ཁྲི་ཤོར་རྒྱལ་མོ།

ཚུལ་ཁྲིམས་ཟླ་བ།

གངས་ཆབ་གཙང་མའི་གཞུར་རྒྱུན་དང་ལྷན་དུ་
ལང་ལོང་དུ་འཕྱུར་བའི་ཁྲི་ཤོར་རྒྱལ་མོ།
ཁྱོད་ཀྱི་རླབས་རིས་གསེབ་ན་
ཟུངས་ཁྲག་གི་དྲེག་པ་ཆགས་ཡོད་ལ།
ཁྱོད་ཀྱི་ཀྱག་ཀྱོག་གི་ཁུག་སོའི་ཁྲོད་དུ་
ལོ་རྒྱུས་ཀྱི་གཟི་འོད་བག་ལ་ཞ་ཡོད།
རེད་ཡ།
གྲང་ཤུར་ཤུར་གྱི་དགུན་གདོང་དེར་ཁྱོད་དང་ལྷན་དུ་
ཁྱོད་ལ་འཕྲེང་བའི་སེམས་པ་མང་པོ་
འདི་ལྟར་འཁྱགས་པས་བསྡམས་སོང༌།
ཁྲི་ཤོར་རྒྱལ་མོ།
མ་ཕམ་གཡུ་མཚོའི་ཟུར་ཁ་འཁྱགས་རོམ་གྱིས་བསྡམས་ཤིང༌།
ཡར་འབྲོག་གཡུ་མཚོའི་ཁོར་ཡུག་དུག་རླངས་ཀྱིས་ཁྱབ་ལ།

གནམ་མཚོ་ཕྱུག་མོའི་རྦ་རླབས་ལྷག་རླུང་གིས་གཙེས་དུས།
སྟོང་སང་སང་གི་དུས་རབས་ཀྱི་ཡ་མཐའ་ཞིག་ལ།
མ་མོག་གི་ནམ་ཟླའི་ཁྲོད་དུ་
ཁྱོད་ཉིད་འདི་ལྟར་ཤུགས་ཀྱིས་སྐྱོམ།
ཁྲི་ཤོར་རྒྱལ་མོ།
གངས་དཀར་ལྷུན་པོའི་ཟུངས་ཁྲག་དང་འདྲེས་ནས།
བླ་འཁྱམས་མང་པོའི་འོ་དོད་དང་བསྡོངས་ནས།
མེས་པོ་སྟོང་གི་ཕྱིར་མིག་འོག་ཏུ།
འཛེར་འཛེར་གྱི་དབྱངས་རྟ་དགུང་ལ་གྱེར་བཞིན་
ཆ་མི་སྙོམས་པའི་ལྕོང་རོང་འདིར།
ཁྱོད་ཉིད་ག་དུས་བར་འདི་ལྟར་སྐྱོམ།
ཁྲི་ཤོར་རྒྱལ་མོ་་་་་་་་་