ཤིས་ཚང་ལྗང་མྱུག
_____________
ཚེ་སྲོག་རླུང་གིས་གཙབས་པའི་དུར་ཐང་ཧྲིལ་བོར།།
ནམ་ཟླ་ཁྲག་གིས་བརླན་པ་ད་དུང་སྐམ་མེད།།
སྡུག་དང་མཆི་མ་བསྣོལ་བའི་ལུང་ཁུགས་དེ་རུ།།
ཁྲག་གི་ལོ་སར་འདོར་བའི་ཁྲེལ་གཞུང་མི་འདུག།
ཀོང་པོའི་ལོ་སར་རྒྱ་མཚོའི་མཐའ་ནས་བསུས་སོང་།།
བོད་ཀྱི་ལོ་སར་བྱང་མཐའི་སྨད་ནས་རོལ་སོང་།།
གཤིན་པོའི་རྣམ་ཤེས་འཁོར་བའི་སྡེ་ཆེན་གླིང་དུ།།
ཁྲག་གི་ལོ་སར་དགའ་སྤྲོའི་དགོད་སྒྲར་སིམ་ཡོད།།
ཕུ་ནུ་གཡུལ་ནས་ཕམ་པའི་བྱུང་བ་སྡུག་པོ།།
ཨ་ཇོ་བཙོན་ལ་ཤོར་བའི་རྐྱེན་དང་ཐོགས་ཡོད།།
མཚོན་གྱི་རྣོ་ངར་གཟེངས་པའི་འཇིགས་རུང་མལ་དུ།།
ཁྲག་གི་ལོ་སར་བསུ་བའི་སྤྲོ་སྣང་ཡལ་མེད།།
ཁ་སང་ཨ་ཕ་གྲོངས་པའི་འདས་དོན་སྣེ་ན།།
དེ་རིང་གླུ་དང་གར་གྱི་ཚོགས་ལ་འཁྲེང་བའི།།
སྐྱི་པགས་འཛུམ་གྱིས་ཐེད་པའི་ངོ་གདོང་དེ་ཚོར།།
ལོ་སར་སྡུག་ལ་སྒོམ་པའི་བཟོད་བསྲན་མི་འདུག།
གཉེན་དང་ཉེ་དུའི་འདས་དོན་སྡུག་གིས་སྲུང་བ།།
ཕ་དང་མེས་པོའི་སྲོལ་དང་གཤིས་སུ་གྲུབ་ཀྱང་།།
རིགས་དང་རུས་ནས་བརྒྱུད་པའི་ཁ་བའི་བུ་རྒྱུད།།
ཁྲེལ་དང་ཕྱི་ཐག་གློད་འདི་ཅི་ཡིས་ལན་ནམ།།
མུན་པའི་སྲུབས་ན་སྤུན་ཟླའི་རེ་བ་ལྷགས་ཡོད།།
གཤིན་པོའི་མལ་དུ་འདས་པོའི་ཕྱིར་མིག་འཁྲེང་ཡོད།།
ཚེ་དང་སྲོག་གིས་བསླངས་པའི་མྱ་ངན་བསམ་ན།།
ཁྲག་གི་ལོ་སར་སྡུག་དང་མཆི་མས་སྲུང་དགོས།།
༢༠༠༩།༡།༦དགོང་མོར་བྲིས།