བདེ་ཆེན་སྒྲོལ་མ།
ཁྱོད་སོང་ཤུལ་དུ།
ཁང་མིག་ཆུང་ཆུང་འདི་ལ་རླུང་ལྡང་སོང།
ནམ་རྒྱུན་དགོད་སྒྲའི་བཟུང་བའི་ཁང་མིག་ཆུང་ཆུང།
ཁ་སང་དེ་རིང་ཚེར་མའི་ཁེངས་པའི་ས་གཞིར་གྱུར་ཡོད།
ཁྱོད་སོང་ཤུལ་དུ།
ལྷང་འཇགས་དང་རྒྱང་མིག་ཁྲོད་ཀྱི་ཟླ་བ་དཀར་པོ།
སྒེའུ་ཁུངས་སྔས་སུ་བྱས་པའི་མི་རྐྱང་གི་མཛའ་མོ་ཡིན།
ཁྱོད་སོང་ཤུལ་དུ།
མཚན་མོ་རིང་དུ་བུད་སོང།
ལང་ཚོའི་དྲོད་ཤ་ལ་སྒུག་པའི་མཚན་མོ་རེ་རེ།
སྨག་མུན་གྱིས་བཏུམ་པའི་ལོ་ཟླར་གྱུར་སོང།
ཁྱོད་སོང་ཤུལ་དུ།
སྡོང་ལོ་ལྷུང་བ་ཡང་སྡུག་བསྔལ་ཞིག
དྲན་པ་ནང་དུ་བཀུག་དུས།
ཁྱོད་དང་བྲལ་ནས་ལོ་ཕྱེད་སོང་འདུག
ཁྱོད་སོང་ཤུལ་དུ།
ངས་བརྩེ་དུང་གི་བྲོ་བ་གཞི་ནས་ཚོར་ལ།
མིག་ཆུའི་རིན་ཐང་ཡང་གསར་དུ་རྙེད་སོང།
ཁྱོད་སོང་ཤུལ་དུ།
ངས་ཁྱོད་ཀྱི་ཇ་ཕོར་ལ་མཆུ་སྦྱར་ཐེངས་མང་བྱས།
འདས་པ་ཕྱིར་དྲན་གྱི་མཚོ་ངོགས་ནས།
དྲན་གདུང་གི་གཏམ་རྒྱུད་བྱེ་ཐང་ལ་རི་མོར་བྲིས།
ཁྱོད་སོང་ཤུལ་དུ།
ངས་ཁྱོད་ཀྱི་ཁ་པར་ནམ་ཡོང་ལ་རེ་སྒུག་བྱས།
ངས་ཁྱོད་ཀྱི་འཕྲིན་ཡིག་ནམ་འབྱོར་ལ་རྨི་ལམ་བཏང།
ཁྱོད་སོང་ཤུལ་དུ།
མཚན་མོ་རེ་རེ།
ང་སྐར་མའི་རྫི་བོར་ཆས་ཏེ།
རྒྱུ་སྐར་ཉེར་བཞི་མིག་ཁ་ནས་བོར་མ་མྱོང༌།
ཁྱོད་སོང་ཤུལ་དུ།
ངས་ཁྱོད་ཀྱི་འདྲ་པར་སྙིང་ཁར་ཡང་ཡང་སྦྱར།
ཁྱོད་ཀྱིས་བཞག་པའི་ཞྭ་མོ་དམར་པོ་ཁོ་ན།
ངའི་སྙིང་གི་འབྱོར་བ་ཆེ་ཤོས་ཡིན།