བཀྲ་ཤིས་དོན་འགྲུབ།
__གླུ་མ་ཟླ་སྒྲོན་ལགས་ཀྱི་གླུ་གཞས་ཤིག་ལ་ཉན་རྗེས།
སྨུག་པ་བན་བུན་དང་འདྲ་བའི
ཆར་པ་ཟིམ་ཟིམ་དང་འདྲ་བའི
སྨྲ་མི་ཤེས་པའི་ཚོར་བ་ལང་ལིང་དུ་འཁུར་འོང་བའི་ཁྱོད་ཀྱི་གླུ་གཞས་དེས
ང་རང་སྤྲིན་གསེབ་དང་མཚོ་ཁར་ཁྲིད་པར་མ་ཟད
རེ་སྒུག་དང་བྲལ་གདུང་གི་མིག་ཟུང་གང་སར་གཏོད་དུ་བཇུག་མོད
ཁ་ཕྱོགས་མེད་པའི་བརྩེ་བ་འདི་ནི
དམིགས་ཡུལ་མེད་པའི་སྐྱོ་བ་ཞིག་ལས་ཅི་ཡང་རེད་མི་འདུག་པས
ང་རང་སྔར་བཞིན་སྟོང་འདང་གི་ཁྲོད་ན་ལུས་ཡོད
ཁེར་ལབ་རྒྱག་བཞིན་ལུས་ཡོད
དུང་བས་ཕྱུག་ཅིང་བརྩེ་བས་གཏམས་པའི་གླུ་སྐད་འཇེབས་པོ་དེས
ཁྱོད་ཀྱི་སྙིང་སྡུག་དེས་ཁྱོད་རང་བརྩེ་དུང་གི་ཞིང་ཁམས་སུ་འཁྲིད་ཚུལ་དང
ཁྱོད་ཀྱི་རྒྱལ་སྲས་དེར་ཁྱོད་རང་ཞེ་གཏིང་ནས་དགའ་ཚུལ་སོགས
མཐོན་པོར་བཏེགས་ཤིང་གཉོམ་པོར་བཀུག་དུས
ངས་གདུང་བ་ལུང་པ་གང་བྲང་ཁོག་ཏུ་བསྐྱིལ་ནས
སུས་ཀྱང་མི་མཐོང་ས་ནས
གཏམ་རྒྱུད་ཅིག་གི་འཁྲབ་ཚན་རེ་རེ་ལ་རོལ་དགོས་བྱུང་བ་ཡང
ཁྱོད་ཀྱི་གླུ་གཞས་དེས་བྱིན་པའི་སེམས་ཁྲལ་འཐོལ་པ་ཞིག་ཅི་ལ་མིན
ཁྱོད་ཀྱི་གླུ་གཞས་དེར་ཇི་ལྟར་ཉན་ཀྱང
ངས་རྩ་བ་ནས་གོ་མི་ཐུབ་པའི་ཆེས་ཐ་མའི་གླུ་ཚིག་དེས
བརྩེ་དུང་གི་གཏམ་རྒྱུད་དེའི་མཇུག་གཏན་ནས་འགྲིལ་དུ་མི་འཇུག་པས
ང་རང་ཕངས་སེམས་ཀྱིས་མནར་དྲགས་ཏེ
གཏན་ནས་གཉིད་ཁུག་ཏུ་འཇུག་གི་མི་འདུག་ལགས