ཁང་སྨིན་གྲོལ་རྒྱ་མཚོ།
ཐོག་མའི་གཏམ།
ཉེ་ལམ་ཨ་རིར་རྟེན་གཞི་བྱས་པའི་གེ་སར་ཚོགས་པས་བཀོད་སྒྲིག་འོག་༼གངས་རིའི་མགོན་པོ་དང༌། གངས་ཅན་པ་༽ཞེས་པའི་བརྗོད་གཞིའི་སྟེང་རྩོམ་ཡིག་འགྲན་བསྡུར་གྱི་ལྡིང་ཆ་ཞིག་གསར་དུ་བསྐྲུན་པར་ཧ་ཅང་དགའ་བོ་བྱུང༌། ཅིའི་ཕྱིར་ཞེ་ན། ཁོ་བོ་རྒྱ་གར་དུ་སླེབས་ནས་བཟུང་ད་དབར་མི་ལོ་ཧྲིལ་པོ་བཅུ་ཙམ་གྱི་རིང་རྩོམ་ཡིག་འགྲན་བསྡུར་གྱི་ཆ་ཤས་ཤིག་གཏན་ནས་ལེན་ཐུབ་མ་སོང་ལ། དེ་ནི་ཕྱོགས་གཅིག་ནས་བཤད་ན། རང་ཉིད་ཀྱི་མི་གཞི་སྒྱུད་ལུག་དང་ལེ་ལོའི་དབང་འོག་ཏུ་ཚུད་དྲགས་པས་ཀྱང་ཡིན་རྒྱུ་རེད། ཡང་ཕྱོགས་གཞན་ཞིག་ནས་སྐབས་དེ་དུས་རང་ཉིད་ཀྱི་རྩོམ་འབྲིའི་ཆུ་ཚད་ཧ་ཅང་ཞན་དྲགས་པས་ཀྱང་རེད་ལ། གྲྭ་རྐྱང་དཀྱུས་མ་ཞིག་གི་ངོས་ནས་སྲོལ་རྒྱུན་སློབ་ཚན་གྱི་རིམ་པ་མ་རྫོགས་པས་ཀྱང་ཡིན་སྲིད། གང་ལྟར་ཉེ་ལམ་བོད་ཀྱི་དུས་བབ་སྟེང་རྩོམ་བརྡ་དེ་སྤེལ་བ་དང་ཁོ་བོ་ཧ་ཅང་ཁོམ་ནས་ཡོད་པའི་དུས་སྐབས་གཞི་གཅིག་ཏུ་འཁེལ་བས། ད་ཐེངས་རང་ཉིད་ཀྱང་འགྲན་བསྡུར་འདིར་ཞུགས་པར་སེམས་གཏིང་ནས་ཐག་གཅོད་བྱས་པ་ཡིན།
མ་གཞི་ནས་རང་ཉིད་ལ་མཚོན་ན་རྩོམ་ཡིག་ཅིག་གསར་དུ་འབྲི་བཞེངས་བྱེད་རྒྱུ་ནི་དེ་ཙམ་གྱི་དཀའ་ངལ་ཅན་ཞིག་མིན་ནའང༌། རྩོམ་ཡིག་གི་བརྗོད་བྱ་བདམས་གསེས་བྱ་རྒྱུ་དེ་ཧ་ཅང་དཀའ་ཁག་ཆེ་ལ་གལ་གནད་ཀྱི་རང་བཞིན་དང་ལྡན་པ་ཞིག་ཀྱང་རེད། ཅིའི་ཕྱིར་ན་རྩོམ་ཡིག་གི་བརྗོད་བྱ་དེ་ཀློག་པ་པོའི་སེམས་ཁམས་དང་སྐབས་བསྟུན་བྱེད་དགོས་པ་ལས། ཀློག་པ་པོའི་སེམས་ཀྱི་འདོད་མོས་དང་འབྲེལ་བ་གཏན་ནས་མེད་པའི་རྩོམ་ཡིག་དེ་དག་ནི། ཕལ་ཆེར་འབྲི་བཞེངས་ཀྱི་མགོ་བརྩམས་པ་དང་དུར་མཆོད་བྱེད་རན་པ་རེད་ཅེས་ངས་བཤད་བཞིན་ཡོད། འོན་ཀྱང་དེ་རིང་གི་བརྗོད་བྱ་ནི་བོད་མི་ཚོར་མཚོན་ན་འདས་མ་ད་གསུམ་གྱི་ལས་དབང་སྤྱི་དང༌། བྱེ་བྲག་མིག་སྔར་བོད་ཀྱི་ཆབ་སྲིད་དང༌། སྐད་ཡིག རིག་གནས། མི་རིགས་བཅས་ཀྱི་གནས་སྟངས་ཡ་ང་བ་དེ་ཚོ་དང་ཧ་ཅང་འབྲེལ་ཆེ་བས་བོད་ཕྱི་ནང་གཉིས་ཀར་རྒྱུས་མངའ་ཡོད་པའི་རྨང་གཞིའི་སྟེང་བོད་ཀྱི་བདེན་དོན་ལ་སེམས་གཏིང་ནས་ཤ་ཞེན་ཡོད་མཁན་གྱི་སྙུགས་ཐོགས་པ་ཚོས་བྲིས་ན། དུས་སྐབས་ཧ་ཅང་འཚམས་པར་བརྟེན་ཁོ་བོས་ཀྱང་མཁས་པའི་རྒྱལ་ཐབས་མ་ཟིན་རུང་བདེན་པའི་ཨུ་ཚུགས་ཀྱིས་རང་གི་ད་ལྟའི་འཆར་སྣང་དང་སྔ་མོ་ནས་བསམ་གཞིགས་བྱས་པའི་གྲུབ་དོན་རྣམས་འདིར་རིམ་བཞིན་དུ་གླེང་བའི་སྤྲོ་བ་བརྟས་སོ། །
དང་པོ། ཁྱེའུ་ལྷ་མོ་དོན་གྲུབ་གངས་རིའི་མགོན་པོར་གྱུར་པའི་ལེའུ་དཀར་པོ།
བོད་གངས་ཅན་པ་ཞིག་ལ་མཚོན་ན་འཕགས་པ་སྤྱན་རས་གཟིགས་ནི་བདག་ཅག་གི་སྟོན་པས་བསྩལ་བའི་རང་ཉིད་ཀྱི་ལྷ་སྐལ་ཐུན་མོང་མ་ཡིན་པ་ཞིག་ཏུ་འདོད་ཀྱིན་ཡོད་ལ། དེ་མཚུངས་སུ་རྒྱལ་དབང་སྐུ་ཕྲེང་ན་རིམ་ཡང་འཕགས་པ་སྤྱན་རས་གཟིགས་ཀྱི་རྣམ་སྤྲུལ་འཁྲུལ་མེད་ཅིག་ཏུ་སེམས་གཏིང་ནས་ཁས་ལེན་གྱི་ཡོད། བོད་ཀྱི་ལོ་རྒྱུས་སྟེང་འཕགས་པ་སྤྱན་རས་གཟིགས་ཀྱི་རྣམ་སྤྲུལ་དུ་འདོད་པའི་བླ་ཆེན་མང་པོ་ཞིག་ཡོད་ནའང༌། དོན་དངོས་ཐོག་དེ་དག་ལས་བོད་མིའི་སྤྱི་ཚོགས་ཁྲོད་ལུགས་གཉིས་གང་ཐད་ནས་ནུས་ཤུགས་ཆེས་ཆེ་བ་ནི་གོང་ས་སྐུ་ཕྲེང་རིམ་བྱོན་རྣམས་ཡིན་པ་སྨོས་མེད་ཡིན།
ང་ཚོའི་འདས་པའི་ལོ་རྒྱུས་ཀྱི་ཆ་ནས་བལྟས་ན། གོང་ས་སྐུ་ཕྲེང་ན་རིམ་གྱི་ཁྲོད་ནས་གོང་ས་སྐུ་ཕྲེང་བཅུ་གསུམ་པ་ནི། ཐུགས་དཀྱིལ་ཆེ་ཞིང་གཟིགས་རྒྱ་ཡངས་པས་བོད་ཀྱི་ཆོས་སྲིད་གང་ཐད་ནས་སྐབས་བསྟུན་ལེགས་བཅོས་དང་གསར་བཏོད་ཀྱི་སྙིང་སྟོབས་ལྡན་པའི་དབུ་ཁྲིད་ཡང་དག་ཅིག་ཡིན་ལ། ཁོང་གི་སྐུ་ཚེ་ཧྲིལ་པོར་བོད་མི་ཚོའི་བདེ་སྡུག་ཉག་གཅིག་ལ་ཁ་ཚ་དགོས་གཏུགས་ཀྱིས་འགན་ཁུར་བྱས་ཡོད་པ་ནི་ལོ་རྒྱུས་ཀྱིས་གསལ་འདོན་བྱས་ཡོད། མ་ཟད་སྐུ་གཤེགས་ཁར་ཡང་ཡོངས་སུ་མ་གྲུབ་པའི་གལ་ཆེའི་བྱ་བ་དེ་དག་གི་མཇུག་སྐྱོང་ཕྱིར་སླར་ཡང་གངས་ལྗོངས་སུ་སྐྱེ་བ་བཞེས་སླད་ཐུགས་དགོངས་གཏད་ཡོད་པ་ནི་ཧ་ཅང་གསལ་པོ་ཡིན།
གནས་སྟངས་དེ་འདྲ་ཞིག་གི་འོག་ནས་སྐུ་ཕྲེང་བཅུ་གསུམ་པ་དགོངས་པ་རྫོགས་པས་སྐབས་དེ་དུས་ཀྱི་བོད་ལྗོངས་ལ་མཚོན་ན། རང་ཉིད་ཀྱི་ངོ་བོ་འཛམ་གླིང་འདིར་འཚོ་གནས་ཐུབ་མིན་གྱི་དུས་བབ་ཛ་དྲག་ཅིག་བརྒྱུད་དགོས་པའི་དབུ་ཚུགས་པ་རེད་ལ། གོང་ས་མཆོག་མ་བཞུགས་པའི་སྟབས་ཀྱིས་རང་མགོ་ན་གནམ་ལས་མེད་པར་འདོད་པའི་མཐོ་རིམ་དཔོན་ངན་འགས་སྒེར་གྱི་སྙིང་ནད་ཁོག་བཅུགས་ཀྱིས་རང་གི་དབང་ཤུགས་སླར་གསོ་བྱེད་པའི་གོ་སྐབས་དམ་འཛིན་བྱས་པ་དེས། ས་གནས་མང་ཚོགས་ལ་བརྡབ་གསིག་དང་བོད་ཀྱི་ཆིག་སྒྲིལ་ནུས་པ་ཉམས་དམས་སུ་འགྲོ་བའི་ཉེར་ལྡོག་ཀྱང་བྱས་པ་རེད། འོན་ཀྱང་རྣམ་དཔྱོད་ཆེ་ཞིང་ཐུགས་དཀྱེལ་ཡངས་པའི་སྲིད་ཚབ་ར་སྒྲེང་དང༌། བཀའ་བློན་ཁྲི་སྨོན་གཉིས་གཙོས་པའི་བོད་ཀྱི་ཆབ་སྲིད་ཐད་ནུས་ཤུགས་ཆེ་བ་མང་པོས་ལྷ་མོའི་བླ་མཚོར་ལྷ་བླའི་ལུང་བསྟན་གཟུགས་སུ་ཤར་བའི་དངོས་ཡོད་ཉམས་མྱོང་གཞིར་བཟུང་སོགས་ཐབས་ཚུལ་མང་པོ་སྤྱད་མཐར། ད་གཟོད་བགྲང་བྱ་བཞི་ཙམ་ལས་མ་སོན་པའི་བོད་ཤར་ཕྱོགས་རྒྱ་ནག་དང་འདབས་འབྲེལ་བའི་ཨ་མདོ་སྟག་འཚེར་གྲོང་ཚོའི་ཁྱེའུ་ཆུང་ཆུང་ལྷ་མོ་དོན་གྲུབ་ྋགོང་ས་སྐུ་ཕྲེང་བཅུ་གསུམ་པའི་ཡང་སྲིད་འཁྲུལ་མེད་དུ་ངོས་འཛིན་བྱས་པ་དེས། བོད་ཀྱི་མཐོ་རིམ་བླ་སྤྲུལ་དང༌། སྐུ་དྲག་དཔོན་རིགས་ཀྱིས་མཚོན་པའི་བོད་མི་བྱིངས་ཀྱི་སེམས་ཁམས་སུ་སྔར་ལས་ཀྱང་སྤོབས་སེམས་དང་ཡིད་ཆེས་ཆེན་པོ་ཞིག་བསྐྲུན་ཡོད་པ་ང་ཚོས་ཚོད་དཔག་བྱེད་མི་དགོས་པ་ཞིག་རེད།
འོན་ཀྱང་སྐབས་དེ་དུས་ཀྱི་ྋགོང་ས་མཆོག་ནི། བསམ་རྒྱུ་ཨ་མ་དང་དྲན་རྒྱུ་འོ་མ་ལས་མེད་པའི་ཁྱེའུ་བྱིངས་དང་གཏན་ནས་མི་འདྲ་ནའང༌། རྙོགས་འཛིང་ཆེ་ཞིང་ཆིག་སྒྲིལ་དང་བརྟན་བརླིང་མེད་པའི་བོད་ཀྱི་ཆབ་སྲིད་འཛིན་སྐྱོང་ཐད་ནུས་པ་མི་ཐོན་པ་སྨོས་ག་ལ་དགོས། འོན་ཀྱང་ཁོང་ཡོད་པས་ད་གཟོད་བོད་མི་ཚོར་ཆོས་དད་ཀྱི་བདེ་སྐྱིད་ཡོད་ལ། ཁོང་ཡོད་པས་དད་ལྡན་གྱི་བོད་མི་ཚོར་མཚན་ན། རང་ཉིད་ལ་ཆེས་མཁོ་གལ་ཆེ་བའི་དངོས་པོ་ཞིག་དང༌། ཆེས་དགའ་སའི་མི་སྣ་ཞིག་ལྷ་དང་བླ་མའི་བཀའ་དྲིན་གྱིས་གནམ་ནས་ཐོལ་བྱུང་དུ་རྙེད་པ་ལྟ་བུའི་ཚོར་སྣང་ཞིག་ཡོད་པ་ནི་ང་ཚོས་ནམ་ཡང་བཤད་ཆོག་ཆོག་ཡིན།
གཉིས་པ། བར་བརྒལ་སྲིད་གཞུང་གི་འཐུས་ཤོར་གྱིས་བསྐྱེད་པའི་ངན་འབྲས་ཀྱི་ལེའུ་ནག་པོ།
སྐབས་དེ་དུས་ཀྱི་བར་བརྒལ་སྲིད་གཞུང་གི་མཐོ་རིམ་སྐུ་དྲག་ར་སྟག་གི་དོན་རྐྱེན་གྱིས་མཚོན་པའི་སྲིད་དབང་རྩོད་པའི་སྤུན་ཟླ་ནང་འཁྲུགས་ཀྱི་གོད་ཆག་མང་པོ་ཞིག་སྔ་ཕྱིར་བྱུང་བ་དེས་ང་ཚོའི་མི་རིགས་འདིའི་ཆབ་དཔལ་རིག་གསུམ་སྔར་ལས་ཀྱང་ཞ་འཐོམ་ཅན་དང་གཅུང་ནད་ཅན་ཞིག་ཏུ་བསྒྱུར་ཡོད་པ་མ་ཟད། སྐབས་དེའི་དབུས་ཕྱོགས་ཀྱི་སེར་གཟུགས་འཛིན་པའི་དམ་ཉམས་འགས་བསླུ་བྲིད་འོག་མང་ཚོགས་ཧྲིལ་པོའི་སེམས་ཁམས་ཀྱང་ཆོས་ལུགས་ཕྱོགས་རིས་ཅན་དང་འཐེན་འཁྱེར་གྱི་ཕྱོགས་སུ་རྦད་དེ་དབྱིངས་ཡོད་པ་ཞིག་བྱས་ཡོད་ལ། བྱེད་ཚུལ་དེས་ཆོས་ལུགས་ཙམ་མ་ཟད་སྤྱི་ཚོགས་ཁྱོན་ཡོངས་ཀྱི་འཆམ་མཐུན་དང༌། སྔོན་གྱི་བྱུང་རབས་ཁྲོད་གོང་བུ་གཅིག་སྒྲིལ་གྱི་ནུས་སྟོབས་ཟབ་མོ་ཡོད་པ་རྣམས་རིམ་པར་འཕྲོ་བརླགས་བཏང་ཡོད་པ་སྨོས་མེད་ཡིན།
མདོ་ཧྲིལ་གྱིས་དྲིལ་ན་གོང་ས་སྐུ་ཕྲེང་བཅུ་གསུམ་པ་དགོངས་པ་རྫོགས་པ་ནས་བཟུང་ང་ཚོའི་དཔོན་རིགས་ཚོས་རང་ས་ནས་རང་ཡུལ་ནས་རང་དབང་ཡོད་བཞིན་དུ་བོད་སྡོད་ཨམ་བན་དང༌། དབྱིན་ཇིའི་སྐུ་ཚབ་ལྟ་བུའི་མི་རིགས་གཞན་གྱི་བཀོད་འདོམས་ལ་ཉན་བཞིན་ཤེས་འཇོན་ལྷག་བསམ་ཅན་གྱི་བོད་མི་གསར་བརྗེ་བ་ཚོར་བསྟན་དགྲ་དང་གདོན་འདྲེའི་མིང་གིས་བསྙད་དེ་མི་གྲལ་ནས་ཁྱི་གྲལ་དུ་འབུད་པར་མ་ཟད། མང་པོ་ཞིག་ཡན་ལག་གཅོད་པ་དང༌། མིག་ཟུང་བྲུལ་བ། ཁྲི་མུན་དུ་འཇུག་པ་སོགས་རྒྱུ་འབྲས་དང་དྲང་བདེན་གྱི་བློ་མིག་ལ་མི་བརྩི་བར་མི་བུ་ཤེས་རབ་ཚོའི་མགོ་བོར་ལྕགས་ཀྱི་ཞ་མོ་འགེབས་རྐྱང་པ་བྱེད་པ་ནི། སྐབས་དེའི་བོད་ཀྱི་བར་བརྒལ་སྲིད་གཞུང་གི་དཔོན་ངན་ཚོས་ཁ་ཕོ་ཆེན་པོས་རང་གི་ཆབ་འབངས་ཆོས་བཞིན་སྐྱོང་སྟངས་རེད།
ད་དུང་སྐབས་དེའི་གཞུང་སའི་སྐུ་དྲག་ཚོས་མང་ཚོགས་དཀྱུས་མའི་དངུལ་ཁྲག་གིས་བསགས་པའི་དཔྱ་ཁྲལ་གྱིས་མེ་ཏོག་ལྡུམ་རའི་ནང་གླུ་གར་སྤྲོ་སྐྱིད་ཤོ་སྦག་གི་ཐུགས་སྤྲོར་རོལ་རྐྱང་བྱེད་པ་ལས། བོད་ཀྱི་ཆབ་སྲིད་དང༌། རིག་གཞུང༌། མང་ཚོགས་དཀྱུས་མའི་བདེ་ཐབས་སོགས་ཀྱི་ཆེད་དུ་ཕུགས་རྒྱང་རིང་བའི་བསམ་བློ་རང་ཚུགས་ཐུབ་པ་ཞིག་གཏན་ནས་བཏང་མྱོང་མེད་སོང་བས་རེད་ལ། ལུང་ཤར་བ། དགེ་འདུན་ཆོས་འཕེལ་ལྟ་བུའི་རང་མི་རིགས་ཀྱི་ཁེ་ཕན་རྐྱང་པར་བསམ་སྟེ་རླབས་ཆེན་གྱི་གོམ་སྟབས་ཆེན་པོ་ཞིག་སྤོ་བའི་དཔའ་མཛངས་ཀྱི་སྙིང་སྟོབས་དང༌། ལྷག་བསམ་དཀར་པོ་ཞིག་གཏན་ནས་མེད་སོང་བས་ཀྱང་ལོས་ཡིན།
སྐབས་དེ་དུས་ཀྱི་དཔོན་རིགས་ཕལ་མོ་ཆེ་ནི་དབུས་ཁུལ་གྱི་ས་ཆ་ག་གེ་མོ་ཙམ་ལས་འཛམ་གླིང་སྤྱིའི་ཆབ་སྲིད་ཀྱི་གོ་རྟོགས་ཐད་ནས་གླེང་ན། ཆེས་གད་མོ་སློང་བ་ཤ་སྟག་ཡིན་ཚུལ་འདུག་སྟེ། སྐུ་ཞབས་འབའ་བ་ཕུན་ཚོགས་དབང་རྒྱལ་གྱིས་སྐབས་དེ་དུས་འཛམ་གླིང་འཁྲུག་ཆེན་བརྒྱབ་ཚར་ཏེ་མཉམ་འབྲེལ་རྒྱལ་ཚོགས་ཀྱང་བཙུགས་ཟིན་ནའང༌། བོད་གཞུང་གི་སྐུ་དྲགས་ཚོས་འཛམ་གླིང་འཁྲུག་ཆེན་རྒྱག་གྲབས་ཡོད་ཚོད་འདུག་ཅེས་བཤད་ཚུལ་བྲིས་པ་ནི། ང་ཚོ་རང་ས་རང་ཡུལ་ནས་སྲོང་བཙན་སྒམ་པོས་སུམ་གཉིས་ས་ཡི་དཀྱིལ་འཁོར་བཟུང་རབས་དང༌། གེ་སར་རྒྱལ་པོས་ཧོར་གུར་གར་བཅོམ་རབས་ཀྱི་གཏམ་རྒྱུད་ཀྱིས་ནམ་ཡང་ཡིད་ཚིམ་སྟེ་ཤ་ཆང་དང་གླུ་གར་སྤྲོ་སྐྱིད་ལ་རྦད་དེ་མགོ་བོ་འཁོར་བ་ལས། ཁྱིམ་མཚེས་རྒྱལ་ཁབ་ཁག་གི་ཆབ་སྲིད་ཀྱི་གནས་བབ་ཅི་འདྲ་ཡིན་པ་དང༌། རང་ས་རང་ཡུལ་ཇི་ལྟར་སྲུང་སྐྱོབས་དང་ཕྱིའི་རྒྱལ་ཁབ་རྣམས་ལ་ལུགས་གཉིས་གང་ཐད་ནས་ཇི་ལྟར་འབྲེལ་ལམ་འཛུགས་དགོས་པའི་བསམ་བློའི་གནས་བབ་ཆེས་དམའ་བའི་དཔེ་མཚོན་གཤའ་མ་ཞིག་མ་ཡིན་ནམ། ལྷག་པར་དུ་སྐབས་དེ་དུས་ཀྱི་བོད་གཞུང་གི་སྐུ་དྲག་ཚོའི་ཁྲོད་དུ་རྒྱ་ནག་གི་དཀར་ཡོལ་དང༌། གོས་ཆེན་འབྲུག་རིས་མའི་འབུལ་བ་བསྡུ་བའི་ཁྲོམ་ར་ཞིག་ཀྱང་དངོས་ཤུགས་བརྒྱུད་གསུམ་ནས་ཤུགས་ཆེན་དར་ཡོད་པར་བརྟེན། དྲང་བདེན་མིན་པའི་ཁྲིམས་ལུགས་ཀྱི་འོག་ཏུ་མང་ཚོགས་དཀྱུས་མ་ཚོའི་ཉིན་རེའི་འཚོ་གནས་ཀྱི་དཀའ་ཁག་ནི་སྔར་ལས་ཀྱང་ཇེ་ཆེར་སོང་ཡོད་ལ། དེའི་དབང་གིས་ང་ཚོ་མི་རབས་གསུམ་གྱི་རིང་མི་རིགས་གཞན་གྱི་བཙན་གནོན་འོག་སྡོད་དགོས་བྱུང་པ་དེ་ནི་ཉེ་རབས་ང་ཚོའི་ལོ་རྒྱུས་ཁྲོད་ཀྱི་བརྗེད་དཀའ་བའི་སྐྱོ་གར་རིང་མོ་ཞིག་རེད།
གསུམ་པ། གུང་ཁྲན་ཏང་གིས་གདུག་རྩུབ་ཀྱིས་བཞེངས་པའི་ཁྲག་གི་ལེའུ་དམར་པོ།
མི་གྲངས་དུང་ཕྱུར་བཅུ་གཉིས་ཙམ་ཡོད་པའི་རྒྱ་ནག་ཧྲིལ་པོ་གུང་ཁྲན་ཏང་གིས་དབང་སྒྱུར་བྱས་ཏེ་གོ་མིན་ཏང་གི་སྲིད་གཞུང་མགོ་རྟིང་སློག་པས་ན། ལྷ་སའི་བོད་སྡོད་ཨམ་བན་གྱི་དབང་ཤུགས་ཀྱང་རིམ་གྱིས་མཇུག་བསྡུས་ཡོད་ལ། དེ་ནས་བཟུང་གདུག་རྩུབ་ཆེ་བའི་ཧམ་སེམས་དང་དྲག་ཤུགས་ཀྱི་འདྲེ་ལག་བོད་དུ་བསྐྱངས་ཏེ་ས་མཐོ་ཆུ་གཙང་གི་ཞི་བདེའི་འཇིག་རྟེན་ཆུང་ཆུང་དེ་འཛམ་གླིང་གི་རྒྱལ་ཁབ་སུས་ཀྱང་མི་ཐོས་སར་ཁྱུད་མུད་གཏོང་བའི་གོ་སྐབས་ཤིག་ལ་རེ་སྒུག་ནན་པོ་བྱས་ཡོད། ཕྱོགས་གཅིག་ནས་བཤད་ན་རྒྱ་དམག་གིས་ཞི་བའི་གྲོས་མོལ་གྱི་མིང་ཁུར་ཏེ་ཐོག་མར་བོད་ཀྱི་བླ་སྤྲུལ་དཔོན་པོ་གང་མང་ཞིག་བོད་ས་གནས་སྲིད་གཞུང་ལ་བཏང་ཡོད་ནའང༌། ཁོང་ཚོའི་ཕུགས་ཀྱི་དམིགས་ཡུལ་ནི་བོད་ས་ཧྲིལ་པོ་ཧམ་ཟ་བྱེད་རྒྱུ་དེ་ཡིན་པས་སྐབས་དེའི་བོད་ཀྱི་སྡེ་སྲིད་དང་བཀའ་བློན་ཚོས་ངོས་ནས་དེ་ལ་རྒྱབ་སྐྱོར་ཐོབ་མེད་པར་མ་ཟད། འགའ་རེར་མི་བསད་ཁྲག་སྦྱོར་གྱིས་མཚོན་པའི་བསམ་ཡུལ་ལས་འདས་པའི་རྣམ་འགྱུར་ངན་པའང་བསྟན་ཡོད།
དེར་བརྟེན་དམར་དམག་གི་ངོས་ནས་ཀྱང་ཆབ་མདོ་བཙན་ལེན་བྱས་པས་བོད་ཀྱི་གནས་བབ་སྔར་ལས་ཀྱང་ཆེས་ཛ་དྲག་ཏུ་གྱུར་བ་རེད། ད་གཟོད་ཁོ་ཚོས་གདུག་རྩུབ་ཀྱི་རྣམ་པ་སྔར་ལས་ཀྱང་ཤུགས་ཆཻར་བཏང་སྟེ་བོད་ཤར་ཕྱོགས་མདོ་ཁམས་ཀྱིས་མཚོན་པའི་ས་མཚམས་ཀྱི་མི་སེར་བརྒྱ་ཕྲག་མང་པོ་དམར་གསོད་དང་བཙོན་འཇུག་མནར་གཅོད་ཚད་ལས་འདས་པ་བྱས་པར་མ་ཟད། ས་གནས་མང་ཚོགས་ཀྱི་བཟའ་འབྲུ་དང་རྟ་ཕྱུགས་སོགས་བཙན་འཕྲོག་དང༌། བུད་མེད་ལ་བཙན་བཙན་གཡེམ་བྱས་པ་སོགས་འགྲོ་བ་མིའི་ཀུན་སྤྱོད་དང་འགལ་བའི་ལས་ངན་བསྟུན་མར་བརྩམས་པའི་སྐོར་བོད་ས་ཡོངས་སུ་ཁྱབ་པ་ན། མདོ་ཁམས་ཀྱི་ས་གནས་ཁག་མང་པོ་ནས་རྒྱ་དམག་ལ་རྒོལ་བའི་ལས་འགུལ་རབ་དང་རིམ་པར་སྤེལ་ཡོད་པ་ནི་ང་ཚོས་འདས་པའི་བྱུང་རབས་ལས་གསལ་པོར་རྟོགས་ཐུབ། དམར་དམག་བོད་དུ་བསྐྱོད་པའི་ལམ་བར་དུ་བོད་མི་སྟོང་ཕྲག་མང་པོའི་ཚེ་སྲོག་ལ་གོད་ཆག་བྱུང་པས། བུད་མེད་བརྒྱ་ཕྲག་མང་པོ་ཡུག་ས་མར་གྱུར་ཡོད་ལ། བུ་ཕྲུག་སྟོང་ཕྲག་མང་པོ་དྭ་ཕྲུག་བཟོས་ཡོད་ནའང༌། མོའུ་ཡིས་ད་དུང་རང་ཉིས་ཀྱིས་བཏང་བའི་དམག་དཔུང་དེའི་མིང་ལ་བཅིངས་གྲོལ་དམག་དཔུང་བཏགས་ཏེ་བོད་མི་རྣམས་ཚོ་སྤྱི་ཚོགས་རྙིང་པའི་སྡུག་བསྔལ་ལས་སྐྱོབས་པའི་ལྷ་དམག་ཅིག་གི་ངོ་བོར་གནམ་ས་གཉིས་ཀ་ནས་བསླུ་ཐབས་ཀྱི་ཁྱབ་བསྒྲགས་ཤུགས་ཆེར་བྱས་ཡོད་པ་དེས། བོད་ཀྱི་སྐུ་དྲག་སྡར་མ་འགའ་རེ་དང༌། འཚོ་གོས་ཀྱིས་ཕོངས་བའི་མང་ཚོགས་ཀླད་མེད་འགའ་རེས་མོའུ་ཡི་སྲིད་ཅུས་ལ་སེམས་གཏིང་ནས་དང་འདོད་བྱེད་པའི་ཉེར་ལེན་དུ་གྱུར་ཡོད་པ་མ་ཟད། བོད་མི་དེ་ཚོས་བཅིངས་གྲོལ་དམག་དཔུང་གི་ངོ་སོ་ཁྱེར་ཏེ་སྐབས་དེའི་བོད་ས་གནས་སྲིད་གཞུང་ལ་དགག་རྒྱག་དང༌། གྱེན་ལོག་བྱས་ཡོད་པ་ནི་མོའུ་དང་མོའུ་ཡིས་བཏང་བའི་དམག་དཔུང་ལ་མཚོན་ན་རང་ཉིད་ཀྱིས་སྤར་བའི་མེ་སྟག་དེ་སྣུམ་མཛོད་ཅིག་དང་འཕྲད་པ་ལྟ་བུའི་ནུས་པ་ཐོན་ཡོད་ཅེས་བརྗོད་ཆོག
འོན་ཀྱང་སྐབས་དེ་དུས་ཀྱི་བོད་ས་གནས་སྲིད་གཞུང་ནི་རྒྱ་དམག་གི་ནུས་པ་དང་བསྡུར་ན་སྒོ་ང་བྲག་ལ་བརྡབ་པའི་དཔེ་ལས་མེད་པས། རེ་ཞིག་མང་ཚོགས་བྱིངས་ཀྱི་འདོད་མོས་ཡོད་མེད་ཇི་ལྟར་ཡང་ཞི་འཇམ་གྱི་རྣམ་པས་བཅིངས་འགྲོལ་དམག་དཔུང་བོད་ཀྱི་རྒྱལ་ས་ལྷ་སར་སླེབས་དུས་མི་འདོད་བཞིན་དུ་འཛུམ་དམངས་རྫུན་མ་ཞིག་གིས་ཕེབས་བསུ་མི་བྱེད་ཐུ་མེད་གྱུར་ཡོད། དེ་ལྟར་བོད་ས་ཡོངས་རྫོགས་རྒྱ་ནག་གི་བསླུ་བྲིད་དང་དབང་ཤུགས་ཀྱིས་ཁྱུར་མིད་བཏང་བ་ནས་བཟུང་བོད་མི་ཚོའི་སེམས་ཁམས་སུ་སྔར་མེད་ཀྱི་འཇིགས་སྣང་དང༌། མ་འོངས་པར་མཐོ་སྒང་འདིར་རང་ཉིད་ཀྱི་རང་གཟུགས་ངོ་མ་དུས་ཡུན་ཇི་ཙམ་རིང་འཚོ་གནས་བྱེད་ཐུབ་རྒྱུའི་སྐོར་ལ་སྔར་ལས་ཀྱང་བསམ་བློ་མང་པོ་ཞིག་གཏོང་རྒྱུའི་གོ་སྐབས་དེ་དབང་མེད་དུ་བྱུང་ཡོད་ནའང༌། དེ་ནི་གཉིད་ལ་ཤོར་བའི་ཤྭ་བ་ཞིག་ཧ་ཅང་བཀྲེས་ལྟོག་གིས་མནར་བའི་སྟག་གི་མཆེ་བར་དུ་ཤོར་རྗེས་ད་གཟོད་རང་ཉིད་ཀྱི་འཚོ་གནས་ཀྱི་རིན་ཐང་ལ་བསམ་གཞིགས་བྱས་པ་དང་ཁྱད་པར་གཏན་ནས་མེད་པ་ཞིག་མ་ཡིན་ནམ།
བཞི་བ། འཇིགས་སུ་རུང་བའི་ལོ་ཟླ་དང་དཀའ་ཚེགས་ཆེ་བའི་འགྲུལ་བཞུད།
གུང་ཁྲན་ཏང་གིས་བོད་ཞི་བའི་བཅིངས་གྲོལ་གྱི་མིང་ཁུར་ཏེ་གཡོ་འཕྲུལ་གྱིས་དམག་དཔུང་བོད་དུ་བཏང་བ་ནི། གནའ་བོའི་ངག་རྒྱུན་ལས་གཤིན་རྗེ་འཛུམ་ན་གསོད་པའི་རྟགས་ཞེས་པ་དང་ཡོངས་སུ་མཐུན་སོང༌། ཐོག་མར་ཞི་བའི་དཔུང་འཇུག་གྲུབ་རྗེས་ད་གཟོད་གྲོས་མཐུན་དོན་ཚན་བཅུ་བདུན་མེ་མདའི་སོ་ཁ་ནས་བཙན་གྱིས་འཇོག་བཅུག་སོང་ལ། དེས་མཐོ་དམན་གྱི་ས་གནས་མི་སེར་ཚོའི་སེམས་པ་སྔར་ལས་ཀྱང་མི་བདེ་བར་གྱུར་ཡོད་པས་དུས་དེ་ནས་བཟུང་འབྱོར་ལྡན་རྣམས་དང༌། ཆབ་སྲིད་ཀྱི་ཕྱོགས་ནས་བསམ་བློ་ཅུང་ཟད་སྔོན་ཐོན་ཅན་ཚོ་རྒྱ་བལ་སོགས་ཁྱིམ་མཚེས་རྒྱལ་ཁབ་རྣམས་སུ་གོམ་ཁ་བསྲིངས་མགོ་བརྩམས་སོང༌། སྐབས་འདིར་ང་ཚོས་དྲན་འོང་བ་ཞིག་ནི། སྲིད་བློན་ཀླུ་ཁང་བས་ང་རྒན་པོ་འཆི་བ་ལོ་གསུམ་གྱིས་འགྱངས་སོང་ལ། ཡང་མིན་ན། གུང་ཁྲན་ཏང་སླེབས་རྒྱུ་ལོ་གསུམ་གྱིས་སྔ་སོང་ཞེས་པ་ནི་ཇི་འདྲའི་གོ་རྒྱུ་ཡོད་པའི་གཏམ་ཞིག་སྟེ། ཁོང་གི་དེ་ལྟར་བཤད་ནས་དུས་ཡུན་རིང་པོ་ཞིག་མ་སོང་བར་རྒྱ་ནག་གིས་བོད་ས་ཡོངས་རྫོགས་ཧམ་ཟ་བྱས་པ་མ་ཟད། བོད་ས་གནས་སྲིད་གཞུང་གི་དམག་དཔུང་ཡང་བཅིངས་གྲོལ་དམག་མིར་བསྒྱུར་ཞིང་བོད་ཀྱི་དམག་སྒར་དུ་ཁྲག་མདོག་ཅན་གྱི་སྐར་ལྔའི་དར་དམར་བཙན་གྱིས་འཕྱར་བཅུག་པ་རེད།
དུས་དེ་ནས་བཟུང་འཚོ་གནས་རང་དབང་དང་འཚོ་བ་ལྷིང་འཇགས་ཀྱིས་ཕྱུག་པའི་མཐོ་སྒང་གི་དག་ཞིང་ཆུང་ཆུང་དེ་ངོ་མ་བརྩེ་མེད་གདུག་རྩུབ་ཀྱི་སྲིན་པོ་མང་པོས་རྦད་དེ་ཁེངས་སོང་ལ། པོ་ཏ་ལའི་རྒྱ་ཕིབ་ལ་དཔངས་པའི་དྲིལ་ཆུང་དེ་ཚོ་རླུང་བུ་འཇམ་པོས་དལ་གྱིས་སྒུལ་བའི་སྙན་ཞིང་འཇེབས་པའི་སྐད་སྒྲ་ཐོས་མི་ཐུབ་ལ། ས་གནས་མང་ཚོགས་དང་ཕྱོགས་ཀྱི་གནས་མཇལ་བ་ཚོས་མ་ཎི་ཡིག་དྲུག་དང་གུ་རུ་པདྨའི་མཚན་སྔགས་ཀྱི་དབྱངས་རྟས་གནམ་ས་རལ་བའི་གཙུག་ལག་གི་མདུན་རྒྱབ་གང་ས་ནས་དཀར་ལྷོག་ལྷོག་ཏུ་འཕྱུར་བའི་ལྷ་བསང་གི་གཡུ་འབྲུག་སྔོན་མོའི་སྒེག་འགྲོས་ཀྱང་གཏན་ནས་མཐོང་མི་ཐུབ་པར་གྱུར་སོང༌། དེ་ལྟར་གུང་ཁྲན་ཏང་གི་གདོང་རིས་ཉིན་རེ་ནས་ཉིན་རེར་ཇེ་ནག་ཇེ་ནག་ལ་སོང་བ་དང་བསྟུན་བོད་ཀྱི་མང་ཚོགས་ཚོའི་སེམས་པ་ཡང་བོད་གཞུང་དང༌། གོང་ས་མཆོག་ལ་ཇེ་ཉེར་ཇེ་ཉེར་གྱུར་ཡོད་དེ༌། དེ་ནི་ལེགས་བཤད་ལས། སྡིག་སྤྱོད་རྒྱལ་པོས་གཙེས་པ་ན། །མི་དབང་ཆོས་རྒྱལ་ལྷག་ཏུ་དྲན་ཞེས་པའི་གནས་ལུགས་དང་གཅིག་ཏུ་གྱུར་ཡོད། ཛ་དྲག་གི་གནས་བབ་དེ་འདྲ་ཞིག་གི་འོག་ནས་ྋགོང་ས་མཆོག་དང་བཀའ་ཤག་ལྷན་རྒྱས་སྐུ་སྲུང་དམག་མི་རྣམས་དང༌། ཆུ་སྒང་བསྟན་སྲུང་དང་བླང་དམག་གིས་དབུ་ཞབས་དཔུང་འདེགས་འོག་ནོར་གླིང་ནས་གསང་ཕེབས་བྱེད་དགོས་བྱུང་ཞིང༌། འདི་ནི་ཉེ་རབས་བོད་ཀྱི་ལོ་རྒྱུས་སྟེང་རྒྱལ་ཁབ་དང་མི་རིགས་གཞན་གྱི་དམག་དཔུང་གིས་བོད་སར་བཙན་འཛུལ་བྱས་ཏེ་རང་ས་ནས་གཞན་ཡུལ་ལ་བཙན་བྱོལ་བྱེད་ཐེངས་གཉིས་པ་ཡང་རེད།
སྐབས་འདིར་ྋགོང་ས་མཆོག་ལ་མཚོན་ན་རྒྱ་ནག་དང་མཉམ་དུ་གྲོས་མོལ་གྱི་ལམ་ནས་ཐག་གཅོད་བྱེད་པའི་རེ་འདུན་ཅི་བས་ཆེ་ནའང༌། རྒྱ་ཕྱོགས་ནས་དེའི་སྐོར་གྱི་གོ་སྐབས་གཏན་ནས་མེད་པར་བྱས་པ་མ་ཟད་བོད་ས་སྟོད་སྨད་གང་སར་དམངས་གཙོ་བཅོས་བསྒྱུར་ཞེས་པའི་གྲལ་རིམ་གྱི་ལས་འགུལ་བཙན་གྱིས་སྤེལ་མགོ་བརྩམས་པར་བརྟེན། མི་ལོ་བརྒྱ་ཕྲག་མང་པོའི་རིང་ཆོས་ཀྱི་འབྲེལ་ལམ་ཆེས་ཟབ་པའི་ཁྱིམ་མཚེས་རྒྱལ་ཁབ་རྒྱ་གར་དུ་སྲིད་དོན་གྱི་སྐྱབས་བཅོལ་མི་བྱེད་ཀ་མེད་གྱུར་ཡོད།
ལྔ་པ། བྱམས་བརྩེ་དང་ཤེས་རབ་ཀྱིས་འཛམ་གླིང་ལ་སྔར་མེད་ཀྱི་འོད་སྣང་བསྐྲུན་པ།
ྋགོང་ས་མཆོག་ནི་སྐུ་ན་ཆུང་ངུའི་དུས་ནས་ཆུ་ཚོད་དང༌། རླངས་འཁོར་སོགས་འཕྲུལ་རིགས་ཀྱི་གསར་ཐོན་དངོས་པོ་རྣམས་ཇི་ལྟར་གྲུབ་པའི་རྒྱུ་རྐྱེན་འཚོལ་དཔྱོད་ལ་དགའ་བའི་གཞོན་ནུ་དམིགས་བསལ་བ་ཞིག་ཡིན་པའི་སྐོར་བོད་ནང་ལོ་བདུན་ཞེས་པའི་དེབ་ཐེར་ནང་གསལ་པོར་བཀོད་ཡོད་ལ། འདི་ནི་ྋཕྱི་གླིང་བ་ཞིག་གིས་ྋགོང་ས་མཆོག་གི་ཉིན་རེའི་འཚོ་བའི་སྐོར་དང༌། ཁོང་གི་ལྷན་སྐྱེས་ཀྱི་སེམས་ཁམས་ལ་འགྲེལ་བཤད་བརྒྱབ་པའི་དེབ་ཐེར་ཐོག་མ་དེ་རེད་ཅེས་བཤད་ཆོག
ངས་འདི་ལྟར་དྲངས་དོན་ནི། སྐད་ཆ་འདི་དག་ང་ཚོ་བོད་མི་ཚོས་ཕྱོགས་ཞེན་བྱས་ཏེ་བྲིས་པ་ཞིག་མ་ཡིན་པར་དོན་དངོས་འཚོལ་དཔྱོད་ལ་བྱང་པའི་ནུབ་ཕྱོགས་པ་ཤེས་རབ་ཅན་ཞིག་གིས་གྲགས་ཅན་ཟིན་ཐོར་བཀོད་པ་ཞིག་རེད། ད་དུང་ཁོས་བཤད་ན། དུས་སྐབས་མང་པོ་ཞིག་ཏུ་ྋགོང་ས་མཆོག་གིས་ཚན་རིག་དང༌། འཕྲུལ་ལས། དམག་དོན། སའི་གོ་ལའི་ཆགས་དབྱིབས་སོགས་ཀྱི་སྐོར་ལ་བཀོད་པའི་དྲི་བར་ལན་འདོན་མ་ཐུབ་པར་ལྷག་པ་ནི། དེང་རབས་ཀྱི་ཤེས་ཡོན་དང་འཚོ་བར་ཡུན་རིང་ཟབ་ཞུགས་བྱེད་མྱོང་པའི་བོད་ནང་ལོ་བདུན་གྱི་རྩོམ་པ་པོ་ལ་མཚོན་ན་ཆེས་ཡ་མཚན་དགོས་པའི་གནས་ཤིག་ཏུ་གྱུར་ཡོད་དེ། ཁོང་གི་སེམས་པར་དེང་སྐབས་འཛམ་གླིང་འདིར་ན་ཆུང་ཚོའི་ཁྲོད་དུ་འདི་འདྲའི་བྱིས་པ་བློ་རྒྱ་གུ་ཡངས་ཞིང༌། རྣམ་དཔྱོད་ཀྱི་རྩལ་ཆེ་བ་དེ་འདྲ་ཇི་ཙམ་ཡོད་དམ་ཞེསྋགོང་ས་མཆོག་གི་མི་གཞི་དང་ཤེས་རབ་ཀྱི་མཛེས་སྡུག་ལ་སེམས་གཏིང་ནས་ཡིད་སྨོན་དང༌། བསྔགས་བརྗོད་བྱས་ཡོད་པ་དེས་ང་ཚོས་ྋགོང་ས་མཆོག་སྐུ་ན་ཆུང་དུས་རྣམ་རིག་ཇི་ཙམ་བཀྲ་མིན་གྱི་ཟུར་གཅིག་གསལ་པོར་རྟོགས་ཐུབ་ལ། དེས་ཁོང་ནི་དགེ་རྒན་ཚོས་ཅི་གསུངས་ལ་ཉན་རྐྱང་བྱེད་པའི་བྱིས་པ་བྱིངས་དང་གཏན་ནས་མི་འདྲ་བའི་ཁྱད་ཆོས་ཀྱང་གསལ་འདོན་བྱས་ཡོད།
ད་དུང་དེས་ཀྱང་ག་ལ་ཚད་དེ་མི་རིང་བར་ཆོས་ཕྱོགས་ནས་བསམ་བློ་སྔོན་ཐོན་ཅན་གྱི་དགེ་བཤེས་གྲགས་ཅན་ཚོ་བསྟེན་ཏེ་ཀ་མད་ཀྱི་དབྱངས་རྟ་ནས་བཟུང་མདོ་སྔགས་རིག་གནས་དང་བཅས་པར་ཐོས་བསམ་དཔྱིས་ཕྱིན་པར་མཛད་པས། ལྷ་དང་བཅས་པའི་སྐྱེ་རྒུ་ཡོངས་ལ་ཐར་བ་དང་ཐམས་ཅད་མཁྱེན་པའི་ལམ་མཆོག་འཁྲུལ་མེད་དུ་སྟོན་པའི་ཐུབ་པའི་གདུང་འཚོབ་ངོ་མར་གྱུར་སོང༌། མདོར་ན་ྋགོང་ས་མཆོག་ནི་དད་གུས་གཙོ་བོར་འཛིན་པའི་གནའ་བོའི་བོད་ཀྱི་བཤེས་གཉེན་དེ་དག་དང་མི་འདྲ་བར། མགོན་པོ་ཀླུ་སྒྲུབ་དང༌། ཆོས་ཀྱི་གྲགས་པ་བཞིན། དུས་ནམ་ཡང་ཤེས་རབ་ཀྱི་འཇུག་པ་གཙོ་བོར་བརྩི་བའི་རླབས་ཆེན་གྱི་སློབ་དཔོན་ཞིག་སྟེ། བཙན་བྱོལ་དུ་ཕེབས་པ་ནས་བཟུང་ཁོང་གི་ཆེས་ཐོག་མར་དགོངས་པ་ནི། དགོན་པ་དང་ལྷ་ཁང་བཞེངས་རྒྱུ་དེ་མ་ཡིན་པར། ཉམས་ང་བའི་མི་རིགས་འདི་འཚོ་གནས་ཀྱི་སོན་རྩར་གྱུར་པའི་ན་ཆུང་གཞོན་ནུ་ཚོའི་ཆེད་དུ་ཤེས་ཡོན་གྱི་བསྟི་གནས་སློབ་གྲྭ་ཞིག་འཛུགས་རྒྱུར་འབད་བརྩོན་བྱས་ཡོད་ལ། དེ་མཚུངས་སུ་རྒྱ་གར་གཞུང་ངོས་ནས་ཀྱང་ཐོག་མར་བཞུགས་སྒར་རྒྱ་གར་བྱང་ཕྱོགས་མུ་སི་རིར་སློབ་མ་ལྔ་བཅུ་ཙམ་ལ་སློབ་གྲྭ་ཆེད་འཛུགས་བྱས་པ་རེད།
སྐབས་འདིར་ྋགོང་ས་མཆོག་གི་གསུང་རྩོམ་ཞིག་ཏུ་ཆེས་སེམས་འགུལ་ཐེབས་པའི་བཀའ་སློབ་ཅིག་བསྩལ་ཡོད་པ་དེ་ངས་ད་ལྟ་ཡང་དྲན་གྱིན་འདུག དེ་ནི་ང་ཚོ་བོད་ཀྱི་ན་ཆུང་ཚོའི་ཆེད་དུ་རྒྱ་གར་གཞུང་གིས་སློབ་གྲྭ་གསར་འཛུགས་བྱེད་སྐབས། ངས་ངོས་ནས་རྒྱ་གར་གྱི་བུ་ཕྲུག་ས་ཡ་མང་པོར་སློབ་ཁང་མེད་པར་ཤིང་སྡོང་འོག་དང་ཐལ་རྡུལ་སྟེང་དུ་སློབ་ཚན་འཚོགས་བཞིན་པའི་གནས་ཚུལ་འདི་གཏན་ནས་བརྗེད་སྲིད་ཀྱི་མ་རེད་ཅེས་གསུངས་པ་དེ་རེད། གསུངས་འཕྲིན་འདི་ནི་ྋགོང་ས་མཆོག་གིས་སྲིད་བློན་པནྜིཏ་ནེ་རོ་ལ་གནང་བའི་བཀའ་མོལ་འདིས་བདག་གི་ཡིད་ལ་རང་བཞིན་གྱིས་སྐྱོ་སྣང་ཞིག་སྦྱིན་པ་ནི། མིག་ཆུ་རྡོག་པ་འགའ་དབང་མེད་དུ་སེམས་ཁམས་དང་གཞི་དང་གཅིག་ཏུ་འདྲེས་ཏེ་གྲང་ཤུར་ཤུར་དུ་གྱུར་བ་ཙམ་མ་ཡིན་པར། མི་ཞིག་ལ་དཀའ་ངལ་ཕྲད་སྐབས་གཞན་གྱིས་རང་ཉིད་ལ་སྦྱིན་པའི་བྱམས་བརྩེར་སེམས་གཏིང་ནས་གུས་བརྩི་དང༌། བླ་ན་མེད་པའི་བཀའ་དྲིན་རྗེས་དྲན་གྱི་གདུང་དབྱངས་རིང་མོ་ཞིག་ཏུ་གྱུར་སོང་བ་དེ་རེད།
དེ་ནས་རིམ་གྱིས་དྷ་ས་བོད་ཁྱིམ་གྱིས་མཚོན་པའི་ན་ཆུང་ཚོའི་ཤེས་ཡོན་བསྟི་གནས་བཅུ་ཕྲག་འགའི་ནང་དུ་སློབ་མ་ཁྲི་ཕྲག་ལ་ཉེ་བར་ཤེས་ཡོན་སྦྱང་རྒྱུའི་མཐུན་རྐྱེན་སྦྱར་ཏེ། ཐུགས་བརྩེ་ཆེན་པོས་མ་འོངས་བོད་ཀྱི་སློབ་ཕྲུག་ཚོ་འདབ་གཤོག་གཉིས་ལྡན་གྱི་ཤེས་ཡོན་པ་ཞིག་ཡོང་རེར་དམིགས་ཏེ་དུས་དང་དུས་སུ་ཟབ་རྒྱས་ཀྱི་བཀའ་སློབ་རིམ་པར་བསྩལ་ཡོད་ནའང༌། ལས་ཀྱི་སྣེ་མོར་གཏོགས་པའི་བོད་མི་ཚོའི་ངོས་ནས་བཙན་བྱོལ་བྱས་ཏེ་མི་ལོ་ལྔ་བཅུ་ལྷག་ཕྱིན་པའི་དེང་སང་ཡང་ྋགོང་ས་མཆོག་གི་དགོངས་བཞེད་ཆ་ཚང་བ་ཞིག་སྐོང་ཐུབ་མེད་པ་ནི་ཧ་ཅང་བློ་ཕམ་དགོས་པའི་གནས་ཤིག་ཡིན། ཡང་ཕྱོགས་གཅིག་ནས་བཤད་ན། ྋགོང་ས་མཆོག་གིས་དུས་ནམ་ཡང་བོད་མི་ཚོར་བསྩལ་རྒྱུའི་བཀའ་སློབ་ནང་དུ། ཡ་རབས་བཟང་སྤྱོད། ཤེས་བྱ་དོན་གཉེར། རང་ཉིད་ནང་པ་ཞིག་ཡིན་པའི་ཆ་ནས་འཚེ་མེད་ཞི་བདེ་ཞེས་གཙོ་བོར་འདོན་གྱིན་ཡོད་ནའང༌། གཞིས་ལུས་སྤུན་ཟླ་ཕུད་པའི་བཙན་བྱོལ་བོད་མི་ཚོའི་ངོས་ནས་ལུང་ཚིག་དེ་དག་ངག་སྐྱོར་བྱས་ཏེ་གཞན་ལ་སློབ་གསོ་གཏོང་སྤྱད་བྱེད་པ་ལས་རང་ཉིད་ཀྱི་ལག་ལེན་དུ་བསྟར་མཁན་ཧ་ཅང་དཀོན་པོར་གྱུར་ཡོད།
ཆེས་དམིགས་བསལ་བ་ཞིག་ལ་ྋགོང་ས་མཆོག་གིས་འཛམ་གླིང་ཤར་ནུབ་ཀྱི་རྒྱལ་ཁབ་གང་དུ་ཆོས་སྲིད་ཀྱི་བྱ་བ་ཅི་ཞིག་བརྩམས་ཀྱང་ཆེས་གལ་ཆེ་བ་ནི། འཚེ་བ་མེད་པ་དང༌། ཞི་བའི་གྲོས་མོལ། ཀུན་ཁྱབ་ཐུགས་ཁུར། ཆོས་ལུགས་མཐུན་སྒྲིལ། འགྲོ་བ་མིའི་ཐོབ་ཐང་སོགས་གཙོ་བོར་འཛིན་དགོས་པའི་ཟབ་རྒྱས་ཀྱི་བཀའ་སློབ་ཡང་ཡང་བསྩལ་བར་བརྟེན། འཛམ་གླིང་གི་གྲགས་ཅན་གྱི་ཆོས་ལུགས་མི་སྣ་དང༌། ཚན་རིག་ཆེད་མཁས་པ། རྩོམ་པ་པོ། སྲིད་ལུགས་མཁས་ཅན་སོགས་ཆེ་རྒུ་ཕལ་མོ་ཆེས་ྋགོང་ས་མཆོག་གི་མཛད་ཕྱོགས་ལ་དགའ་བསུ་ཆེན་པོ་བྱས་ཡོད་པར་མ་ཟད། ཕྱི་ལོ་༡༩༨༩ ལོའི་ ༡༢། ༡༠། ཉིན་འཛམ་གླིང་འདིར་སྙན་གྲགས་ཆེས་ཆེ་བའི་བྱ་དགའ་ནོ་བེལ་ཞི་བདེ་གཟེངས་རྟགས་འབུལ་བཞེས་མཛད་པ་ནི་བོད་མི་ཚོར་མཚོན་ན་ཉེ་བའི་བྱུང་རབས་ཁྲོད་གཟི་བརྗིད་ཀྱི་ལེའུ་གསར་བ་ཞིག་ཡིན་ནོ། ། དེ་ནས་བཟུང་སྔ་ཕྱིར་ཨ་རིའི་གྲོས་ཚོགས་ཀྱི་རྟགས་མས་མཚོན་འཛམ་གླིང་ཤར་ནུབ་ཀྱི་གཞུང་འབྲེལ་དང་གཞུང་འབྲེལ་མ་ཡིན་པའི་དྲང་བདེན་གྱི་ཚོགས་པ་མང་པོས་ྋགོང་ས་མཆོག་ལ་རྒྱལ་ཁབ་སོ་སོའི་མི་སེར་ཆེ་མཐོང་ལག་འཁྱེར་དང༌། གཙུག་ལག་སློབ་གྲྭའི་སློབ་དཔོན་ཆེན་མོ། བྱས་རྗེས་ཅན་གྱི་གྲགས་ཅན་མི་སྣའི་དྲན་རྟེན་ཕྱག་རྟགས་སོགས་རང་རང་གི་ཁྱད་ཆོས་མཚོན་པའི་ཆེས་མཐོའི་གཟེངས་རྟགས་རྒྱུན་མར་བསྩལ་ཡོད་ལ། ཉེ་བའི་ཆར་ཡང་རྒྱལ་སྤྱིའི་ཉེས་ཡང་ཚོགས་པས་གཟེངས་རྟགས་ཐེངས་དང་པོ་དེ་ྋགོང་ས་མཆོག་ལ་འབུལ་བཞེས་མཛད་ཡོད།
དེ་དག་ནི་རླབས་ཆེན་གྱི་སློབ་དཔོན་དམ་པ་འདིས་བོད་མི་ཙམ་མ་ཟད། འགྲོ་བ་མྀའི་རིགས་སྤྱི་དང༌། ལྷག་པར་གོ་ལ་གཅིག་གྱུར་གྱི་ཐད་རླབས་ཆེན་གྱི་དགོངས་པ་ཆེར་བཞེས་མཛད་པར་ཤར་ནུབ་ཀྱི་སྐྱེས་བུ་དཔྱོད་ལྡན་ཚོས་ངོས་འཛིན་ཐོབ་པའི་མཚོན་རྟགས་ཙམ་ཡིན་ལ། མགོན་པོ་གང་ཉིད་ཀྱིས་ཡུན་རིང་ཐོས་བསམ་བྱས་པའི་ཐེག་པ་ཆེན་པོའི་ཆོས་ཀྱི་སྙིང་པོར་གྱུར་པའི་བློ་སྦྱོང་རྣམས་ལ་རང་ངོས་ནས་ཚོད་བགམ་ཐེངས་ཤིག་བྱས་པའི་གྲུབ་འབྲས་ཀྱང་ཡིན་སྲིད། མདོར་ན་ྋྋགོང་ས་མཆོག་ནི་འཛམ་གླིང་འདིར་མི་འབོར་དུང་ཕྱུར་བདུན་ཅུ་ཙམ་ཡོད་པའི་ནང་གི་ཆེས་རླབས་ཆེན་གྱི་སྐྱེས་བུ་ཚད་མ་གཅིག་པུ་དེ་ཡིན་ལ། དམག་འཁྲུག་དང་སྒེར་གཅོད་ལ་རྒོལ་ནུས་པའི་ངེས་དོན་གྱི་དཔའ་པོ་དེ་ཡང་ཡིན་ནོ། །
དྲུག་པ། བོད་ཀྱི་ཆབ་སྲིད་ཐད་སྐབས་བསྟུན་གྱི་འཕོ་འགྱུར་རླབས་ཆེན་བཏང་བ།
ཁྱོད་ཤི་ང་གསོན་གྱི་འཐུབ་འཁྲུག་རིང་མོ་འཛམ་གླིང་དམག་ཆེན་གཉིས་པའི་རྗེས་སུ་ད་གཟོད་མིའི་རིགས་ལ་བསམ་བློ་གསར་བ་ཞིག་དང༌། ཉམས་མྱོང་གསར་བ་ཞིག་ཐོབ་པ་ནི། སྒེར་གཅོད། ཧམ་སེམས། བཙན་འཛུལ་བཅས་ཀྱིས་དུས་ནམ་ཡང་འཛམ་གླིང་འདིར་ཞི་བདེ་ངོ་མ་ཞིག་མི་ཐོབ་པའི་ངེས་པ་གཏིང་ནས་རྙེད་ཡོད་པ་དེ་རེད། དེའི་རྐྱེན་གྱིས་མི་རིང་བར་མཉམ་འབྲེལ་རྒྱལ་ཚོགས་བཙུགས་པ་ནས་བཟུང་འཛམ་གླིང་འདིར་དམངས་གཙོ་དང༌། ཞི་བདེ། མི་རིགས་དང༌། ཕོ་མོ་འདྲ་མཉམ། ཆོས་དད་རང་དབང་དང༌། སྨྲ་བརྗོད་རང་དབང་གི་ཞི་བའི་འཐབ་རྩོད་སྔར་ལས་ཀྱང་ཤུགས་ཆེ་རུ་སོང་ཡོད་ལ། དེས་ཡུན་རིང་སྲིད་དབང་སྒེར་གཅོད་པ་དང༌། རྒྱལ་བོའི་ལམ་ལུགས། བྲན་གཡོག་ལམ་ལུགས་ཀྱི་མངའ་འོག་ཏུ་འཚོ་བཞིན་པའི་འབངས་མི་ཚོར་རྒྱལ་སྤྱིའི་ཁྲིམས་ཐོག་ནས་རང་ཉིད་མི་བུ་རང་དབང་ཅན་ཞིག་ཏུ་འགྱུར་རྒྱའི་ཐད་ཁྲིམས་ལུགས་གསར་བཟོས་མཚོན་པའི་མིག་དཔེ་གལ་ཆེན་ཞིག་བསྐྲུན་ཡོད་ནའང༌། རྒྱ་ནག་དམར་ཕྱོགས་ལྟ་བུའི་ཧམ་ཤེད་ཆེ་བའི་རྒྱལ་ཁབ་གསར་བ་འགས་དེ་ལས་ལྡོག་སྟེ་ཉམས་ཆུང་ནུས་མེད་དུ་གྱུར་པའི་རྒྱལ་ཁབ་མང་པོ་དྲག་དམག་གིས་རང་ཉིད་ཀྱི་མི་སེར་སྤེལ་ཡུལ་དུ་བསྒྱུར་གང་ཐུབ་བྱས་ཡོད།
དེ་ནི་ཁོང་ཚོར་མཚོན་ན་རང་ཉིད་ཀྱི་གཟི་བརྗིད་ཅིག་ཏུ་བརྩི་བཞིན་ཡོད་ནའང༌། ཞིབ་མོར་བརྟགས་ན་དུས་རབས་ཀྱི་བསམ་བློའི་རྗེས་མ་ཟིན་པར་ཞི་བདེ་དང་དམངས་གཙོར་རྒྱང་བཀྱེད་བྱས་པའི་ལོ་རྒྱུས་ཀྱི་ལེའུ་ནག་པོ་ཞིག་ལ་ཅི་ཡང་མ་ཡིན་ནོ། །འོན་ཀྱང་གོང་ས་མཆོག་ནི་སྲིད་དབང་སྒེར་གཅོད་པ་དེ་དང་གཏན་ནས་མི་འདྲ་བར་སྐུ་གཞོན་ནུའི་དུས་ནས། ཡང་དག་པའི་དམངས་གཙོ་དང༌། སྤྱི་ཚོགས་རིང་ལུགས་ལ་ཆེས་མོས་མཐུན་ཡོད་མཁན་ཞིག་ཡིན་ཏེ། འདིར་དཔེ་མཚོན་གྱི་ཁོང་གི་བཀའ་སློབ་ཅིག་དྲངས་ན། གོང་ས་མཆོག་སྐུ་གཞོན་ནུའི་སྐབས་ཤིག་སྐུ་དྲག་ཅིག་ལ་ཁྲིམས་གཏུགས་བྱེད་མཁན་གྱི་མི་སེར་ཞིག་རྩེ་ཕོ་བྲང་དུ་བཅར་ཏེ་ཞུ་གཏུགས་བྱས་ནའང༌། ཕོ་བྲང་ཤོད་ཀྱི་སྣེ་མགྲོན་པས་ཞུ་གཏུགས་བྱེད་པོར་བཀའ་བཀྱོན་དྲག་པོ་བཏང་བའི་ཚུལ་གོང་ས་མཆོག་གིས་དངོས་སུ་གཟིགས་པ་ན། ཁོང་གི་ཐུགས་ལ་ཨ་ཁ་དཔོན་པོ་དྲང་མོ་ཞིག་དང་དམངས་སེམས་ལྡན་པ་ཞིག་མེད་ན་མི་སེར་ཚོ་ཅི་འདྲའི་སྙིང་རྗེའང་དགོངས་ཏེ། མ་འོངས་པར་ངའི་སྲིད་དབང་འཛིན་སྐབས་ཅིས་ཀྱང་ཕྱོགས་གང་ཐད་ནས་དྲང་བདེན་ཞིག་ཨེ་ཡོང་བལྟ་དགོས་སྙམ་པ་བྱུང་གསུངས། འདི་ནི་གོང་ས་མཆོག་སྐུ་ན་ཧ་ཅང་ཆུང་ངའི་སྐབས་མི་སེར་ཚོའི་འཚོ་བར་བསམ་ཤེས་བྱེད་སྟངས་རེད་ལ། དངུལ་དང་གོ་ས་རྐྱང་པར་མགོ་འཁོར་བའི་དེང་རབས་ཀྱི་དཔོན་ཆེན་ཚོའི་མི་ཚེ་ཧྲིལ་པོར་སྐར་ཆ་གཅིག་གི་དུས་ཡུན་ཙམ་ཡང་དྲན་མ་མྱོང་བའི་ནང་སེམས་ཀྱི་རྩ་ཆེའི་ནོར་བུ་ཞིག་ཀྱང་ཅི་ལ་མིན།
མདོར་ན་སྤྱི་ལོ་ ༡༩༥༠། ཟླ་ ༡༡། པའི་ ༡༧། ཉིན་ྋགོང་ས་མཆོག་གིས་བོད་ཀྱི་ཆོས་སྲིད་ལུགས་གཉིས་ཀྱི་ཐུགས་འགན་ཐོག་མར་བཞེས་པ་ན་མ་འོངས་པར་འགྲོ་དོན་འཕེལ་བའི་རྟེན་འབྲེལ་ལ་དགོངས་ཏེ་བོད་ས་ཁྱོན་ཡོངས་ཀྱི་བཙོན་པ་རྣམས་གློད་གྲོལ་མཛད་པ་སོགས་ནི་དམངས་གཙོའི་རྒྱལ་ཁབ་གྲགས་ཅན་ཨ་རི་ལྟ་བུར་མ་ཟད་འཛམ་གླིང་འདིར་ཆོས་ལྡན་རྒྱལ་ཁམས་སུ་གྲགས་པའི་ཆེན་པོ་རྒྱ་གར་བ་ལའང་མེད་པའི་རིས་མེད་ཀྱི་བྱམས་བརྩེའི་ལས་འགུལ་རླབས་པོ་ཆེ་ཡིན་ནོ། །
ལྷག་པར་དུ་ྋགོང་ས་མཆོག་ནི་གསར་བཏོད་དང་མདུན་སྐྱོད་ཀྱི་ཐུགས་སྟོབས་ཆེན་པོ་མངའ་བའི་དབུ་ཁྲིད་ཡང་དག་པ་ཞིག་ཡིན་པས། སྐུ་ན་ཆུང་ངུའི་དུས་ནས་ཁྱབ་རྒྱ་ཆུང་ཞིང་གསར་བརྗེའི་སྙིང་སྟོབས་ཞན་པའི་བོད་ས་གནས་སྲིད་གཞུང་གི་ཆབ་སྲིད་སྐྱོང་སྟངས་དེས་ཐུགས་ཡིད་མ་ཚིམས་པའི་གཟིགས་སྣང་སྔ་ཕྱིར་བྱུང་བ་བཞིན། ཐ་ན་རྒྱ་དམག་བོད་དུ་འབྱོར་རྗེས་ཀྱང་བོད་ཀྱི་སྲིད་དབང་བརྟན་བརླིང་མིན་ནའང༌། ད་དུང་ཐུགས་སྤོབས་མ་ཞུམ་པར་མི་མང་གི་ཆེད་དུ་དུས་ཚོད་ཆུད་ཟོས་གཏན་ནས་མ་བཏང་བར་ཁྲིམས་ཞིབ་ཁང་ལྟ་བུའི་ལས་ཁུངས་མང་པོ་ཞིག་གསར་འཛུགས་གནང་ཡོད།
རྒྱ་གར་དུ་ཕེབས་པ་ནས་བཟུང་བཙན་བྱོལ་བོད་གཞུང་གི་ཆབ་སྲིད་ཀྱི་སྒྲོམ་གཞིར་དུས་དང་དུས་སུ་འགྱུར་བ་བཏང་བའི་ཚུལ་ཡང༌། བོད་ཀྱི་བདེན་མཐའ་རྩོད་པའི་ཐབས་ལམ་སྔོན་གྱི་བྱུང་རབས་ལ་གཞི་མ་བཅོལ་བར་ད་ལྟའི་བོད་ཀྱི་གཉན་ཕྲེང་ཆེ་བའི་གནས་སྟངས་འདི་ལས་སྐྱོབས་ཕྱིར་ཕྱི་ལོ་ ༡༩༨༨། ལོར་བོད་རྒྱ་གཉིས་སྨན་གྱི་ཐབས་ལམ་ཡང་དག་པ་དབུ་མའི་ལམ་གྱི་སྲིད་ཇུས་གསར་རྩོམ་དང༌། ལོ་དེར་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་བོད་དོན་ལས་འགུལ་ཚོགས་པ་གསར་འཛུགས་མཛད། ཕྱི་ལོ་ ༡༩༩༠། ལོར་རྒྱ་ནག་གཞུང་གིས་བཙན་བྱོལ་གཞུང་འདི་ཏཱ་ལའི་བླ་མ་སྒེར་གྱི་སྐུ་དབང་དང་འབྲེལ་བའི་གནད་དོན་ཅིག་ལས་མིན་ཚུལ་གྱིས་འཁྱོག་བཤད་རྒྱུན་མར་བྱས་པ་ན། བོད་ཕྱི་ནང་གཉིས་ཀ་ནས་བོད་མི་ཚོས་ས་གནས་ཁག་གི་འཐུས་མིས་ཡིག་ངག་གཉིས་ཀྱི་ལམ་ནས་བཙན་བྱོལ་བོད་གཞུང་ནི། གཞིས་བྱེས་བོད་མི་ཡ་དྲུག་གི་མངོན་འདོད་དང་མཐུན་པའི་སྲིད་གཞུང་ཡིན་པ་མཚོན་ཕྱིར་བོད་མི་མང་སྤྱི་འཐུས་གྲོས་ཚོགས་གསར་འཛུགས་བྱས་པར་མ་ཟད། ཕྱི་ལོ་༡༩༩༡། ལོ་དེ་རྒྱལ་སྤྱིའི་བོད་ཀྱི་ལོར་གཏན་འབེབས་དང་བརྩི་སྲུང་བྱས།
རིམ་གྱིས་ནང་སྲིད་དང༌། བདེ་སྲུང༌། འཕྲོད་བསྟེན། ཤེས་རིག ཕྱི་དྲིལ། ཆོས་དོན་བཀའ་བློན་རྣམས་ཀྱང་ྋགོང་ས་མཆོག་རང་ཉིད་ནས་ཐད་ཀར་མིང་འདོན་གནང་ན། མང་གཙོའི་ལམ་ལུགས་ནང་མི་འཚམས་པར་དགོངས་ཏེ་མཚམས་འཇོག་གནང་ཞིང༌། བཀའ་སྤྱི་གཉིས་ཀ་མི་མང་ནས་ཐད་ཀར་འོས་འདེམས་བྱེད་པའི་མང་གཙོ་ཡང་དག་པའི་ལམ་དུ་བསྐྱོད་པའི་བཀའ་སློབ་ལམ་སྟོན་རྒྱ་ཆེར་གནང་བ་སོགས་ནི། བོད་མི་ཚོའི་ངག་རྒྱུན་དུ་ང་ཚོའི་མང་གཙོ་ནི་ྋགོང་ས་མཆོག་གིས་ཐད་ཀར་མི་མང་ལ་གསོལ་རས་བསྩལ་བ་ཞིག་རེད་ཅེས་སྒྲོགས་བཞིན་པ་འདི་ཀའོ། །
དེས་ན་བཙན་བྱོལ་དུ་གྱར་ནས་མི་ལོ་ཧྲིལ་པོ་ལྔ་བཅུ་ལྷག་འགོར་བའི་དེ་རིང་གི་བར་དུ་ྋགོང་ས་མཆོག་གིས་ང་ཚོའི་མི་རིགས་འདི་མང་གཙོ་ཚད་དང་ལྡན་པའི་རྒྱལ་ཁབ་སྤྱི་དང་འདྲ་བར་གང་ས་ཅི་ཐད་ནས་གོ་རྟོགས་སད་ཕྱིར་རླབས་ཆེན་གྱི་བཀའ་སློབ་མང་དུ་བསྩལ་ཡོད་ནའང༌། ང་ཚོ་དེ་ལས་ལྡོག་སྟེ་རང་ཉིད་ཀྱིས་རང་ཉིད་བརྙས་པའི་རྨོངས་གཉིད་མཐུག་པོ་ཞིག་གིས་རྦད་དེ་བཟི་ནས་ཡོད་པའི་གནས་ལུགས་འདི་རང་ཉིད་ཐེ་པའི་བོད་མི་ཚོས་ངེས་པར་དུ་ཁས་ལེན་བྱེད་དགོས་ལ། སེམས་གཏིང་ནས་ྋགོང་ས་རྒྱལ་བ་དོན་གྱི་བདག་པོར་དགོངས་སེལ་ཡང་ཞུ་དགོས་པར་མ་ཟད། འབྱུང་འགྱུར་མགོན་པོ་གང་ཉིད་ཀྱིས་མི་ལོ་དུ་མའི་སྔོན་ནས་བོད་མི་མང་ལ་ཐུགས་བརྩེ་ཆེན་པོས་ཡང་ཡང་བསྟན་པའི་མང་གཙོ་ཡང་དག་པ་དང༌། མི་གཞི་ཡང་དག་པ་ཞིག་གི་ཕྱོགས་སུ་མདུན་སྐྱོད་ཀྱི་གོམ་སྟབས་ཀྱང་ཤུགས་ཀྱིས་སྤོ་རྒྱུའི་དམ་བཅའ་རེ་ཅིས་ཀྱང་སེམས་གཏིང་ནས་འབུལ་དགོས་པའི་དུས་ལ་བབས་པ་ཡིན་ནོ། །
བདུན་པ། ཉེ་ཆར་བསྩལ་བའི་གསུང་འཕྲིན་རིན་པོ་ཆེ་དང་དེའི་སྒུལ་ཤུགས།
ཉེ་བའི་ལོ་ཤས་སྔོན་ནས་ྋགོང་ས་མཆོག་གི་རྒྱལ་སྤྱིའི་ལྡང་ཆ་ཁག་ཏུ་རང་ཉིད་ཕྱེད་བགྲེས་ཡོལ་ཡིན་པའི་བཀའ་སློབ་སྔ་རྗེས་མང་པོ་བསྩལ་ཡོད་ལ། དེ་ནི་ཉེ་ཆར་སྤྱི་འཐུས་གྲོགས་ཚོགས་ལ་བསྩལ་བའི་གསུང་འཕྲིན་དེའི་ལམ་སྦྱོང་ཞིག་ཀྱང་རེད་ཅེས་བཤད་ཆོག གསུང་འཕྲིན་དེའི་བརྗོད་བྱའི་དོན་ཧྲིལ་གྱིས་དྲིལ་ན། ྋགོང་ས་མཆོག་གི་མཚན་གནས་རྗེས་འབྲེལ་གྱི་ཆབ་སྲིད་ཀྱི་དབང་ལུང་ཡོངས་རྫོགས་མང་ཚོགས་ཀྱིས་འོས་འདེམས་བྱུང་བའི་འགོ་ཁྲིད་ལ་སྤྲོད་རྒྱུ་ཡིན་པའི་སྐོར་ཡིན་ལ། དེ་ལྟ་བུ་ཡོངས་ཆེད་ཁྲིམས་བཟོ་ལྷན་ཚོགས་ལའང་ད་ལྟའི་ཁྲིམས་ལ་བཟོ་བཅོས་བྱེད་དགོས་སྐོར་གྱི་བཀའ་སློབ་འགངས་ཆེན་བསྩལ་ཡོད། ལྷག་པར་དུ་ཉེ་ཆར་ྋགོང་ས་མཆོག་གིས་ཞལ་སྔ་ནས། དགའ་ལྡན་ཕོ་བྲང་ཟེར་བ་དེ་དགེ་ལུགས་པའི་གཞུང་ཞིག་ཡིན་པ་དང༌། བོད་གཞུང་ཞེས་པའང་སྔོན་ཆད་གཙོ་བོ་དབུས་གཙང་གི་ས་གནས་ཙམ་ལ་དབང་བསྒྱུར་པའི་གཞུང་ཞིག་ཡིན་པས། ད་ནས་བཟུང་ཕྱིས་འབྱུང་རྒྱལ་དབང་སྐུ་ཕྲེང་རིམ་པར་བྱོན་པ་རྣམས་ཀྱིས་ཆོས་ཀྱི་དབུ་ཁྲིད་ཁོ་ན་མཛད་པ་མ་གཏོགས་ཆབ་སྲིད་ཀྱི་ཐད་འབྲེལ་བ་བྱེད་རྒྱུ་མིན་པ་དང༌། དེ་ཡང་སྔོན་གྱི་དུས་རྒྱལ་དབང་སྐུ་ཕྲེང་དང་པོ་ནས་བཞི་པའི་དབར་དུ་ཚང་མ་ཆོས་ཀྱི་དབུ་ཁྲིད་རྐྱང་པ་མཛད་པ་ལས། ཆབ་སྲིད་ཐད་འབྲེལ་བ་མེད་པ་སོགས་ཀྱི་ལོ་རྒྱུས་དང་སྦྲགས་ད་ཡོད་ཀྱི་དགའ་ལྡན་ཕོ་བྲང་གི་ངོ་བོ་བསྒྱུར་ཏེ། མཚན་ཉིད་ཡོངས་སུ་ཚང་བའི་མང་གཙོའི་སྒྲིག་འཛུགས་ཤིག་ཏུ་བསྒྱུར་དགོས་ཚུལ་གྱི་ལམ་སྟོན་རླབས་ཆེན་མཛད་ཡོད་པ་དེ་རེད།
འོན་ཀྱང་གསུང་འཕྲིན་འདིའི་ཐད་གྲོས་ཚོགས་ནང་སྤྱི་འཐུས་ཆབ་བྲག་ལྷ་མོ་སྐྱབས་ཀྱིས་མཚོན་པའི་ཕུགས་རྒྱང་རིང་ཞིང་དཔྱོད་ཤེས་ཀྱིས་ཕྱུག་པ་རེ་འགའ་ལས་རིན་ཐང་ལྡན་པའི་བཀའ་མོལ་གནང་མཁན་དཀོན་པོར་གྱུར་ཡོད་པ་ནི་ངོ་མ་ཡིད་སྐྱོ་དགོས་པ་ཞིག་རེད། བཀའ་ཁྲྀ་ཟམ་གདོང་རིན་པོ་ཆེས་ཀྱང་ཚོར་བ་དང༌། རིག་པ་གཉིས་ལས་ཕྱི་མ་བདམས་དགོས་པ་རེད་ཅེས་ཨ་ཆད་འུ་ཐུག་གིས་གསུང་སྐད་ཅིག་ཤོར་ཡོད་པར་བལྟས་ན། བོད་མི་རིགས་མང་གཙོ་ཅན་དུ་གྱུར་པའི་སྐྱེ་སྐར་ཏེ་དགེ་ལྡན་ཕོ་བྲང་གི་སྲིད་དབང་ལ་རྫོགས་ཚིག་འགོད་པའི་ཉིན་མོར་གྱུར་པ་གཉིས་ལས་སྔ་མར་དུང་ཞེན་ཆེ་ཚོད་རེད། ཁོང་གིས་འདི་ལྟར་བཤད་དུས་ང་ངོ་མ་ཡ་མཚན་སོང༌། མི་ལོ་བཅུ་ཕྲག་མང་པོར་བཙན་བྱོལ་བོད་མིའི་ཤེས་རིག་སྤྱི་དང༌། ལྷག་པར་དུ་ཉེ་བའི་ལོ་བཅུའི་རིང་བོད་ཀྱི་ཆབ་སྲིད་ཐད་རླབས་ཆེན་དབུ་ཁྲིད་པ་ཟམ་གདོང་ལྟ་བུའི་མི་སྣ་རྒན་པ་ཚོར་ཡང་མདུན་སྐྱོད་ཀྱི་སྙིང་སྟོབས་དེ་ཙམ་མེད་པར་བལྟས་ན། གདན་ས་ཁག་ཏུ་ལྟ་གྲུབ་བཟང་ངན་གྱི་འདུ་ཤེས་རྐྱང་པས་ཁྱོད་ཤི་ང་གསོན་བྱེད་པའི་ཤེས་ཡོན་པ་གཞན་དག་གི་ཤེས་རབ་ཀྱི་སྣང་བརྙན་དང༌། ཚོར་བའི་ཁ་ཁོག་དེ་ངས་གཏན་ནས་མཐོང་མི་འདོད་པ་ཞིག་ཡིན་པ་སྨོས་མ་དགོས་པ་རེད།
གང་ལྟར་ངས་བསམ་པར་ྋབོད་མིའི་ཚབ་མཚོན་དུ་གྱུར་པའྀ་སྤྱི་འཐུས་གྲོས་ཚོགས་ཀྱིས་གསུང་འཕྲིན་འདིའི་ཁ་ཕྱོགས་ལ་སློབ་སྦྱོང་གཏན་ནས་བྱེད་འདོད་ཀྱིན་མེད་ལ། དེ་ལས་ལྡོག་སྟེ་སྔར་རྒྱུན་ལྟར་བོད་ཀྱི་ཡོད་ཚད་ྋགོང་ས་མཆོག་ལ་བརྟེན་རྐྱང་བྱས་ནས་བསྡད་ན་ད་གཟོད་རང་ཉིད་སྐྱིད་པོ་ཞིག་ཡོང་བར་འདོད་ཀྱིན་ཡོད་པ་ནི། དཔེར་ན། ནར་མ་སོན་པའི་བྱིས་པ་ཚོས་རང་ཉིད་ཀྱི་ཨ་མ་རྒན་མོ་དུས་ནམ་ཡང་རང་ཉིད་དང་འབྲལ་མི་སྲིད་པའི་ཡིད་ཆེས་བྱས་པ་གཉིས་སུ་མེད་པ་ཞིག་རེད། མ་གཞི་བུ་ཕྲུག་ཚོར་དེ་ལྟ་བུའི་ཞིག་འདུ་ཤེས་ཞིག་ཡོད་པ་ནི་མི་ཆོས་ཀྱི་རིན་ཐང་ལྡན་པས་ཆེས་འོས་འཚམས་ཤིག་ཡིན་ནའང༌། ཕྱོགས་གཅིག་ནས་བསམ་ན། བརྩེ་ཞེན་དང་སྙིང་རྗེས་ཕྱུག་པའི་ཨ་མ་རྒན་མོ་ནམ་ཡང་རང་ཉིད་དང་འབྲལ་མི་སྲིད་སྙམ་པ་དེ་ཚེ་སྲོག་གི་ཆག་འཇིག་ཐད་ཤེས་རབ་ནར་སོན་པའི་བྱིས་པ་སྤྱྀའི་བླུན་རྟགས་ཤིག་ཅི་ལ་མིན། གང་ལྟར་ཐེངས་འདིའི་གསུང་འཕྲིན་རིན་པོ་ཆེས་བོད་ཕྱི་ནང་གི་བོད་མི་ཙམ་ཟད་འཛམ་གླིང་གི་རྒྱལ་ཁབ་མང་པོ་ཞིག་གི་དབུ་ཁྲིད་ཚོར་སྔར་མེད་ཀྱི་མིག་དཔེ་གསར་བ་ཞིག་བཞག་ཡོད་ནའང༌། དེ་ལྟར་གོ་མིན་ནི་མི་བུ་རང་དང་རྒྱལ་ཁབ་རང་ཉིད་ཀྱི་ཤེས་འཇོན་དང་བདེན་པའི་སྟོབས་ཤུགས་ལ་རག་ལས་པ་ཞིག་རེད།
ཉེ་ཆར་ཨ་རབ་ལུང་པ་རྣམས་ཀྱི་ནང་དུ་མི་མང་གིས་མང་གཙོ་རྩེད་ལེན་བྱེད་ཀྱིན་པའི་གནས་ཚུལ་སྔར་ལས་ཀྱང་ཤུགས་ཇེ་ཆེར་སོང་ཡོད་ལ། ཨི་ཇེབ་དང༌། ལི་བྷེ་ཡ་མི་མང་སོགས་ཀྱིས་ཞི་དྲག་གཉིས་ཐད་ནས་སྲིད་དབང་སྒེར་གཅོད་པ་ཚོར་ཆབ་སྲིད་ཀྱི་དབང་ཆ་མི་མང་ལ་དགོས་པའི་སྐད་ཤུགས་ཉིན་རེ་ནས་ཇེ་ཆེར་འགྲོ་བཞིན་པ་དེར། ཆབ་སྲིད་དཔྱད་བརྗོད་པ་ཚོས་འཛམ་གླིང་གི་མང་གཙོའི་གསར་བརྗེ་བཞི་པ་ཞེས་བཏགས་ཡོད།
འོན་ཀྱང་ཆེས་ཡ་མཚན་པ་ཞྀག་ལ་ང་ཚོའི་མང་གཙོ་ནི། མི་མང་གིས་ཞི་དྲག་གིས་བླངས་པ་ཞིག་མ་ཡིན་པར་ཡང་དག་པའི་དབུ་ཁྲིད་ཀྱིས་ཐུགས་བརྩེ་ཆེན་པོས་མི་མང་ལ་བཙན་ཐབས་སུ་གནང་བ་ཞིག་ཡིན་པས། འཛམ་གླིང་གི་མང་གཙོའི་རྒྱལ་ཁབ་སྤྱི་དང༌། ལྷག་པར་ཉེ་ཆར་ཚ་ཚ་འུར་འུར་བྱེད་བཞིན་པའི་དཀྱིལ་ཤར་ཡུལ་གྲུ་ཚོའི་མང་གཙོའི་འཕེལ་རིམ་དང་བསྡུར་ན་བསམ་ཡུལ་ལས་འདས་པའི་བྱུང་རབས་ཅན་གྱི་མང་གཙོ་ངོ་མཚར་ཅན་ཞིག་ཆགས་ཡོད། ངས་འདི་ལྟར་བརྗོད་དོན་ྋགོང་ས་མཆོག་གིས་གྲོས་ཚོགས་སུ་བསྩལ་བའི་གསུང་འཕྲིན་འདིའི་དགོངས་གཞི་ནི། ཧ་ཅང་རླབས་ཆེ་ཞིང་ཕུགས་རྒྱང་རིང་བས་མ་འོངས་བོད་ཀྱི་དཀའ་ངལ་མང་པོ་ཞིག་རང་ཡལ་དུ་འགྲོ་བའི་ཐབས་སུ་མ་སྤྱད་པར། དེ་ལས་ལྡོག་སྟེ་གསུང་འཕྲིན་དེ་གྲོས་ཚོགས་ནས་ལག་བསྟར་བྱས་ན་འཕགས་པ་སྤྱན་རས་གཟིགས་དང་བོད་མི་རིགས་གཉིས་ད་ནས་བཟུང་རྦད་དེ་འབྲེལ་མེད་དུ་འགྱུར་བཞིན་པ་ལྟ་བུའི་ལྟ་ཚུལ་གྲོས་ཚོགས་ཀྱི་མི་ཚོས་ཤུགས་ཆེར་བཟུང་བ་དེས། ྋགོང་ས་མཆོག་གི་གསུང་འཕྲིན་དེའི་ནུས་པ་ཁོང་ཚོའི་བློ་ཡུལ་དུ་ཤོང་མེད་པ་ཧ་ཅང་གསལ་པོ་ཡིན།
ཕྱོགས་གཅིག་ནས་གྲོས་ཚོགས་ཀྱི་འཐུས་མི་ཕལ་མོ་ཆེས་དེ་ལྟར་བརྗོད་དོན། རང་ཉིད་ཀྱིས་ྋགོང་ས་སྐུ་ཕྲེང་ན་རིམ་ལ་བཅངས་པའི་བརྩེ་ཞེན་ངོ་མ་ཕྱིར་འདོན་བྱས་པ་ཡིན་སྲིད་ནའང༌། དྲན་འཕྲུལ་ཅན་འགའ་རེས་རང་ཉིད་ལ་སླར་ཡང་གྲོས་ཚོགས་ཀྱི་རྐུབ་སྟེགས་འཐོབ་ཕྱིར་མང་ཚོགས་ཀྱི་མིག་སྔར་རང་གི་སྣང་བརྙན་ཇེ་ལེགས་སུ་བཏང་ཡོད་པའང་བཤད་མ་དགོས་པ་ཞིག་རེད། དེ་ལྟར་ང་ཚོའི་གཞི་རིམ་གྱི་མང་ཚོགས་ཙམ་མ་ཟད་ཆེས་ཤེས་འཇོན་སྔོན་ཐོན་པར་བརྩི་བའི་གྲོས་ཚོགས་ཀྱི་འཐུས་མི་ཚོར་ཡང་མང་གཙོའི་ཁེ་དབང་ལོངས་སུ་སྤྱོད་པའི་སྙིང་སྟོབས་དང༌། གསར་བཏོད་ཀྱི་སྤོབས་པ་ཧ་ཅང་ཞན་པར་བརྟེན་བོད་ཀྱི་བསྟན་སྲིད་ཡོངས་རྫོགས་ཀྱི་ལས་དོན་རྣམས་སླར་ཡང་དགུང་གྲངས་བརྒྱད་ཅུར་ཕྱོགས་པའི་ྋགོང་ས་མཆོག་གཅིག་པུའི་ཕྱག་ཏུ་ཨུ་ཚུགས་ཀྱིས་འཇོག་བཞིན་བཞིན་པ་འདིས། ང་ཚོར་དོན་ངོ་མར་རྒྱུ་འབྲས་ཀྱི་ཚད་ཐིག་ཅིག་མེད་སོང་བ་རེད་དམ། ཡང་ན་ང་ཚོ་མདུན་སྐྱོད་དང་གསར་གཏོད་ལ་སྐྲག་པའི་རྡར་མ་རྐྱང་རྐྱང་ཡིན་སོང་བས་རེད།
གང་ལྟར་ད་ནི་ྋགོང་ས་མཆོག་གི་གསེར་ཞལ་ང་ཚོ་དང་གྱེས་པའི་དུས་ཚོད་མི་འགྱངས་པར་འོངས་ངེས་པས། ང་ཚོས་ཐབས་བརྒྱ་ཅུས་སྟོང་གིས་ྋགོང་ས་མཆོག་གི་རྒྱུན་དུ་བཀའ་སློབ་ཏུ་གྲབས་བསྒྲིགས་སྡིག་ས་ནས་བྱེད་དགོས་པ་ཡིན་རེད་ཅེས་པ་སྙིང་ལ་བཅིངས་ཏེ། ང་ཚོའི་འཇོན་མིན་ཇི་ལྟར་ཡང༌། ྋགོང་ས་མཆོག་གི་གསུང་འཕྲིན་འདི་དགའ་དད་སྤྲོ་གསུམ་གྱིས་སྒོ་ནས་སློབ་སྦྱོང་བྱེད་རན་རེད་ལ། གསར་བརྗེའི་བློ་སྟོབས་ཆེན་པོས་མ་འོངས་པའི་བོད་བསྟན་སྲིད་མི་རིགས་དང་བཅས་པའི་ཆེད་དུ་ྋགོང་ས་མཆོག་བཞུགས་པའི་སྐབས་དང་བསྟུན་ནས་གང་ཞིག་ཁ་སྐོང་དགོས་པ་དེ་ཚོ་ངེས་པར་དུ་ཀུན་གསབ་བྱེད་པའི་དུས་ལ་བབ་ཡོད་པ་ལས། ཁྱེད་མེད་ན་ང་ཚོས་མི་འཇོན་པའི་ཚུལ་རྐྱང་པ་བཤད་དེ་གསེར་ལས་དཀོན་པའི་དུས་ཚོད་ཆུད་ཟོས་སུ་གཏོང་བའི་དུས་གཏན་ནས་མིན་པར་འདོད་དོ། །
མཇུག་གཏམ་ཐོར་བུ།
ཉིན་འགའི་རིང་ངས་རང་ཉིད་ཀྱི་རྨོངས་འཆར་རྣམས་འདི་ལྟར་བྲིས་ཚར་ནའང༌། སེམས་ནང་དུ་ད་དུང་ཅི་ཞིག་ལྷག་སོང་བ་ལྟ་བུའི་ཚོར་བ་ཞིག་ཡོང་གི་འདུག མ་གཞི་ནས་རང་ཉིད་རྩོམ་ཡིག་འབྲི་བ་དང༌། བོད་ཀྱི་ཆབ་སྲིད་བཤད་རྒྱུར་དགའ་བ་ཙམ་ལས་ཆབ་སྲིད་ཀྱི་ཐད་ནས་གོ་རྟོགས་དེ་ཙམ་མེད་པ་རང་གིས་གསལ་པོར་ཤེས་ཀྱི་ཡོད། འོན་ཀྱང་ལས་ཀྱི་འཁོར་སྟངས་ཤིག་གིས་ང་བོད་རིགས་སུ་གཏོགས་པའི་ཉིན་དེ་ནས་བཟུང༌། ངས་སེམས་ཁམས་མ་ཡུམ་གངས་ལྗོངས་དང་གཤིབ་ནས་ཡོད་ལ། ངའི་གླུ་ངག་དབྱངས་གསལ་སོ་བཞི་དང་འདྲེས་ནས་ཡོད། ད་དུང་ངའི་རེ་སྙེགས་དང་ཡིད་སྨོན་བྱེད་ས་དུས་ནམ་ཡང་རྒྱལ་མཚམས་དང་མི་རིགས་ཀྱི་དབྱེ་བ་མེད་པར་རང་དབང་དང་མང་གཙོ་ཁོ་ན་ཡིན་པས། ཐེངས་འདིའི་འགྲན་ཚོགས་སུ་ཞུགས་དོན་ཡང་དམིགས་ཡུལ་ཆེན་པོ་དེ་དག་ཁོར་ཡུག་ཆུང་ཆུང་འདིའི་ནང་མི་རིང་བར་འཕེལ་རྒྱས་སུ་འགྲོ་བར་རང་ངོས་ནས་ཁ་ཙམ་མིན་པར་སེམས་གཏིང་ནས་གཞོགས་འདེགས་བྱས་པ་ཙམ་ཡིན་ནོ། །
ང་ལ་འདིའི་སྐོར་ལ་དྲི་བ་ཁ་ཤས་ཡོད། བོད་མི་མང་གིས་ག་རེའི་ཆེད་དུ་རྒྱལ་བ་རིན་པོ་ཆེའི་བཀའ་བཞིན་བསྒྲུབ་དགོས་པ་རེད། བོད་མི་མང་གིས་རྒྱལ་བ་རིན་པོ་ཆེའི་བཀའ་བསྒྲུབས་ཡོད་མེད་ལ་དོག་སློང་བྱེད་པ་བཞིན་དུ་རྒྱལ་བ་རིན་པོ་ཆེས་བོད་མི་མང་གི་མངོན་འདེད་བསྒྲུབས་ཡོད་མེད་དོག་བྱས་ན་ཡག་གམ། རྒྱལ་བ་རིན་པོ་ཆེས་ནོར་འཁྲུལ་བྱས་ཡོད་དམ། དྲི་བ་དེ་གསུམ་ལ་ལན་རེ་འདེབས་ཐུབ་ན་ངའི་བློ་སྒོ་འབྱེད་པར་ཕའཔར་ཕན་ཐོགས་འདུག། ཐུགས་རྗེ་ཆེ།
དྲི་བ་དེ་གསུམ་གྱི་ལན་སོ་སོས་ཤེས་དགོས་པ་ཞིག་རེད། ཁྱེད་ཀྱིས་ད་དུང་དེ་རྟོགས་མེད་པ་ཡ་མཚར། ངོ་མ་ཡ་མཚར། དོན་དམ་དུ་འདི་དྲི་བ་ཞིག་རེད་དམ། ཟུར་ཟ་ཞིག་རེད།
སྤྱི་ཚོགས་ཤིག་གིས་མི་སྒེར་ཞིག་གི་བཀའ་བསྒྲུབ་དགོས་ན་ལམ་ལུགས་དེ་བཀས་བཀོད་བརྒྱུད་འཛིན་དུ་འགྱུར་མི་འགྲོའམ། བོད་མི་མང་ནི་སྤྱི་ཚོགས་ཤིག་ཡིན་པ་དང་རྒྱལ་བ་རིན་པོ་ཆེ་ནི་སྤྱི་དམངས་ཤིག་ཡིན་པའི་ཆ་ནས་བོད་མི་མང་གིས་རྒྱལ་བ་རིན་པོ་ཆེའི་བཀའ་བསྒྲུབས་ཡོད་མེད་གླེང་བ་ལས་ཀྱང་རྒྱལ་བ་རིན་པོ་ཆེས་བོད་མི་མང་གི་མངོན་འདོད་བསྒྲུབས་ཡོད་མེད་གླེང་ན་རིན་ཐང་ཆེ། བརྟག་དཔྱད་ཚད་ལྡན་ཞིག་ཡོང་དགོས་ན་དྲང་ལྡོག་ཕྱོགས་ཀྱི་ཆ་གང་མང་མང་ནས་མཐོང་དགོས་པ་ཡིན་པས་རྒྱལ་བ་རིན་པོ་ཆེས་ནོར་འཁྲུལ་བྱས་ཡོད་མེད་གླེང་ངེས་པར་དུ་ཡང་དགོས་སྙམ།
གོང་དུ་སྤོབས་པ་མཐའ་ཡས་ལགས་ཀྱིས་བཀོད་པའི་དྲི་བ་དེར་ངས་ལན་གཏན་ནས་རྒྱག་མི་འདོད། རྒྱུ་མཚན་ནི་༸གོང་ས་མཆོག་གིས་བོད་མི་དམངས་ཀྱི་མངོན་འདོད་སྒྲུབ་ཡོད་མེད་ལ་ཁྱོད་རང་གཙོ་བྱས་པའི་གཞིས་བྱེས་གཉིས་ཀྱི་བོད་མི་ཚང་མར་དོགས་པ་ཙམ་ཡང་མེད་པ་དོན་དངོས་ཡིན་མོད། ད་དུང་ཅི་ཞིག་ལ་དཔྱོད་མདོག་དང་། གུ་ཡངས་ཚུལ་གྱིས་ལན་རང་ཉིད་ཀྱིས་གསལ་པོ་ཤེས་པའི་དྲི་བ་དེ་འདྲ་ཁོ་བོར་འཕེན་བཞིན་པ་དེས་ནི། རྒན་ཆབ་བྲག་ལགས་ཀྱིས་གསུངས་པ་དེ་ག་རང་མད་པར་འདུག་པས། སྐྱག་པ་ལག་པས་སྒུལ་ན་དྲི་མ་ལས་གཞན་མེད་པའི་གནས་ལུགས་ཀྱི་རྗེས་སུ་འབྲང་དགོས་བྱུང་ངོ་།
དེ་མིན་དབྱངས་ཅན་མཚོ་མོ་ཞུ་བས་ལོ་རྒྱུས་དང་མི་མཐུན་པ་མང་རབས་བཤད་ཀྱང་གཞན་གཞི་གཅིག་ཀྱང་སྟོན་རྒྱུ་མ་བརྙེད་པ་དེ་ཡང་ཅུང་ཡ་མཚན་དགོས་པའི་གནས་སུ་གྱུར་བ་ལགས།
ཁྱེད་རྣམ་པ་རྒན་དང་དགེ་ཕྲུག་སུ་ཡིན་རུང་རྒྱལ་བ་རིན་པོ་ཆེ་གླེང་དགོས་ན་དྲི་བ་འདི་ཚོར་ལན་འདེབས་དགོས་པ་གལ་ཆེན་པོ་རེད་བསམ། ང་ལ་མི་ཞིག་གིས་རྒྱལ་བ་རིན་པོ་ཆེས་ནོ་རྦེལ་ཞི་བདེའི་རྟགས་མ་གང་གི་ཕྱིར་བླངས་པ་རེད་ཟེར། ངས་ནི་ལན་གསལ་པོ་ཞིག་འདེབས་མ་སོང་།
དྲི་བ་ཡིན་ན་རེད་ཟུར་ཟ་ཡིན་ན་རེད་དེ་ཁོ་རང་ཉིད་ལས་ལྷག་པའི་སུས་ཀྱང་འགྲེལ་ཐུབ་ཀྱི་མ་རེད་ལ་དགོས་པ་ཡང་ཡོད་པ་མ་རེད། གང་ལྟར་ཁོ་ཡང་རྒྱལ་བ་རིན་པོ་ཆེ་ནང་བཞིན་སྤྱི་དམངས་ཤིག་ཡིན་པའི་ཆ་ནས་མི་ཚེ་གང་བོ་བོད་སྤྱི་བའི་ཆེད་དུ་བཏང་དང་གཏོང་བཞིན་པར་ཡིད་ཆེས་བྱེད་ཀྱི་ཡོད།
གཅེས་ཕྲུག་ཚོ། དྲི་བ་ལ་འདི་འདྲི་ཆོག་དང་མི་ཆོག་ཟེར་བ་ཞིག་ཡོད་དུས་མ་འགྲིགས་པ་རེད། ལན་འདེབས་མི་ཤེས་ན་ཤེས་གི་མི་འདུག འདི་དཔྱད་གཞི་རེད་ཟེར་ཐུབ་དགོས་པ་རེད།
སྤོབས་པ་མཐའ་ཡས་ལགས་ཀྱི་དྲི་བ་འདི་དག་ལ་ལན་ཞིག་་་་་བཀུར་འོས་ཆབ་བྲག་ལགས་ཀྱིས་འདེབས་རོགས་གནང་།
རྒྱ་གཞུང་དང་་་་མྱི་འདིའི་རིགས་ལ་ངོས་འབྲེལ་གྱི་ལན་ཞིག་བཏབ་ཀྱང་ཕན་ཐོགས་ཅང་ཡོང་མི་སྲིད་ཀྱང་མཆན་པུ་བ་རེ་ཟུང་ལ་ཕན་སྲིད་སྟབས་ལན་སྟབས་བདེ་ཞིག་འདེབས་རོགས།
་་་་་་ སྐབས་འདིར་ྋགོང་ས་མཆོག་གི་གསུང་རྩོམ་ཞིག་ཏུ་ཆེས་སེམས་འགུལ་ཐེབས་པའི་བཀའ་སློབ་ཅིག་བསྩལ་ཡོད་པ་དེ་ངས་ད་ལྟ་ཡང་དྲན་གྱིན་འདུག དེ་ནི་ང་ཚོ་བོད་ཀྱི་ན་ཆུང་ཚོའི་ཆེད་དུ་རྒྱ་གར་གཞུང་གིས་སློབ་གྲྭ་གསར་འཛུགས་བྱེད་སྐབས།
ངས་ངོས་ནས་རྒྱ་གར་གྱི་བུ་ཕྲུག་ས་ཡ་མང་པོར་སློབ་ཁང་མེད་པར་ཤིང་སྡོང་འོག་དང་ཐལ་རྡུལ་སྟེང་དུ་སློབ་ཚན་འཚོགས་བཞིན་པའི་གནས་ཚུལ་འདི་གཏན་ནས་བརྗེད་སྲིད་ཀྱི་མ་རེད་ཅེས་གསུངས་པ་དེ་རེད། ་་་་་་་
་་་་་་་་ ང་ཚོས་ཐབས་བརྒྱ་ཅུས་སྟོང་གིས་ྋགོང་ས་མཆོག་གི་རྒྱུན་དུ་བཀའ་སློབ་ཏུ་གྲབས་བསྒྲིགས་༼གྲ་འགྲིག་སྡུག་ས་ནས་བྱས་༽སྡིག་ས་ནས་བྱེད་དགོས་པ་ཡིན་རེད་ཅེས་པ་སྙིང་ལ་བཅིངས་ཏེ། ང་ཚོའི་འཇོན་མིན་ཇི་ལྟར་ཡང༌། ྋགོང་ས་མཆོག་གི་གསུང་འཕྲིན་འདི་དགའ་དད་སྤྲོ་གསུམ་གྱིས་སྒོ་ནས་སློབ་སྦྱོང་བྱེད་རན་རེད་ལ།
གསར་བརྗེའི་བློ་སྟོབས་ཆེན་པོས་མ་འོངས་པའི་བོད་བསྟན་སྲིད་མི་རིགས་དང་བཅས་པའི་ཆེད་དུ་ྋགོང་ས་མཆོག་བཞུགས་པའི་སྐབས་དང་བསྟུན་ནས་གང་ཞིག་ཁ་སྐོང་དགོས་པ་དེ་ཚོ་ངེས་པར་དུ་ཀུན་གསབ་བྱེད་པའི་དུས་ལ་བབ་ཡོད་་་་་་་་
སྤོབས་མཐའ། གོང་ན་ཁྱོད་ཀྱིས་ཅིག་བཤད་བཞག་པ་དེ་དྲི་བ་ཞིག་ཡིན་པའི་དབང་དུ་བཏང་ཡང་ལན་ཞིག་རྒྱག་པ་ནི་ངལ་བ་རང་བཙལ་ཞིག་གཞན་གང་མཐོང་མ་སོང་། མ་ཟད་དཔྱད་རིན་ཟེར་བ་ཞིག་ཁྱོན་ནས་མི་འདུག་ངོ་མ་ཡིན། ད་དུང་གོང་ན་སུ་གཅིག་གིས་དྲི་བ་འདྲི་ཆོག་གི་མ་རེད་བཤད་མི་འདུག་མོད་ཁྱོད་ཀྱིས་གཞི་མེད་པར་སྐད་དེ་འདྲ་ཞིག་ཁ་ནས་ཤོར་དོན་ཅི་ཡིན་ནམ། ཁྱོད་ལ་རྣམ་རྟོག་ཚ་བ་ལ།
བོད་ཀྱི་རྒྱལ་གླུ་གསར་རྩོམ།
འཛམ་གླིང་ཡང་ཐོག་བོད་རིགས་སྤུན་ཟླའི་ཡུལ་
བོན་ཆོས་ནང་བསྟན་ཞི་བདེའི་འོད་སྣང་འབར་
བསྟན་འགྲོའི་རྒྱལ་ཁབ་རྒྱ་ཆེར་སྐྱོང་བའི་གཞུང་
མཛད་བྱུས་ཀྱི་དབང་ཐང་རྒྱས་
ལུགས་གཉིས་ཁྲིམས་སུ་བཅས་པས་
ཕྱོགས་ཀུན་བྱམས་བརྩེས་སྐྱོང་
དམངས་བསྐོས་དགའ་བ་བརྒྱ་ལྡན་གོ་འཕང་གནམ་ལ་རེག
ཕུན་ཚོགས་སྡེ་བཞིའི་ཡར་རྒྱས་ངང་
གངས་ལྗོངས་མདོ་དབུས་ཁམས་གསུམ་ཁྱོན་ལ་
བདེ་སྐྱིད་རང་དབང་གསར་པས་ཁྱབ་
ཆོས་སྲིད་ཀྱི་ལམ་ལུགས་དང་
ཆོས་རིག་ཕྱོགས་བཅུར་རྒྱས་པས་
འཛམ་གླིང་མི་རིགས་ཀུན་ལ་ཞི་བདེའི་དཔལ་ལ་སྦྱོར་
བོད་རྒྱལ་མི་རིགས་ཡ་རབས་བཟང་སྤྱོད་དང་
བཀྲ་ཤིས་དགེ་མཚན་རླབས་ཆེན་དྲང་བདེན་གྱིས་
མཐའ་མཚམས་དམག་འཁྲུག་གཡུལ་ལས་རྒྱལ་གྱུར་ཅིག །
གདངས་རྙིང་པར་འགྲོ་ཐུབ་པར་བྱས།
སྤོབས་པ་ལགས། འདྲི་བ་དང་དོགས་པ། ཡང་ན་དཔྱད་དགོས་པའི་སེམས་ཚོར་ཅན་དེ་ཁྱེད་་རང་རེད། དེར་བརྟེན་ལན་དགོས་ན་ཡག་ཤོས་ཁྱོད་རིང་གི་ས་ནས་རེག་གི་རེད་འདོད། ང་ཚོ་ལ་དེའི་སྐོར་འདྲི་བ་གཏན་ནས་མེད། ཡང་ན། ཉིད་ཀྱི་འདྲི་བ་དེར་ལན་པེ་ཅིན་མཁར་ནས་ལན་རྙེད་སྲིད། ལན་དེ་ཡང་ཁྱོད་ལ་དགོས་པའི་ལན་ཚ་བོ་དེ་ཡིན་ངེས། ཨ་ལ་རྩེད་མོ་ཡིན། སྤོབས་པ་ལགས། སྤོབས་པ་མཐོ་བ་ལ་པེ་རེད་འདུག
སྤྱིར་བཏང་བགྲོ་གླེང་འདི་འདྲ་ནི་ཧ་ཅང་གལ་ཆེན་པོ་ཞིག་རེད། ཡིན་ནའང་བགྲོ་གླེང་དེ་དོན་འབྲས་ཅན་ཞིག་ཏུ་འགྱུར་མིན་ནི་ངོ་བསྟོད་གཅིག་པོ་ཙམ་མ་ཡིན་པར། དྲང་བདེན་གྱི་སྒོ་ནས་ཕྱོགས་གཉི་ཀའི་དགེ་སྐྱོན་གླེང་བ་དེ་གལ་ཆེ་ཤོས་ཡིན།
སྤོབས་མཐའ་ཟེར་བའི་མི་འདི་ཡི་སྤོབས་པ་ལ་མཐའ་ཞིག་མེད་གཏན་རེད། དང་པོ་བོད་ཕ་མེས་རིག་གཞུང་བོན་ལ་མཆིལ་ཞགས་བཏབ་སོང། དེ་ནས་དུས་འཁོར་ལ་བཟློག་པ་རྒྱབ་སོང། དེ་ནས་ཡི་དམ་དྲག་པོའི་ལྷ་རྣམས་ལ་བསྐུར་འདེབས་བྱས་སོང། དེ་ནས་བོད་ཀྱི་གཉན་འཕྲང་ཆེ་བའི་དུས་སྐབས་སུ་ཆོས་སྲིད་གང་ཅིར་བཀའ་དྲིན་གཞལ་དུ་མེད་པའི་བདག་ཉིད་ཅན་༧གོང་ས་ད
མཆོག་ལ་ཐེ་ཚོམས་བཙུགས་སོང། ད་གང་བྱེད་རྩིས་ཡོད་དམ། ད་ངོ་མ་ཁྱེད་སྤོབས་བྲལ
རང་རེད། མིང་ངན་འོག་ནས་གབ་རྫུས་ཀྱིས་སེམས་ལ་གང་དྲན་ཁ་ནས་གང་ཐོན་སྨྲ་བ་འདི་ལ་ངས་མི་བུ་སྤོབས་པ
ཅན་ཞིག་ལ་ངོས་འཛིན་ཞུ་ཐབས་མེད། ད་ལྟ་འཛམ་གླིང་འིར་བོད་ཅེས་རྣ་བར་གོ་རྒྱུ
ཡོད་པ་དང་ཤེས་སུ་ཡོད་པ་འདི་༧ གོང་ས་མཆོག་གི་བཀའ་དྲིན་ཡིན་པར་ཤེས་དགོས། ཕྱི
རྒྱལ་དང་རྒྱ་གར་བའི་གྲལ་དུ་བོད་གདོང་ཅན་ནམ་བོད་པའི་དགེ་འདུན་པ་ཞིག་ཕྱིན་ཚེ་་་་ཏཱ་ལའི་བླ་མ་་་་་ཞེས་བརྗོད་ཀྱིན་པ་འདིས
ཅི་ཞིག་མཚོན་གྱི་མེད་དམ། ཁོང་གི་གོམ་གང་སྤོབས་པ་དང་ཚིག་གཅིག་བཤད་རུང་དེ་དག་ཐམས་ཅད་བོད་དོན་གྱིས་རྩིས་ཟིན་ཡོད་སྙམས། མ་གཞི་ནས་མི་སྒེར་ནས་སོ་སོ་སོའི་ལྟ་ཚུལ་ཤོད་ལོས་ཆོག་དེ་ལའང་རྒྱུ་མཚན་དྲངས་རྒྱུ་དགོས་པ་ལས་ཁ་ནས་གང་ཐོན་བཤད་ན་འགན་འཁྲི་མི་ཁུར་བའི་བྱ་སྤྱོད་ཅིག་རེད།
ངས་འདིར་རྒྱལ་བ་རིན་པོ་ཆེ་ལ་བསྟོད་སྨད་གང་ཡང་བྱེད་གི་མེད། ངས་རྩོམ་འདི་དང་འབྲེལ་ནས་དྲི་བ་ཁ་ཤས་བཏོན་པ་ཙམ་ཡིན། ཐབས་སྐྱོ་བ་ཞིག་ལ་ལན་འདེབས་མཁན་བྱུང་མ་སོང་།
བོད་ལ་རྒྱ་ནག་གིས་བཙན་འཛུལ་བགྱིས་པ་རེད། སྐབས་དེར་གཞུང་དམངས་གཉིས་ཀྱི་ནང་གསང་མྱུལ་བ་མང་པོ་ཡོད། ཡིན་ནའང་བོད་མི་དམངས་བརྒྱ་ཆ་བདུན་ཅུ་ཙམ་གྱིས་རྒྱའི་གསང་མྱུལ་ཡོད་མེད་མ་ལྟོས་པར་༧རྒྱལ་བ་རིན་པོ་ཆེ་དང་གཞུང་གི་ལོངས་ཕྱོགས་ལ་སྲ་བརྟན་གྱིས་བཞེངས་པ་དཔེར་ན་ནོར་བུ་གླིང་ག་སྲུང་སྐྱོབས་སླད་ཕལ་མོ་ཆེས་སྲོག་གཏོང་རྐྱང་གནང་བའི་པར་ཡང་ད་ལྟའི་བར་མཇལ་བགྱིད་ཡོད། གོ་མཚོན་དང་ལྡན་པ་མི་ཉུང་བ་ཞིག་གིས་རང་སྲོག་བློས་གཏོང་གིས་རྒྱལ་བ་རིན་པོ་རྒྱ་གར་དུ་གདན་དྲངས་པ་རེད། མི་དམངས་ཡང་མ་ནུས་པ་མ་གཏོགས་ནུས་ཚོད་ཀྱིས་རྒྱལ་བ་རིན་པོ་ཆེའི་རྗེས་སུ་འབྲང་བ་རེད།
མི་གྲངས་མང་པོ་རྒྱ་གར་དུ་འབྱོར་བ་རེད། སྐབས་དེར་སྐྱབས་བཅོལ་དུ་འབྱོར་བ་རྣམས་ལ་གདམས་ཀ་གཉིས་ཡོད་སྲོག་འཚོ་ཐབས་ཙམ་བྱེད་བགྱི་ཡིན་ནམ་མུ་མཐུད་ནས་རང་ཡུལ་སྲུང་སྐྱོབས་བྱེད་བགྱི་ཡིན་ནམ། དྲི་བ་འདི་འཁྲེགས་པོ་ཞིག་མ་རེད། དེང་སྐབས་ཡང་ཡོང་གི་ཡོད། ཡིན་ནའང་མི་རབས་གོང་མ་དྲིན་ཅན་ཚོས་དྲི་བ་ཕྱི་མ་འདམས་ཡོད། དེ་ཡང་དྲག་རྒོལ་གྱིས་རང་ཡུལ་སྐྱོབས་བགྱི་ཡིན་ནམ་ཤེས་བྱ་ཡོན་ཏན་སྦྱངས་སྟེ་རང་ཡུལ་འཐོབ་ཐབས་བྱེད་བགྱི་ཡིན་ནམ། རྒྱལ་བ་རིན་པོ་ཆེའི་དམག་རྒྱག་དགོས་ནའང་རང་ཉིད་དམག་ནང་འགྲོ་མི་དགོས་པ་དེ་ཞེ་ས་མ་ཞུས་ན་ཤེས་ཀྱིན་ཡོད་ཀྱང་དམག་འཐབ་མུ་མཐུད་ནས་མི་བྱེད་པ་འདམས་པ་རེད། བོད་མི་ཚོར་མུ་མཐུད་ནས་རང་ཡུལ་གྱི་ཆེད་དུ་བརྩོན་དགོས་པ་དང་དེ་ཡང་འཚེ་བ་མེད་པ་དང་ཤེས་ཡོན་ཡར་རྒྱས་ལས་གཞན་གང་ལ་ཡང་རེ་ས་མེད་པའི་རྒྱུད་སྐུལ་གནང་བ་རེད། ནེའུ་ཧ་རོས་ཀྱང་བོད་མི་ཚོར་ཤེས་ཡོན་གྱི་མ་ཕོངས་པ་གཅིག་བགྱི་བའི་ལས་འཆར་ལ་རྒྱབ་སྐྱོར་གནང་བ་རེད། རྒྱལ་བ་རིན་པོ་ཆེར་གོ་ཆ་མ་རག་པར་འུ་ཐུག་ནས་གོ་ཆ་སྤོང་བ་འམ་གོ་ལག་གི་གཡུལ་འཐབ་ལ་བསུན་སྣང་བྱུང་བ་གང་ལྟར་ཡང་བཙན་བྱོལ་སྤྱི་ཚོགས་དང་བོད་ནང་གི་བོད་མིར་ཚོར་ཤེས་ཡོན་ཀྱིས་ང་ཚོ་ཕོངས་པ་རེད། ཤེས་ཡོན་ཧུར་ཐག་འབད་ཐག་གནང་རོགས་ཅེས་བཀའ་བསྒྲགས་པ་དང་ཕྱག་གཉིས་ཐལ་མོ་སྦྱར་བ་བགྱིས་ཏེ་འོངས་པ་རེད། བྱ་དགའ་སྤྲད་དགོས་པའི་རྒྱུ་མཚན་འདི་འདྲ་ཡིན་ནམ། ང་སྐྱབས་བཅོལ་དུ་ཡོང་དོན་རྒྱལ་བ་རིན་པོ་མཇལ་དུ་འོངས་པ་ཡིན། འདི་ངའི་ཨ་མ་དང་། གྲོགས་པོའི་ཚོའི་དྲིན་ཡིན། དངོས་གནས་ཁྱེད་ཀྱི་མི་ཤེས་ན་བྱ་དགའ་སྤྲད་དུས་ཀྱི་གསུང་བཤད་ལ་ཉོན་དང་གོ་ཡང་ངོ་། དྲ་འབུ་བསོད་ཟད་རེད་ཡ།
དེ་ཡང་དྲག་རྒོལ་གྱིས་རང་ཡུལ་སྐྱོབས་བགྱི་ཡིན་ནམ་ཤེས་བྱ་ཡོན་ཏན་སྦྱངས་སྟེ་རང་ཡུལ་འཐོབ་ཐབས་བྱེད་བགྱི་ཡིན་ནམ། དམག་རྒྱག་དགོས་ནའང་༧རྒྱལ་རིན་པོ་ཆེའི་རང་ཉིད་དམག་ནང་འགྲོ་མི་དགོས་པ་དེ་ཞེ་ས་མ་ཞུས་ན་ཤེས་ཀྱིན་ཡོད་ཀྱང་དམག་འཐབ་མུ་མཐུད་ནས་མི་བྱེད་པ་འདམས་པ་རེད། བོད་མི་ཚོར་མུ་མཐུད་ནས་རང་ཡུལ་གྱི་ཆེད་དུ་བརྩོན་དགོས་པ་དང་དེ་ཡང་འཚེ་བ་མེད་པ་དང་ཤེས་ཡོན་ཡར་རྒྱས་ལས་གཞན་གང་ལ་ཡང་རེ་ས་མེད་པའི་རྒྱུད་སྐུལ་གནང་བ་རེད། ནེའུ་ཧ་རོས་ཀྱང་བོད་མི་ཚོར་ཤེས་ཡོན་གྱི་མ་ཕོངས་པ་གཅིག་བགྱི་བའི་ལས་འཆར་ལ་རྒྱབ་སྐྱོར་གནང་བ་རེད། ༧རྒྱལ་བ་རིན་པོ་ཆེར་གོ་ཆ་མ་རག་པར་འུ་ཐུག་ནས་གོ་ཆ་སྤོང་བ་འམ་གོ་ལག་གི་གཡུལ་འཐབ་ལ་བསུན་སྣང་བྱུང་བ་གང་ལྟར་ཡང་བཙན་བྱོལ་སྤྱི་ཚོགས་དང་བོད་ནང་གི་བོད་མིར་ཚོར་ཤེས་ཡོན་ཀྱིས་ང་ཚོ་ཕོངས་པ་རེད། ཤེས་ཡོན་ལ་ཧུར་ཐག་འབད་ཐག་གནང་རོགས་ཅེས་བཀའ་བསྒྲགས་པ་དང་ཕྱག་གཉིས་ཐལ་མོ་སྦྱར་བ་བགྱིས་ཏེ་འོངས་པ་རེད། ནོར་ཝེ་བྱ་དགའ་སྤྲད་དགོས་པའི་རྒྱུ་མཚན་འདི་ཚོ་རེད། དེ་ཙམ་དུ་མ་ཟད་ཡོངས་གྲགས་ཀྱི་དུས་ངན་འདི་འདྲར་སྐྱེས་པ་ནི་དཀའ་ལས་བརྒྱབ་ན་རྒྱག་རིན་ཡོད་པའི་མི་རབས་གལ་གནད་ཅན་བོད་གནས་དང་མི་གནས་ཆག་འཇིག་གི་མཚམས་ལ་སྐྱེ་བའི་བོད་མི་རྩ་ཆེ་ཤོས་དེ་ཡིན་པའི་ལམ་སྟོན་མཛད་ཡོད། འདི་ཚོ་རེད་ཅེས་བརྗོད་ན་འགྲིག་ག
གཅིག བོད་མི་དམངས་ཕྱེད་ཀྱི་མངོན་འདོད་ནི་རྒྱ་ལ་དགྲ་ཤ་རྩོད་བགྱི་དེ་ཡིན་སྲིད། མངོན་འདོད་ནི་འདོད་པ་རང་ཡིན་སྟབས་སྐྱེས་བུ་དམ་པ་སུ་གང་གིས་ཀྱང་རོགས་མི་བྱེད། མངོན་འདོད་འདི་༧རྒྱལ་བ་རིན་པོ་སྒྲུབ་མེད་ཀྱང་མ་སྒྲུབ་པ་རང་ཡག་ག་ཡོད།
གཉིས། བོད་མི་དམངས་ཀྱི་དགོས་མཁོ་ནི་རང་ཡུལ་ཡོད་པ་དང་གཉའ་གནོན་མེད་པ་འདི་ཡིན། འདི་ང་ཚོའི་དགོས་མཁོ་ཡིན་པ་བསླབས་པའི་ཆེད་ཁོང་གིས་སྐུ་ཚེགས་ཆེན་པོ་མཛད་ཡོད།
གསུམ། གཉིས་ཀ་ལ་མེད་མི་རུང་བའི་དགོས་མཁོ་ནི་ཤེས་ཡོན་དང་ཡ་རབས་སྤྱོད་བཟང་དེ་ཡིན། དོན་འདིའི་ཆེད་དུ་ཐུགས་ཁུར་ཚད་མེད་གནང་ཡོད། ལན་མདོར་བསྡུས་ཅིག་བཏབ་ཡོད། ༧རྒྱལ་བ་རིན་པོ་ཆེས་བོད་པར་ཆད་ཡོད་བསམ་བསམ་གཅིག་ང་ལ་བྱུང་མྱོང་མེད།
བོད་མི་ས་ཡ་དྲུག་ལ་སྤོབས་པ་མཐའ་ཡས་ནང་བཞིན་ཤེས་ཡོན་དང་སྤོབས་པ་ཡོད་ན་རང་དབང་དམངས་གཙོ་ལ་ལོངས་སྤྱོད་ཐུབ་ཀྱི་རེད། བདེ་སྐྱིད་ཀྱི་ཉི་མ་ཤར་གྱི་རེད། ཡིན་ནའང་ཤེས་ཡོན་དང་སྤོབས་པ་མེད་པའི་མྱི་མང་སོང་ནས་རང་དབང་ཡོད་ཚོད་བོར་ཟིན་པ་རེད།་་་་སྙིང་རྗེ།
ན་ནིང་ཚུན་ཆོད་ཅིག་ནས་རང་རང་གི་ཞེ་འདོད་དང་མི་མཐུན་པའམ་རང་རང་ལ་གནོང་ཡོད་པའི་དྲི་བ་འདོན་པ་དང་བསམ་ཚུལ་འཆད་པ་ལ་ཅིག་ཅིག་མིག་མིག་ལ་ཟུར་ཟ་རེད་ཟེར་བ་དང་། མཚན་ཤས་བཟོ་བ་རེད་བ། དམ་ཉམས་རེད་ཟེར་བ་སོགས་ཀྱིས་ཁ་འགོག་ཐབས་བྱེད་སྲོལ་ཞིག་དར་བཞིན་འདུག་པས་དེས་ཆག་སྒོ་ཆེན་པོ་ཁྱེར་ཡོང་གི་རེད་བསམ་གི།
ཁ་བརྡ་ཚང་གི་དཔྱོད་ལྡན་སྤོབས་མཐའི་དྲིས་ལན་ལ།
༡) བོད་མི་མང་གིས་༧རྒྱལ་བ་རིན་པོ་ཆེའི་བཀའ་གསུང་ཇི་ལྟ་བ་བཞིན་གཙོ་བོས་ཇི་ལྟར་བཀའ་བརྩལ་ལྟར་སྒྲུབ་དགོས་མིན་དེ་གལ་ཆེན་པོ་མ་ཡིན་པར། རྒྱལ་བ་རིན་པོ་ཆེས་བོད་མི་མང་གི་མངོན་དོན་དེ་ཁོ་ན་ཉིད་རྫི་བོ་ལྟ་བུས་སེམས་བསྐྱེད་ནས་བསྒྲུབ་ཐུབ་མིན་དེ་གལ་ཆེ་ཤོས་ཡིན། གང་ཡིན་ཞེ་ན། རྒྱལ་བ་རིན་པོ་ཆེ་མི་གཅིག་གིས་བོད་མི་མང་གི་འཐུས་ཚབ་གནང་ནས་རྒྱལ་སྤྱིའི་སྒང་དེར་བོད་མི་ཡོད་དོ་ཅོག་གི་ཐོབ་ཐང་དང་ཁེ་ཕན་ལེན་གྱི་ཡོད་པས་ཡིན།
༢) བོད་མི་མང་གིས་རྒྱལ་བ་རིན་པོ་ཆེའི་བཀའ་གསུང་གང་ཡིན་གླེན་པས་རྡོ་བསྲེགས་བསྡམས་པ་ལྟར་བྱས་ནས་བསྒྲུབས་ཡོད་མེད་ཀྱི་དོགས་སློང་ཡོང་བས་རྒྱུ་མཚན་ནི། རྒྱལ་བ་རིན་པོ་ཆེས་ཕུགས་རྒྱང་རིང་པོར་གཟིགས་ནས་བོད་མི་མང་གི་རེ་འདོད་ཡང་དག་པ་ཞིག་བསྒྲུབ་ཀྱིན་ཡོད་མེད་ལ་དོགས་སློང་ཡོད་པས་ཡིན། གང་ཡིན་ཞེ་ན། རྒྱལ་བ་རིན་པོ་ཆེས་བོད་མི་མང་གི་མངོན་འདོད་ལྟར་བསྒྲུབ་མ་ཐུབ་པ་ཡིན་ན་བོད་མི་མང་གིས་རྒྱལ་བ་རིན་པོ་ཆེའི་བཀའ་གསུང་ལ་དོགས་སློང་གི་སྤུ་སྐྱེས་ཆོག་པ་དང་དྲང་བདེན་གྱི་ཞིབ་དཔྱོད་ཡང་བྱེད་དགོས་ངེས་ཤིག་རེད།
༣) རྒྱལ་བ་རིན་པོ་ཆེས་ཡེ་ཤེས་དབྱིངས་གཟིགས་ཀྱི་འཇའ་ཚོན་ལ་ནོར་འཁྲུལ་གྱི་སྤྲིན་པ་ནག་ནག་རེ་བྱུང་ཡོད་མེད་ནི། དེང་སང་འགྲོ་བཞིན་པའི་བོད་དོན་དང་བོད་མིའི་འཐབ་རྩོད་དེ་མཐོན་པོ་གནམ་དང་དོག་མོ་ས་གང་འདྲ་ཞིག་ལ་སླེབས་ཡོད་མེད་དེས་ཤེས་ཐུབ་ངེས་ཡིན། གང་ཡིན་ཞེ་ན། རྒྱལ་བ་རིན་པོ་ཆེར་བོད་དོན་དང་བོད་མིའི་འཐབ་རྩོད་ཀྱི་གནས་སྟངས་འདིའི་ཐོག་མཐའ་བར་གསུམ་གྱི་བྱ་བ་ཀུན་གྱི་འགན་འགན་ཡོངས་རྫོགས་ཁོང་གཅིག་པོ་ལ་ཡོད་པས་ཡིན།
དཔྱོད་ལྡན་དྲ་གྲོགས་གླག་རྒོད་ཐུགས་རྗེ་ཆེ། ཁྱེད་དང་ངེད་ཀྱི་བསམ་བློ་ཕྱོགས་མང་པོ་ནས་ཆུ་ལ་ཆུ་བཞག་ཏུ་གྱུར་སོང་།
ངས་ནི་བོད་མི་ཕྱེད་ལ་དགྲ་ཤ་རྩོད་འདོད་ཡོད་པ་རེད་ཅེས་བཤད་ཡོད། བོད་མི་ཕྱེད་ལ་དམག་རྒྱག་འདོད་ཡོད་པ་རེད། སུ་ཞིག་གིས་དམག་ཆས་མཁོ་འདོན་ནུས་ན་དེའི་ཕྱོགས་ལ་བོད་མི་ཕྱེད་ཡོད་ཡོད་རེད། བོད་མིའི་སྒྲིག་འཛུགས་ལ་ང་ནི་རེ་བ་ཆེན་པོ་ཡོད།
རྒྱལ་བ་རིན་པོ་ཆེ་མེད་ན་བོད་ཞེས་པ་འཛམ་པོ་གླིང་ནས་ཤེས་དཀའ་ཚོད་རེད། བླ་མ་དུས་གསུམ་མཁྱེན་པ་ཡིན་པ་བཤད་ཅི་དགོས། སྤྱི་དམངས་ཞིག་གི་ཆ་ནས་བལྟས་ནའང་ཡོན་ཏན་དང་ཤ་ཞེན་ཧ་ལས་པ་འདུག ཨ་རིའི་ས་ཁུལ་གང་དུ་ཡང་བོད་ཟེར་ན་ཀུན་གྱིས་ཤེས་པ་དང་མཐོང་ཆེན་ཧ་ལས་པ་བྱེད་པ་དང་། སོག་པོ་དང་ཡུ་གུར་ཟེར་ན་ཤེས་མཁན་དཀོན་པ་བཅི་རེད། རྒྱལ་བ་རིན་པོ་ཆེའི་བཀའ་དྲིན་རེད། སྤོབས་མཐའ་ཟེར་མཁན་འདིས་རང་མཚང་བསྟན་འདུག
གང་ལྟར་དོན་གྱི་སྙིང་པོར་ཁྱེད་ཀྱིས་བྲིས་གཏམ་ལ་དགའ་བསུ་ཚ་ཐག་ཆོད་གཅིག་ཞུ་ཡི་ཡོད། དེ་མིན་རྒྱལ་བ་རིན་པོའི་སྐུ་གསུངས་ཐུགས་ཀྱི་ཡོན་ཏན་མི་ཤེས་མཁན་དེ་རིགས་ལ་སྐད་བཤད་པ་ནི་ཆུ་ནང་རྡོ་འཕང་བའི་རང་བཞིན་ལས་མ་འདས།