ནག་པོ་སྦྲུལ་གྱི་མདུད་པ།
གཅིག
རང་རེའི་བོད་ཟས་མོག་མོག་གི་ནང་འཇུག་མོག་ཤ་ཞིབ་བུར་གཏུབས་པའི་ཤ་ནི། ངེད་ཚང་གི་ཁྱི་ཆུང་གཉིས་ཀྱི་ཟ་མ་ཡིན་ཞིང་། བདུན་ཕྲག་གཉིས་རེའི་ནང་མོག་ཤ་ཀེ་ལོ་གཉིས་ལྷག་ཅིག་ཉོ་དགོས་ཤིང་། དེ་སྔོ་ལྡུམ་ཞིབ་བུར་གཏུབ་པ་ཀེ་ལོ་ཕྱེད་ཙམ་ལ་བསྲེས་ནས་ཡག་པོར་ཚོས་བཅུག་རྗེས་ཉིན་རེར་ཐེངས་རེར་ཁྱི་གཉིས་ལ་སྤྲོད་དགོས་པ་རེད། ཁྱིམ་ཚང་འགའ་ཤས་ཀྱིས་མཚམས་རེར་ཁྱི་ལ་སྤྲོད་རྒྱུའི་ཟ་མ་བཟང་ཆེས་ནས་ཁྱི་འཇུ་མི་ཐུབ་པར་སྐྱུག་གིན་ཡོད་པར་ཡང་བཤད་ཅིང་། མིའི་ཟས་རིགས་ཚོར་དུས་བཀག་ནང་ཟ་དགོས་པ་ལས་དེ་ལས་འདས་ན་ཟ་མི་ཉན་པར་བཤད་པ་བཞིན་ཁྱིའི་ཟ་མ་ཡང་ཟླ་ཚེས་ལས་ཡོལ་ཟིན་ན་ནམ་ཡང་མི་སྤྲོད་པར་མི་བཞིན་འཕྲོད་བསྟེན་ལ་དོ་སྣང་བྱེད་ཀིན་འདུག
སྤྱིར་ནུབ་གླིང་གི་རྒྱལ་ཁབ་དག་འབྱོར་ལྡན་ཡིན་པས་ཁོ་ཚོའི་འཚོ་བའི་ཕྱིའི་དངོས་པོའི་དཔལ་ཡོན་འབྱོར་ཕྱུག་དང་དར་རྒྱས་ཆེན་པོ་ཡོད་པ་ཡོངས་ཁྱབ་ལྟར་ཡིན་པར་མ་ཟད། ལྷག་པར་ཁོ་ཚོའི་སྒོ་ཟོག་རྟ་ལུག བ་གླང་དང་ཁྱིམ་བྱ། ཞི་མི་དང་ཁྱི་སོགས་སྒོ་ཕྱུགས་དུད་འགྲོ་དག་ཀྱང་དུད་འགྲོའི་གོ་སར་མི་འཇོག་པར་མི་དང་འདྲ་མཉམ་ལྟ་བུའི་གཅེས་སྐྱོང་དང་བདག་ཉར་ཧ་ཅང་ཞིབ་ནན་ཆེན་པོ་འདུག ཁྱི་སོགས་ཁྱིམ་གསོས་སེམས་ཅན་གྱི་ཟས་སོགས་ཅ་དངོས་ཚོང་ཁང་ཧ་ཅང་མང་བར་མ་ཟད། རྒྱུན་མཁོའི་ཚོང་ཁང་ལྟེ་གནས་སོགས་ཚོང་ཁང་མང་ཆེ་བ་ན་ཡང་ཁྱི་སོགས་ཁྱིམ་གསོའི་སེམས་ཅན་དག་ལ་སྤྲོད་རྒྱུའི་ཟས་རིགས་དང་གྱོན་པའི་རིགས། སྡོད་གནས་ཁང་ཆུང་དང་ཉལ་སའི་རིགས། རྩེད་ཆས་རིགས་སོགས་སེམས་ཅན་དེ་དང་དེའི་རིགས་དང་ལོ་ཚད་ལ་དཔག་པའི་རིགས་སྣ་ཚོགས་དང་རིམ་པ་མི་འདྲ་བ་དུ་མ་ཆེད་དུ་བཟོ་འཚོང་བྱེད་ཀིན་འདུག
དེ་ཡང་དཔེར་ན། ཁྱིའི་ཟས་རིགས་གཅིག་པུ་ལ་མཚོན་ན། ཤ་མེད་ཟས་རིགས་སྣ་ཚོགས་དང་། ཤ་ཡོད་ལ་ཡང་སེམས་ཅན་གྱི་ཤ་རིགས་ལ་སྐམ་པོ་དང་རློན་པ། བཙོས་མ་དང་སྲེག་མ། རུས་པའི་རིགས་དང་ཤ་ཁུའི་རིགས། རྒྱུན་རིང་མུར་རྒྱུའི་རུས་པ་དང་སྨན་བསྲེས་པའི་ཤ་དང་གྲོ་ཕྱེའི་གོ་རེའི་རིགས་སོགས་སྟབས་བདེ་ཞིང་གཙང་སྦྲ་ལྡན་པའི་ངང་རྒྱུན་གོམས་ངང་ཉོ་ཚོང་བྱེད་ཀིན་འདུག་ལ། ཁྱིའི་གྱོན་གོས་རིགས་ཀྱང་དགུན་གོས་དང་ལྷམ་ལ་སོགས་པ་བྱིས་པ་ཆུང་ངུའི་གྱོན་གོས་དག་དང་འདྲ་བར་ཚོན་མདོག་དང་རི་མོ་སྣ་ཚོགས་ཡོད་པའི་འཇམ་རྩུབ་སྲབ་མཐུག་གི་གྱོན་པའང་བགྲང་མི་ཚར་བ་འདུག
ཁྱིའི་རྩེད་ཆས་རིགས་མང་པོ་དང་། ཁྱིའི་ཕོར་བའི་རིགས་སྣ་མང་དང་ཁྱི་བཀྲུ་སའི་ཁྲུས་གཞོང་དང་འདག་རྫས་དང་འདག་ཕྱེའི་རིགས་སྣ་ཚོགས། ཁྱིའི་དྲི་མ་འགོག་བྱེད་ཀྱི་བྱུགས་ཆུ་སྣ་ཚོགས་དང་ཁྱིའི་མལ་གོས་སོགས་ལ་འགོ་ནད་འགོག་བྱེད་ཀྱི་བྱུགས་ཆུ་རིགས་མང་པོ་འདུག་པར་མ་ཟད། ཁྱི་འདོགས་བྱེད་ཀྱི་ལྕགས་ཐག་སོགས་ཐག་པ་ཁྱིའི་ཆེ་ཆུང་ལ་དཔག་པའི་ཕྲ་སྦོམ་ལྕི་ཡང་སྣ་ཚོགས་དང་ཁྱིའི་སྐེར་འདོགས་རྒྱུའི་མིང་བྱང་ཆེ་ཆུང་སོགས་ཐ་ན་ཁྱི་ཁྲིད་ནས་ས་ཆ་གང་ལ་རྐང་ཐང་དུ་ཕྱིན་སྐབས་མཉམ་ཁྱེར་དགོས་པའི་ཁྱིའི་ཁྱི་སྐྱག་བླུག་སྣོད་ཀྱིི་འགྱིག་གི་ཁུག་མ་ཡང་དེར་ཆེད་བཟོས་ཀྱིས་བེད་སྤྱོད་གཏོང་རྒྱུ་དང་གཏོང་གིན་འདུག
ཕྱི་གླིང་པ་དག་ནི་རང་རེའི་བོད་དང་རྒྱ་གར་ལྟར་མིན་པར་ཁོར་ཡུག་སྲུང་སྐྱོབ་དང་ཁོར་ཡུག་གཙང་སྦྲ་ལ་གལ་ཆེན་བྱེད་པའི་གོམས་གཤིས་རང་འཇགས་སུ་གྱུར་ནས་ཡོད་པས། ཁོ་ཚོས་ཁྱི་ཞིག་ཁྲིད་ནས་སོང་ན་ཡང་ཁྱི་དེས་ལམ་ཁར་ས་ཆ་གང་ཞིག་ནས་ཁྱི་སྐྱག་བཏང་ན་དེ་དེར་མི་འཇོག་པར་འགྱིག་ཁུག་ནང་བླུགས་ནས་གད་སྙིགས་བླུག་སྣོད་གང་ན་ཡོད་སར་སྐྱེལ་ཞིང་། སྐྱེལ་ས་མེད་ན་རང་ཁྱིམ་དུ་ཁྱེར་ཡོང་ནས་གད་སྙིག་ཟོ་བའི་ནང་བླུག་གིན་འདུག འདི་ཡང་འདི་ལྟར་ཁྱི་སྐྱག་གཅིག་པུ་མིན་པར་མི་རྒན་གཞོན་སུ་ཡིན་ན་ཡང་རི་མགོ་དང་ས་སྟོང་སོགས་ས་ཆ་གང་ཞིག་ཡིན་ན་ཡང་རང་གིས་ཟོས་འཐུང་བྱས་པའི་སྣོད་ཆས་རིགས་ཤོག་གུ་དང་འགྱིག་ཁུག་སོགས་དེ་ལྟར་གཙང་བཟོའི་ངང་ཁོར་ཡུག་ལ་འགན་འཁུར་ལེན་བཞིན་འདུག
ངས་ནི་མཚམས་རེར་ངེད་ཚང་གི་ཁྱི་ཆུང་གཉིས་ཁྲིད་ནས་གོམ་པ་རྒྱག་པར་ཆས་སྐབས་ལམ་བར་ནས་ཁྱི་སྐྱག་ག་བར་བཏང་ན་དེ་གར་བཞག་ནས་ཡོང་གིན་ཡོད། མཚམས་རེར་སྤྱི་གླིང་དང་ལམ་འགྲོའི་མི་ཚོས་མཐོང་ས་ནས་ཁོ་ཚོས་བྱེད་པ་བཞིན་འགྱིག་ཁུག་ནང་མི་བླུག་རང་བླུག་ཆགས་ཀིན་འདུག དེ་ནི་ཡར་ཀླུང་ས་ཆར་བསྡད་ན་ཡར་ལྷ་ཤམ་པོ་བསྟོད་དགོས་པའི་དབང་གིས་རེད།
གཉིས།
གཞན་ཡང་རང་རེའི་བོད་པའི་མིའི་འཕྲོད་བསྟེན་ལས་ཕྱི་གླིང་པ་འདི་ཚོའི་ཁྱིའི་འཕྲོད་བསྟེན་བྱེད་ཚུལ་ཡག་པོར་འདུག་ཟེར་ན་ཆོག་པར་སེམས། ཁྱིམ་ཚང་སུ་ཡིན་ཡང་བདག་ཉར་བྱས་ཡོད་པའི་སེམས་ཅན་དག་ནི། སེམས་ཅན་དེ་དག་ཚང་མར་དུས་ནམ་ཞིག་ནས་སྐྱེས་པ་དང་མིང་། རྒྱལ་ཁབ་གང་གི་སེམས་ཅན་ཡིན་པ་དང་ལོ་ཅི་ཙམ་ལོན། ན་ཚ་ཡོད་མེད་སོགས་ཀྱི་ལོ་རྒྱུས་དང་གནས་ཚུལ་ཆ་ཚང་ཐོ་འགོད་ངང་ཁྱིམ་བདག་དང་སེམས་ཅན་དེ་དག་བསྟེན་གཏུག་བྱ་ཡུལ་གྱི་སྨན་ཁང་ཁག་སོ་སོས་ཉར་ཚགས་ལེགས་པོར་བྱས་ནས་འདུག བདུན་ཕྲག་གཅིག་གི་གོང་ནས་ངེད་ཚང་གི་ཁྱི་གཉིས་ཀྱི་ཁྱི་སྨན་ཁང་ནས་སྦྲགས་ཐོག་ཡི་གེ་བཏང་བ་ལྟར། ཕྱི་ལོ་༢༠༡༣ ཟླ་༢ ཚེས་༢༢ ཉིན་གྱི་ཕྱི་དྲོར་སྨན་ཁང་ནས་སྤྲད་པའི་དུས་ཆད་ལ་ང་དང་ངའི་ཆུང་མས་ངེད་ཚང་གི་ཁྱི་ཆུང་གཉིས་ཁྲིད་ནས་ཁྱིའི་སྨན་ཁང་ལ་སོང་བ་ཡིན། སྨན་ཁང་དེར་སླེབས་མ་ཐག་མིང་གཞུང་ཐོ་བཀོད་དུ་གསལ་བ་ལྟར་སྨན་གཡོག་དང་སྨན་པ་ཚོས་ཁྱིའི་གནས་ཚུལ་ག་འདྲ་ཡོད་པ་སྔོན་མ་ནས་ཁོང་ཚོའི་གློག་ཀླད་ནང་ཉར་ནས་ཡོད་པ་ལ་བསྡུར་ནས་ཁྱི་རེ་རེར་བཞིན་རྒྱ་མར་ལྕི་ཚད་འཕར་ཡོད་མེད་འཇལ་བ་སོགས་འགྱུར་བ་ཅི་ཞིག་བྱུང་ཡོད་མིན་ལ་བརྟག་དཔྱད་བྱེད་པ་དང་། དེ་རྗེས་ཁྱིའི་རྐང་ལག་གི་སྡེར་སེན་རིང་བོར་སྐྱེས་པ་དག་གཏུབ་པ་སོགས་རིམ་བཞིན་ཁྱིའི་མིག་དང་རྣ་བ། སོ་དང་ལུས་ཀྱི་ཕྱི་ནང་ཚང་མ་ལ་ན་ཚ་ཡོད་མེད་གློག་ཆས་སོགས་འཕྲུལ་རིགས་སྣ་ཚོགས་ཀྱིས་བརྟག་ཞིབ་ནན་ཏན་བྱེད་ཅིང་། སྔར་མུས་ནས་འགྱུར་ལྡོག་གང་དང་གང་བྱུང་ཡོད་པ་དང་། ད་དུང་མ་འོངས་པར་ཁྱི་འདི་ལ་རྒྱུན་ལྡན་གྱི་འགྱུར་བ་འདི་དང་འདི་འདྲ་འབྱུང་ཚུལ་སོགས་རེ་རེར་བཞིན་སྨན་པས་དོ་བདག་ལ་ངོ་སྤྲོད་བྱེད་ཀིན་འདུག་ལ། ནད་རིགས་སྔོན་འགོག་གི་སྨན་ཁབ་རྒྱག་པ་དང་གཞུག་མར་ཟླ་ཚེས་འདིའི་ཉིན་ཡང་བསྐྱར་སྨན་ཁང་ལ་ཡོང་དགོས་ཚུལ་སོགས་རིམ་པར་བསླབ་སྟོན་གསལ་བཤད་བྱས་སོང་། དེ་རྗེས་བརྟག་དཔྱད་ཀྱི་དངུལ་སྤྲོད་ཁང་དུ་སོང་བ་ན་དངུལ་འཛིན་ངོས་སུ་སྒྲོ་ལར་༡༦༠ བབས་འདུག
སྤྱིར་ཁྱི་སོགས་སེམས་ཅན་གྱི་ཆེད་མཁས་སྨན་པ་དང་སྨན་ཁང་སོགས་ལ་རིན་གོང་ཆེན་པོ་འདུག་ལ། ལྷག་པར་སེམས་ཅན་དེ་ཚོར་མིག་དང་རྐང་ལག་སོགས་ལ་གཤགས་བཅོས་དང་འགོ་ནད་རིགས་ལས་ཉེན་སྐྱོབ་ཛ་དྲག་ཅན་དག་ལ་དམིགས་བསལ་རིན་གོང་ཆེན་པོར་འདུག ཁྱིའི་སྨན་ཁང་དག་ཀྱང་མིའི་སྨན་ཁང་བཞིན་ཆུ་ཚོད་ཉེར་བཞིའི་རིང་སྒོ་མི་རྒྱག་པར་ཕྱེ་བཞིན་འདུག སྔར་ལོ་སྟེ་༢༠༡༢ལོར་ངའི་ངོ་ཤེས་ཕྱི་གླིང་པ་བཟའ་མི་གཉིས་ལ་བོད་ཁྱི་ཆུང་ཆུང་གཉིས་ཡོད་པ་ལས་གཅིག་ལ་མཚན་གུང་ཆུ་ཚོད་༡༡ དང་༣༠ ཙམ་ལ་གློ་བུར་འདར་བའི་ངང་འགུལ་སྐྱོད་མི་ཐུབ་པར་ན་ཟུག་ཤུགས་ཆེན་གཏོང་གིན་ཡོད་པའི་ནད་རྟགས་བྱུང་བས། ཐད་ཀར་ཁྱིའི་ཛ་དྲག་སྨན་པ་ལ་ཁ་པར་བཏང་ནས་སྨན་ཁང་དུ་ཁྱེར་ནས་གཟེར་གཅོག་སྨན་ཁབ་སོགས་བརྒྱབས་ནས་སྲོག་ཉེན་ལས་བསྐྱབས་པ་རེད། ཡིན་ཡང་མཚན་མོ་དེར་སྨན་བཅོས་བྱས་གླ་ལ་སྒྲོ་ལར་དྲུག་བརྒྱ་ལྷག་ཤོར་འདུག
གསུམ།
ད་དུང་ཡང་གཅིག་བཤད་ན། མཁས་དབང་དགེ་འདུན་ཆོས་འཕེལ་གྱིས། གཞན་ཕན་སྙིང་རྗེའི་སྣུམ་དང་བྲལ་ན་ཡང་།།རིག་རྩལ་ཐབས་མཁས་གློག་གི་ཆོ་འཕྲུལ་གྱིས།།དྲང་པོའི་མི་ལ་འཁྱོིག་པོའི་ལམ་སྟོན་པའ།།སྐྲ་སེར་སྤྲེའུའི་རིགས་ལ་དོགས་ཟོན་མཛོད།། ཅེས་པ་ལྟར་ཕྱི་གླིང་པ་མང་ཆེ་བར་སྤྱི་བྱེའི་ཤེས་ཡོན་གྱི་གནས་ཚད་མཐོན་པོ་འདུག་ཅིང་། ཤེས་ཡོན་དང་སློབ་གསོའི་ལམ་སྲོལ་གཏིང་ཟབ་ཅིག་རྒྱུན་འཇགས་སུ་དར་ནས་ཡོིད་པའི་དབང་གིས་ལོས་ཡིན་སྙམ། ཁོ་ཚོ་ཕལ་ཆེ་བ་ནི་རང་ཉིད་སྤྱང་གྲུང་ལྡན་པར་མ་ཟད་གཞན་སེམས་ཅན་དག་ལ་ཡང་སློབ་སྦྱོང་སོགས་སྦྱོང་བརྡར་སྣ་ཚོགས་སྤྲད་ནས་མི་སྐད་བཤད་ན་གོ་བཞིན་ཡོད་པ་ལྟ་བུར་བཟོ་གིན་འདུག
ཁོ་ཚོས་བདག་ཉར་བྱས་པའི་སེམས་ཅན་དག་ལ་སློབ་སྦྱོང་སྤྲོད་ཅིང་། སློབ་སྦྱོང་སྤྲོད་ཡུལ་གྱི་ཆེད་བཙུགས་སློབ་གྲྭ་དང་ཆེད་མཁས་དགེ་རྒན་སོགས་ཀྱང་འདུག དཔེར་ན་སྔར་ལོ་སྟེ་ཕྱི་ལོ་༢༠༡༢ ཕྱི་ཟླ་༡༡ ཚེས་༡༡་ཉིན་གྱི་ཞོགས་ཀའི་ཆུ་ཚོད་༩་མ་ཟིན་ཙམ་ལ་ང་ངའི་གྲོགས་མཚན་མཐུན་བུད་མེད་བཟའ་བ་ལྗོས་སི་དང་ཨན་ལྗེ་གཉིས་དང་མཉམ་དུ་ཁོ་མོ་གཉིས་ཀྱི་ཁྱི་གཉིས་སྦྱོང་བརྡར་སློབ་གྲྭར་སོང་བ་ཡིན། ང་ཚོས་ཁྱི་གཉིས་རླངས་འཁོར་ནང་ཁྱེར་ནས་སློབ་གྲྭའི་སྒོ་ཆེན་སླེབས་སོང་། དེ་དུས་ངའི་རོགས་པས་སྔར་ནས་དུས་ཆད་བྱས་ཟིན་པའི་ཁྱིའི་དགེ་རྒན་བུད་མེད་དེར་ཁ་པར་བཏང་སྐབས་སྐར་ཆ་འགའ་ལས་མ་འགོར་བར་བུད་མེད་ལོ་ན་བཞི་བཅུ་མ་ཟིན་ཙམ་གྱི་སྟོད་གོས་སེར་པོ་དང་ཉི་འགོག་ཞྭ་མོ་གྱོན་མཁན་ཞིག་ཡོང་ནས་ང་ཚོར་མོ་རང་སྤྲོད་ངང་སྣེ་ལེན་བྱས་སོང་། མ་ཟད་མོས་ལག་ཏུ་བཟུང་བའི་ཁྱིའི་འདོགས་ཐག་གཉིས་ཀ་ང་ཚོའི་ཁྱི་གཉིས་ཀྱི་སྐེ་རུ་སྐོན་བཞིན་ཁྱི་གཉིས་ལ་ལག་པས་བྱིལ་བྱིལ་གཏོང་བཞིན་གནས་སྟངས་ག་འདྲ་ཡོད་མེད་ཐད་དྲི་བ་འདྲི་བཞིན་ང་ཚོ་རྭ་བ་ཆེན་པོ་ཞིག་གི་ནང་དུ་ཁྲིད་སོང་།
ཞོགས་ཀ་དེར་ཉི་མ་ཅུང་ཚ་བོ་འདུག་ན་ཡང་ང་ཡ་མཚར་དང་ཧང་སངས་ངང་རོགས་པ་ཚོ་དང་མཉམ་དུ་ཁྱིའི་སློབ་གྲྭ་ལ་རྒྱུས་ལོན་བྱས་པ་ཡིན། རྭ་བ་ཆེན་པོ་དེའི་ནང་ཁྱིམ་བདག་ཚོས་རང་རང་གི་ཁྱི་རྣམས་ཁྲིད་ནས་སྡོད་པ་དང་ཉོལ། ཤོག་དང་མ་བྱེད་སོགས་ཀྱི་དབྱིན་ཇིའི་ཚིག་འགའ་ཡང་ཡང་བཤད་བཞིན་རང་རང་གི་ཁྱི་ཚོ་ཡར་མར་ཁྲིད་ཀིན་སྦྱོང་བརྡར་སྤྲོད་ཀིན་འདུག ཉིན་དེར་ཁྱིའི་སློབ་གྲྭའི་རྭ་བ་དེའི་ནང་མི་བརྒྱ་ལྷག་ཅིག་གིས་ཁྱི་ཕལ་ཆེར་དྲུག་ཅུའམ་བདུན་ཅུ་ཙམ་ཁྲིད་ནས་ཡང་འདུག སློབ་གྲྭ་དེར་ཁྱིའི་དགེ་རྒན་ཕོ་མོ་ཉི་ཤུ་ལྷག་གིས་སྦྱོང་བརྡར་སློབ་བཞིན་འདུག་ན་ཡང་སློབ་གྲྭ་དེ་ནི་ཁྱིའི་ཡན་ལག་སློབ་གྲྭ་ཞིག་ལས་ལྟེ་གནས་སློབ་གྲྭ་ངོ་མ་ཞིག་མིན་པར་བཤད།
མཚམས་ཤིག་ལ་ང་ཚོའི་ཁྱི་གཉིས་ཀྱི་མིང་ཐོ་འགོད་པར་བུད་མེད་ལོ་ཆུང་ཞིག་ཡོང་ནས་ཁྱི་རེ་རེའི་མིང་དང་ལོ་ཚད་ཅི་ཡིན། སྦྱོང་བརྡར་འདིར་ཞུགས་ཐེངས་གང་ཡིན་སོགས་འདྲི་བཞིན་དེབ་ངོས་སུ་ཐོ་འགོད་བྱས་སོང་། ཉིན་དང་པོ་ལ་རིན་མེད་ཐོག་སྦྱོང་བརྡར་ཁོ་ཚོས་སྤྲོད་ཀིན་འདུག དེ་ནི་ཁྱིའི་དགེ་རྒན་ཁོ་ཚོ་ལ་ཁྱིམ་བདག་ཚོས་མུ་མཐུད་ནས་སློབ་གྲྭའི་སྦྱོང་བརྡར་ལ་ཡོང་རྒྱུ་ཡིན་པའི་གདེང་ཚད་ལོན་ནས་ཡོད་པ་ལྟ་བུ་ཞིག་འདུག
ང་ཚོའི་ཁྱི་གཉིས་ལ་ཡང་དགེ་རྒན་དེས་ཡར་མར་ཁྲིད་བཞིན་སྡོད་ཟེར་ནས་འདུག་འཇུག་པ་དང་། སོང་ཟེར་བ་དང་ཉོལ་ཟེར་བ། མི་དང་ཁྱི་གཞན་མཐོང་ན་མ་ཟུག་ཟེར་ནས་ཟུག་མི་འཇུག་པ་སོགས་སྦྱོང་བརྡར་ཆུ་ཚོད་གཅིག་མ་ཟིན་ཙམ་སྤྲད་རྗེས། ཁྱིམ་བདག་སོ་སོས་རང་གི་ཁྱི་རྣམས་ཁྲིད་ནས་ཁྱིའི་འཛིན་རིམ་དང་པོ་ནས་ལྔ་པའི་བར་ཡོད་པའི་སྡེ་ཚན་གང་ཡིན་གྱི་ཁོངས་སུ་སོ་སོར་འཚོགས་བཅུག་སོང་། ང་ཚོ་ནི་འཛིན་རིམ་དང་པོའི་སྡེ་ཚན་རེད་འདུག་པས་དེར་ང་ངའི་གྲོགས་ཀྱིས་ཁྱི་གཉིས་ཁྲིད་ནས་སོང་བ་ན། ཁྱིའི་སློབ་གྲྭའི་འགོ་འཛིན་པ་རེད་སྙམ་པའི་མི་གཟུགས་སྟོབས་ཆེ་ཞིང་རྒྱག་པ། ལོ་ཚད་བཞི་བཅུ་ཙམ་ལོན་པའི་ཀླད་པ་དམར་ཞིང་ཁ་སྤུ་སེར་སྐྱ་རིང་བོས་ངོ་གདོང་ཁེབས་པ་ཅན་ཞིག་གིས་ཁྱི་མོ་ནག་པོ་ཆེན་པོ་ཞིག་འགྲམ་ལ་སྡོད་བཅུག་ནས། ཁྱིམ་བདག་ཚོ་ལ་ཁོ་ཚོའི་སློབ་གྲྭ་ནས་ཇི་ལྟར་སྦྱོང་བརྡར་སྤྲོད་ཀིན་ཡོད་ཚུལ་སོགས་སྟོན་ཆེད་དུ་ཁྱི་མོ་དེར་ག་རེ་ལབ་ན་དེ་བཞིན་བྱེད་པའི་མཐོང་བ་མངོན་སུམ་གྱི་ངོ་སྤྲོད་དང་སྦྲགས་ནས་ཁྱིམ་བདག་ཚོའི་སེམས་པ་འགུགས་ཐབས་ཀྱི་སློབ་གསོའི་སྦྱོང་བརྡར་གྱི་གནས་ཚུལ་དང་ལོ་རྒྱུས། བརྒྱུད་རིམ་དང་མཇུག་འབྲས་སོགས་ཞིབ་ཕྲ་རུ་ཆུ་བཞུར་ངང་ཆུ་ཚོད་གཉིས་ལྷག་རིང་བཤད་སོང་། དེ་རྗེས་ཁྱིམ་བདག་ཚོའི་དྲི་བ་གཏོང་བའི་གོ་སྐབས་སྤྲད་ནས་དྲིས་ཞིབ་པར་བཤད་ཀིན་འདུག དེར་ལོ་ངོ་གསུམ་རིང་སྦྱོབ་བརྡར་སྤྲད་ནས་ཁྱིའི་འཛིན་རིམ་ལྔ་བ་བར་མཐར་ཕྱིན་ན་ཁྱི་ལ་ཕར་ག་རེ་ལབ་པ་བཞིན་འགྲོ་འདུག་སོགས་དེ་བཞིན་བྱེད་ཀིན་ཡོད་འདུག
དེ་མིན་ཉིན་ཞག་ཉི་ཤུ་དང་ཟླ་བ་གསུམ་དང་དྲུག་སོགས་དུས་ཡུན་རིང་ཐུང་མི་འདྲ་བ་འདུག་ལ། སྦྱོང་བརྡར་གྱི་གླ་ཆ་ཡང་རིམ་པ་མི་འདྲ་བ་འདུག ཉིན་དེར་ཆུ་ཚོད་གསུམ་ལྷག་སྦྱོང་བརྡར་བྱས་ནས་ང་ཚོ་ཕྱིར་ནང་ལ་ཁྱི་གཉིས་ཁྲིད་ནས་ཡོང་བ་ཡིན། ཡིན་ཡང་ངའི་གྲོགས་གཉིས་ཀྱིས་མུ་མཐུད་དུ་ཁྱི་གཉིས་སློབ་གྲྭ་དེར་སྐྱེལ་འདོད་འདུག་པས། སླར་ཡང་ཉིན་ཤས་གཞུག་ནས་སྔར་ཁྱིའི་དགེ་རྒན་དེར་ཁ་པར་བཏང་ནས་སློབ་གྲྭར་ཉིན་ཞག་ཉི་ཤུར་འཇོག་རྒྱུའི་ཐག་གཅོད་བྱས་སོང་།
ཉིན་ཞིག་ཁྱིའི་དགེ་རྒན་དེ་དང་རོགས་པ་ཞིག་བཅས་རླངས་འཁོར་བཏང་ནས་ཆེད་དུ་ཁྱི་གཉིས་ལེན་པར་ཡོང་སོང་། འབྲེལ་གཏུག་བྱ་ཡུལ་ཁ་པར་ཨང་དང་སྡོད་གནས་སོགས་ཀྱི་ཁ་བྱང་སྤྲད་ནས་ཁྱི་གཉིས་ཁྱེར་ནས་འགྲོ་སོང་། དེ་རྗེས་ཟླ་གཅིག་མ་ཟིན་ཙམ་ལ་ཁྱི་གཉིས་ཕྱིར་བླངས་འདུག་པར་ངོ་མ་སྔར་ལྟར་མི་ཟུག་དང་། ཡར་མར་མི་རྒྱུག་པར་ཁུ་སིམ་ངང་སྡོད་ཅིང་། སྡོད་དང་སོངས་དང་ཟོ་སོགས་གང་བཤད་པ་བཞིན་བྱེད་པའི་སྦྱོང་བརྡར་ཡག་པོ་ཞིག་ཐེབས་ཚར་འདུག ཡིན་ཡང་དགེ་རྒན་ཚོས་བཤད་ན་ཡང་བསྐྱར་སྔར་བཞིན་འགྱུར་ཉེན་ཡོད་པས། ཉིན་རེར་བཞིན་ཆུ་ཚོད་གཉིས་ཙམ་རིང་ཡར་མར་ཁྲིད་ནས་འགྲོ་སྡོད་སོགས་ཡང་ཡང་ཟླ་གཅིག་གཉིས་རིང་མུ་མཐུད་དགོས་པར་བཤད་འདུག་པས། དེ་ནས་བཟུང་ངའི་གྲོགས་བཟའ་ཟླ་གཉིས་ཟླ་གཅིག་ཙམ་རིང་ཞོགས་པར་སྔ་བོར་ལངས་ནས་ལས་ཀར་མ་སོང་སྔོན་ལ་ཁྱི་གཉིས་ལ་སྦྱོང་བརྡར་སྤྲོད་ཀིན་འདུག
མཚམས་རེར་ངས་དེ་ལྟར་སྦྱོང་བརྡར་སྤྲོད་བཞིན་པ་མཐོང་དུས་ཁོ་བཟའ་མི་གཉིས་ཐང་མི་ཆད་པར་འདི་ལྟར་རྒྱུན་མཐུད་ཐུབ་ངོ་མ་བརྩོན་འགྲུས་དང་ཨུ་ཚུགས་ཆེན་པོ་འདུག་བསམ་བྱུང་། ཡིན་ཡང་ལས་མ་བྱས་པ་དང་མི་འཕྲད་པ། བྱས་པ་ཆུད་མི་ཟ་བ་ཟེར་བཞིན་དེ་ལྟར་སྦྱོང་བརྡར་བྱས་པའི་མཇུག་འབྲས་སུ་ད་སྐབས་ཁོ་ཚོའི་ཁྱི་གཉིས་ནི་བྱིས་པ་ཆུང་ཆུང་ཁ་ཉན་གཉིས་དང་འདྲ་བར་ཞི་འཇམ་ལྷོད་སྡོད་ངང་ཅི་བཤད་ལ་ཉན་པའི་སྦྱོང་བརྡར་ལེགས་པོར་ཐེབས་ཟིན་པས། ཁོ་བཟའ་མི་གཉིས་ཀྱིས་སྔ་ཕྱིར་ཁྱོན་སྡོམ་སྒྲོ་ལར་ཉིས་སྟོང་ལྷག་སྦྱོང་བརྡར་གླ་ཆར་སྤྲད་ཟིན་པ་དོན་ཐོག་ཏུ་སྨིན་ཡོད་པའི་དགའ་སྤྲོའི་ངང་འདུག ད་དུང་ང་ཚོ་མིའི་སྐྲ་སོགས་མཛེས་བཟོ་ཁང་ཡོད་པ་བཞིན་ཁྱི་དང་ཞི་མི་སོགས་ཀྱི་སྤུ་དང་སྡེར་སེན་གཏུབ་པ་དང་སྣུམ་བྱུགས་པ་སོགས་བྱེད་ཡུལ་མཛེས་བཟོ་ཁང་འདུག
བཞི།
ད་ནི་ངེད་ཚང་གི་ཁྱི་གཉིས་སྐོར་བཤད་འདོད་བྱུང་བས། ཆེ་བའི་མིང་ལ་ཆེབ་ཟེར་ཞིང་ཆུང་བའི་མིང་ལ་རཱ་ལྗེ་ཟེར། ཆེ་བ་དེ་ངའི་ཆུང་མས་ཉོས་རྗེས་ཁྱིའི་དགེ་རྒན་ཞིག་ཁྱིམ་ལ་ཚུར་ཡོང་བཅུག་ནས་སྦྱོང་བརྡར་སྤྲད་ཟིན་པས། སྡོད་ལབ་ན་ཙོག་པུར་འདུག་པ་དང་། ཉོལ་ལབ་ན་ཉལ་ཞིང་སོངས་ལབ་ན་རྒྱུག་པའི་སྤྱོད་པ་ཞིག་ལོབས་ནས་ཡོད། ཆུང་བ་དེ་ལ་ཡང་རྒྱུན་པར་ང་དང་ཆུང་མས་དགོང་མོར་ཁོམ་པ་ནམ་ཡོད་ལ་ཆུ་ཚོད་ཕྱེད་ཙམ་རེའི་རིང་སྦྱོང་བརྡར་སྤྲོད་ཀིན་ཡོད་པས། དེང་སྐབས་འགྲོ་འདུག་དང་ཟ་མ་ཕོར་བའི་ནང་བླུགས་ནས་སྔུན་ལ་བཞག་ན་ཡང་ཟོ་མ་ལབ་བར་མི་ཟ་བར་ཚིག་དེ་བཤད་པར་ཚུར་གདོང་ལ་ལྟ་བཞིན་སྒུག་སྡོད་བྱེད། གཅིན་སྐྱག་ཅི་ཞིག་གཏོང་དགོས་ན་སྒོ་རྭའི་ནང་ཕྱི་ལ་འགྲོ་བ་ལས་ཁྱིམ་དུ་ནམ་ཡང་མི་གཏོང་བ་སོགས་ཡག་པོར་སྦྱོང་བརྡར་ཐེབས་ཀིན་འདུག མ་གཞི་ངེད་ཚང་གི་ཁྱི་ཆུང་གཉིས་གཟུགས་བོང་ཆུང་བས་མགྲོན་པོ་སོགས་མི་སུ་ཡོང་ན་ཡང་གཅེས་འོས་སུ་ཀུན་གྱིས་མཐོང་གིན་འདུག
གཞན་གློག་བརྙན་དང་དྲ་རྒྱ་སོགས་སུ་ཁྱིའི་ཆེད་མཁས་དགེ་རྒན་ཚོས་ཁྱིའི་རྣམ་འགྱུར་མིག་གིས་ལྟ་སྟངས་དང་རྔ་མ་གཡུག་ཚུལ་སོགས་ལ་གཞིགས་ནས་ཁྱི་དེ་དང་དེའི་སེམས་ཀྱི་དགའ་སྡུག་དང་ཁྲོ་བ་སོགས་ཀྱི་ཚོར་བ་ལ་འགྲེལ་བཤད་རྒྱག་པ་སོགས་མདོར་ན། ཁྱི་ལ་སྤོ་ལོ་རྩེ་ཚུལ་དང་རྐུབ་སྟེགས་ཐོག་འདུག་ཚུལ་སོགས་རྩེད་རིགས་སྣ་ཚོགས་དང་ཅ་ལག་སོགས་ཁ་རུ་འཛིན་དུ་འཇུག་པ། ཉེན་སྐྱོབ་བྱ་ཚུལ་དང་བྲོ་འཁྲབ་ཚུལ། ལག་འཇུ་གཏོང་བ་ཚུན་ཆད་སྦྱོང་བརྡར་སྤྲད་ནས་སློབ་ཀིན་འདུག
ལྔ།
དེ་ལྟར་ཕྱི་གླིང་པ་ཚོས་རང་རང་གི་ཁྱི་སོགས་ལ་ཡང་རང་ཉིད་ཆེས་དགའ་སའི་ཕ་མ་སྤུན་ཉེ་སོགས་ཀྱི་གཅེས་མིང་འདོགས་པ་དང་། ཡང་ན་རང་ཉིད་ཆེས་དགའ་ཤོས་ཀྱི་ཅ་ལག་དང་ཟས་མིང་སོགས་ཁྱི་ལ་འདོགས་ཀིན་འདུག མ་ཟད་ཁོ་ཚོ་གཉེན་ཉེ་ཕན་ཚུན་ནང་འགྲོ་དུས་རང་གི་ཁྱིའི་མིང་དང་གནས་ཚུལ་ངོ་སྤྲོད་བྱེད་ཅིང་འདྲ་དཔར་སོགས་སྟོན་གྱི་འདུག དེ་མིན་ལྷག་པར་ཡེ་ཤུ་སྟོན་པའི་སྐྱེས་སྐར་ལྟ་བུའི་དུས་ཆེན་ལ་ཁོ་ཚོའི་ནང་མི་མཉམ་འཛོམས་དང་ཕན་ཚན་ལེགས་སྐྱེས་སྟེར་རེས་བྱེད་སྐབས་ཀྱང་གཉེན་ཚན་ཚོས་རང་རང་གི་ཁྱི་འདི་དང་འདིས་ཟེར་ནས་མིང་བྲིས་ཏེ་ཕ་རོལ་ཚང་གི་ཁྱི་དེ་དང་དེ་ལ་ཕུལ་ཞེས་པའི་རྔན་པ་སྤྲོད་རྒྱུའི་ཁྱིའི་རྩེ་ཆས་དང་རུས་པ་མུར་རྒྱུ་སོགས་ཉོས་ནས་སྤྲོད་ཀིན་འདུག
མདོར་བསྡུས་ནས་བཤད་ན། ཕྱི་གླིང་པ་ཁོ་ཚོས་ཁྱིམ་དུ་ཉར་བའི་ཁྱི་སོགས་སེམས་ཅན་དག་ནི་ཁོ་ཚོའི་བུ་ཕྲུག་ཅིག་ལོས་ཡིན་པའི་བདག་གཅེས་གལ་ཆེར་འཛིན་གིན་འདུག ཨ་རིའི་སྲིད་འཛིན་ཨོ་བྷའ་མར་ཡང་ཁྱི་ཞིག་མཚམས་རེར་སྡིངས་ཆའི་ཐོག་ཁོ་དང་མཉམ་དུ་ཁྲིད་བཞིན་འདུག་ལ། ༧གོང་ས་མཆོག་གི་ཞི་མི་ཟེར་བའི་དབྱིན་དེབ་ཅིག་ཀྱང་འདུག་ཅིང་། དེ་བཞིན་མི་ཆེན་དཔོན་ཆེན་སོགས་མཐོ་དམན་རྒན་གཞོན་ཐམས་ཆད་ཀྱིས་དེ་བཞིན་གཅེས་སྐྱོང་ལེགས་པོའི་ངང་ཁྱི་དང་ཞི་མི་སོགས་ཉར་བཞིན་འདུག
སྔར་རྒྱ་གར་ནས་ངས་གོ་ཚོར་བྱུང་བ་ཞིག་ལ། ཕྱི་གླིང་པ་ཁྱོ་ག་མེད་མཁན་ཚོས་ཁྱི་དང་ཞི་མི་སོགས་སེམས་ཅན་དག་ཉར་ནས་རང་གི་མཚན་མར་ལྡག་ཏུ་འཇུག་ཆེད་ཉར་བཞིན་ཡོད་པ་རེད་ཟེར་བ་དང་། དེ་ལྟར་བྱེད་བཞིན་ཡོད་པའི་གློག་བརྙན་རེ་མཐོང་མྱངས་ན་ཡང་། ཁོ་ཚོའི་ནང་དེ་འདྲ་བྱེད་བཞིན་ཡོད་པ་འགའ་རེ་ཡོད་ཆོག་ན་ཡང་། མང་ཆེ་ནི་དེ་ལྟར་མིན་པ་ཧ་ཅང་གསལ་པོ་རེད། ངས་བསམ་གཞིགས་ལྟར་ལ་ཁོ་ཚོས་ཁྱི་དང་ཞི་མི་སོགས་སེམས་ཅན་ལ་དེ་ལྟར་གཅེས་སྐྱོང་དང་དགའ་བ་ནི། ཁོ་ཚོའི་ཡུལ་སྲོལ་གྱི་བཟའ་ཚང་བར་གྱི་བརྩེ་དུང་མ་གཏོགས་ཕ་མ་བུ་ཕྲུག་གི་བར་གྱི་བརྩེ་དུང་དེ་བུ་ཕྲུག་ལོ་ན་ཆེར་ཆགས་པ་དང་མཉམ་དུ་ཡལ་འགྲོ་བའམ་ཕན་ཚུན་བར་རྩིས་ཆེན་བྱ་འདོད་ན་ཡང་ཡུལ་སྲོལ་གོམས་སྲོལ་སོགས་ཀྱི་དབང་གིས་དེ་ལྟར་བརྩེ་དུང་ཕལ་ཆེ་བས་རྒྱུན་མཐུད་མི་ཐུབ་མཁན་ཚོས་རང་རང་གི་བརྩེ་བ་བྱ་ཡུལ་ཞིག་གི་ཚབ་ཏུ་ཁྱི་དང་ཞི་མི་སོགས་བདག་ཉར་བྱེད་ཀིན་ཡོད་པ་མིན་ནམ་སྙམ་པ་བསམས་སོང་། ཡིན་ཡང་འགའ་ཤས་ནི་ངོ་མ་སེམས་ཅན་ལ་སྙིང་རྗེ་བྱེད་མཁན་ཡང་འདུག་ཅིང་། སྤྱིར་ཕྱི་གླིང་པ་ཁོ་ཚོ་སེམས་ཅན་ཚོ་ལ་སྙིང་རྗེ་ཆེན་པོ་བྱེད་མཁན་ཕལ་ཆེ་བ་རེད་འདུག་སྙམ། སྔོན་མར་ང་རྒྱ་གར་ན་ཡོད་དུས་ཕྱི་གླིང་ཁོ་ཚོས་ལམ་སྲང་གི་ཁྱི་སོགས་དུད་འགྲོ་ནད་ཅན་དང་ལྟོགས་པ་སོགས་ལ་དང་བླངས་ངང་སྨན་བཅོས་དང་ཟས་ཉོས་ནས་སྤྲོད་ཀིན་འདུག
དྲུག།
ངས་ཕྱི་གླིང་པ་དག་གིས་ཁྱི་དང་ཞི་མི་སོགས་ལ་འདི་ལྟར་དགའ་བོ་དང་གཅེས་ཉར་བྱ་དོན་ཅི་ཡིན་ནམ་སྙམ་པའི་ཤེས་འདོད་ཀྱིས་དེད་ནས། ངའི་ངོ་ཤེས་གྲོགས་པོ་རོལ་མོའི་སྒྱུ་རྩལ་པ་སྐུ་ཞབས་ཕེ་ཁྲེིར་ལ་དྲིས་པ་ཡིན། ཁོས་དེ་ནི་ལོ་ངོ་ཉིས་བརྒྱ་ལྷག་གི་ཡར་སྔོན་ཙམ་ཐོག་མར་དབྱིན་ཡུལ་གྱི་ཕྱི་གླིང་པ་ཕྱུག་པོ་ཚོས་བདག་ཉར་བྱས་པ་ལས་རིམ་པར་སྲོལ་དེ་བྱུང་ཞིང་། དེང་སང་ནུབ་གླིང་གཅིག་པུར་མིན་པར་ཉི་ཧོང་སོགས་ཤར་གླིང་ནང་འབྱོར་ལྡན་ཁྱིམ་ཚང་དག་གིས་ཀྱང་ཉར་བཞིན་ཡོད་པ་རེད་ཟེར་ཞིང་། དབྱིན་ཡུལ་དུ་རིམ་པས་བརྟག་དཔྱད་བརྒྱུད་ཁྱིའི་རིགས་རྒྱུད་སྣ་ཚོགས་བསྲེས་ནས་བསྐྱེད་བསྲིངས་བྱས་ཏེ་རྒྱལ་ཁབ་དང་ཡུལ་ལུང་མི་འདྲ་བའི་ཁྱིའི་རིགས་བསྲེས་དུས་དེ་རིགས་ལས་མཆེད་པའི་ཁྱི་རིགས་མི་འདྲ་བ་མང་པོ་ཞིག་བྱུང་བ་རེད་ཟེར།
མ་ཟད་ཁྱིའི་རིགས་མང་པོ་ལ་ཁོང་ཚོས་ཁྱིའི་གཤིས་སྤྱོད་ལས་བསྒྱུར་བཅོས་དང་སློབ་གསོའི་སྦྱོང་བརྡར་སྤྲད་ནས་མི་བཟང་པོ་ཞིག་གི་སྤྱོད་ཚུལ་བཞིན་ཁྱིམ་བདག་རྒས་འཁོགས་མིག་ལོང་ཚོར་ལམ་ཁྲིད་བྱེད་པ་དང་སྦྲགས་ཡིག་དང་ཚགས་ཤོག་སོགས་ཅ་ལག་གང་དགོས་ལབ་པ་བཞིན་ཁྱེར་ཡོང་ནས་སྤྲོད་པ་སོགས་ཧ་ཅང་རོགས་ཕན་སྒྲུབ་པ་དང་ཉེན་སྲུང་བྱེད་བཞིན་ཡོད་པ་རེད་ཟེར། འདི་ལྟར་བྱེད་མཁན་གྱི་རིགས་མང་ཆེ་བ་ནི་ཁྱི་གཟུགས་སྟོབས་ཆེ་བའི་རིགས་དག་ཡིན་འདུག ཡང་སློབ་གྲྭའི་དགེ་རྒན་ལྗེམ་སི་ལ་དྲིས་པ་ན། ཁོས་དགོད་བཞིན་དུ་དེ་ནི་ནུབ་གླིང་པ་ཚོ་སྨྱོན་པ་ཡིན་པས་རེད་ཟེར་ལ། ཁོའི་སྤོ་བོ་ལགས་ལ་ཁྱི་ཞིག་ཡོད་པ་དེས་རྟག་པར་ཕྱིའི་སྒོི་ཆེན་གྱི་ཡིག་སྒམ་ལས་ཚགས་དེབ་སོགས་དང་། ཁྱིམ་ནང་གི་ཅ་ལག་མཁོ་དངོས་གང་ཁྱེར་ཤོག་ལབ་ན་ཁྱེར་ཡོང་ནས་ཁོ་ལ་སྤྲོད་པ་སོགས་གཡོག་བྱེད་བཞིན་ཡོད་པ་རེད་ཟེར། འདིར་ཁྱིམ་ཚང་ཕྱུག་པོ་ཚོས་ཁྱིམ་བདག་ནང་ལ་སྡོད་ཁོམ་མེད་པར་ལས་ཁུངས་སོགས་སུ་ལས་ཀར་འགྲོ་དགོས་དུས། ནང་ལ་ཁྱི་ལ་བདག་སྐྱོང་བྱེད་མཁན་མི་གླས་ནས་ཁྱི་ལ་བདག་བྱེད་དུ་འཇུག་གིན་ཡོད་པ་དང་། དེ་མིན་ཁྱི་བཅོལ་ཁང་དུ་བདག་བྱེད་པར་བཅོལ་འཇོག་ཀྱང་བྱེད་བཞིན་ཡོད་པ་རེད་ཟེར།
ནུབ་གླིང་པ་ཚོས་བཤད་སྲོལ་ལ། ཁྱི་ནི་མིའི་གྲོགས་ཡག་ཤོས་དེ་ཡིན་པ་རེད་ཟེར། རྒྱུ་མཚན་ནི་མི་ལ་དར་རྒུད་བདེ་སྡུག དབུལ་ཕྱུག བཟང་ངན་དང་ཡག་ཉེས་ཀྱི་འགྱུར་ལྡོག་ཅི་ཞིག་བྱུང་ན་ཡང་རང་གིས་ཉར་བའི་ཁྱི་ནི་ནམ་ཡང་ཁྱོད་ལ་དགའ་བ་དང་སྲུང་སྐྱོབ་བྱེད་པ་ལས་གྲོགས་ངན་དང་ཕ་མ་བུ་ཕྲུག་ངན་པ་ལྟར་ཕན་ཚུན་བར་གྱི་འབྲེལ་བ་དེ་འབྱོིར་ཚེ་དགའ་བ་དང་བརྩེ་བ་ཡོད་མདོག་བྱེད་ཅིང་། ཅུང་ཟད་རྒུད་པ་ན་རྒྱང་དུ་ཡལ་འགྲོ་བ་ལྟ་བུའི་བཅོས་མའི་ཟློས་གར་མི་འཁྲབ་པར་བདག་པོས་ཕར་བྱམས་སྐྱོང་བྱས་པ་བཞིན་ཚུར་ལ་ཡང་སྲུང་སྐྱོབ་དང་དགའ་བོ་བྱེད་བཞིན་ཡོད་པའི་དབང་གིས་ཁྱི་ནི་མིའི་གྲོགས་ཡག་ཤོས་དེ་ཡིན་པ་རེད་ཟེར།
གཞན་ངའི་གྲོགས་པོ་ཁོ་གཉིས་ཀྱི་བསམ་ཚུལ་མཐུན་པའི་ངང་གོང་དུ་ངས་བསམས་པ་བཞིན་ཕྱི་གླིང་པ་ཚོས་ཁྱི་སོགས་ཉར་དོན་ནི། ཁོ་ཚོ་ལ་ཡོད་པའི་སེམས་ནང་གི་བརྩེ་བ་དེ་རང་གི་བུ་ཕྲུག་ཁྱིམ་ནས་ཕྱིན་རྗེས་སྤྲོད་ཡུལ་ཞིག་མེད་པའི་དབང་གིས་བཟའ་མིི་གཉིས་སམ། ཕའམ་མ་གཅིག་པུར་སྡོད་མཁན་ཚོས་རང་རང་གི་བུ་ཕྲུག་གི་ཚབ་ལྟ་བུར་བྱས་ནས་ཁྱི་དང་ཞི་མི་སོགས་བདག་ཉར་བྱེད་བཞིན་ཡོད་པ་རང་གི་བུ་ཕྲུག་ལྟར་གཅེས་སྐྱོང་བྱེད་བཞིན་ཡོད་པ་རེད་ཟེར་ནས་བཤད་སོང་།
བདུན།
ངས་འདི་ལྟར་འདི་དག་འབྲི་དགོས་དོན་ནི། ངས་ང་ཚོ་བོད་པ་ཚོས་སློབ་སྦྱོང་དང་ཤེས་ཡོན་ལ་༧གོང་ས་མཆོག་གིས་གསུངས་པ་ལྟར་དོ་སྣང་དང་གལ་ཆེའི་རིན་ཐང་རྟོགས་དགོས་པའི་སྐུལ་མ་ཞིག་ཐེབས་ཆེད་བྲིས་ཡིན་ལ། སློབ་གསོ་དང་ཤེས་ཡོན་མེད་ན་ནམ་ཡང་ང་ཚོ་ནི་མི་མ་ཟད་ནུབ་གླིང་པའི་ཁྱིའི་འཚོ་བ་ཙམ་ལ་ཡང་རོ་མྱོང་བྱ་མི་ཐུབ་པར་རྗེས་ལུས་སུ་གནས་དགོས་པར་སེམས། དེས་ན་ང་ཚོས་ང་ཚོ་ཅི་ཞིག་གིས་གཉིད་སད་མ་ཐུབ་པར་ལུས་ནས་ཡོད་པ་ངེས་པར་དུ་ཤེས་དགོས་པའི་དུས་ལ་སླེབས་ཡོད་པར་འདོད་ཅིང་། ངས་འདི་ནས་ད་དུང་བཤད་འདོད་པའི་ཚིག་གཅིག་ནི། ང་ཚོས་ང་ཚོའི་བསམ་བློའི་ནང་ཤེས་ཡོན་སློབ་སྦྱོང་ཨང་དང་པོར་འཛིན་དགོས་པ་ལས་དཔལ་འབྱོར་འཚོལ་སྒྲུབ་ཨང་དང་པོར་འཛིན་མི་རུང་བ་དེ་ཡིན། ནུབ་གླིང་པ་དག་ཀྱང་དང་པོ་ནས་འཇིག་རྟེན་བཀོད་པ་པོས་འབྱོར་ལྡན་དང་ཡར་ཐོན་ཅན་གྱི་ངོ་བོ་རུ་བཀོད་བཞག་པ་ཅིག་མིན་པར་ཁོ་ཚོས་ཁོ་ཚོ་ལ་ཡོད་པའི་རྣམ་དཔྱོད་དང་། སློབ་སྦྱོང་བརྒྱུད་ནས་འབད་བརྩོན་གྱི་མཇུག་འབྲས་སུ་དེང་སྐབས་ང་ཚོའི་མིག་ལམ་དུ་ཁོ་ཚོ་ནི་གསེར་མདོག་ལྡན་པ་ཞིག་ཏུ་མཐོང་གིན་ཡོད་པ་ཅི་ལ་མིན་ནམ། རྒྱུ་མཚན་དེའི་དབང་གིས་ང་ཚོས་ལག་ཟུང་བཟེད་ནས་ཁོ་ཚོའི་སྔུན་ལ་པུས་བཙུགས་ངང་སྡོད་བཞིན་ཡོད་པ་མ་ཡིན་ནམ། །
༢༠༡༣ ༥ ༧
རྒྱས་བཤད་གནང་བར་ཐུགས་རྗེ་ཆེ།
ཤུགས་རྒྱག་ནས་བཀླགས། ཁ་སང་ཞིག་ཁྱོད་ཀྱིས་བྲིས་པ་ནང་བཞིན་བྲོ་བ་དེ་མ་བྱུང་། ༼མི་གཏོང་བ་སོགས་ཡག་པོར་སྦྱོང་བརྡར་ཐེབས་ཀིན༽སྦྱོང་བརྡར་ཡག་པོ་ཟེར་དགོས་སར་ཡག་པོར་སྦྱོང་བརྡར་ཞེས་མི་བདེ་བ་དེ་འདྲའང་ཁ་ཤས་མཐོང་། དེ་ཙམ་མོ།།
ངས་སྔོན་མར་ཨ་རི་བ་དང་ཁོ་ཚོའི་ཁྱི་ལྟ་བུའི་ལྷུག་རྩོམ་ཞིག་བྲིས་ཏེ་བོད་ནང་གི་སྤྱན་དུས་དེབ་དང་ཨ་རིའི་ནུབ་གླིང་གི་བོད་གསར་ཤོག་གཉིས་སུ་སྤེལ་ཟིན་མོད། ང་ལ་ཁྱི་མེད་པའི་དབང་གིས་ཁྱེད་ཀྱི་འདི་བཞིན་ཞིབ་ཕྲ་འབྲི་ཐུབ་མ་སོང་། ཐུགས་རྗེ་ཆེ། ང་ལ་ཁང་པ་ཞིག་ཡོད་ན་ངས་ཀྱང་ཁྱི་ཕྲུག་ཆུང་ཆུང་ཞིག་ཉོ་གི་ཡིན། ངས་དེ་ལ་སངས་རྒྱས་ཀྱི་སྐུ་འདྲའི་མདུན་ལག་གཉིས་ཐལ་མོ་སྦྱར་ནས་མགོ་བོ་སྒུར་སྒུར་བྱེད་སྟངས་ཤིག་སློབ་འདོད། ངས་ནི་དེང་སང་ཁ་ན་ན་བར་དུ་རང་གི་སློབ་མ་ཨ་རི་བ་ཚོར་དབྱར་ཁར་གྲོག་མར་ཆུ་ག་གོན་གྱིས་ཟས་སྦྱིན་གཏོང་རོགས་ཞེས་འབོད་སྐུལ་ཞུ་གིན་ཡོད།
ཡོད་ཚད་ལྷ་དང་ལྷའི་ཡུལ་མིན་པ་ཤེས་ཡོད། ངེད་ཚང་གི་ཁྱི་རྒན་གྱིས་གནའ་སྔ་མོ་ནས་མོག་མོག་ཟོས་པ་རེད། ཧང་སངས་རྒྱུ་ག་རེ་ཡོད་པ་རེད།
ས་དེ་ནས་ཡག་སྡུག་གི་མི་ཚེ་མཐའ་ཡོད་པ་ཞིག་མིག་མཐོང་བྱུང་ན་དེ་ནས་ཁྱོས་ཁྱི་ལྟོ་དང་མི་ལྟོ་གཉིས་ལ་མ་འདྲ་ག་རེ་ཡོད་མེད་དང་། ཁྱི་ལྟོ་འདི་ཡག་དྲག་ནས་སྤྲད་པ་ཞིག་རེད་དམ། ཟས་ཀྱི་ནང་གི་སྙིག་མ་ཞིག་ཡིན་མིན་གསལ་པོ་ཤེས་ནི་རེད།
གྲོགས་པོ་ལགས་སུ་ཁྱི་ཕྲུག་ཆུང་ཆུང་གཉིས་ཡོད་ཙང་ཁྱི་གཉོར་སྐྱོང་སྐོར་ལ་ཡག་པོ་བྲིས་ཞག ཡིན་ཡང་། གྲོགས་པོར་བུ་ཕྲུག་ག་ཚོད་ཡོད་མེད་དང་བུ་ཕྲུག་ལ་སློབ་སྦྱོང་སྤྲོད་སྟངས་ཕྱོགས་ནས་ངོ་སྤྲོད་རེ་གནང་ན་ག་འདྲ་འདུག
ཁྱེས་བཤད་ནོ་བདེན་གི ང་མོས་མཐུན་ཡོད། མི་རིགས་ཁག་ཅིག་གིས་རྒྱུན་དུ་ཞལ་འདོན་འདོན་དུས་ཁ་ནས་སེམས་ཅན་ཐམས་ཅད་བདེ་སྐྱིད་ལྡན་པར་ཤོག་ཅེས་མིག་ཙུམ་ཙུམ་དང་མགོ་སྒུར་སྒུར་བྱེད་བཞིན་ཡོད་ན་ཡང་། ལག་ལེན་ཐོག དུད་འགྲོ་ལ་ཁྱད་གསོད་དང་མཐོང་ཆུང་ཚད་མེད་གཏོང་བ་ནི་ཁོ་ཚོའི་གོམས་གཤིས་འདོར་དུ་མེད་པ་དེ་ཡིན། གོམས་གཤིས་དེ་ལ་ང་ནི་ཡིད་མུག་ནས་ཡོད།
ང་ལའང་ལོ་གཅིག་དང་ཟླ་བ་དགུ་ཅན་གྱི་ཞིམ་ཕྲུག་ཆུང་ཆུང་ཐིག་ལེ་དང་ལྡན་པ་ཞིག་ཡོད་ལ་ཁོ་ནི་ངའི་བུ་ཚབ་དང་ང་ནི་ཁོ་གི་ཕ་ཚབ་ལྟ་བུའི་རྩེ་འདང་ཡོད།
མཁས་དབང་དགེ་འདུན་ཆོས་འཕེལ་གྱིས།
གཞན་ཕན་སྙིང་རྗེའི་སྣུམ་དང་བྲལ་ན་ཡང་།།
རིག་རྩལ་ཐབས་མཁས་གློག་གི་ཆོ་འཕྲུལ་གྱིས།།
དྲང་པོའི་མི་ལ་འཁྱོིག་པོའི་ལམ་སྟོན་པའ།།
སྐྲ་སེར་སྤྲེའུའི་རིགས་ལ་དོགས་ཟོན་མཛོད།།
གསུངས་པ་འདི་ཡང་དེ་དུས་རྒྱ་གར་ནང་། །
ཨིན་ཇིའི་བཙན་རྒྱལ་རིང་ལུགས་ལ་གཟིགས་ནས། །
རང་གི་ཉམས་མྱོང་བོད་པར་གདམས་པ་ལས། །
ཁྱི་ཉར་ཉམས་མྱོང་གསོག་ལ་སྦྱར་དོན་མེད། །
ཡག་པོ་རེད། ཡག་པོ་བྱས་ཤག
དེང་སང་མི་རིན་པོ་ཆེ་ལས་ཁྱི་རྩ་ཆེན་པོ་ཡིན་ནི་རེད།
དུད་འགྲོ་ཁྱི་ཞིག་ལ་དེ་འདྲའི་མཐུན་རྐྱེན་སྦྱོར་ཐུབ་ཀྱི་ཡོད་ན།
མི་ལས་རིན་པོ་ཆེ་ཐོབ་པའི་མི་ཉམ་ཆུང་ཞིག་ལ་མཐུན་རྐྱེན་སྦྱོར་མ་ཐུབ་པ་ག་རེ་ཡིན་ནམ།
ཡག་པོ་བྲིས་འདུག། བོད་ཀྱི་འབྲོག་ཁྱི་དེ་ཚོ་ཡང་དྲན་ཡོངས་གི་འདུག།
གྲོགས་པ་ལགས་ལ། ཁྱི་ཕྲུག་ཆུང་ཆུང་གཉིས་ཡོད་ཙང་ཁྱི་གཉོར་སྐྱོང་སྐོར་ཡག་པོ་བྲིས་ཞག ཡིན་ཡང་། གྲོགས་པོར་བུ་ཕྲུག་ག་ཚོད་ཡོད་མེད་དང་དེ་གར་བུ་ཕྲུག་ལ་སློབ་སྦྱོང་སྤྲོད་སྟངས་ཕྱོགས་ནས་ཀྱང་ངོ་སྤྲོད་རེ་གནང་ཐུབ་ན་ལྷག་ཏུ་ཡག་གི
“མྱི་ལ་བརྩེ་བ་མེད་ཅིང་ཁྱི་ལ་བརྩེ་བ་”ཞེས་བའི་གཏམ་དཔེ་དེ་ནུབ་ཕྱོགས་ན་འཚོ་བ་དངོས་སུ་གྱུར་ཡོད་འདུག་ དཔེར་ན་། མྱིའི་བར་ལ་བརྩེ་བ་ཡོང་དཀའ་ཞིང་གཟའ་ཐོར་དང་། ཕན་ཚུན་གསོད་རེ་། རང་སྲོག་རང་གིས་གཅོད་པ་སོགས་ནི་ནུབ་ཕྱོགས་ཀྱི་གསར་ལམ་རྒྱུན་ལྡན་ཡིན་། ནུབ་ཕྱོགས་སུ་རང་ཁ་འཁྱོར་མི་འཁྱོར་བའི་མྱི་དག་གིས་ཁྱི་ལ་ཡོད་ཚད་སྦྱིན་ཨེ་ཐུབ་ལྟ་།
ནུབ་ཕྱོགས་ན་རང་ཁ་འཁྱོར་གི་མེད་ན་ཤར་ཕྱོགས་པ་མང་པོའི་སེམས་ན་ནུབ་ཕྱོགས་ཁོ་ན་དྲན་དགོས་དོན་ཡོད་པ་མ་རེད། སྐད་ཆ་འདི་དོན་ལ་གནས་མེད། དེ་གཅིག་རེད།
ཁྱི་ལ་རྩེ་བ་ཡོད་ན་མྱི་ལ་རྩེ་བ་མེད་པའང་ཡིན་རྒྱུ་མ་རེད། སྐད་ཆ་འདི་བཀའ་ལོག་རེད། དེ་གཉིས་བྱས།
བཟའ་ཐོར་དང་ཕན་ཚུན་གསོད་རེས། རང་སྲོག་རང་གིས་གཅོད་པ་སོགས་ནི་ཤར་ཕྱོགས་ན་ཡང་ག་ཚད་དགོས་དགོས་ཡོད། གསར་འགྱུར་ལ་ཐོན་མ་ཐོན་གི་ཁྱད་པར་ཡིན། དེ་གསུམ་རེད།
ཡིན་ན་ཡང་ནུབ་ཕྱོགས་པ་ཕལ་ཆེ་བ་ནི་འདོད་པ་མེད་པ་དང་ལྟ་བ་མི་མཐུན་པ་དང་མཉམ་དུ་མི་ཚེ་ཨུ་ཚུགས་མཐར་སྐྱེལ་མི་བྱེད་པ་དེ་ཡང་ཁོ་བ་ཚོའི་གཤིས་ཀ་ཞིག་རེད། བཟའ་ཐོར་ཚར་རྗེས་ཤར་ཕྱོགས་པ་ནང་ལྟར་ཕན་ཚུན་མཐོང་མི་སྤྲོ་བ་དང་། ཁ་མི་གྲག་པ། དགྲ་བཞིན་ལྟ་བའི་གཤིས་ཀ་དེ་སེམས་ན་མི་འདུག་ལ། ཕན་ཚུན་མི་དགའ་བའི་རྣམ་འགྱུར་སྟོན་པ་དང་ཕན་ཚུན་དགྲ་ལྟར་བཟུང་བའི་སྡང་སེམས་དེ་ཡང་ཤར་ཕྱོགས་པ་ནང་བཞིན་མ་རེད།
གང་ལྟར་ཁྱི་དང་ཞི་མི་སོགས་ལ་གསོ་སྐྱོང་བྱེད་ཚུལ་ནི་ཤར་ཕྱོགས་ཀྱི་མི་རིགས་ཁ་ཤས་དང་བསྡུར་ན་མི་ལས་ཀྱང་ལྷག་པར་བདག་སྐྱོང་གང་ལེགས་གནང་བཞིན་འདུག ཤར་ཕྱོགས་པ་མང་པོ་ཞིག་ནི་རྒྱུན་དུ་དོན་མེད་ཞེན་ཁོག་ལ་དགའ་བོ་ཡོད་པ་ངས་ཤེས། མི་དེ་འདྲ་ནི་རང་ཕྱོགས་ཁོ་ནར་བསྟོད་པ་རྐྱང་བྱེད་ཀི་རེད།
ཨ་ལེ་་་་་བོད་པའི་མོག་མོག་ཁྱོད་ཚང་གི་ཁྱིའི་ཟ་མ་ཡིན་དུས་་་་་་ཁྱོད་ཚང་གི་མིའི་ཟ་མ་རྒྱ་ཐུག་ཡིན་རྒྱུ་རེད་པ།