ཆང་སྐྱེས།
མཐོན་མཐིང་ཨ་སྔོན་དགུང་གི་རྒྱུ་སྐར་གྱི་དབུས་ནས།།
དཀར་གསལ་བཅོ་ལྔའི་ཟླ་བ་ཡིད་འོང་གིས་འཛུམ་དུས།།
བརྩེ་སེམས་ཁྱོད་ལ་ཞོགས་པའི་བདག་སེམས་ཀྱི་རྟ་ཕོས།།
དྲན་གདུང་ལྕགས་སྒྲོག་གཅོད་ལ་ཐེ་ཚོམ་ཞིག་མི་འདུག།
མེ་ཏོག་སྤང་ལ་བཞད་པ་དུས་ཚིགས་ཀྱི་ལང་ཚོ།།
སྤྲིན་པ་རླུང་གིས་འཁུར་བ་སྐྱོ་གདུང་གི་ན་ཟུག།
སྣང་བ་ཆང་གིས་མྱོས་པའི་འཆར་ཡན་གྱི་ཀློང་ནས།།
ཁྱོད་ཞལ་པད་མོ་བདག་གི་སྙིང་ག་རུ་བཞད་སོང་།།
ས་སྲོད་མཚམས་སྤྲིན་དམར་བའི་མཛེས་སྡུག་གི་ངོཊ་ནས།།
ཁྲུང་ཁྲུང་དཀར་མོ་ཆ་ཞིག་རྒྱང་རིང་ལ་འཕུར་དུས།།
དུང་བ་ཁྱེད་ལ་ཟབ་པའི་འཁྲེང་ཞེན་གྱི་ཕྱིར་མིག།
སྙིང་སྡུག་ཁྱེད་ཀྱི་ཕྱོགས་ལ་མདའ་མོ་བཞིན་ཤོར་སོང་།།
སྨག་རིམ་མུན་པ་སྟུག་པོའི་སུན་སྣང་དང་འགྲོགས་ནས།།
འབྲུག་མོས་གུ་གར་དྲན་པའི་འཕྲིན་པ་དེ་གོ་ན།།
དྲན་གདུང་ལྕི་མོའི་མིག་ཆུ་དབང་མེད་དུ་ཤོར་ཏེ།།
ཡ་ཐོད་ཁྲ་ཆུང་མིག་གི་མཐོང་ལམ་ཡང་བསྒྲིབས་སོང་།།
བརྩེ་བ་ཁྱེད་ལ་གཏད་པའི་དུང་ཞེན་གྱི་སེམས་པ།།
བདག་གིས་ཁྱོད་ལ་ཕུལ་བའི་དྭངས་གཙང་གི་ལག་སྐྱེས།།
འཛུམ་གྱིས་ཕྱུག་པའི་ཁྱེད་ཀྱི་ཟུར་མིག་གི་གཡོ་འགུལ།།
བདག་གི་སྙིང་ལ་ཟུག་པའི་མེ་ཏོག་གི་མདའ་མོ།།
ཆར་བ་ཟ་ཟིམ་འབབ་པའི་དོ་དགོང་གི་མཚན་མོ།།
སེམས་ཀྱི་སྙིང་སྡུག་ཁྱེད་རང་ལྷག་པར་ཏུ་དྲན་བྱུང་།།
སྨུག་པ་ལང་ལོང་འཐིབ་པའི་བསམ་གཞིག་གི་ཀློང་ནས།།
ཁྱོད་ནི་བདག་ལ་མཚོན་ན་ཚེ་སྲོག་གི་རིན་ཐང་།།