འབའ་སྲས།
མིག་གིས་རྒྱང་རིང་མི་མཐོང་ཞིང་།།
མདུན་ནས་སྡོད་དུ་མི་འཇུག་པ།།
སེམས་སུ་དུག་སྦྲུལ་ལྕེ་ལྡན་པ།།
ཁྱོད་ཚོའི་ཁ་ནང་ཁུ་ཚུར་སྟེར།།
ཁ་ནས་བོད་སྐད་མི་སྨྲ་བ།།
ལག་པས་བོད་ཡིག་རྨོངས་པ་ཅན།།
སེམས་ན་བོད་པའི་དྲི་མེད་པ།།
ཁྱོད་ཚོའི་ཁ་ནང་ཁུ་ཚུར་སྟེར།།
ལག་ཏུ་གྲི་དང་མདུང་བཟུང་ཞིང་།།
སེམས་སུ་གནོད་པའི་མཚོ་འཕྱུར་བའི།།
རང་མི་རང་གིས་གསོད་པ་པོ།།
ཁྱོད་ཚོའི་ཁ་ནང་ཁུ་ཚུར་སྟེར།།
བླ་མ་གྲོངས་ན་མྱ་ངན་མེད།།
མཁས་པ་འདས་ན་རྗེས་དྲན་མེད།།
ཕ་མ་ཤི་ན་མིག་ཆུ་མེད།།
ཁྱོད་ཚོའི་ཁ་ནང་ཁུ་ཚུར་སྟེར།།
སློབ་གྲྭར་ཆས་ཀྱང་ཤེས་བྱ་མེད།།
ཚོང་ལ་སོང་ན་ཡོང་སྒོ་མེད།།
ཁྱིམ་ནས་བསྡད་ན་ཕན་ཐོགས་མེད།།
ཁྱོད་ཚོའི་ཁ་ནང་ཁུ་ཚུར་སྟེེར།།
དགྲ་བོ་དྲིན་ཆེ་གཉེན་དུ་མཐོང་།།
ཕ་གསོད་བུ་ལ་བྱ་དགའ་ཕུལ།།
དགྲ་གཉེན་དབྱེ་བ་མི་འཁོར་བ།།
ཁྱོད་ཚོའི་ཁ་ནང་ཁུ་ཚུར་སྟེར།།
ཁྱིམ་གྱི་ཟ་མ་ཚར་སོང་རུང་།།
བུ་ཕྲུག་ལྟོགས་ནས་ཤི་སོང་ཡང་།།
དྲན་རྒྱུ་བསམ་རྒྱུ་གཅིག་མེད་པ།།
ཁྱོད་ཚོའི་ཁ་ནང་ཁུ་ཚུར་སྟེར།།
ཁང་པ་གཞན་གྱིས་འཕྲོག་སོང་རུང་།།
ཆུང་མ་གཞན་ལ་ཉལ་སོང་རུང་།།
རང་བདག་རང་གིས་མི་ཐུབ་པ།།
ཁྱོད་ཚོའི་ཁ་ནང་ཁུ་ཚུར་སྟེར།།
བླ་མས་ཆོས་ལོག་གསུངས་ན་ཡང་།།
མཁས་པས་ལོག་འགྲེལ་བྱསས་ན་ཡང་།།
བདེན་ནོ་དེ་འོ་བསྟོད་པ་པོ།།
ཁྱོད་ཚོའི་ཁ་ནང་ཁུ་ཚུར་སྟེར།།
བོད་ཡིན་བོད་ཡིག་མི་ཤེས་པ།།
བོད་ལ་ཤ་ཞེན་མེད་པ་ཚོ།།
བོད་ལ་ཕན་ཐོགས་ཅི་ཡང་མེད།།
ཁྱོད་ཚོའི་ཁ་ནང་ཁུ་ཚུར་སྟེར།།
བོད་ཀྱི་ཡུལ་ཁོར་སྲུང་ཆེ་བ།།
བོད་ཀྱི་སྐད་ལ་འདང་ཆེ་བ།།
བོད་རིགས་ཡིན་པར་ངོ་ཤེས་པ།།
ནམ་ཡང་བདག་གི་སེམས་པ་སྟེར།།
༢༠༡༧/༠༤/༢༡ རང་ཁྱིམ་སྙན་ངག་བཞུར་ཁྱིམ་ནས།