས་ཚེས་བཞིའི་དགོང་དྲོ་རང་ལ་ལྡི་ལིར་བྲོས་འདུག རྗེས་སུ་ཁོ་རྡ་སར་ཡོང་དོན་སྐོར་ལ་རྩད་ཞིབ་བྱེད་སྐབས། ཁོ་ཐོག་མར་ཡོང་དུས་ནས་མིང་ལ་འཇམ་དཔལ་དགྱེས་པའི་བློ་གྲོས་དང་སོག་པོའི་མཁན་པོ་ཞིག་ཡིན་པའི་སྒྲུང་ཞིག་བཟོས་འདུག་ལ། གསང་བ་དེ་རྐུབ་མི་བརྡོལ་བ་ག་ལ་སྲིད་དེ། རྡ་སར་སླེབས་པའི་སྔ་དྲོ་ནས་ས་ཁྱབ་རྡོ་ཁྱབ་ཏུ་གྱུར་བས་ཁོ་ལ་བྱ་སྤྱོད་གང་ཡང་སྤེལ་བའི་གོ་སྐབས་མ་རེག་པ་རེད། དེའི་སྟབས་ཀྱིས་ང་ཚོས་མཐའ་གཅིག་ཏུ་འདི་རེད་ཅེས་བརྗོད་མི་ཐུབ་ནའང༌། ཁོ་རང་རྒྱལ་འཚོང་བ་ཞིག་དང་ཡང་ན་གངས་ཅན་བླ་བའི་ཨབ་ཕྲུག་ཅིག་ཡིན་པ་ལ་དོགས་པ་སྤུ་རྩེ་ཙམ་ཡང་མེད་པ་ཡིན་ནོ།།ཁོའི་ཞིབ་ཕྲའི་ལོ་རྒྱུས་གླེང་མི་དགོས་པར་ཚང་མས་ཤེས་ངེས་ཡིན་ལ། གལ་སྲིད་འདི་ནས་བརྗོད་དགོས་ཚེ་རྟ་དྲེལ་གྱི་ཁལ་ལས་འགོངས་པར་འགྱུར་བས་ངལ་བ་མི་བསྟེན་པར་བྱའོ།། ལྡི་ལི་ནས་རྡོ་རྗེ་གདན་སོགས་མཇལ་སྐོར་དུ་སོང་འདུག་ལ། ད་ལྟའང་རྒྱ་གར་ནང་ལོགས་ན་འཁོར་གྱིན་ཡོད། མི་ཚང་མས་ཁོ་ལས་དོན་ཞིག་གི་ཆེད་དུ་ཡོང་བ་ཞིག་ཡིན་པ་ཚོད་དཔག་བྱེད་ཀྱིན་འདུག་པ་ལས། འདི་རེད་ཅེས་གསལ་ཁ་གང་ཡང་ཐོན་མི་འདུག
ལྷ་ཆབ་སྦྱིན་པའི་དྲ་ངོས་སུ་ཡོད་པ་ཞིག་གྲོགས་པོ་ཞིག་གིས་ང་ལ་བསྐུར་འདུག་པ་དམར་བཤུས་བྱས་ནས་འདིར་བཤམས་པ་ཡིན།