ཁྲག་མཆོད་སྤངས་པར་སྨོན་པ།

ཁང་ཟླ་སྲས།

བགྲང་ཡས་བསྐལ་བར་བསླབས་པའི་ཤེས་རབ་དང་།།
བརྒྱ་ཕྲག་སྲོག་གིས་ཉོས་པའི་བྱམས་བརྩེ་ཡིས།།
སྲིད་ཞིའི་ཁྱོན་འདིར་དམ་ཆོས་རྔ་བོ་ཆེ།།
རྡུང་མཛད་སྟོན་པ་མཆོག་དེ་སྙིང་ནས་དྲན།།

འཇིག་རྟེན་འདི་ན་གཅེས་པ་གྲངས་མེད་ཀྱང་།།
སྲོག་ལས་གཅེས་པའི་དངོས་ཤིག་ཡོད་མ་ཡིན།།
དེ་ཕྱིར་སྲོག་གཅོད་སྤངས་པའི་ལེགས་བྱས་ལ།།
བསྔགས་པ་ཡ་རབས་སྐྱེ་བོའི་སྤྱོད་པ་ཉིད།།

རལ་གྲིའི་སོ་ནི་ཁབ་རྩེ་ལས་ཀྱང་རྣོ། །
བ་ལང་དག་ནི་བླུན་པོ་ལས་ཀྱང་ལྐུག །
རྨོངས་པ་དག་ནི་སྨྱོན་པ་ལས་ཀྱང་འཇིགས། །
དེ་གསུམ་འཛོམས་པས་ས་གཞི་བ་རོས་བཀངས། །

སོད་སོད་སྒྲ་ཡིས་རྣ་བ་ཚ་བར་བྱེད། །
དམར་པོ་ཁྲག་གི་རླབས་ཀྱིས་རི་བོ་གཡོ། །
སྙིང་རྗེ་བྲལ་བའི་ཡིད་ནི་རླུང་བཞིན་འཚུབས། །
འཇིག་རྟེན་དེ་ཀོ་དམྱལ་བ་གསོན་པོ་འདྲ། །

རྣོ་ངར་མཚོན་ལ་དྲངས་པའི་ཚེ་སྲོག་ནི། །
སོར་རྩེས་བགྲང་མྱུར་བར་བགྲང་ཀྱང་མི་ཁེད་པའི། །
བལ་བོའི་ཡུལ་གྱི་འཇིགས་རུང་དམར་མཆོད་དེས།
རྒྱ་ཡི་མི་ཡུལ་ཆེན་པོ་དྲན་པར་བྱེད། །

ལོག་སྤྱོད་པ་ཡིས་ཆོས་ཀྱི་མིང་ཁུར་ཏེ། །
ཉེས་མེད་སྐྱེ་བོའི་སྐེ་རྩ་བཅད་པའི་བརྙན། །
མིག་ལ་མངོན་བཞིན་བལ་བོའི་ཆོས་པ་ཚོས། །
བ་ལང་བསད་པའི་གྲངས་ཀ་སུ་ཡིས་རྟོགས། །

ལྷ་མོ་ནག་མོ་ཞེས་བྱའི་འདྲེ་མོ་ཞིག །
ལན་གཅིག་མཆོད་ལ་གྲངས་མེད་སྲོག་གཅོད་པ། །
གནའ་བོའི་ཆོས་དང་དེང་རབས་དམངས་གཙོ་ཡི། །
སྲོལ་བཟང་གང་ལ་དེད་ཀྱང་མཛའ་མ་ཡིན། །

བལ་བོའི་ཡུལ་འདིར་ཕྱི་ནང་རིག་པ་ཡི། །
གནས་ལ་དཔྱོད་པའི་དྲན་དབང་ཉུང་བ་དང་། །
རིག་གསར་རིག་པའི་དཔལ་ཡོན་མ་དར་བས། །
ད་གཟོད་ངན་སྲོལ་འདི་དག་འབྱམས་པར་གྱུར། །

རྒྱུད་ལ་དད་པ་མེད་པའི་སྐྱེ་བོ་ཡང་། །
གཞན་ལ་འཚེ་བའི་སྦྱོར་བར་མི་འཇུག་ན། །
དད་པས་ཁྲག་གི་རྒྱ་མཚོ་བསྐྱིལ་བ་ཡི། །
སྲོལ་ངན་འདི་ཀོ་ལྐུག་པའི་ཆོས་ལུགས་ཉིད། །

ལྷ་གཅིག་མཆོད་པས་བ་ལང་འཛད་པར་བྱས། །
ཁྲག་གིས་གཙང་པོས་ས་གཞིའི་མདོག་ཀྱང་བསྒྱུར། །
གྲལ་གྲི་བརྡར་པའི་སྒྲ་དག་རྣ་བར་གཟན། །
ད་ནི་ཅིས་ཀྱང་སྲོལ་འདི་ཆད་པས་དགའ། །

བལ་བོས་ལྷ་མོ་ཁྲག་གིས་བཀུར་བ་བཞིན། །
བོད་པས་བླ་མ་གཡག་ལུག་ཤ་ཡིས་མཆོད། །
མངོན་ལྐོག་ཙམ་ལས་ཀུན་ནས་རྨོངས་པ་ཡི། །
ལྕི་ཡང་རྒྱུ་འབྲས་མིག་ལ་ཡོད་མ་ཡིན། །

ཧིན་དྷིའི་ཆོས་མགོ་རྒྱ་གར་ཡུལ་ཡིན་མོད། །
འཕགས་པའི་ཡུལ་ན་ཁྲག་གི་བསྙེན་བཀུར་མེད། །
ཟས་དང་མེ་ཏོག་མཆོད་པའི་སྲོལ་བཟང་པོ། །
བལ་བོད་གཉིས་ཀར་དར་ན་དགའ་བ་ལ། །

སྒོར་འགའི་ཆེད་དུ་བརྒྱ་ཕྲག་འགྲོ་བའི་སྲོག །
སྣང་བའི་འཇིག་རྟེན་འདི་ནས་སྤྱུགས་བྱེད་པའི། །
བ་ལང་དང་ནི་གཤེད་མ་གཉིས་པོ་ཡང་། །
སྲས་གཙང་སྲས་པོ་དེ་དང་ཕྲད་པར་ཤོག །

སྐད་ཅིག་ཙམ་ལ་ཤིན་ཏུ་གཅེས་པ་ཡི། །
བ་ཡི་མགོ་བོ་ཁྲག་གི་མཚོ་ཀློང་དུ། །
འཕེན་པའི་ཉམས་ཐག་བཤན་པ་དེ་ཚོ་ཡང་། །
ད་ནས་སྙིང་རྗེའི་སེམས་དང་འབྲལ་མེད་ཤོག །

ལས་ངན་འདི་ཡི་སྐྱེ་རྒྱུན་རྡོ་རྗེའི་མདུད། །
སྙིང་རྗེའི་ཐོ་བས་རྨང་ནས་གཞིལ་བ་ཡི། །
འབྲེལ་ཡོད་ཕྱི་ནང་སྐྱེ་བོའི་ཚོགས་རྣམས་ཀྱང་། །
བྱང་ཆུབ་ཤིང་གི་དྲུང་དུ་འཚང་རྒྱ་ཤོག །

བདེན་མིན་ཇི་ལྟར་ཡང་བལ་བོའི་དམར་མཆོད་ཆེན་མོའི་རྒྱུན་རྩ་བཅད་བྱས་པའི་གཏམ་དྲ་ཐོག་ནས་མཐོང་བ་དང་ཡིད་ལ་དང་བ་ཆེན་པོ་སྐྱེས་ཏེ་ཨ་འདུས་པས་བསམ་གཏན་གྱི་གནས་རྡོར་གླིང་རུམ་སྤུག་བཤད་གྲྭར་ཐོལ་བྱུང་དུ་བཀོད་པ་འདིས་ཀྱང་རྗེས་སུ་ཡི་རངས་ཀྱི་དགེ་བས་འགྲོ་ཀུན་ཚེ་རིང་ནད་མེད་ཀྱི་དཔལ་ལ་སྤྱོད་པར་གྱུར་ཅིག །