གཉན་ཆེན།
གངས་ཅན་བོད་ཡུལ་བླ་མའི་ཞིང་ཁམས་ཡིན།།
གངས་རིའི་བདག་པོ་བླ་མའི་གདུལ་བྱ་ཡིན།།
གངས་ལྗོངས་ལྷ་ཀླུ་མང་བོའི་ལྷས་ར་ཡིན།།
གངས་རིའི་ལྷ་ཚོགས་གྲག་མེད་འགུལ་མེད་ཡིན།།
གངས་སེང་དར་ཆ་ནུབ་པའི་ཉིན་མོ་ནས།།
གངས་ཁྲོད་ཁྲག་གིས་ཁ་མདོག་དམར་བོར་གྱུར།།
གངས་རིའི་ཉི་མ་བཞུད་པའི་མུན་ཁྲོད་ན། །
གངས་ཕྲུག་གཞོན་ནུའི་མདུན་ལམ་རླུང་གིས་འཁུར།
གངས་རིའི་ར་བ་དམག་གི་གཡུལ་ས་ཡིན། །
གངས་ལྗོངས་རྒྱ་ཡིས་གཏེར་ཁ་སྔོག་ས་ཡིན། །
གངས་སེང་ཕྱི་ལ་བསྐྲད་པའི་རང་ཡུལ་ན། །
གངས་སེང་ཤུལ་ན་ཁྱི་སེང་དཔོན་པོ་ཡིན། །
བླ་མས་ཆོས་ཀྱི་འཁོར་ལོ་སྐོར་ས་ཡིན། །
བླ་མའི་བྱིན་རླབས་སེམས་ལ་འཇུག་ས་ཡིན། །
བླ་སྤྲུལ་འཁོར་ཚོགས་རྒྱ་མཚོའི་སྐོར་ས་ཡིན། །
བླ་སྤྲུལ་དངོས་རྫུན་གཉིས་ཀ་མང་ས་ཡིན། །
ལྷ་བ་མོ་བའི་རླུང་རྟ་རྒྱུག་ས་ཡིན། །
ལྷ་ཀླུ་གནོད་སྦྱིན་གནོད་པ་གཏོང་ས་ཡིན། །
ལྷ་མི་གཉིས་ཀ་རྒྱ་ཡི་བྲན་གཡོག་ཡིན། །
ལྷ་ས་དག་ཞིང་དམག་གི་སྒར་ཁ་ཡིན། །
དེང་གི་ལྷ་ས་འདྲེ་ཡི་གྲོང་ཁྱེར་ཡིན། །
རྒྱ་བོད་ལྷ་འདྲེ་གཉིས་ཀ་འཁྲུགས་ས་ཡིན། །
རུས་རྐང་མེད་པའི་བོད་ལྷ་འདྲེ་རུ་གྱུར། །
ལྷ་མིའི་མགོ་ན་འདྲེ་ཡིས་བཀའ་དབང་ཡོད།།
མི་ཡིས་མ་ཤེས་ལྷ་ལ་འདྲི་ས་ཡིན། །
ལྷ་ཡིས་མ་ཤེས་སྨྱོ་རྫུན་བཤད་ས་ཡིན། །
ལྷ་མི་ལྐོག་འབྲེལ་མགོ་སྐོར་གཏོང་ས་ཡིན། །
མི་ཡི་རང་གཤིས་ཁྱི་རུ་འགྱུར་ས་ཡིན། །
མི་ཡི་སྟེང་ན་ལྷ་ཡི་བཀའ་ཁྲིམས་ཡོད། །
མི་ཡི་རྒྱབ་ན་ལྐོག་ཉན་མེ་མདའ་ཡོད། །
མི་ཡི་མཐའ་ན་བཙན་པོའི་ཁྲིམས་ར་ཡོད། །
མི་ངན་བླ་སྤྲུལ་བཀྲོངས་པའི་གཤེད་མ་ཡོད། །
༢༠༡༣ ༡༠ ༩ ཉིན་ཨ་དཀོན་བླ་མ་ཁྲིན་དུ་ནས་བཀྲོངས་པ་ཐོས་རྗེས་བྲིས།
འགྲོ་བ་མི་ཡིན་ཚད་སྐྱེས་ཙམ་ནས་རང་དབང་དང་འདྲ་མཉམ་རེད།
རྒྱལ་སྤྱིའི་འགྲོ་བ་མིའི་ཐོབ་ཐང་གི་གསལ་བསྒྲགས།