ཆབ་མདོ་ངག་ཕུན།
བོད་མི་རྣམས་བཙན་བྱོལ་ལ་སླེབས་པའི་ཉིན་ནས་བཟུང་སྟེ་༸རྒྱལ་བ་རིན་པོ་ཆེའི་ཤེས་ཡོན་གྱི་ཐོག་ཏུ་བླ་ན་མེད་པའི་ཐུགས་འཁུར་གཙོ་བཞེས་ཀྱིས་རྒྱ་གར་སྲིད་བློན་མཆོག་ལ་རེ་འདུན་རིམ་ཞུས་ལྟར། སྲིད་བློན་མཆོག་ནས་བོད་མིའི་ཐོག་ཏུ་དགོངས་བཞེས་བླ་མེད་དུ་བཞེས་ནས་བོད་མིའི་སློབ་གྲྭ་ཁེར་གཙང་ཟུར་དུ་བཙུགས་རྒྱུ་དགོངས་བཞེས་ཙམ་མ་ཟད། མཐུན་འགྱུར་གནང་བས་དྲན་གྱི་ད་ལྟ་བར་ང་ཚོའི་བོད་མི་རིགས་ཀྱི་སོན་རྩ་རྣམས་ལ་གནའ་དེང་ཡ་བྲལ་མེད་པར་འཚོ་གནས་གསོ་སྐྱོང་ཐུབ་པ་བྱུང་བ་རེད་ལ། བོད་མི་རིགས་ཀྱི་ནམ་ཡང་བརྗེད་ཐབས་མེད་པའི་ཕན་ཐོགས་རླབས་ཆེན་བྱུང་ཡོད་པ་དེ་རེད། ཡིན་ནའང་ཤེས་ཡོན་ཐོག་ལ་དང་ཐོག་དམིགས་ཡུལ་བཟུང་བ་ཇི་བཞིན་འགྲུབ་འབྲས་ཡོང་ཐུབ་ཀྱི་མེད་པས་༸རྒྱལ་བ་རིན་པོ་ཆེའི་བཀའ་སློབ་རིམ་པ་ཕེབས་ཡོད་པ་དང། འབྲེལ་ཡོད་ཁག་ལ་ཤེས་ཡོན་ཐོག་ལ་ཤུགས་རྒྱབ་དགོས་པའི་བཀའ་སློབ་རིམ་པར་ཕེབས་ཡོད། ཡིན་ནའང་སློབ་ཕྲུག་གི་ཤེས་ཡོན་གནའ་དེང་ཡ་མ་བྲལ་བའི་ཚད་ལྡན་ཞིག་གསོ་སྐྱོང་ཡོང་ཐུབ་ཀྱི་མེད་པ་དེ་རེད། དེར་བརྟེན་ནས་གོང་འོག་ཚང་མའི་ཤེས་ཡོན་ཐོག་ལ་འཐུད་ཤོར་འགྲོ་གིན་ཡོད་ཚུལ་བཤད་ཀྱི་ཡོད་ལ། ལྷག་དོན་བོད་ཡིག་གི་ཤེས་ཚད་ཧ་ཅང་སྐྱོ་པོའི་གནས་ཚད་ལ་སླེབས་ཡོད་ཅིང་། དེ་དག་ཡོང་རྐྱེན་ནི་བོད་ཡིག་བཀོལ་སྤྱོད་བྱེད་སའི་ཁོར་ཡུག་ཆུང་བ་དང་། ཕ་མ་སོ་སོའི་བུ་ཕྲུག་ལ་བོད་ཡིག་ལ་དོ་སྣང་བྱེད་དགོས་པའི་བསླབ་བྱ་རྒྱབ་རྒྱུའི་ཚབ་ཏུ་དེ་ལས་རྡོག་སྟེ་ཨིན་ཡིག་མ་ཤེས་ན་ལས་ཀ་རག་གི་མ་རེད་ཅེས་ཕྲུ་གུ་སེམས་ཁམས་སུ་བླུགས་གང་ཐུབ་བྱེད་ནས་ཕྲུ་གུའི་བོད་ཡིག་ལ་དོ་སྣང་མེད་པ་རྐང་བཙུགས་ནས་ཕ་མ་འགས་ཤས་ཀྱིས་བཟོ་གི་ཡོད་པ་གོ་མྱོང་ལ་མིག་གིས་མཐོང་མྱོང་ཡོད། དེ་བཞིན་བོད་མིའི་སྒྲིག་འཛུགས་ཁག་ཏུ་ཨིན་ཡིག་མ་ཤེས་ལས་བྱེད་ནང་དུ་ཚུད་ཀྱི་མེད་ལ། མཐའ་ན་ཡིག་གད་ལའང་ཚུད་ཀྱི་མེད་པ་དེ་རེད། གཅིག་བྱས་ན་གཞན་ཡུལ་ལུང་དུ་གཞན་དབང་སྟབས་བསྟུན་བྱེད་དགོས་དུས་དཀའ་ངལ་གྱི་གནས་སྟངས་ཤིག་ཡིན་སྲིད། གང་ལྟར་གཞན་དབང་གི་འོག་ནས་བོད་ཡིག་སྐྱོ་པོ་ཡོང་བར་ཆག་བཞག་ཀྱང་ཨིན་ཇི་ཤེས་ཚད་ཡག་པོ་ཞིག་ཡོང་དགོས་ཀྱང་དེ་ཡང་ཐུགས་རེ་ཇི་བཞིན་མེད་རབས་བརྗོད།
གང་ལྟར་ང་ཚོའི་དམིགས་ཡུལ་བོད་ཀྱི་ཆོས་དང་རིག་གཞུང་མ་བརླག་པའི་ཆེད་དུ་བོད་མི་ཁེར་གཙང་ཟུར་དུ་སློབ་གྲྭ་བཙུགས་གནང་བ་དེ་རེད། དེར་བརྟེན་ནས་དང་ཐོག་བོད་ཁྱིམ་ནས་འཛིན་གྲྭ་དང་པོ་ནས་འཛིན་རིམ་ལྔ་བའི་བར་སྐད་ཡིག་གཞན་གྱི་ཐོག་ནས་སློབ་ཁྲིད་མ་དགོས་པའི་བོད་པའི་སྐད་ཡིག་ཐོག་ཏུ་སློབ་ཁྲིད་བྱས་ཀྱང་དེ་ལས་བརྒལ་བ་བོད་ཀྱི་སྐད་ཡིག་ཏུ་སློབ་ཁྲིད་བྱེད་མ་ཐུབ་ལྷག་ཡོད།
ལྷག་དོན་རྒྱ་དམར་གྱི་དེང་སྐབས་བོད་ས་འཛུགས་སྐྲུན་ལ་ཁ་བཏགས་ནས་བོད་མི་རིགས་ཀྱི་སྐད་ཡིག་མེད་པ་བཟོ་རྒྱུའི་ལས་འགུལ་སྤེལ་ནས་བོད་ཀྱི་སྐད་ཡིག་བཀོལ་སྤྱོད་བྱེད་སའི་ཁོར་ཡུག་ཆུང་དུ་བཏང་དང་གཏོང་བཞིན་ཡོད་ཅིང་། བོད་ཡིག་སློབ་ཚན་ཉུང་དུ་གཏོང་ཐབས་ཀྱི་བཙན་བཀའ་གཏོང་གི་ཡོད་པ་དེ་རེད། ཡིན་ནའང་གཞིས་ལུས་བོད་མི་རྣམས་ཀྱི་ཡོད་ཚད་བློས་བཏང་ནས་བོད་མི་རིགས་སྐད་ཡིག་ཐོག་ཏུ་ཤུགས་སྣོན་རྒྱག་བཞིན་ཡོད། རྒྱ་གཞུང་གི་ཐབས་ལམ་འདྲ་མིན་སྣ་ཚོགས་ཤིག་སྤྱད་ནས་བོད་ཀྱི་སྐད་ཡིག་མེད་ཐབས་བཟོ་གི་ཡོད་པ་དེ་རེད། དེ་འདྲ་ཛ་དྲག་གི་གནས་སྟངས་ཤིག་གི་འོག་ཏུ་ང་ཚོ་ལྷུང་ཡོད།
ལོ་ངོ་མང་པོ་ཞིག་གི་རིང་དུ་བཙན་བྱོལ་བོད་མིར་ཤེས་ཡོན་གྱི་སྲིད་ཇུས་འདི་རེད་ཟེར་བ་སྟོན་རྒྱུ་མེད་པ་ལྷག་པ་རེད། བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་ནང་”དོན་དམ་བོད་ཀྱི་གཞི་རྩའི་དགོས་མཁོ་དང་འཚམས་པའི་ཤེས་རིག་གི་སྲིད་བྱུས་ཡང་དག་ཅིག་བཟོ་རྒྱུ་”ཞེས་འཁོད་ཡོད་ཀྱང་ལོ་མང་ལྷག་པ་དེ་རེད། དེ་ག་རེེ་མཚོན་གྱི་ཡོད་རེད་ཅེ་ན། འབྲེལ་ཡོད་ཚོས་ཤེས་ཡོན་ཐོག་ལ་དོ་སྣང་གང་ཙམ་ཞིག་གནང་ཡོད་མེད་རྟོགས་ཐུབ་པ་ཞིག་རེད། བཀའ་ཤག་སྐབས་བཅུ་གཅིག་པའི་བཙན་བྱོལ་བོད་མིའི་ཆབ་སྲིད་ཐུགས་འགན་བཞེས་པ་ནས་བཟུང་རིམ་གྱིས་བཅའ་ཁྲིམས་རིན་པོ་ཆེའི་དགོངས་དོན་དང་། བོད་མིའི་གཞི་རྩའི་དགོས་མཁོ་དང་འཚམས་པའི་ཤེས་ཡོན་སྲིད་ཇུས་ཤིག་གཏན་འབེབས་གནང་རྒྱུའི་ཆེད་དུ་ཕྱི་ནང་གི་མཁས་དབང་ཚོས་བགྲོ་གླེང་མཐིལ་ཕྱིན་པ་གནང་ནས་མཐར་བོད་མི་མང་ཁྲིམས་བཟོ་ལྷན་ཚོགས་ཀྱི་བོད་མིའི་ཤེས་ཡོན་སྲིད་ཇུས་གཏན་འབེབས་གནང་བ་དེ་རེད། ཡིན་ནའང་ཤེས་ཡོན་སྲིད་ཇུས་ཡོད་པ་དང་། དེ་ཡང་དག་པ་ཡིན་པ་ཙམ་གྱི་ཕན་ཐོགས་མེད་ཅིང་། ཤེས་ཡོན་སྲིད་ཇུས་ཀྱི་དགོངས་དོན་དེ་དག་ལག་ལེན་ཚུན་མཐུན་ལག་བསྟར་བྱེད་མིན་འབྲེལ་ཡོད་རྣམས་ལ་ཐུག་ཡོད། ལྷག་དོན་བཙན་བྱོལ་བོད་པའི་སློབ་གྲྭ་ཡོངས་རྫོགས་ཤེས་ཡོན་སྲིད་ཇུས་འོག་ཏུ་ཤར་བསྐྱོད་འགྲོ་ཐུབ་ཀྱི་མེད་ལ་ལག་ལེན་བསྟར་ཐུབ་ཀྱི་མེད།
སློབ་དེབ་ལ་ཆ་མཚོན་ན་བོད་ཁྱིམ་ཤེས་ཡོན་སྡེ་ཚན་ནས་འཛིན་གྲྭ་དང་པོ་ནས་འཛིན་གྲྭ་ལྔ་བར་སྤྱི་ཚོགས་རིག་གནས་དང་ཚན་རིག་སློབ་དེབ་ཁག་བོད་བསྒྱུར་གནང་ནས་སློབ་ཁྲིད་གནང་གི་ཡོད། ཤེས་ལྷན་ནས་འཛིན་གྲྭ་གསུམ་པའི་ཨང་རྩིས་ནས་བརྒྱད་པའི་བར་དང་། ཚན་རིག་སློབ་དེབ་འཛིན་གྲྭ་དྲུག་པ་ནས་འཛིན་གྲྭ་བརྒྱད་པའི་བར་ཕབ་བསྒྱུར་གནང་ཡོད། ཤེས་ལྷན་གྱི་ཨང་རྩིས་དང་ཚན་རིག་སློབ་དེབ་དེ་དག་གཏན་ཉིན་སློབ་གྲྭ་ཁག་ལ་སློབ་ཁྲིད་ག་ཚད་ཙམ་ཞིག་གནང་གི་ཡོད་དམ། དེ་བཞིན་ཤེས་ལྷན་ནས་ཕབ་བསྒྲུར་གནང་བ་དེ་དག་བོད་ཁྱིམ་སློབ་གྲྭ་ཁག་ལ་སློབ་ཁྲིད་གནང་གི་ཡོད་དམ། གང་ལྟར་ཤེས་ཡོན་སྡེ་ཚན་གཉིས་ཀྱི་བར་ལ་འབྲེལ་བ་མེད་པའི་བར་སྟོང་ཞིག་ལྷག་མེད་འགྲོ་སྙམ། དེར་བརྟེར་ནས་ཤེས་ཡོན་གྱི་སྡེ་ཚན་གཉིས་གཙོས་པའི་ཤེས་ཡོན་དང་འབྲེལ་བ་ཡོད་པའི་སྡེ་ཚན་ཡོངས་རྫོགས་མཉམ་རུབ་ཀྱི་ཐོག་ནས་སློབ་གཞི་རྩ་འཛིན་ཡོངས་རྫོགས་གཅིག་འགྱུར་གྱིས་རྩོམ་སྒྲིག་གནང་བ་ཡིན་ན་ཕྱི་ནང་གཉིས་ཀར་ལ་ཕན་རླབས་དང་འགྲུབ་འབྲས་ཆེ་བ་མངོན་ལ། དེ་འདྲ་བཙན་བྱོལ་བོད་མིའི་སློབ་གྲྭ་ཡོངས་རྫོགས་ལ་སློབ་གཞི་གཅིག་འགྱུར་དགོས་པའི་ཁྲིམས་བཟོ་ལྷན་ཚོགས་ཀྱི་ཁྲིམས་ལུགས་ཤིག་གཏན་འབེབས་ཤིག་བཟོ་དགོས་པའི་དུས་ཚོད་རན་འདུག་སྙམ།
དེ་སྔོན་འབྲེལ་ཡོད་གཅིག་གིས་སློབ་གྲྭའི་དགེ་རྒན་རྣམས་རྩ་དགོངས་ཞུ་མཁན་མང་བའི་དབང་གིས་སློབ་ཕྲུག་གི་ཤེས་ཡོན་ལ་འཐུས་ཤོར་འགྲོ་གི་ཡོད་ཚུལ་བརྗོད་ཀྱི་འདུག་པས། སྐབས་དེར་ངས་དགེ་རྒན་ལ་མཐུན་རྐྱེན་ཚུན་མཐུན་སྦྱར་མ་ཐུབ་པས་དགེ་རྒན་རྣམས་རྩ་དགོངས་ཞུ་འགྲོ་གི་ཡོད་པ་རེད་ཅེས་ཞུས་པས། ཁོང་གིས་མ་རེད། དགེ་རྒན་ལ་ལྷག་བསམ་ཡོད་ན་མཐུན་རྐྱེན་བཟང་ཞན་ལ་ལྟ་གི་མ་རེད་ཅེས་བདེན་ཅོག་ཅོག་གི་གསུང་གནང་གི་འདུག །དེ་མ་རེད་ཟེར་རྒྱུ་མི་འདུག་སྟེ་དགེ་རྒན་ཡང་འཚོ་བ་རོལ་དགོས་པ་དངོས་ཡོད་ཡིན་དུས་མཐུན་སྦྱོར་འདོད་བློ་ཁེངས་པ་ཞིག་མེད་ན་འཚོ་གནས་ཁག་པོ་ཡིན་པ་དེ་རེད། དེར་བརྟེན་ནས་ཤེས་ཡོན་སྲིད་ཇུས་ནང་དུ་”མི་རིགས་དང་སྤྱི་ཚོགས་ཀྱི་འབྱུང་འགྱུར་གནས་བབས་ཤེས་ཡོན་ལ་རག་ལུས་ཤིང་། ཤེས་ཡོན་བཟང་ཞན་དགེ་རྒན་ལ་རག་ལུས་པས། དགེ་རྒན་ནི་སྤྱི་ཚོགས་ནང་གལ་གནད་ཆེ་ཤོས་ཡིན་སྟབས། མི་གཤིས་དང་སྤྱོད་ལམ་ལེགས་ཤོས། ཤེས་ཡོན་གནས་ཚད་བཟང་ཤོས་རྣམས་དགེ་རྒན་གྱི་ལས་སྒོར་འཇུག་ཐབས་བྱ་རྒྱུ་དང་། དགེ་རྒན་གྱི་ཆེ་མཐོང་དང་མཐུན་རྐྱེན་བཟང་པོ་ཡོང་ཐབས་སུ་ཁྲིམས་ལུགས་ཀྱི་ཆ་རྐྱེན་བསྐྲུན་དགོས་”ཞེས་གསལ་པོ་བཀོད་གནང་མཛད་ཡོད་ཀྱང་། དགེ་རྒན་རྣམས་ལ་ད་བར་བར་དུ་ཁྲིམས་ལུགས་ཀྱི་ཆ་རྐྱེན་བསྐྲུན་ཡོད་པ་ཞིག་མཐོང་མ་བྱུང་། ཤེས་ཡོན་སྲིད་ཇུས་ནང་དུ་ཡོད་པ་ནང་བཞིན་དགེ་རྒན་རྣམས་ལ་མཐུན་རྐྱེན་སྐྲུན་གྱི་མེད་པའི་དབང་གིས་དགེ་རྒན་རྣམས་མགྲོན་པོ་ནང་བཞིན་སློབ་གྲྭ་ནང་ལོ་ཤས་དང་ཟླ་ཤས་ལས་མ་བསྡད་པ་རྩ་དགོངས་ཞུ་ནས་ཐོན་འགྲོ་གི་ཡོད་པ་དེ་རེད། ཁོང་རྣམས་ལ་ཐུགས་ཁག་མི་འདུག་སྙམ། རྒྱུ་མཚན་ནི་དཀའ་ལས་ཆེ་ཤོས་དང་ལས་འགན་ཆེ་ཤོས་ཡིན་ནའང་ཁོང་རྣམ་པ་འདོད་བློ་ཁེངས་པ་ཞིག་མཐུན་རྐྱེན་སྐྲུན་ཐུབ་ཀྱི་མེད་པ་དེ་རེད། དེ་སྐྲུན་མ་ཐུབ་པའི་དབང་གིས་མི་གཤིས་དང་སྤྱོད་ལམ་ལེགས་ཤེས། ཤེས་ཡོན་གནས་ཚད་བཟང་ཤོས་རྣམས་དགེ་རྒན་གྱི་ལས་སྒོར་འཇུག་ཐབས་བྱ་རྒྱུ་ཞེས་བཀོད་ནའང་ལག་ལེན་མ་བསྟར་ན་གང་འདྲ་ཞིག་བྱས་ནས་ལས་སྒོར་འཇུག་ཐུབ་ཀྱི་རེད་དམ། ང་ཚོའི་སྤྱི་ཚོགས་ནང་གི་ལས་བྱེད་ལས་སློབ་གྲྭའི་རྒན་ལགས་རྣམ་པར་མཐུན་རྐྱེན་ཆུང་བ་ཡོད་པ་རེད། ང་ཚོས་དགེ་རྒན་རྣམ་པའི་ཉི་མ་གང་འཁྱོལ་སློབ་ཁྲིད་གནང་བ་མ་མཏོགས་སེམས་གཏིང་ནས་སློབ་ཁྲིད་བྱེད་ཀྱི་མེད་ཚུལ་སོགས་ནག་ཉེས་ཡོད་ཚད་དགེ་རྒན་མགོ་ལ་གཡོག་གང་ཐུབ་བྱེད་ཀྱི་ཡོད་པ་ལས་ཁོང་རྣམས་པའི་སློབ་ཁྲིད་གནང་སྟངས་དང་དཀའ་ལས་སྐྱོན་སྟངས་དོ་སྣང་ཙམ་ཡང་བྱེད་ཀྱི་མེད་ལ། དགེ་ལགས་རྣམ་པར་མཐུན་རྐྱེན་ག་ཚད་ཅིག་ཡོད་པ་ཐུགས་ཞིབ་གནང་མཁན་ཡོད་དམ། དེ་སྔོན་སློབ་གྲྭའི་དགེ་རྒན་བྱེད་མྱོང་བ་དགེ་རྒན་ཞིག་དྷ་ས་ལས་བྱེད་ལ་ཞུགས་ནས་ཕྱག་ལས་གནང་སྐབས་ཁོང་ཧང་སངས་ནས་ལས་བྱེད་ཀྱི་ལས་ཀ་གུ་ཡངས་པོ་ཞེ་དྲག་རེད་འདུག །དུས་ཚོད་ལ་ལས་ཀ་ལས་དེ་མ་གཏོགས་གང་ཡང་དཀའ་ངལ་མི་འདུག །སློབ་གྲྭ་དགེ་རྒན་ལ་དེ་འདྲ་ལྷོད་ལྷོད་སྡོད་ཁོམ་ཡོད་མ་རེད་ཅེས་ལབ་ཀྱི་འདུག །དེར་བརྟེན་ནས་ད་ལྟ་བཀའ་ཤག་གསར་པའི་ཤེས་ཡོན་གྱི་ཐོག་ལ་ནུས་ཤུགས་སྟོན་རྒྱུ་ཡིན་པ་གསུང་དོན་ལྟར། དེ་ལྟར་གནང་བའི་རེ་བ་དང་ཡིད་ཆེས་གཙང་མ་ཡོད་ཅིང་།
ལྷག་དོན་བརྒྱུད་ལམ་ཁག་ནས་གནས་ཚུལ་དོན་གསལ་ལས། “བོད་སློབ་འཛིན་སྐྱོང་ཁྱབ་ཁོངས་གཏན་ཉིན་སློབ་གྲྭ་ཁག་གི་ཤེས་ཡོན་གྱི་གནས་ཚད་དང་བདེན་དོན་གང་ཅིའི་ལྟ་ལྟོག་འཐུས་ཚང་ཡོང་ཐབས་སུ་”ཞེས་དང་། ཡང་ཤེས་རིག་ལས་ཁུངས་ནས་སྔ་རྗེས་འབད་བརྩོན་གནང་བའི་བརྒྱུད་རིམ་ཞེས་བཀོད་དོན་ལྟར་ད་ནི་རྒྱ་གར་དབུས་གཞུང་གི་བོད་མིའི་སྒྲིག་འཛུགས་ལ་སློབ་གྲྭ་ཆ་ཚང་རྩིས་སྤྲོད་གནང་རྒྱུ་ཡིན་པ་ཐུགས་གཏན་འཁེལ་དོན་ལྟར། ད་ནི་བོད་མིའི་སྒྲིག་འཛུགས་ཀྱི་མ་འོངས་པ་སློབ་གྲྭ་དེ་དག་ཤེས་ཡོན་གྱི་ཐོག་ལ་ཁོར་ཡུག་གང་འདྲ་ཞིག་སྐྲུན་ཐུབ་མིན་དེ་འབྲེལ་ཡོད་རྣམ་པའི་ཕྱག་ཏུ་ཡོད་པས། ཐུགས་བསམ་ཡག་པོ་ཞིག་བཞེས་ནས་སློབ་གྲྭ་དེ་དག་ཤེས་ཡོན་དང་འཛིན་སྐྱོང་སྔར་ལས་ལྷག་ཙམ་ཡར་རྒྱས་གོང་འཕེལ་ཡོང་བ་བྱེད་དགོས་པ་ཞིག་ལས་སྔོན་མ་ནང་བཞིན་ཕྱིན་བསྡད་ན་ཡར་རྒྱས་ནམ་ཡང་འགྲོ་མི་ཐུབ་པ་དེ་རེད། སློབ་གྲྭ་འཛིན་སྐྱོང་གི་འགྲོ་སྟངས་དང་། དགེ་རྒན་རྣམས་པའི་སློབ་ཁྲིད་ཀྱི་འཆར་འགོད་སོགས་ལ་འགྱུར་བ་ངེས་ཅན་གཏོང་དགོས་པ་དེ་རེད། མཐའ་ན་གཏན་ཉིན་སློབ་གྲྭའི་ཁག་གི་ནང་དུ་སློབ་ཕྲུག་རྣམས་བཞེས་ལག་མཉམ་དུ་བཟོ་སྟངས་ཚུན་ཆད་ལ་འགྱུར་བ་གཏོང་དགོས་པ་དེ་རེད། སློབ་གྲྭ་གཅིག་ནང་དུ་སློབ་ཕྲུག་ཉུང་མཐའ་བཞི་བརྒྱ་ལྔ་བརྒྱ་ཙམ་ལ་བཞེས་ལག་བཟོ་དགོས་དུས་བཟོ་མཁན་རྣམས་ལ་སྐུ་ངལ་དང་། སློབ་ཕྲུག་རྣམས་ལའང་བཞེས་ལག་ལ་བྲོ་བ་མེད་པ་སོགས་ཀྱི་དཀའ་ངལ་ཕྲད་ཀྱི་ཡོད་པ་དེ་རེད། ད་ལྟ་བོད་ཁྱིམ་ལྟ་བུ་ཡིན་ན་ཁྱིམ་ཚང་བཟོས་ནས་བཞེས་ལག་བཟོ་དུས་བཞེས་ལག་བྲོ་བ་ཆེ་བ་དང་། སློབ་ཕྲུག་རྣམས་ལའང་བཞེས་ལག་བཟོ་ཤེས་པའི་ལག་ཤེས་དང་གོམས་གཤིས་བཟང་པོ་རང་རྒྱུད་ལ་འཇག་འགྲོ་བ་སོགས་ཀྱི་ཕན་ཐོགས་ཡོང་གི་ཡོད་པ་དེ་རེད། དེ་སྔོན་སློབ་གྲྭ་ཞིག་ནང་དུ་ཐབ་ཚང་གཅིག་གི་ནང་དུ་སློབ་ཕྲུག་བདུན་བརྒྱ་ནས་བརྒྱད་བརྒྱ་ཙམ་ལ་མཉམ་དུ་བཞེས་ལག་བཟོས་ནས་སྤྲད་ཀྱི་འདུག་ཅིང་། སྐབས་རེ་བཞེས་ལག་མ་ཚོས་པ་དང་། བཞེས་ལག་ལ་བྲོ་མེད་པ་སོགས་ཀྱིས་བཞེས་ལག་མང་པོ་བཤོས་ནས་འཕྲོག་བརླག་མང་པོ་འགྲོ་ཡོད་པ་མཐོང་མྱོང་ཡོད་པ་དེ་རེད། དེར་བརྟེན་ནས་མ་འོངས་པ་ཤེས་ལྷན་ནས་ངེས་པར་དུ་དེ་རིགས་ལའང་སྣང་ཆུང་མེད་པ་ཡིད་ཟབ་གནང་དགོས་པས་རེ་འདུན་གྱི་བསམ་ཚུལ་ཙམ་ཞིག་ཡིན།
དེའི་དུས་ཀྱི་སྲིད་བློན་སུ་ཡིན་ནམ། མང་པོས་མི་མཁྱེན་པས། སྲིད་བློན་དེའི་མཚན་ཇ་ཝ་ལཱལ་ནེཧ་རུ་ཡིན། སྲིད་བློན་དེ་རང་བཞིན་སེམས་བཟང་ཅན་ཞིག་ཡིན་འདུག། ངས་ཁོང་༡༩༤༩ལོའི་དབྱར་ཀ་ལ་དྭགས་སུ་མཐོང་། མི་རྣམས་ཀྱིས་ཁོང་ལ་ལྷ་ལྟ་བུའི་གུས་ཞབས་ཞུ། དེའི་དུས་རྒྱ་གར་དམག་མིའི་ནང་དུ་བལ་པོའི་རིགས་ཡོད་འདུག རི་ལ་དམག་རྒྱབ་དགོས་པ་ན། རྒྱ་གར་གཏིང་གི་མི་ལས་བལ་པོ་དྲག་བསམ་ནས་ཡིན་ངེས། རྒྱ་གར་གྱི་བལ་དམག་མང་ཙམ་ལ་དྭགས་ལ་སླེབས། བལ་པོའི་དམག་མི་ཞིག་གིས་ནེཧ་རུའི་འདྲ་སྤར་ཞིག་ང་ལ་སྐྱེས་ལ་བྱིན། སྤར་དེ་བཀྲ་ཤིན་ལྷུན་པོ་བར་དུ་སླེབས་ནས་གཅེས་པས་ལྟ་བར་བྱེད། དེའི་རྗེས་ཕལ་ཆེར་༡༩༦༠ཙམ་ལ་ཡིན་ཤས་ཆོས་འཁོར་གནས་མཇལ་བར་ཕེབས་སྐབས་སུ་མི་མང་པོས་བསྐོར་ནས་ཕེབས་པ་མཐོང་། ཁོང་སྐུ་གཤེགས་རྗེས་སུ་ཁང་པ་ལྟ་བར་འགྲོ་བ་ན། བཞུགས་སའི་ཁང་པ་དེ་ན་སངས་རྒྱས་ཀྱི་སྐུ་འདྲ་སྣ་ཚོགས་ཡུལ་སོ་སོ་ནས་ཁོང་ལ་ཕུལ་པ་རྣམས་བཞུགས་ཡོད་པ་མཇལ་མྱོང་བ་དྲན། ཁོང་ནད་པ་ཡིན་པའི་སྐབས་སུ་སྐུ་མདུན་གཟིགས་པར་ཕེབས་དུས་ཁོང་རང་ཡར་བཞེངས་ཏེ། ༧གོང་ས་རྒྱལ་བ་རིན་པོ་ཆེ་ལ་གུས་བཀུར་ཞུ་བ། སྐུ་མདུན་གྱི་མཛད་སྒོའི་གློག་བརྙན་དུ་ལོ་ཁ་ཤས་སྔོན་དུ་མཐོང་ངོ་།།
ཅ་ཅ་ནེ་ཧ་རུ་ཨ་མར་ར་ཧོ།།
ཇ་ཝ་ཧར་ལཱལ་ ནེཧ་རུ་ ཞེས་བཅོས་སོ།
ཇ་ཝ་ཧར་ལཱལ་ ནེཧ་རུ་ ལ་ཅ་ཅ་ནེཧ་རུ་ཞེས་བྱིས་པ་དག་དགའ་བཞིན་འབོད་དོ།།