རས་པ
——-
ནམ་ཞིག ཁྱེད་རང་བཞུད་འགྲོ་ཁའི་སྐད་ཅིག་མའི་དུས་དེར་ཡང༌། བདག་གི་སྣང་བ་གཙང་མ་འདི་ལ་ཕྱིར་ལྟོས་ཡང་ཡང་གནང་རོགས་ཞུ། སྲོད་ཁའི་རླུང་བུ་ཕྲ་མོས་སྐྲ་ལོ་སིལ་སིལ་སྒུལ་བའི་ངང་ཚུལ་དེ་ནི་ཞི་འཇམ་གྱི་སེམས་དོན་ལ་ཡང་ཡང་འགྲེལ་རོགས་ཞུ། ཁྱེད་རང་བཞུད་འགྲོ་དུས། དུས་སྐར་གྱི་ཆ་ཤས་རེ་རེས་བདག་ཉིད་ཀྱི་ཡོད་ཚད་སྟོང་བར་བཟོ་ངེས་ཀྱང༌། ནམ་མཁའི་དབྱིངས་ཀྱི་ཟླ་ཟེར་ཕྲ་མོ་ཞོགས་རྩྭའི་ཟིལ་ཐིགས་བཞིན་ཁྱོད་ཀྱི་མིག་མཐའ་རུ་མ་ལེན་རོགས།
བདག་ཉིད་འགྲུལ་བཞུད་ལ་གོམས་པའི་རྐང་ལམ་ཕྲ་མོའི་ཟུར་དུ། ལྗོན་པའི་རྩེ་མོ་ནང་དུ་བཀུག་སྟེ་ང་ལ་བརྩི་བཀུར་མེད་པའི་བཟོ་ལྟ་རེ་སྟོན་སྲིད་ཀྱང༌། ཟླ་འོད་གཙང་བོར་བཞུར་བའི་གཅེས་སེམས་ཁོ་ནས།ངས་ཁྱེད་ཀྱི་སྐྲ་ལོ་ལས་མང་པའི་རང་ཉིད་ཀྱི་མདུན་ཕྱོགས་སུ་ཡང་ཡང་ལྟ་སྲིད། ཁྱེད་ཀྱི་གཅེས་ངག་ལས་མངོན་པའི་གཞས་དབྱངས་ཕྲ་མོའང་སྣང་བ་གཙང་མའི་བསིལ་གདུགས་སུ་འཁྱེར་ངེས་ལགས། ཁྱེད་རང་ཕེབས་རྗེས་སུ། བདག་གི་གཉིད་ལམ་ནི་སྟོང་ཁམས་ཆེན་པོ་ཞིག་ཏུ་ཅིས་ཀྱང་འགྱུར་བར་ཤོག
ཁྱེད་ལ་བལྟས་པའི་ངང་ཚུལ་ནི་རི་བྲག་གི་འགུལ་བསྐྱོད་ཕྲ་མོ་མཐོང་བའི་ལྷ་དབང་སུ་ཞིག་གི་མིག་ཤེས་བཞིན་གསལ་ལྷིང་ངེར་ཡོད་ནའང༌། ང་ལ་སྐྱོ་སྣང་གི་རླབས་ཀྱིས་སྐྱོམ་པའི་སྡུག་ཡས་ཀྱི་འཚོ་བ་དེ་མི་དགོས་ལགས། ཁྱེད་རང་མགྱོགས་མྱུར་གྱིས་ཕེབས་རྗེས། ངས་སྣང་བ་གཙང་མ་འདི་ལ་བྱི་དོར་ཡང་ཡང་བགྱིས་ཏེ། བདག་གཉིས་འགྲོགས་ནས་མི་ལོ་ཆིག་སྟོང་རྗེས་ཀྱི་གྱེས་བྲལ་ཅིག་ཏུ་བལྟ་བར་བྱ།དེ་ཡང་འདྲིས་ནས་རྙིང་བའི་རྒྱན་ཆ་ཞེ་རྩིས་ཅན་ཞིག་ཏུ་བསམ་པར་བྱ། གྱེས་བྲལ་ནི་འཚོ་བའི་སྣང་ཚུལ་ཞིག་ཡིན་ནམ། གྱེས་བྲལ་ནི་འཚོ་བའི་དོན་དུ་སྡུག་བསྔལ་ཞིག་ཡིན་ནམ། ཁྱེད་ནི་གྱེས་བྲལ་ཞེས་པ་འདི་ཡིན་ནམ། ཁྱེད་རང་འགྲོ་དུས། ང་ལ་མ་གསུངས་རོགས།
༢༠༠༨ ། ༤ ། ༡༥ཉིན།