ཆང་སྐྱེས།
སྐྱ་རེངས་འོད་ཀྱིས་སྐར་མའི་ཏིང་འཛིན་དཀྲོགས།།
འདབ་ཆགས་མ་བུའི་གཤོག་ཟུང་རིང་དུ་བརྐྱངས།།
ཚང་ཚིང་ནགས་ཀྱི་ལྗོན་ཤིང་ལོ་མའི་སྟེང་།།
མཚན་མོར་བཏབ་པའི་མུ་ཏིག་འོད་དུ་འཚེར།།
འགྲམ་པ་ལག་པས་སྐྱོར་ཏེ་འདང་ཞིག་བརྒྱབ།།
འཛུབ་མོ་ནང་ལ་བཀུག་སྟེ་རྩིས་ཤིག་བཏབ།།
མདང་གསུམ་རྨི་ལམ་ཞིང་གི་བུ་མོ་དེ།།
ད་དུང་མཐོང་བའི་ལམ་ན་ལྷུག་ལྷུག་འཛུམ།།
ཁུ་བྱུག་གཞོན་ནུ་རྒྱ་གར་ཡུལ་ན་སྡུག།
བྱེའུ་ཆུང་འཇོལ་མོ་རྒྱ་རྫོང་ནགས་ན་སྐྱོ།།
མཛའ་གཞས་སྙན་མོ་འདི་འདྲ་ཡོད་ན་ཡང་།།
བདག་གིས་ཁྱེད་ལ་སྙན་ངག་ཇི་ལྟར་འབྲི།།
སྲོང་བཙན་སྒམ་པོས་ཀོང་ཇོ་ཐབས་ཀྱིས་བསུས།།
གུར་གར་རྒྱལ་པོས་འབྲུག་མོ་བཙན་གྱིས་འཕྲོག།
གཏམ་རྒྱུད་འདི་འདྲ་བོད་ལ་མང་མོད་ཀྱང་།།
ཁྱེད་ལ་གཏད་པའི་བརྩེ་བ་གཙང་མ་ཡིན།།
བསམ་གཞིགས་མགོ་བོ་བྲང་ཁོག་སྟོད་ལ་སྨད།།
ཐ་མག་ཚེ་སྲོག་རེ་རེ་ཤུགས་ཀྱིས་རྔུབ།།
རང་སེམས་རང་གིས་གསོས་པའི་ཨུ་ཚུགས་ཀྱིས།།
སྡུག་སེམས་འཁྱག་ལ་སྦྱར་བ་ཉུང་ཉུང་མིན།།
ཁོ་བོས་སྲེད་པའི་ཟུར་མིག་ཁྱེད་ལ་གཏད།།
ཁྱེད་ཀྱིས་ཞེན་ཆགས་ཕྱིར་མིག་བདག་ལ་བཞག།
ཡིད་འོང་ལྷོད་ཀྱིས་འཛུམ་པའི་མཛེས་སྡུག་གིས།།
སེམས་ཀྱི་ལྷིང་འཇགས་དཀྲོགས་ལ་ཅི་ཞིག་ཁག།