ཁྲི་ཀའི་ཨ་མྱེས་ཡུལ་ལྷར་བསྟོད་པ་ཤ་ཀུ་ཏའི་ཆུན་པོ། ཅོག་རོང་བྱང་རྒྱ།

བདག་གིས་སོ་ཞི་ལས་བསྡད་དུས་ཨ་མྱེས་ཡུལ་ལྷའི་ཕོ་ཉ་ཞིག་བདག་གི་རྒྱབ་ལ་ཐོན་ནས་ཡུལ་ལྷའི་སྐུ་ཚེ་བརྟན་པར་བཞུགས་པའི་རྩོམ་ཞིག་འབྲི་དགོས་ཞེས་བསྐུལ་བས། ང་རྒྱལ་གྱི་གཞན་དབང་དུ་གྱུར་ཏེ་རང་ཉིད་ལ་བསྟན་བཅོས་རྩོམ་པའི་ནུས་པ་མེད་པ་དེ་བརྗེད་དེ་ཁོང་ཚང་ལ་ཡ་ཞེས་ཁས་ལེན་ཤོར་བས་མི་འབྲི་ཐབས་མེད་པའི་གནས་སུ་ལྷུང་སྟེ། སྡུག་བསྔལ་དང་བར་ཆད་དང་རྐྱེན་ངན་དང་འཐབ་འཁྲུག་དང་སྐྱོ་གར་བཅས་ཀྱིས་གང་བའི་ཨ་མེ་རི་ཀ་མུན་ནག་ལུང་བ་ལའང་ཨ་མྱེས་ཡུལ་ལྷའི་བྱིན་རླབས་ཀྱི་ཉི་ཟེར་ཞིག་ཤར་ན་བསམ་ནས་ཡུལ་ལྷའི་བསྟོད་པ་འདི་བྲིས་བ་ཡིན། ཉེ་བའི་ཆར་གངས་ཅན་པ་མང་པོ་ཞིག་གི་ཚེ་སྲོག་རྐྱེན་ལམ་དུ་ཕྱིན་པ་དང་ལྷག་ཏུ་ཨ་མེ་རི་ཀ་ནས་གཞོན་ནུ་གདུག་ཅན་ཞིག་གིས་བྱིས་པ་ཉི་ཤུ་ལྷག་དང་ལག་དམར་ཁོང་གི་མ་དང་བཅས་བའི་དར་མ་བདུན་ལྷག་ལ་མེ་མདའ་བརྒྱབ་ནས་དུས་གཅིག་ཏུ་བཀྲོངས་པའི་བརྗོད་ལས་འདས་ཤིང་བཤད་སྲོལ་མེད་པའི་རྐྱེན་ངན་བར་ཆད་འདི་དང་འདྲ་བ་མ་འོངས་བའི་དུས་སུ་མི་འབྱུང་བའི་ཆེད་དུ་འཇམ་དབྱངས་ནག་པོའི་ཡང་སྤྲུལ་ཨ་མྱེས་ཡུལ་ལྷ་ཁྱེད་ཀྱིས་དགོངས་སུ་གསོལ། འཛམ་གླིང་ཡུལ་གྲུའི་མི་རྣམས་ཀྱི་མགོན་གྱིས་དཔུང་གཉེན་གྱིས་ལམ་སྣ་དྲོངས།

རྨ་ཀླུང་གཙང་མོའི་རབ་ཁ་ན།

འབའ་རྩེ་དཀར་མོའི་གདུང་རྒྱུད་ན།

བདག་གི་ཨ་མྱེ་ཡུལ་ལྷ་ཡིས།

ཁྲི་ཀའི་མི་དམངས་རྟག་ཏུ་སྐྱོངས།

 

ཁྱེད་ལ་བསྟོད་ན་ཁྱེད་ཀྱིས་སྲུང་།

ཁྱེད་ལ་སྨད་ན་ཁྱེད་ཀྱིས་འདུལ།

དགྲ་འདུལ་གཉེན་སྐྱོང་ལྷ་རྒན་ཁྱེད།

བསྐལ་བ་ཁྲི་ལོ་བར་དུ་བཞུགས།

 

སྐྱབས་ཅིག་འོ་དོད་བོས་ཙ་ན།

གླིང་ལ་དཀྲིས་གསུམ་རྒྱག་ནུས་ཤིང་།

མེ་ཤུགས་འཕུར་མདའ་ལས་མགྱོགས་པའི།

མཐུ་རྩལ་ཐོགས་མེད་ཁྱེད་ལ་མངའ།

 

གཡས་ནས་རྒྱ་ནག་ཐུན་ཙུས་མཆོད།

གཡོན་ནས་ཤན་པ་ར་མགོས་མཆོད།

མདུན་ན་བསམ་འཕེལ་ནོར་བུ་འབྱུང་།

རྒྱབ་ཀྱི་དབང་ཐང་ཀླུ་ལྟར་བཙན།

 

བུ་འདོད་པ་ལ་བུ་སྟེར་ཞིང་།

དཔོན་འདོད་པ་ལ་དཔོན་ས་བསྩལ།

སློབ་གྲྭ་བ་ལ་ཡོན་ཏན་བསྩལ།

ཀུན་དགའ་དོན་འགྲུབ་ཀུན་ལ་བསྩལ།

 

དུས་ནི་སྙིགས་མར་གྱུར་བའི་ཚེ།

ལྷ་ལའང་མི་མཐུན་བར་ཆད་མང་།

དགྲ་ཡ་འཁོན་ཡས་མཐོ་འཚམ་ན།

གཙོ་འཛིན་མའོ་ཡིས་ལས་ལས་བྱོས།

 

ཞིང་བ་འབྲོག་པ་ཨུ་ཚུགས་ཆེ།

གྲོང་ཁྱེར་བ་རྣམས་སེར་སྣ་ཆེ།

ཁྱེད་ལ་འཕྲིན་བཅོལ་སྐུལ་བསྐུལ་ནས།

ཁྱེད་ཐུགས་བསུན་པོར་བཏང་ལོས་ཡོད།

 

དེ་ཕྱིར་ངལ་བ་གསོ་དགོངས་ན།

ཨ་རིའི་ཡུལ་ལ་ལན་ཅིག་ཕེབས།

ལུང་བ་ཆེ་དང་རྒྱན་པོ་གྲོང་།

མྱི་ཡོག་གྲོང་ལ་ངས་ཁྱེད་ཁྲིད།

 

ཕ་མ་བྱིས་པ་དགྲ་བཅོམ་པ།

དགྲོང་སོགས་མཚམས་མེད་ལྔ་བྱེད་པའི།

གདུག་པ་ཅན་དང་མ་ཧྤྷེ་ཡ།

ལག་དམར་རྐུན་ཇག་འདི་ན་སྐུང་།

 

སྙིང་རྗེ་མེད་པའི་སྲིན་པོ་རྣམས།

ཁྱེད་ཀྱི་མཐུ་ཡིས་ཐུལ་བར་མཛོད།

རྒྱུ་འབྲས་མེད་པའི་ཨ་རི་འདི།

ཁྱེད་ཀྱིས་དབང་དུ་འདུས་བར་མཛོད།

 

དངོས་འབྱོར་ཡིད་སྤྲུལ་ཨ་རི་ཡི།

ཡོད་ཚད་བདག་གིས་ཁྱེད་ལ་འབུལ།

མ་རྩ་རིང་ལུགས་ལས་མཆེད་པའི།

བྲན་གཡོག་འདི་རྣམས་ཁྱེད་ཀྱིས་སྐྱོབས།

 

རླབས་ཆེན་གཟི་བརྗིད་མགོན་པོ་ཡི།

སྐུ་ཚེ་རྟག་ཏུ་བརྟན་པར་ཤོག

ཡང་དག་མཐུ་ལྡན་ལྷ་མཆོག་གི

འཕྲིན་ལས་གླིང་བཞིར་བྲིན་པར་ཤོག

 

ཁྲི་ཀའི་མི་རྣམས་ཁྱེད་ཀྱི་གཉེན།

མ་གཡེང་མ་གཡལ་དེ་རྣམས་སྐྱོངས།

ཁྲི་ཀའི་ཡུལ་འདི་ཁྱེད་ཀྱི་གནས།

ས་དེར་ཡུན་ནས་བཞུགས་པར་མཛོད།

—————————————————————-

མཆན།

ཤ་ཀུ་ཏ། ཁྲི་ཀའི་ཡུལ་ན་མ་གཏོགས་མེད་པའི་ཤིང་ཐོག་ཅིག་གི་མིང་། སྨན་གཞུང་གི་ཚེ་འཕེལ་བདུད་རྩི་ཕལ་ཆེར་འདི་ལས་བྱུང་བ་ཡིན།

སོ་ཞི། ཉི་ཧོང་ངམ་འཇར་པན་གྱི་ཟ་མ་ཞིག་གི་མིང་། 

གཙོ་འཛིན་མའོ། རྒྱ་ནག་གུང་ཁྲན་ཚོགས་པའི་ཤིང་རྟའི་སྲོལ་འབྱེད་མའོ་ཙད་ཏུང་ཟེར་བ་དེར་གོ་དགོས། 

ལུང་བ་ཆེ། ཨ་རིའི་ས་ཆ་ཞིག་གི་མིང་ཡིན། ས་གས་ནས་ལུང་བར་གྱུར་བ་རེད་ཅེས་བཤད་སྲོལ་ཡོད།

རྒྱན་པོ་གྲོང་། ལ་སི་བེ་ཀ་སི་ཟེར་བའི་ཨ་རིའི་གྲོང་ཁྱེར་རྒྱན་པོ་འབྱེད་ས་ཞིག

མྱི་ཡོག་གྲོང་། ཨ་རིའི་གྲོང་ཁྱེར་ཆེན་པོ་ཞིག་གི་མིང་། 

མ་ཧྤྷེ་ཡ། འཛམ་བུ་གླིང་གི་ཇག་ཚོགས་ཆེས་ཤོས་ཀྱི་མིང་།