འབུར་དཀར་ཕྲིན་ལས་ནས།
སེར་ཆེན་ཉི་མ་ལགས་ཁྱེད་ཤར་ས་ན་ང་ཚོ་སྒུག་ཡོད། དད་དམ་གྱི་མཁའ་དབྱིངས་དྭངས་ཤིང་། ལྷག་བསམ་དང་སྙིང་སྟོབས་ཀྱི་ཁ་བས་བཀླུབས་པའི་གནས་མཆོག་འདིར། ཁྱེད་ཤར་ས་འཆུག་པ་ག་ནས་ཡིན། འོན་ཀྱང་ཉི་ཟེར་ཚ་དྲོད་ཀྱི་མ་ལག་རྒྱས་བཞིན་པའི་སྐབས་ཤིག་ན། ཕྱི་ནང་དང་ཁ་ཞེ་མི་མཚུངས་བའི་གཡོ་འཕྲུལ་གྱི་བུ་ཡུག་དང་འདོད་རྔམ་གྱི་ཁ་ཆར་དྲག་པོས་ང་ཚོ་དང་ཁྱེད་བཙན་གྱིས་ཕྲལ། དུས་དེ་ནས་ད་བར། དྲན་ཐེངས་རེར་མིག་ཆུ་རེ། ལྟ་ཐེངས་རེར་ཡིད་ཆད་རེ། གནས་འདི་ན་སྦྲང་ཆར་ཆད་སོང་། ཉི་འོད་ཡོལ་སོང་།
རེད་དེ། ད་དུང་ཡང་། གངས་རི་ཇེ་དཀར་རེད། རྩི་ཤིང་ཇེ་མང་རེད། མེ་ཏོག་ཇེ་བཀྲ་རེད། བུང་བ་ཇེ་མང་རེད། ནམ་ཡང་བསླུས་མེད། ནམ་ཡང་འགྱུར་མེད། སེར་ཆེན་ཉི་མ་ཁྱེད་ཤར་ས་ན་ང་ཚོ་སྒུག་ཡོད། ལག་པས་ལག་པ་སྦྲེལ་བ་ཇེེ་དམ་ཡིན། །སེམས་པས་སེམས་པ་སྦྲེལ་བ་ཇེ་བརྩེ་ཡིན། །རེད་དེ། གོ་ལའི་འཁོར་འགྲོས་དལ་དུ་སོང་བ་ཨེ་རེད། ཡིན་མི་སྲིད། ཁྱོད་ལ་དུང་བ་ཆེ་དྲགས་པས་རེད། སྒུག་ཡུན་རིང་སོང་། སེར་ཆེན་ཉི་མ་ལགས་ཁྱེད་མགྱོགས་པོར་ཕེབས་དང་། གནས་འདིར་སྔར་བཞིན་དད་དམ་གྱི་མཁའ་དབྱིངས་དྭངས་ལ། ཆོས་སྲིད་འདྲེས་མའི་ཐལ་འཚུབ་མེད་ཅིང་། དམ་སྡོམ་ཉམས་པའི་བུ་ཡུག་མེད། ཕྱི་ནང་གོ་ལྡོག་གི་ཚེར་མ་མེད་ཅིང་། གཡོ་སྒྱུ་མགོ་སྐོར་བྱེད་མཁན་གྱི་ཁྱི་སྤྱང་མེད། རྒྱབ་མདུན་མི་མཚུངས་བའི་སྤྲེའུ་རྔ་རིང་སྣ་ནག་མ་མེད་ལ། ཕྱི་ཐག་ཐུང་བའི་ཕག་པ་རྔ་རྡུམ་དེ་བས་ཀྱང་མེད། ས་གཙང་དང་ཆུ་གཙང་ཡིན། དམ་གཙང་དང་སྡོམ་གཙང་ཡིན། མདོག་མདོག་མིན། གྱུ་གྱུ་མིན། ཅི་གསུང་མཚན་འཛིན་ཡིན། ཅི་མཛད་ལེགས་མཐོང་ཡིན། སེར་ཆེན་ཉི་མ་ལགས་ཁྱེད་ཤར་ས་ན་ང་ཚོ་སྒུག་ཡོད།
གནས་འདིར་མི་ལྷ་རུ་འདོད་པའི་བཅོས་མའི་ལྷ་མེད་ལ། མི་འདྲེ་རུ་འགྱུར་པ་གསོན་འདྲེ་ངོ་མ་མེད། མི་ཡུལ་དྭངས་མ་ཡིན། ཁྱེད་ཤར་ས་ན་ང་ཚོས་སྒུག་སྡད་ཡོད། སེར་ཆེན་ཉི་མ་ལགས།
ཕྱི་ལོ་ ༢༠༡༩ ཟླ་ ༦ ཚེས་ ༢༦ ཉིན།
ཡག་པོ་བྲིས་འདུག་གསེར་ཆེན་ཉིན་མ་ལགས་ཁྱེད་ལ་ལྟོས་ནས་སྒུག་མཁན་མང་ཁྱེད་ཡང་ཡང་མངོན་རོགས་འཆར་རོགས་གཏན་དུ་ཡིན།