བཀྲ་ཤིས་དོན་འགྲུབ།
རི་སུལ་སྨུག་པའི་རྒྱ་མཚོར་བྱིངས་བ་དང་།།
སེམས་ཀྱི་བྱང་ཐང་ནད་ཀྱིས་བཟུང་བ་དག།།
རི་རྒྱལ་ཧད་ཀྱིས་འགྱོགས་པའི་ཤེད་འདྲ་བའི།།
སྙན་ངག་ཡུལ་ཁམས་འདར་བའི་ཆོ་འཕྲུལ་ལགས།།
འདྲེ་ཤིག་ལུས་ལ་འབྱར་འདྲའི་མི་རུལ་ཚོ།།
དྲི་ངན་སྲིད་པའི་ཁམས་ལ་མ་འགྲེམས་ཤིག །
ཁ་ནག་མེ་རུ་འབར་བའི་གྱོད་ལངས་ན།།
མགོ་བོ་རྡོ་ལ་བརྡབ་དགོས་ཐུག་ཡོང་ངོ་།།
མེ་ཏོག་རྒྱ་སེ་འདྲ་བའི་སྨན་ཆུང་མའི།།
འཛུམ་ཆུང་འོག་གི་ཚེར་མ་རྣོ་དྲགས་པས།།
སེམས་པ་ཕར་ལ་ཤོར་བའི་རྗེས་རོལ་ན།།
སྙིང་ལ་ཚ་ཟེར་རྒྱག་པའི་སྡུག་བསྔལ་ཡོད།།
ནམ་གུང་ཁྱི་སྤྱང་ལྡོམ་པོས་སྙིང་རླུང་སློང་།།
སྲོད་ལ་དུག་སྦྲང་ནག་པོའི་དམག་འཐབ་འཁྲུགས།།
ལྟས་ངན་དགུ་ཡིས་ཁེངས་པའི་འཇིག་རྟེན་འདི།།
ཟས་ཀྱི་སྙིགས་མའི་ལྷན་དུ་དོར་ན་འདོད།།
ཁྭ་ཏ་ནག་པོའི་ཨག་སྐད་འཛེར་པོ་དང་།།
རུས་རྐང་གླིང་བུའི་ཧང་སྐད་རྩུབ་མོ་སྟེ།།
རྣ་བ་སུན་དུ་འཇུག་པའི་སྒྲ་ངན་དག།།
ང་ལ་ཞེ་འཁོན་སློང་བའི་གཏེ་པོ་ཡིན།།