མི་ཉག་དུང་བརྡ།
ངས་འཁོས་ལྕོགས་ཀྱིས་བྲོད་ཁ་སློང་པའི།
འུ་གཉིས་ཀྱི་མཛའ་བརྩེའི་རིན་ཐང་ལ་གློ་བ་དཀར་ཡང་།
ཁྱེད་ཀྱིས་བདག་ལ་ལེ་བདའ་དང་སྐང་རའི།
རྨ་ཁ་ཇི་ཙམ་བརྩེགས་ཀྱང་།
ངས་གཏན་དུ་ཁྱོད་ལ་བཟོད་སྒོམ་བྱེད་ཆོག
ངའི་མིག་ཁར་ཁྲ་ཆིལ་ལེར་བཞད་པའི།
ཁྱེད་དང་ངའི་གཏམ་རྒྱུད་ཀྱི་སྐྱེལ་ཚལ་དཀྱེལ་ཆེ་དེར།
ཁྱེད་ཀྱིས་བསམ་བཞིན་དུ་གཟུར་གང་ཐུབ་དང་།
འབུར་འཇོམས་གཏོང་ཅི་ཐུབ་བྱེད་རུང་།
ངས་གཏན་དུ་ཁྱོད་ལ་བཟོད་སྒོམ་བྱེད་ཆོག
བདག་གི་འབྲི་མར་ལས་ཀྱང་འཇམ་པའི།
སེམས་ཀྱི་ངོས་ལྟེབ་ཏུ།
སྐྱོ་གདུང་དང་ན་ཟུག་གི་རྩུབ་རེག་ཇི་འདྲའི་ཟབ་ཀྱང་།
ངས་གཏན་དུ་ཁྱོད་ལ་བཟོད་སྒོམ་བྱེད་ཆོག
ངས་འུ་གཉིས་ཀྱི་མིག་མདུན་ན།
ལྷུག་ལྷུག་ཏུ་དགོད་པའི་སྐལ་བཟང་མེ་ཏོག་ཅིག་ལ།
ཆུ་ལུད་དྲོད་གཤེར་གྱི་གསོན་ཤུགས་ཇི་ཙམ་སློང་ཡང་།
ཁྱེད་ཀྱིས་སྨྲེང་སེམས་དང་གཙི་འདང་གང་ཡང་མེད་པར།
འཛུམ་མདངས་དང་དགོད་སྒྲའི་ལྭ་བ་དྲོན་མོ་སློག་གང་ཐུབ་བྱས་རུང་།
བདག་ལ་དབང་བ་ནི
ཉིལ་ལི་ལི་ཡི་མཆི་མ་དང་།
ན་ཟུག་ལྕི་མོ་ཞིག་གི་ཕྱི་ཤུན་བཤུ་བའི།
སྒམ་དཀྱེལ་གྱི་བློ་ཁོག་ཅིག་དང་།
གུ་ཡངས་ཀྱི་སེམས་པ་རློན་པ་ཞིག་གིས།
ངས་གཏན་དུ་ཁྱོད་ལ་བཟོད་སྒོམ་བྱེད་ཆོག །
ཨ་རོགས། ད་སྐབས་མི་ཉག་ཚང་གི་དུད་ཁུང་ནས་དུ་བ་སྔོ་ལྷོག་ལྷོག་འཕྱུར་གྱི་འདུག ཨ་ལ་ཀུ་རེ་ཡིན། བདག་ལ་ངེས་པར་ཏུ་ཁ་པར་ཞིག་གཏོང་རོགས། བདག་གིས་སྐུ་ཉིད་ཀི་ཨངས་གྲངས་བརླག་འདུག
གྲོགས་ཁྱེད་ཀྱིས་འུ་གཉིས་ཀྱི་མཛའ་བརྩེར་དུངས་ཐག་ཆོད་དེ་ཁ་པར་ཨང་གྲངས་སྤྲོད་ཚོད་མི་འདུག ཀུ་རེ་ཡིན།