འབུམ་རྒྱ་ཐར།
ཁ་ཕྱོགས་མེད་པར་ཁ་ལས་ཤིག་གིས་འཁོར་འཁོར་ཁྱེད་ཀྱི་སྒོ་ཁར་ཐོན།།
དགོང་མ་དེ་ལ་ཁ་མ་མེད་མོད་ཁ་མཐུན་བུ་མོ་ཁྱོད་དང་འཕྲད།།
རུམ་ཁ་ཡུན་གྱིས་ཕྱེས་པ་ཙམ་ལས་འབྱར་བའི་བྱང་ཆ་དེ་འདྲ་མེད།།
ཡིན་ཡང་རི་ཁ་འབྲོག་ཁ་ཉུལ་ནས་ང་ལ་ལོབས་མྱོང་ཅིག་ཅིག་ཡོད།།
ཐོག་མར་ལག་པས་འགྲམ་པར་ཐུག་དུས་ངོ་ཚའི་ཚུལ་དུ་མགོ་བོ་གཅུས།།
དེ་ནས་ལག་པས་ནུ་མར་རེག་དུས་རེ་མ་ཁ་ལོར་འཁོར་ལ་བྱེད།།
ཐ་མར་ལག་པས་འདོམ་ལ་དྲུད་དུས་དངངས་འཚབ་དང་བཅས་འཕག་ར་བྱེད།།
བྱ་བྱེད་འདི་མོ་འགའ་ཞིག་བསྟན་རྗེས་ངེད་གཉིས་ལྷོ་འགྲིག་བྱང་འགྲིག་རེད།།
ཁྱོད་བསོ་ང་བསོར་སྣང་བ་ཞིག་གིས་མཚན་མོ་གཅིག་གི་དུས་ཚོད་བྲོས།།
དགའ་དུངས་གཏམ་གྱིས་ཕྱི་བུར་བཏུམས་ཏེ་སེམས་ཀྱི་གཏམ་སྙན་ཡོད་ཚད་བྱོ།།
ལག་པའི་ནང་ལ་ལག་པ་བཞག་ཏེ་བསམ་པའི་སྨོན་ལམ་མཉམ་དུ་བཏབས།།
གྲགས་རྒྱ་འགུལ་རྒྱུ་ཅི་ཡང་མེད་པར་མིག་མདངས་ཁོ་ནས་ཁ་བརྡ་བྱེད།།
དོ་དགོང་ང་དང་འབྲོག་མོ་འདི་ལ་འཁོར་བའི་གསང་བ་མང་མང་ཡོད།།
དོ་དགོང་ང་དང་འབྲོག་མོ་འདི་ལ་མཐུན་པའི་སྙིང་གཏམ་ཚར་གཅིག་ཡོད།།
དོ་དགོང་ང་ཡིས་འབྲོག་མོ་ཞིག་ལ་ལུས་ཀྱི་འདོད་པ་ཡོད་ཚད་སྦྱིན།།
དོ་དགོང་ང་རང་འབྲོག་མོ་ཞིག་གི་རུམ་ན་བརྩེ་བའི་བདེ་བས་མྱོས།།
དགོང་མ་དེ་དང་འབྲོག་མོ་དེ་ལ་དྲན་གསོའི་སྙན་ངག་རྐང་གཅིག་འབྲི།།
དགོང་མ་དེ་དང་འབྲོག་མོ་དེ་ཉིད་ད་དུང་ང་ལ་དབང་བར་ཤོག །
མིང་ལ་ཅི་ཟེར་ཡིད་ལ་མི་དྲན་གང་གི་ཡིན་པ་ངས་མི་ཤེས།།
གང་ལྟར་མོག་མོག་ཞིག་གི་ཚུལ་དུ་ང་དང་བརྩེས་པ་བཀའ་དྲིན་ཞུ།།