གངས་བཙན་པོ།
རང་གིས་དབྱངས་གསལ་སོ་བཞི་མ་ཤེས་གོང་།།
བྱིས་པའི་རྩེ་ཁང་ལ་སོགས་མི་ཤེས་དུས།།
ཁྱེད་ཀྱི་དབྱངས་རྟ་ཁོ་ནར་རྣ་བར་སོན།།
ཁྱེད་ཉིད་འཇིག་རྟེན་འདི་རུ་ཡོད་ཚད་ཡིན།།
རང་ཉིད་ལྔ་རིག་སློབ་གྲྭར་འགྲིམ་སྐབས་སུ།།
རྒན་གྱིས་བསླབ་ཀྱང་ཅི་ཡང་མི་ཤེས་དུས།།
ཁྱེད་ཀྱི་དབྱངས་རྟའི་གླུ་ཚིག་ངག་ཏུ་ཐལ།།
དེ་དུས་ཁྱེད་ཉིད་ཞིང་འདིར་མ་མ་ཡིན།།
རང་གི་རྐང་པ་ས་སྟེང་བཞག་ཤེས་སྐབས།།
སྤྱི་ཚོགས་ཁ་ཕྱོགས་ཙམ་ཡང་མི་རྙེད་དུས།།
ཁྱེད་ཉིད་ལ་རྒྱའི་དབྱངས་རྟས་ས་སྟེང་ཁྱབ།།
དེ་དུས་ཁྱེད་ཉིད་ལ་རྒྱའི་གླུ་བ་ཟེར།།
རང་མགོ་ཐོན་པ་ཙམ་ཡང་མི་ཤེས་དུས།།
བོད་པ་ཟེར་བའི་སྐྱོ་ཉམས་མ་ཐོས་གོང་།།
ཁྱེད་ཀྱིས་སྐྱོ་གདུང་གླུ་དབྱངས་མང་ཐོས་སྐབས།།
ཁྱེད་ཉིད་བོད་པའི་བུ་ཕྲུག་གཅེས་ལོ་བཏགས།།
རང་སྣང་མཐོན་པོ་ཙམ་ཞིག་སླེབས་དུས་སུ།།
རྣ་ལ་ཉན་རྒྱུ་ཞིག་ལས་མི་བསམ་དུས།།
ཁྱེད་ཀྱི་གླུ་གཞས་ཁོ་ནས་ཉི་མར་ཆོད།།
དེ་དུས་ཁྱེད་ཀྱི་མཚན་ལ་ཁུ་བྱུག་ཟེར།།
རང་གི་ཡབ་མེས་བཀའ་དྲིན་དྲན་ཙམ་དུས།།
རང་གི་སྲོལ་རྒྱུན་ཕྱོགས་ལ་དུངས་མཁན་དཀོན།།
དེ་དུས་ཁྱེད་ཉིད་བོད་པའི་སྲོལ་ལ་དགའ།།
དུས་དེར་ཁྱེད་ཉིད་ཚངས་པའི་སྲས་པོ་ཟེར།།
རང་གི་མི་ཚེ་ས་མཐར་བསྐྱེལ་སྐབས་དེར།།
ཡུལ་ལུང་མང་པོའི་གླུ་སྐད་མང་ཐོས་ཀྱང་།།
སྐྱིད་སྡུག་གང་ལ་ཉན་ཀྱང་སྐྱིད་ངོ་འཆར།།
ཁུ་བྱུག་ཁྱེད་ཉིད་མ་གཏོགས་ཡོད་མ་མཆིས།།
རང་གི་ཕ་ཡུལ་དྲན་པའི་ཉིན་མོར་མང་།།
རང་ལ་སྐྱོ་གྲོགས་བྱེད་མཁན་མང་ནའང་།།
ཁྱེད་ཀྱི་གླུ་གཞས་དེ་ལས་གཞན་མ་དམིགས།།
ཁྱེད་ཉིད་འཇིག་རྟེན་འདི་ནས་ཡོད་ཚད་ཡིན།།
དེ་རིང་ཐན་སྐད་ཞིག་གིས་ངག་ནས་ཐལ།།
ཁུ་བྱུག་གླུ་བ་དོ་ནུབ་བཞུར་སོང་ཟེར།།
རང་གི་ཚོར་བ་ཡོངས་རྫོགས་གཅིག་ཏུ་བསྡུས།།
དེ་དུས་རང་གི་བླ་མ་གློ་བུར་དྲན།།
ཕྱི་མ་ཟེར་དུས་ཚང་མ་ཆ་མེད་ཡིན།།
ཆ་ཡོད་རྒྱུས་མངའ་གོང་ས་མཆོག་ཉིད་ཡིན།།
བསྔོ་རྟེན་ཞིག་གི་ལམ་ཁ་བསྟན་ནས་ཡོད།།
དག་ཞིང་བར་རྡོའི་ལམ་ནས་འདྲེན་བར་ཤོག།
ཁྱེད་ཀྱིས་གངས་ཅན་བོད་ལ་ལེགས་སྐྱེས་མང་།།
ཁ་བ་གངས་ཅན་མ་རྫོགས་ཁྱེད་རང་བརྟན།།
གནས་སྐབས་གཟིམ་སར་བདེ་བའི་སྨོན་ལམ་མང་།།
མྱུར་དུ་གངས་ཅན་ཡུལ་ལ་བྱོན་པར་སྨོན།།
བོད་ཁམས་ཡོངས་ལ་མིང་དུ་གྲགས་པའི་གླུ་བ་གདུ་བྷེ་ལགས་དོ་ནུབ་མྱ་ངན་ལས་འདས་པ་ཐོས་མ་ཐག་རང་གི་མི་ཚེ་དང་སྦྱར་ནས་བརྒྱུད་རིང་ཉུང་ཙམ་དང་བཅས་མྱ་ངན་ཚད་མེད་ཞུ།
རྒྱ་གར་ལྷོ་ཕྱོགས་ནས་དྲ་མིང་གངས་བཙན་པོས་2016/2/27 དགོང་མོར་ཕུལ།