ཁྱེད་སྐུ་ཚེ་བསྲིང་དགོས།

——ལྷ་རྒོད།
 
སྐྱབས་སངས་རྒྱས་ཁྱེད་ཡིན།།
མགོན་དམ་ཆོས་ཁྱེད་ཡིན།།
གྲོགས་དགེ་འདུན་ཁྱེད་ཡིན།།
ངའི་མཆོག་གསུམ་ཁྱེད་ཡིན།།

སྐུ་མཚན་དཔེ་དེ་ཡིས།།
མ་འགྲོ་བའི་འཁོར་ཚོགས།
ཡིད་དགའ་བདེའི་ཚོར་བ།།
གྲངས་བགྲང་ཡང་མི་ཚར།།

གསུང་འགག་མེད་རང་སྒྲས།།
འཁོར་བུ་སློབ་སྣ་ཚོགས།།
ཆོས་འཇིག་རྟེན་གཉིས་ཀྱི།།
ལམ་ཡང་དག་བསྟན་སོང་།།

ཐུགས་བྱང་སེམས་དེ་ཡིས།།
དགྲ་ཤ་བ་ཡིན་རུང་།།
བུ་གཅིག་པའི་མ་ལྟར།།
དུས་ཀུན་ཏུ་གཟིགས་ཡོད།།

དྲིན་ཕ་ལོ་ཁྱེད་ཡིན།།
བྱམས་མ་ལོ་ཁྱེད་ཡིན།།
སྙིང་ཉེ་ས་ཁྱེད་ཡིན།།
ངའི་སྙིང་ནོར་ཁྱེད་ཡིན།།

ཚེ་འདི་ཡི་དཔོན་ཡིན།།
ཚེ་ཕྱི་མའི་མགོན་ཡིན།།
དུས་ཀུན་ཏུ་གཉེན་ཡིན།།
ངའི་ཡོད་ཚད་ཁྱེད་ཡིན།།

ཁྱེད་མཇལ་ཐེངས་རེ་ལ།།
ངོ་མིག་ཆུས་བརླན་ཡོང་།།
ཁྱེད་དྲན་ཐེངས་རེ་ལ།།
ལུས་བ་སྤུ་ཟིང་ཡོང་།།

ང་སྐྱིད་རུང་སྡུག་རུང་།།
ཕ་བླ་མ་ཁྱེད་ཉིད།།
མགོའི་ཡ་ཐོད་མྱིག་ཡིན།།
སྙིང་དམར་པོ་བཅུད་ཡིན།།

མ་འགྲོ་བ་ཀུན་གྱི།།
སྐྱབས་ཀུན་འདུས་ངོ་བོར།།
དུས་སྲིད་མཐའི་བར་དུ།།
ཁྱེད་སྐུ་ཚེ་བསྲིང་དགོས།།

ཚེག་བར་ལྔ་ཅན་གྱི་རྩོམ་ཡིག་དེ་རིང་མ་གཏོགས་བྲིས་མ་མྱོང་བས་ཡག་པོ་ཞིག་ཡོང་ཁག་པོར་འདུག །ཁ་རྩང་རྩོམ་གདན་ལྟ་བུ་ཞིག་ཐོལ་བྱུང་དུ་བྲིས་པར་གྲོགས་མི་ཉུང་བ་ཞིག་གིས་དགའ་མོས་ཆེན་པོ་གནང་སོང་བས་བུ་མོ་ཡག་འདུག་ཟེར་དུས་ཕྱི་རྟིང་གནམ་ལ་བཀྱག་ཞེས་པའི་དཔེ་ལྟར། དེ་རིང་གོང་འོག་གསར་བརྗེ་དང་ཤོ་ལོ་ཀ་གསར་འཇུག་སོགས་ཀྱིས་ལེགས་བཅོས་ཀྱང་ཏོག་ཙམ་བྱས་ཡོད།། ལྷ་རྒོད་ཀྱིས།