ཁྱི་ཅིའི་ཕྱིར་བསྙོར་རམ།

ཏཱ་ནི་ཆོས་གྲགས།

༼༡༽ལོ་འགའི་གོང་ནས་བཟུང་སྐད་འཕྲིན་ནི་འཚོ་བའི་ཁྲོད་ལྗོངས་རྒྱུའི་གནས་ཤིག་ཏུ་གྱུར་པས་ཉི་མ་རེ་རེར་ཨ་མྱེས་རྨ་ཆེན་འཕྲིན་སྟེགས་དང་ཁ་གྱའི་ཁྱུང་སྔོན་འཕྲིན་སྟེགས། བཙན་པོའི་དྲ་བ་བཅས་ལ་མིག་བཤེར་ཙམ་རེ་དུས་ངེས་མེད་དུ་བྱ་དགོས་པའི་གོམས་སྲོལ་ལྟ་བུ་ཆགས་འདུག་རྐྱེན་དེ་རིང་ཡང་ཁྱུང་སྔོན་འཕྲིན་སྟེགས་སུ་ཁྱི་དང་མི་ཞེས་པའི་རྩོམ་ཞིག་བཀླགས་པ་ཡིན་ལ་དེར་རྐྱེན་བྱས་ཏེ་དུས་རྒྱུན་འཇིག་ཉེན་གྱི་དྲན་འཆར་ཡལ་བ་མེད་པ་ཞིག་བདོག་པ་དེ་ཅི་ནུས་ཀྱིས་ཚིག་ཉུང་ངུར་བརྟེན་ཏེ་བརྗོད་འདོད་བྱུང་།

༼༢༽སྤྱིར་ན་བོད་པ་རྣམས་ཀྱིས་སྔོན་ཆད་ཁྱི་གསོས་པ་ནི་སོ་སོའི་དགོས་མཁོའི་ཆེད་ལས་ཁྱིས་རང་ཁ་གསོ་ཐུབ་ཀྱིན་མི་འདུག་སྙམ་སྟེ་གསོས་ཡོད་མེད་ཅི་ཆ། དེང་སང་ཁྱིའི་དགོས་མཁོ་མེད་ཕྱིར་རང་དགར་ཁྱི་གསོ་མཁན་མེད་སོང་བ་དང་གང་སར་ཁྱི་ལྡོམ་མང་བའང་སྔོན་ཆད་ཁོ་ཚོས་གསོས་པའི་ཁྱི་རྣམས་ཁྱི་ལྡོམ་དུ་ཕུད་པ་ཉུང་རྒྱུ་རེད། ཁྱི་རྣམས་རང་བྱུང་གིས་སྐྱེ་འཕེལ་བྱས་པ་མི་ཉུང་བས་ཁྱི་ལྡོམ་ལོས་ཀྱང་མང་། དེ་ལ་བདག་པོ་མེད་ཚེ་ལྟོ་བ་འགྲངས་པ་དང་ལྟོགས་པ་ཅི་རིགས་ཡོད་རྒྱུ་རེད་དེ། དེ་ནི་སྒོ་ཁྱི་མ་བྱས་ཕྱིན་རི་སྐྱེས་སྲོག་ཆགས་གཞན་དང་གཅིག་པར་གྱུར་པ་རེད། བོད་པ་རྣམས་ལ་སྙིང་རྗེ་ཇི་འདྲ་ལྡན་ནའང་ས་སྒང་འདིའི་སྟེང་གི་རང་ལ་དགོས་མཁོ་ཡོད་མེད་ཀྱི་སྲོག་ཆགས་ཐམས་ཅད་བསྙོར་དགོས་ཚེ་དེའང་དཀའ་ལས་ལྷག་མ་ཞིག་ཅི་ལ་མིན་དྲན་བྱུང་བ་དང་དགོས་མཁོ་ཞེས་པ་དེའང་རྐུན་འགོག་གཅིག་པུ་མ་ཡིན་པར་སྣང་བ་སྐྱིད་བྱེད་དམ་གྲོགས་པོའི་ཚབ་ཏུ་གསོས་ནའང་དགོས་མཁོ་རེད་མོད་བོད་པ་ཚོ་ད་དུང་ཁྱི་འདུག་རོགས་བྱ་དགོས་པའི་ཚད་དུ་བསླེབས་ཨེ་ཡོད་དམ་དྲན་བྱུང་།

༼༣༽གནའ་སྔ་མོ་ཞིག་ནས་ང་ཚོས་དགོས་མཁོ་བསྐང་ཐུབ་མིན་ལ་མ་ལྟོས་པར་ངན་པའི་དཔེ་ལ་ཁྱི་འཇོག་པའི་སྲོལ་ལྟ་བུ་ཞིག་ད་ལྟའི་བར་དུ་ཡོད་ཅིང་སྨོད་པ་དང་འཕྱ་བ་སྡིགས་པ། ཐ་ན་བསྟོད་པ་བྱེད་ཚེ་ཡང་མི་ཞིག་ཡོད་ན་ཁྱིའི་གོང་མ་ཟེར་དཔེ་བ་འདིས་རང་གི་འདུ་ཤེས་ལ་མི་ཁྱི་གཉིས་བསྡུར་ཚད་ཇི་འདྲ་བ་གསལ་བོར་བཤད་ཡོད་ནའང་། ཁྱི་ལ་དེ་འདྲའི་ལྟ་ཚུལ་འཛིན་དགོས་པའི་དམིགས་བསལ་ངན་གཤིས་གང་ཡོད་རང་ངོས་ནས་གསལ་ཁ་མི་འཁྲོལ་མོད།ཕལ་ཆེར་ཁྱི་ལ་གཙང་བཙོག་དང་ངོ་ཚའི་འདུ་ཤེས་མེད་པའི་ཆ་ནས་ཁྱི་ལ་བཙོག་པའམ་ངན་པར་བལྟས་ཤིང་ཁྱི་ནི་མིས་མི་ལ་སྡིགས་བྱེད་ཀྱི་ལག་ཆ་ཞིག་ཏུའང་གྱུར་སོང་བ་མིན་འགྲོ་སྙམ་པ་བྱུང་།

༼༤༽དེ་ལྟ་ནའང་ང་ཚོ་བོད་འདིས་སྒོ་ཁྱིར་མཐོང་ཆུང་གིས་མི་གཅེས་པ་རེད་དམ་ཞེ་ན་དེ་འདྲ་ནི་གཏན་ནས་མ་ཡིན་ཏེ་སྒོ་ཁྱི་ལ་དབྱར་བསིལ་ཁང་དང་དགུན་དྲོ་ཁང་དབུབ་པ། སྒོ་ཁྱི་ལ་ལོ་སྐལ་ཚུན་ཆད་བཅའ་བ་དང་སྒོ་ཁྱི་ཤི་ཚེ་དགེ་སྒྲུབ་བྱེད་པ་དང་སྒོ་ཁྱི་ཤི་བའི་རོ་ཡང་རི་སྒང་མཐོ་ས་དང་ས་གཙང་སར་བསྐྱལ་བའི་སྲོལ་འདུག     ཡིན་ནའང་སྐབས་འདིར་བཤད་འདོད་པ་དེ་ང་ཚོ་བོད་པས་སྒོ་ཁྱིར་གཅེས་སྲོལ་གཅེས་རབས་དེ་མ་ཡིན་པར་དུས་ཀྱི་འགྱུར་འགྲོས་དང་མཉམ་པོར་མི་ལ་ལྟོས་པས་ཁྱི་ནི་མི་རྣམས་ལ་མེད་ཐབས་མེད་པའི་སེམས་ཀྱི་ཁེན་ས་ཞིག་ཏུ་གྱུར་དང་འགྱུར་གྱིན་ཡོད་པའི་སྣང་ཚུལ་ཐབས་སྐྱོ་བོ་ཞིག་མཆིས་པ་འདི་ཡིན།

༼༥༽དེང་གི་མི་རྣམས་ལས་དམིགས་བསལ་གྲོང་ཁྱེར་དུ་འཚོ་སྡོད་བྱེད་མཁན་ཚོས་མི་ལས་ཁྱི་ལ་བདག་དོམ་བྱེད་པ་འདི་མཐའ་གཅིག་ཏུ་སྙིང་རྗེ་དང་བརྩེ་སེམས་ལྡན་པས་རེད་ཅེ་ན་ཇི་བཞིན་ཁས་ལེན་དཀའ་བའི་གནད་འགག་ཅིག་ལྷགས་ཡོང་གིན་འདུག་དྲན་སོང་། དེ་ཡང་། རྒྱ་ནང་གི་གྲོང་ཁྱེར་གང་དུའང་རྒྱ་མི་ཕལ་མོ་ཆེས་རང་མགོ་ཐོན་མཚམས་ནས་ཕ་མ་དང་ལྷན་དུ་སྡོད་འདོད་མི་བྱེད་པ་དེ་ནི་ད་ལྟ་འཚོ་བའི་གོམས་སྲོལ་རྒྱུན་ལྡན་ལྟ་བུ་ཞིག་ཏུ་གྱུར་ཚར་འདུག་ལ། མ་བུ་སོ་སོར་འཚོ་ཐབས་བྱ་རྒྱུ་དེ་འཚོ་བའི་ཆ་རྐྱེན་ལྡན་མིན་སོགས་གང་ལའང་མི་ལྟོས་པར་ཕ་མ་ལོ་རྒན་དྲུག་ཅུ་བདུན་ཅུར་སོན་ནའང་ཕྱོགས་ངེས་མེད་དུ་གཡོག་ལས་བྱས་ཏེ་གླ་དངུལ་ཕྲན་བུས་རང་ཁ་གསོ་ཐབས་བྱ་དགོས་རུང་དེ་ལྟར་འཚོ་བ་རོལ་དགོས་པ་དང་དུས་དང་དུས་སུ་བུ་ཕྲུག་གིས་ཕ་མར་བསྐོར་རྒྱག་པ་དང་ཁ་པར་ལས་འབྲེལ་གཏུག་བྱེད་པའང་ཤིན་ཏུ་རབ་ཏུ་ཉུང་བ་མིག་མཐོང་ལག་ཟིན་རེད།

༼༦༽ཕ་མ་དང་ཁ་ཐག་རིང་བར་སྡོད་འདོད་ཅན་དེ་ཚོའི་ཁྲོད་དུ་ཕྱུག་བདག་ཡོད་ལ་འབྱོར་འབྲིང་དང་འབྱོར་མེད་ཀྱང་ཡོད། རྒྱུ་འབྱོར་དབུལ་ཕྱུག་གི་ཁྱད་པར་གནམ་ས་ཡོད་ནའང་ཐམས་ཅད་ལ་མཐུན་ཆ་ཞིག་ཡོད་པ་དེ་ཕ་མ་མི་མཁོ་བ་ལས་ཁྱི་ཞིག་ངེས་པར་བསྙོར་ཡོད་པ་དེ་རེད། གནའ་མི་བོད་ཀྱི་གཏམ་དུ། མི་རྡུགས་ཐུག་སྟེ་ཁྱི་ལ་ཕྱག་འཚལ། ཟེར་བ་ལྟར། རྒྱ་མི་གཙོས་གྲོང་ཁྱེར་བ་ཚོ་མི་རེས་ཁྱི་རེ་འཁྲིད་པ་ལ་ནང་དོན་མི་གཅིག་པ་མང་ཚུལ་མི་རེར་གནས་ལུགས་རེ་བགྲང་རྒྱུ་ཡོད་ཆོག་ནའང་ཁྱོད་ཀྱིས་ཉལ་ན་ལངས་ན་ཁྱི་ཁོ་ནར་སེམས་གཏམ་བཤད་ཁུལ་གྱིས་མི་ཚེར་ཕུད་རྒྱག་བྱེད་པ་འདི་མཐོང་ཐེངས་རེར་རིན་ཐང་བྲལ་བའི་མིའི་འཚོ་བའི་དྭངས་ཆ་ཞིག་རྩ་བརླགས་བྱས་ཟིན་པའི་མཇུག་འབྲས་ཡ་ང་བ་ཞིག་གློག་བརྙན་བཞིན་འཆར་འོང་བའི་སྣང་བ་བཅོས་མིན་ཞིག་མི་སྐྱེས་རང་དབང་ཅི།

༼༧༽རྒྱའི་ཤན་ཤུགས་ཐེབས་པར་བཤད་ནའང་ཆོག་ལ་སྤྱིར་གྲོང་ཁྱེར་བའི་འཚོ་སྟངས་ཤིག་ཏུ་སྨྲ་ཡང་རུང་སྟེ།   བཤད་སྟངས་བསྒྱུར་པ་ཙམ་པོས་ནང་དོན་ལ་འགྱུར་བ་ག་ལ་ཐེབས།  རྒྱ་མི་རྣམས་ལ་རུ་ཁ་ཁྱིམ་མཚེས་དང་བཟང་ས་རྒྱན་ས་ཞེས་པའི་ཁ་ཁོག་ཕྱི་ནང་བསྲེ་ས་ཞིག་མེད་ལ། ཕ་མ་དང་བུ་ཕྲུག་མཉམ་འཛོམས་ཀྱི་སྤྲོ་དགའ་ལོངས་སྤྱོད་ཅེས་པ་མིང་གི་ལྷག་མ་ཙམ་ཡང་མེད། རང་མགོ་མི་ཐོན་པའི་བྱིས་པ་ཚོ་ཁྱི་གུ་དང་ལྷན་དུ་གཅེས་གཅེས་བྱེད་ནའང་། དེར་ཡང་སྨྱུག་སླེའི་ནང་གི་བྱི་འུ་དང་ཁྱི་གུ་ཞིག་ལས་རྩེད་རོགས་ཟེར་བ་ཞིག་མེད་ལ་ཡོད་ཀྱང་ཕན་ཚུན་བརྩེ་འདང་ཆགས་ཏེ་བློ་འཁེལ་ཆོག་པའི་འདུ་ཤེས་དེ་བརླགས་ཚར་ཡོད། ཁྱིས་ཁོ་ཚོའི་ཅི་ཞིག་གཞན་པར་མི་བཤད་ལ་གཞན་གྱི་ཅི་ཞིག་ཚུར་ཡང་མི་བཤད། བསམ་པ་རྩེ་གཅིག་གིས་ཁོ་ཚོའི་རྗེས་སྙེགས་མཁན་གྱི་སེམས་ཅན་གཅིག་བགྲང་ཆོག་པ་དེ་ཁྱི་རང་རེད་ཅེ་ནའང་སྐད་ཆ་ཐལ་ཆེ་འགྲོ་རྒྱུ་མི་འདུག་སྙམ།

༼༨༽དེང་དུས་རྒྱ་མི་རྣམས་རང་གི་སྨྱོ་ཧམ་དང་གཡོ་སྒྱུ་ཁྲམ་གསུམ་གྱིས་རྣམ་པ་སྤྱི་ཚོགས་ཅན་ནས་མདོ་དོན་ཁེར་རྐྱང་དུ་འདེད་ཅིང་ཉིན་མཚན་དབྱེར་མེད་དུ་གང་སར་མི་ཚོགས་འཚང་ག་ཤིག་ཤིག་བཞུར་ནའང་བཙལ་འཚོལ་འགྲན་བསྡུར་གྱི་འཚོ་བའི་གནོན་ཤུགས་འོག་རང་རང་སར་རྟག་པར་སྨིན་མཚམས་ལ་སྡུག་མདུད་བརྒྱབ་སྟེ་འགྲོ་བ་དང་ལན་རེར་ཁྱི་གུར་གཅེས་སྡིགས་གང་རུང་གི་སྐད་ཆ་རེ་བཤད་ནས་སྤམ་མདོག་ཨུ་ཚུགས་ཀྱིས་སྟོན་པ་དང་ཁྱི་གུ་འཁྲུད་པ་དང་ཁྱི་གུ་གོས་ཐུལ་དུ་བསྙོལ་བ། ཁྱི་གུ་ཁོ་ནར་བཟའ་མིའི་འདུ་ཤེས་ཀྱིས་གོས་ལྭ་ཡགས་པོ་བསྐོན་པ་སོགས་བྱེད་པ་ནི་མིའི་སྤྱི་ཚོགས་སུ་འཚོ་བའི་རྣམ་པ་ཙམ་ལས་མི་དེའི་རིགས་མིའི་མཛའ་གཅུགས་ཀྱི་དྲོད་ཁོལ་ལས་ཕྱིར་གྱེས་ཚར་བ་གསལ་རྗེན་དུ་བསྟན་འདུག་སྙམ་པའི་དྲན་ཚུལ་འགོག་མེད་ཅིག་སྐྱེས་འོང་།

༼༩༽ཁྱི་བསྙོར་བ་ནི་འུ་ཐུག་པའི་གདམ་ག་ཞིག་ཡིན་པ་ལས་སྙིང་རྗེ་ཞིག་མིན་སྣང་འཆར་འོང་། ང་ཚོ་ཡང་དེའི་ཐད་ཀྱི་འདུ་ཤེས་བརྗེ་བའི་དུས་ཤིག་ལ་ཉེ་བར་བཅར་ལྟས་མེད་དམ་སྙམ་ཡང་ལྟོས་བཅས་ཀྱིས་ཁ་སང་དེ་རིང་ད་དུང་རྒྱ་བོད་གཉིས་ཀར་མི་དང་ཁྱི་འམ། ཁྱི་དང་ཕ་མ་བརྗེ་བའི་སྣང་ཚུལ་ཐད་ནས་ཁྱད་པར་ཡོད་ཅིང་ལྷག་པར་དབུས་ལྷ་ལྡན་དུ་ཉིན་རེ་བཞིན་གཙུག་ལག་ཁང་དང་པོ་ཏ་ལ་གང་རུང་གི་སྐོར་ལམ་དུ་གཞོན་པ་ཚོས་སོ་སོའི་ཕ་མའམ་ཕ་མའི་ཕ་མ་གང་རུང་འཁར་བར་བརྟེན་ཏེ་འགྲོ་ཐུབ་པ་རྣམས་ཀྱི་མཆན་ནས་བསྐྱོར་ཏེ་འགྲོ་བ་དང་དེ་ལྟར་མི་ནུས་པ་རྣམས་རྐང་གསུམ་འཁོར་ལོ་ཆུང་བ་དེ་འདྲའི་ནང་དུ་དེད་ནས་སྐོར་བར་འགྲོ་བ་མང་བོ་འདུག      མདོ་སྨད་ཁུལ་དུའང་དེ་འདྲ་མེད་པ་མིན་མོད་ཉུང་བར་སྣང་བ་དང་ཁྱད་པར་དེང་དུས་ལོ་ཆུང་ཕལ་མོ་ཆེས་སོ་སོའི་ཕ་མ་དང་གཉེན་ཉེའི་པར་རམ་དེ་དང་འབྲེལ་ཡོད་དྲན་རྟེན་ཉར་བཤམས་བྱེད་པ་མཐོང་དཀོན་པ་དང་ལྡོག་སྟེ་བཟོས་ཚར་གྱིས་ལས་པའི་ཁྱི་གུ་དང་། དོམ་ཁྲ།   ཕག    ལྟ་བུ་རེ་བཤམས་ཏེ། 再见！我的小猪。ཟེར་བ་དང་། 我的小狗，晚安！ཟེར་ཡོང་བ་ལྟ་བུས་ང་ཚོ་ཡང་མཐར་ཐུག་གི་གདམ་ག་ཁྱི་ལས་མེད་པའི་མ་འོངས་པ་ཞིག་ལ་ཇེ་ཉེར་འགྲོ་བཞིན་མེད་དམ་ཞེས་པའི་དྲི་བ་ཞིག་ངང་ངམ་ཤུགས་ཀྱིས་འཁོར་འོང་ངོ་།།

༢༠༡༨་༠༥་༡༦་ཉིན།