སོག་མདའ།
༡༽ ངོ་མཚར་བསིལ་ལྡན་ལྗོངས་ཀྱི་འཛིན་མ་ཡི།།
ཤར་ཕྱོགས་མདོ་སྨད་སྟག་འཚེར་ཁྱིམ་གཞིས་ནས།།
རིན་ཆེན་གང་ལ་ཕོག་པའི་ལྷ་སྐལ་ཆེ།
སྐྱེ་འགྲོ་དཔལ་དུ་འཁྲུངས་པ་སྐུ་དྲིན་ཆེ།།
༢༽ ངོ་མཚར་མཚན་དཔེས་བརྒྱན་པས་རབ་མཛེས་སྐུ།།
ཡབ་ཡུམ་གསེར་གྱི་ཉི་ཟླའི་པང་བ་རུ།།
༸རྒྱལ་མཆོག་མི་ཡི་ཉི་མའི་ཡང་སྲིད་ཀྱིས།།
གསེར་གྱི་ཁྲི་ལ་འགྱིངས་པ་སྐུ་དྲིན་ཆེ།།
༣༽ ངོ་མཚར་གང་སྐུ་ལང་ཚོ་ཆེས་ཕྲ་ཡང་།།
བསིལ་ལྡན་ཁ་བ་རི་བའི་བདེ་སྡུག་ཆེད།།
ཆོས་སྲིད་ཟུང་གི་ཐུགས་འགན་ཡོངས་བཞེས་ཏེ།།
ལམ་བཟང་འཁོར་ལོས་བསྒྱུར་བ་སྐུ་དྲིན་ཆེ།།
༤༽ ངོ་མཚར་ཐུགས་ཀློང་རྒྱ་མཚོས་འོད་སྣང་གིས།།
དགྲ་གཉེན་ཀུན་ལ་ཕན་པའི་ཞི་བདེའི་སྨན།།
གཉིས་ཕན་དབུ་མའི་ལམ་བཟང་རིན་ཆེན་གཏེར། །
སྐྱེ་འགྲོའི་དཔལ་དུ་གནང་བ་སྐུ་དྲིན་ཆེ།།
༥༽ ངོ་མཚར་ཤེས་རབ་རལ་གྲིའི་མེ་ལོང་གིས།
ཚན་རྩལ་རིག་པའི་དཔལ་དང་ནང་པའི་ཆོས།།
སྙན་གྲགས་འཛིན་མའི་ཁྱོན་གྱི་མཁས་དབང་ལྷན།།
དོན་གྱིས་བརྡར་ཤ་བཅད་པ་སྐུ་དྲིན་ཆེ།།
༦༽ ངོ་མཚར་འཛམ་གླིང་ཤར་ནུབ་མ་ལུས་ཀུན།།
མཆོག་སྐུའི་གསེར་གྱི་ཉི་མའི་འོད་སྣང་གིས།།
བླང་དོར་གནས་ལུགས་རྨོངས་པའི་སྐྱེ་འགྲོ་ཀུན།།
གསུང་གི་བདུད་རྩིས་ཚིམ་མཛདསྐུ་དྲིན་ཆེ།།
༧༽ ངོ་མཚར་སྤྱན་རས་གཟིགས་དབང་མི་ཡི་མགོན།།
མཁའ་ཁྱབ་འགྲོ་བ་ཀུན་གྱི་དད་འདུན་མཐུས།།
སྐུ་གསུང་ཐུགས་ཀྱི་བཞེད་དོན་ལྷུན་འགྲུབ་ནས།།
སྐུ་ཚེ་རྒྱལ་མཚན་བརྟན་པར་སྐུ་དྲིན་ཆེ།།
༢༠༡༥་༤་༧ ཉིན་རང་ཤག་ནས་བྲིས། དགེ་ལེགས།
༸གོ་ས་མཆོག་ནི།
་
དུས་ཀྱི་ཆར་པ།
དགོས་དུས་ནོར་བུ།
དགུན་གྱི་ཉི་མ།
ཀུན་གྱི་མཛའ་བཤེས།
་
ཡུན་དུ་བརྟན་ཅིག
བོད་པའི་མགོན་སྐྱབས།
དཔྲལ་བའི་མིག་ཟུང་།
ཀུན་གྱི་བཀུར་ཡུལ།
ཁོག་པའི་སྲོག་སྙིང་།
དད་རྟེན་བྱ་ས།
བྱིན་རླབས་ཞུ་ས།
ཡིད་འཆེས་བྱ་ས།
བཀའ་དྲི་ཞུ་ས།
སྐྱིད་དུས་མཆོས་ས། །
སྡུག་དུས་ངུ་ས། །
འདི་ཕྱིའི་སྐྱབས་གནས། །
ཁྱེད་ལས་གཞན་མེད། །