གངས་ལྷ།
ཀོ་ཉོ་པགས་ཚོང་བྱེད་པའི་གྲྭ་འཁྱམས་དང་།།
ཁྲེ་ཉོ་འབུ་ཚོང་གནང་བའི་བན་དྲག་གཉིས།།
ས་ཉོ་ཁང་ཚོང་མཁས་པའི་བླ་བྲང་གསུམ།།
ཆོས་རྨོངས་སྐྱེ་བོའི་མཐོང་ཚུལ་མི་གཅིག་རུང་།།
ཐུབ་པའི་རིང་ལུགས་བཤིག་ལ་གཅིག་པ་ཉིད།།
དཀོར་ཁས་ཁྱིམ་ཚང་གསོ་བའི་བླ་མ་དང་།།
འབུལ་ཟོག་བཤས་ལ་འབེབ་པའི་གཉེར་པ་གཉིས།།
རྟེན་འཚོང་ཁྱི་ཚོང་མཁས་པའི་དགེ་དྲག་གསུམ།།
ཕལ་པའི་སྣང་རོར་མཛད་རྣམ་མི་མཚུངས་མོད།།
དམ་པའི་ཆོས་དང་མི་མཐུན་གཅིག་པ་ཉིད།།
མགྲོན་ཁང་གྲོང་དུ་བཞེངས་པའི་བླ་ཆེན་དང་།།
མགོན་ཁང་སྲང་དུ་འདེབས་པའི་གྲྭ་ཚང་གཉིས།།
སློང་ཡིག་སྐེ་ལ་འདོགས་པའི་སེར་སྤྲང་གསུམ།།
གདན་དང་སྒོར་གྱི་རྩེགས་རིམ་མི་འདྲ་ཡང་།།
རེ་བ་དངུལ་ལ་འཆང་ཚུལ་གཅིག་འདྲ་ཉིད།།
དཔེ་ཡག་པོ་གསུངས་འདུག་དངོས་ཡོད་གནས་ཚུལ་རེད།
སྐྱོན་ཚང་མ་ལ་ཡོད་ཡོད་པ་རེད། སྐྱོན་བརྗོད་གནང་འདོད་ན་གནའ་རྒྱའི་ཚེ་ལོ་ནང་བཞིན་རྒན་གཞོན་བར་གསུམ་དང་། གནའ་མ་མག་པ། མི་སྐྱ་གསར་བུ་གསར་མོ་ཚོ་ཚང་མའི་སྐྱོན་བརྗོད་ན་དྲང་བདེན་ཆགས་རྒྱུ་ལས་གྲྭ་བ་གཅིག་པོ་སྐྱོན་བརྗོད་གནང་བསྡད་ན་དེ་ནི་ཕྱོགས་སུ་ལྷུང་བའི་སྐྱོན་འདུག།
༄༅། གཞན་གྱི་རྗེས་མ་ཆོད་ན་ཕྲག་དོག་གི་སྐད་ཆ་བཤད་ནས་ཕན་གྱི་མ་རེད། དེང་སང་བོད་ཕྱི་ནང་གཉིས་ན་ཕྲག་དོག་གི་སྐད་ཆ་བཤད་མཁན་འགའ་ཤས་འདུག མིག་ཚ་ན་སྡུག་གྱོང་རེད་བསམ་སོང་། དུས་རབས་འདི་འགྲན་རྩོད་ཀྱི་དུས་རབས་ཤིག་རེད། སྔུན་ལ་མ་ཟིན་ན་ཡང་རྗེས་ལ་མ་ལུས་པ་བྱེད་དགོས་པ་རེད། སྒྱུད་ལུག་པ་དང་ལེ་ལོ་ཅ་་ཚོའི་སྐྱོ་ངག་ལ་ཕྱི་ལྟས་མ་བྱེད། བཟང་ངན་གང་གིས་ཀྱང་མདུན་ནས་མདུན་དུ་བསྐྱོད། བླ་བྲང་དང་། གྲྭ་རྐྱང་གང་ཡིན་ཡང་དམངས་དང་མཉམ་དུ་འཚོ་དགོས་པ་གཅིག་པ་ཡིན་པས་ལྟོ་སྲོག་གཉིས་ལ་འབྲེལ་བ་ཆེན་པོ་ཡོད་པ་མ་བརྗེད་རོགས། དེས་ཕྱིར་གཞན་ལས་ངེས་པར་དུ་རྣམ་པར་རྒྱལ་ཐབས་ལ་འབུངས་ཤིག
༄༅། །བོད་ཀྱི་གྲྭ་བའི་སྐོར་གྱི་དྲིས་ལན། །
2014-11-06 羊兄乐园
དྲི་བ།
དགེན་བན་ཤུལ་ལགས་ལ་བཀའ་འདྲི་ཞིག་ཡོད། དེང་སྐབས་བོད་ཀྱི་གྲྭ་བ་རྣམས་ཀྱི་གཤིས་སྤྱོད་མི་སྐྱ་ལས་སྡུག་པས་དོན་དངོས་སུ་ཁོ་ཚོ་བོད་ལ་དགོས་སམ་མི་དགོས། ལོ་རྒྱུས་དང་སྦྱར་ཏེ་བཀའ་ལན་ཕྱག་སྟོན་གནང་རོགས་ཞུ་ཞུ། དྲི་བ་འདྲི་མཁན་བཟོད་རྒྱམ་ཡིན།
དྲིས་ལན།
བོད་ཀྱི་རབ་བྱུང་བ་ནི་རྒྱལ་པོ་ཁྲི་སྲོང་ལྡེ་བཙན་གྱི་དུས་སུ་བྱུང་བ་ཞིག་ཡིན་ལ། རབ་བྱུང་བའི་གང་ཟག་གི་ཐོག་མ་སྦ་ཁྲི་གཟིགས་དང་རབ་བྱུང་བའི་སྡེ་ཐོག་མ་སད་མི་མི་བདུན་བྱ་བ་དེ་ཡིན། ཁོང་རྣམས་ལ་བཙན་པོ་ཁྲི་སྲོང་ལྡེ་བཙན་གྱིས་བླ་ནས་འཚོ་བ་སྦྱར་ཞིང་བཅོམ་ལྡན་འདས་ཀྱི་རིང་ལུགས་འཛིན་པར་བརྐོས་ནས་ཆེ་མཐོང་བྱས་པའི་ཤུགས་རྐྱེན་གྱིས་ཕྱིས་སུ་བོད་ཀྱི་རབ་བྱུང་བའི་གྲངས་ཀ་མང་ནས་མང་དུ་འཕེལ་འགོ་བརྩམས་ཡོད། ཡིན་ནའང་སྐབས་དེ་དུས་སུ་མི་རྣམས་ལས་རིག་པ་རྣོ་ཤོས་དང་བྱད་གཟུགས་ཡག་ཤོས་གདམས་ནས་རབ་བྱུང་བ་བྱེད་པའི་ཆ་རྐྱེན་ཡོད་སྟབས་ཆོས་ལ་སློབ་སྦྱོང་དང་འདུལ་འཛིན་ཡང་དག་པ་མང་པོ་བྱུང་བཞིན་ཡོད། དཔེར་ན་སྐབས་དེ་དུས་སུ་རྒྱ་གར་ནས་ཤིང་ཏ་ལའི་ལོ་མའི་གླེགས་བམ་ལྔ་བརྒྱ་ཤིང་རྟར་དྲུད་ཡོང་ཏེ་བསམ་ཡས་སྒྲ་བསྒྱུར་གླིང་ནས་ལོ་ཙཱ་བྱས་ཏེ་སུས་ཀྱང་འགྲན་བཟོད་དཀའ་བའི་བཀའ་བསྟན་སོགས་བྱུང་བ་ལྟ་བུ་ཡིན། དེ་ནས་རིམ་བཞིན་མི་རྣམས་ཀྱིས་མཐའ་བཞི་ལ་དམག་རྒྱག་པའི་ལས་ཀ་དེ་མི་འདོད་པར་བསམ་ཡས་སོགས་སུ་རབ་བྱུང་བ་བྱེད་པའི་འདོད་པ་དེ་རེ་བ་མཐར་ཐུག་ཅིག་ལ་བརྩིས་ཡོད། དེའི་ཉེར་ལེན་གྱིས་རྒྱལ་པོ་འུ་དུམ་བཙན་པོའི་སྐུ་ཚེའི་སྨད་ལ་སླེབས་དུས་སུ་ཧ་ལམ་སྐྱེ་ཕོ་ཚང་མ་བསམ་ཡས་ལ་འཚེང་ཁ་བྱེད་པའི་ཚོད་རེད། དེ་ལ་དམིགས་ནས་རྒྱལ་པོ་འུ་དུམ་བཙན་པོས་ཀྱང་རབ་བྱུང་བའི་གྲངས་ཀ་ལ་ཚོད་འཛིན་ཅུང་ཟད་བྱེད་པའི་དགོངས་པ་བཞེས་པ་རེད། དེར་སྔགས་མཁན་ལྷ་ལུང་དཔལ་རྡོར་དང་སྣུབས་སངས་རྒྱས་ཡེ་ཤེས་སོགས་སྔགས་པ་རྣམས་ཐུགས་ཧ་ཅང་མ་རངས་ནས། འུ་དུམ་བཙན་པོའི་མགོ་ན་རྭ་ཡོད་ཚུལ་དང་བདུད་ཀྱི་སྤྲུལ་བ་ཡིན་ཚུལ་སོགས་སྨྲས་ནས་བསྟན་པ་སྣུབས་པ་རེད་ཅེས་བསྙད་བཏགས་ཏེ་མི་འབངས་རྣམས་ལ་ཁྱབ་བསྒྲགས་བྱས་པ་རེད། དེར་མ་ཟད་ལྐོག་ནས་བཙན་པོ་བཀྲོང་བའི་གྲོས་བྱས་ཏེ་སྣུབས་ཆེན་བལ་ཡུལ་ལ་མཐུ་སྦྱངས་དུ་སོང་བའི་ལོ་རྒྱུས་ཡོད། ཡིན་ནའང་བཙན་པོ་འུ་དུམ་དར་མས་རབ་བྱུང་བའི་གྲངས་ཀར་ཚོད་འཛིན་བྱས་པ་ཙམ་མ་གཏོགས་བསྟན་པ་རྩ་མེད་དུ་སྣུབས་པའི་འཆར་གཞི་མེད་པ་ནི་སྐུ་ཚེའི་སྟོད་ཀྱི་ཆོས་དར་བའི་སྨོན་ལམ་དེ་དག་ལ་བལྟས་ནའང་ཤེས་པ་རེད། གང་ལྟར་སྐབས་འདི་དུས་སུ་རབ་བྱུང་བའི་གྲངས་ཀར་ཚོད་འཛིན་བྱས་པ་ཙམ་ལས་དེ་དག་གི་སྤྱོད་པ་འཆལ་བ་དང་འདུལ་བ་དོར་ནས་ཚོད་འཛིན་བྱས་པ་ཞིག་མིན་མོད། འུ་དུམ་བཙན་པོས་མ་འོངས་བར་དེའི་སྔ་ལྟས་ཡོད་པར་དགོངས་པ་བཞེས་མེད་དམ་སྙམ།
དེ་ནས་འུ་དུམ་བཙན་པོ་བཀྲོངས་རྗེས་སུ་བོད་སིལ་བུར་འཐོར་ཏེ་གཅིག་གྱུར་མགོ་བདག་མེད་སྟབས་གང་དྲན་དྲན་བྱས་ཏེ་ལ་སྟོད་ཨ་ཙ་ར་དམར་པོ་དང་ཨར་ཚོ་བན་དེ་བཅོ་བརྒྱད་སོགས་བྱུང་ནས་རབ་བྱུང་བའི་སྤྱོད་པ་འཆལ་བ་དང་འདུལ་བ་རྨང་མེད་དུ་ཉམས་ཏེ་སྦྱོར་སྒྲོལ་སོགས་བྱུང་ནས་ལྷ་བླ་མ་ཡབ་སྲས་དང་ཇོ་བོ་ཡབ་སྲས་སོགས་ཀྱིས་རྣམ་པར་བཀག་ནས་ལམ་ཡང་དག་ཏུ་བཙུད་པ་དེ་རེད། འདི་ལ་བལྟས་ན་འུ་དུམ་བཙན་པོའི་རབ་བྱུང་བའི་གྲངས་ཀར་ཚོད་འཛིན་གནང་བའི་དགོངས་པ་དེའང་ཅུང་ཟད་རྟོགས་ཐུབ་བམ་སྙམ། ལོ་རྒྱུས་ལས་བྱུང་བའི་རབ་བྱུང་བའི་གནས་ཚུལ་མདོར་བསྡུས་ཙམ་ནི་འདི་འདྲ་རེད།
དིང་སང་ཡང་དེའི་རྒྱུན་མུ་མཐུད་ནས་སྐྱོང་དང་སྐྱོང་མུས་སུ་ཡོད་མོད། ས་དང་རྡོ་ཡི་གསེབ་ན་གསེར་རྣམས་བག་ལ་ཉལ་བའི་ཚུལ་དུ་ཡོད་པ་བཞིན་བསླབ་གསུམ་མིག་འབྲས་བཞིན་སྲུང་བའི་རབ་བྱུང་བ་མེད་པ་ནི་མི་སྲིད་པས་ང་ཚོས་ཀྱང་བླང་དོར་ཡོད་པའི་སྒོ་ནས་བོད་ཀྱི་རབ་བྱུང་བ་རྣམས་ལ་གདེང་འཇོག་བྱེད་འོས་སོ་སྙམ། ད་ལྟ་བོད་ལ་ལྷག་བསྡད་ཡོད་པ་ནི་སངས་རྒྱས་ཆོས་ལུགས་ཀྱི་རིག་གཞུང་འདི་ཙམ་རེད། གལ་ཏེ་འདི་ཡང་མེད་ན་མི་རིགས་འདི་ལ་ངོམ་ཆོག་པ་དང་དེའི་ངོ་བོ་སྲུང་ཐུབ་པའི་རིག་གཞུང་གང་ཡང་ལྷག་མེད་པ་རེད། གལ་ཏེ་འདི་ལ་སློབ་སྦྱོང་བྱེད་དགོས་ན་འདུལ་འཛིན་རབ་བྱུང་བའི་སྡེ་མེད་ཚེ་མི་སྐྱ་ཞིག་གིས་གང་ཡང་མི་ལྕོག་པ་མནའ་བསྐྱལ་ནས་ཐག་བཅད་ན་ཆོག་གི་རེད། དེས་ན་ང་ཚོས་ཀྱང་མཐའ་གང་ལའང་མ་ལྷུང་བར་ཡང་དག་པའི་རབ་བྱུང་འདུལ་འཛིན་བ་རྣམས་ལ་གུས་བཀུར་དང་རྒྱབ་སྐྱོར་བྱེད་འོས་ཏེ། ཁ་ཅིག་གི་སྤྱོད་པ་དང་འདུལ་བ་ཉམས་ན་ཡོད་ཚད་ཉམས་དགོས་པའི་དོན་དག་ཁྱོན་ནས་མེད་མོད། འཇིག་རྟེན་ཁྱིམ་པ་དང་ཐག་ཇེ་ཉེ་ནས་ཇེ་ཉེ་ཡིན་པའི་རབ་བྱུང་བའི་གཟུགས་བརྙན་དེ་དག་དང་རྒྱང་དུ་བཀྱེད་པ་ནི་ཐབས་ཡག་ཤོས་ཤིག་རེད་བསམ་ཡོད།
མདོར་ན་བོད་ལ་ད་ལྟའི་དུས་སུ་སྤུས་གཙང་གྲལ་དག་པའི་རབ་བྱུང་འདུལ་འཛིན་པའི་སྡེ་ཞིག་མེད་ན་ང་ཚོའི་རིག་གཞུང་ཉམས་པར་ཐེ་ཚོམ་ཅི་ཡང་མེད་པས། ཕྱིས་སུ་ཕྱི་རྐྱེན་ནང་རྐྱེན་རྐྱ་འཐབ་པའི་རབ་བྱུང་འདུལ་འཛིན་པ་ཡོད་ཚད་ལ་སྡང་བའི་དམིགས་པ་དེ་ནི། རང་གི་གདོང་ལ་རང་གིས་གཅིན་བྱུག་པའི་ཚུལ་ལས་མ་འདས་སམ་སྙམ་ཏེ་ཁྱེད་རྣམས་ཀྱིས་ཀྱང་དཔྱད་པར་རིགས་སོ།།
བན་ཤུལ་དཔལ་མཁར་རྒྱལ་གྱིས།
༢༠༡༤/༡༡/༤ལ། ལྷ་སར།
请点击下面推广，获取更多生活资讯和好玩的APP，谢谢支持！
གཡུ་བྲག་པའི་མཆན་ལེགས་སོ།
སངས་རྒྱས་ཆོས་ནི་ང་ཚོ་ཚང་མའི་རེད།
སོ་སོའི་ས་ནས་གོ་བ་གུས་བ་ལས།།
རང་མིན་གཞན་ལ་ཆོས་ཁྲིམས་འདི་འདི་སོགས།།
ཚིག་ངན་ལྟ་བ་བསྟན་པ་བསྟན་པའི་དགྲ།
བཀའ་བསྟན་པོ་ཏུ་ཁང་བ་ཁང་བ་དག།
སེམས་ཀྱི་འཆར་སྒོ་བཏུལ་བའི་ཞི་བདེ་ལམ།
ཚེ་གང་བསགས་པའི་བསོད་ནམ་ལས་འབྲས་སོགས།
རྣམ་སྨུན་རང་སྨུན་ཡིན་པས་གཞན་མ་དཀྲུག།
ཕར་ལ་མ་ལྟ་ཚུར་ལ་ཞིབ་ལྟ་བྱོས།།
སོ་སོས་ཤེས་བའི་ཡོན་ཏན་དག་ལ་ལྟོས།།
གཞན་ཕན་བདག་ཕན་མེད་པའི་ཁ་དེར་ལྟོས།
རང་སྐྱོན་རིག་པའི་མི་ནི་ཤྭཀྱ་བ།།
དམར་ལྟ་ཅན་ཞིག་གི་སྐད་ཆ་ལས་གཞན་ཅི་ཡང་མ་མཐོང་།