གཏམ་མཐའ་མ།

རྭ་འཕྲིན། ༼ ཨ་རི ༽
 
ཐེངས་འདིའི་ཨ་རིའི་སྲིད་འཛིན་སྐོར་གྱི་གསར་འགྱུར་དག་རྫུན་གཉིས་ཀས་གནམ་ས་བཀབ་དང་འགེབ་བཞིན་པའི་སྐབས་འདིར། ཁོ་བོས་ཀྱང་ཐེངས་འདིའི་ཨ་རིའི་སྲིད་འཛིན་འོས་འདེམས་སྐོར་ལ་མཐའ་མཇུག་གི་སྐད་ཆ་ཁ་ཤས་བཤད་འདོད་བྱུང་།

སྤྱིར་འོས་འདེམས་འདིའི་སྐོར་ལ་སྐད་ཆ་བཤད་དགོས་ན། དང་པོ་ “Q” ཚོགས་ཁག་ཟེར་བ་འདི་དང་། “ Deep State “ ཟེར་བ་འདི་གཉིས་ངེས་པར་དུ་ཤེས་དགོས་སྙམ། གང་ཡིན་ཞེ་ན། ངས་སྔོན་མ་ནས་བཤད་མྱོང་ཡོད། ཐེངས་འདིའི་ཨ་རིའི་སྲིད་འཛིན་འོས་འདེམས་ནི། སྲིད་འཛིན་ཊོམ་ཕི་མཆོག་དང་ཧོན་ལོག་རྒྱའོ་བྷེ་ཌིན་གཉིས་ཀའི་སུ་སྲིད་འཛིན་ལ་སྡོད་ཐུབ་མིན་གཅིག་པུ་ཙམ་མ་ཡིན་པར། འཛམ་གླིང་ཡོངས་ཀྱི་འགྲོ་བ་མིའི་ཐོབ་ཐང་དང་རང་དབང་། དམངས་གཙོ། ཐ་ན་སྒེར་གྱི་བདེ་འཇགས་སོགས་ལ་དམ་པོར་འབྲེལ་བསྡད་ཡོད་པ་ཞིག་རེད། བོད་ཀྱི་གཏམ་དཔེ་ཞིག་ལ། རྒྱལ་པོའི་རྒྱལ་ས་མ་བདེ་ན། སྤྲང་པོའི་ཉལ་ས་མི་བདེ་ཞེས་པ་འདི་ལས་མ་མཆིས། མཐར་དེད་ན་གནད་དོན་འདིའི་རྒྱབ་ལྗོངས་ནི་་ “Q” ཚོགས་ཁག་དང་ “ Deep State “ གཏིང་རིམ་སྲིད་དབང་ཟེར་བ་འདི་གཉིས་དང་། བདེན་རྫུན་དང་དཀར་ནག་གི་གཡུལ་འགྱེད་ཅིག་རེད།

འོ་ན་”Q” ཚོགས་ཁག་ཟེར་བ་འདི་ཅི་ཞིག་རེད་ཅེ་ན། ལ་ལས་གང་ཟག་སྒེར་བ་ཞིག་རེད་ཟེར་མཁན་དང་། ཡང་ཁ་ཤས་ཀྱིས་གློག་ཀླད་ཅིག་ཡིན་པའི་བཤད་སྲོལ་འདྲ་མིན་སྣ་ཚོགས་མང་པོ་ཞིག་འདུག་མོད། ཁོ་བོས་བསམ་ན་ཨ་རིའི་ཆེས་མཐོའི་གསང་བའི་དམག་དོན་ཚོགས་ཁག་ཅིག་རེད་སྙམ། གལ་ཏེ་མི་སྒེར་བ་ཞིག་ལ་ནུས་པ་འདི་འདྲ་ཡོད་ན་སྲིད་འཛིན་ལ་ཁོ་རང་ལངས་ཏེ། ཨ་རི་དང་འཛམ་གླིང་གི་མི་མཐུན་ཕྱོགས་ཐམས་ཅད་ཕམ་པར་བརྒྱབ་ན་འགྲིག་མོད་དེ་མ་ཡིན་པ་གསལ་བོ་རེད། འོན་ཀྱང་མི་བུ་རྣམ་དཔྱོད་ཅན་ཉུང་ཤས་ཀྱིས་གྲུབ་པའི་ཚོགས་པ་ཞིག་ཡིན་ཤས་ཆེ། ཚོགས་ཁག་འདིའི་མིང་གཞན་ལ་” QAnon “ ཡང་ཟེར། གང་ལྟར་ཚོགས་པ་འདི་མཐའ་གཅིག་ཏུ་སྲིད་འཛིན་ཊོམ་ཕི་མཆོག་ལ་རྒྱབ་སྐྱོར་བྱེད་མཁན་ཞིག་ཡིན་ལ། ཐ་ན་ཉིས་སྟོང་བཅུ་དྲུག་ལོར་ཊོམ་ཕི་ཨ་རིའི་སྲིད་འཛིན་ལ་འདེམས་ཐོན་བྱུང་བ་ཡང་ཚོགས་པ་འདིས་རྒྱབ་སྐྱོར་བྱས་པ་ཉག་གཅིག་ལ་བརྟེན་ཏེ་བྱུང་བ་འདྲ། དེ་སྔ་ཚོགས་པ་འདིས་ནོར་བ་ཅི་ཡང་མེད་པའི་ཐོག་ནས་ཨ་རི་དང་འཛམ་བུ་གླིང་ལ་བྱུང་ཚར་བའི་དོན་རྐྱེན་མང་པོ་ཞིག་ལ་སྔོན་བརྡ་བརྒྱབ་ཟིན་ཡོད། མཐའ་མ་དེ་སྲིད་འཛིན་ཊོམ་ཕི་མཆོག་གི་Twitter དང་སྤྱི་ཚོགས་དྲ་ལམ་ཡོངས་རྫོགས་སྒོ་རྒྱག་རྒྱུ་ཡིན་པ་སོགས་དོན་ཚན་དྲུག་བཤད་པའང་དེ་བཞིན་དུ་བྱུང་ཟིན། གང་ལྟར་ད་སྐབས་ཚོགས་པ་འདི་དང་སྲིད་འཛིན་མཆོག་གི་གཙོས་རྒྱལ་གཅེས་ལྷག་བསམ་ཅན་གྱི་མི་བུ་མང་པོ་ཞིག་གི་སྤྱི་ཚོགས་དྲ་ལམ་ཚང་མ་བཀག་ཚར་ཡོད་པ་ཀུན་གྱིས་མཁྱེན་གསལ་ཡིན་པ་དེ་རེད།

འོ་ན་ “ Deep State “ གཏིང་རིམ་སྲིད་དབང་ཟེར་བ་འདི་ཡང་ཅི་ཞིག་རེད་དམ། འདི་ནི་འཛམ་གླིང་གི་འབྱོར་ལྡན་ཁྱིམ་རྒྱུད་ཁག་ཅིག་དང་། རྒྱལ་ཁབ་སྒེར་གཅོད་པ་ཁ་ཤས་ལས་གྲུབ་པའི་དཔུང་སྡེ་ཞིག་རེད་སྙམ། འབྱོར་ལྡན་པ་རྣམས་ཀྱིས་ཁོང་ཚོར་གང་ཡོད་པ་དེས་འདོད་པ་མ་ཚིམས་པར། འཛམ་གླིང་ཡོངས་སམ་གོ་ལ་ཟླུམ་པོའི་སྲིད་འབྱོར་རིག་གསུམ་ཁོང་ཚོའི་དབང་འོག་གམ། སྟངས་འཛིན་གྱི་ར་བའི་ནང་བཅུག་འདོད་པ་དེ་རེད། སྒེར་གཅོད་པ་རྣམས་ཀྱིས་རང་གི་དབང་ཆ་དེ་བློས་མ་ཐོང་བར་ཐབས་བརྒྱ་ཇུས་སྟོང་བཀོལ་ཏེ། འབྱོར་ལྡན་པ་དེ་ཚོ་དང་ཁྱི་སྤྱང་ངན་འབྲེལ་གྱིས་མུ་མཐུད་དུ་ཁོང་ཚོའི་དབང་ཤུགས་འཛིན་ཐབས་བྱེད་ཀྱི་ཡོད་ལ། མདོར་ན་ཁོ་ཚོ་ནི་ཁེ་ཕན་དོན་དོན་གཉེར་བ་ཁག་ཅིག་རེད་ལ། དེ་ལ་རུལ་སུངས་ཀྱང་ཟེར།

སྤྱིར་སྲིད་དབང་ཟེར་བ་འདི་ཆུ་ཕྲན་ནང་བཞིན་ཡིན་དགོས་པར་བཤད་སྲོལ་ཞིག་ཡོད་ལ། དེ་ནི་ཤིན་ཏུ་བདེན་པར་སྣང་སྟེ། དཔེར་ན། ཆུ་མོ་ཞིག་བཞུར་རྒྱུན་མ་ཆད་པར་མུ་མཐུད་དུ་འགྲོ་ཐུབ་ན་ད་གཟོད་དྭངས་ཤིང་གཙང་བ་ཞིག་ཡོང་ཐུབ་ལ། ཆུ་མོ་དེ་ས་ཁུལ་གཅིག་ཁོ་ནར་གནས་ཏེ་ཡུན་རིང་པོ་འགོར་ན་ཆུ་རྙོག་དང་། བཙོག་ཆུར་གྱུར་འགྲོ་བ་ཆོས་ཉིད་ཡིན་པ་ལྟར། དཔོན་པོ་གཅིག་གོ་གནས་གཅིག་ནས་སྡོད་རྒྱུ་མང་དྲགས་ན་མང་ཆེ་བ་རུལ་སུངས་སུ་གྱུར་འགྲོ་བ་ཡང་དེ་མཚུངས་རེད། དེའི་ཕྱིར་ཨ་རིའི་རུལ་སུངས་པ་དག་ལ་ Washington Swamp ཡང་ཟེར། གང་ལྟར་དཔུང་སྡེ་འདིས། ཨ་རིའི་རང་དབང་དང་། དམངས་གཙོ། ཁྲིམས་སྲོལ་བཅས་ནི་ཁོང་ཚོའི་བཀག་རྡོ་ཡིན་པར་མཐོང་ནས། གཡོ་བྱུས་ཀྱི་དྲ་རྒྱ་ཨ་རིའི་ཕྱོགས་བཞི་མཚམས་བརྒྱད་ལ་བཀྲམ་ཞིང། དམངས་གཙོ་ཚོགས་པ་གཙོ་བྱས་ཏེ། ཆེས་མཐོའི་ཁྲིམས་དཔོན་དང་། གྲོས་ཚོགས་གོང་འོག་གི་མཐོ་རིམ་མི་སྣ་མང་པོ་ཁོང་ཚོའི་དབང་འོག་ཏུ་བསྡུས་ཟིན་པ། སྐབས་འདིའི་སྲིད་འཛིན་འོས་འདེམས་ཀྱི་བརྒྱུད་རིམ་ཁྲོད་མིག་མཐོང་ལག་ཟིན་ཆགས་ཡོད།

“Q” ཚོགས་ཁག་དང་གཏིང་རིམ་སྲིད་དབང་གཉིས་ཀྱི་གཡུལ་འགྱེད་འདི་ཧ་ཅང་གི་གསང་བ་ཞིག་ཡིན་པ་མ་ཟད། རྒྱ་ཆེ་ལ་གཏིང་ཟབ་པའི་རྐྱེན་གྱིས་ང་ཚོས་དཀར་ནག་གི་དབྱེ་བ་བཀར་དུས་ཤིན་ཏུ་གཟབ་དགོས་པ་མ་ཟད། ཕྱི་ཚུལ་གྱི་རྣམ་འགྱུར་ཅི་རིགས་ལ་བརྟེན་ནས་སྡོམ་ཚིག་འཇོག་རྐྱང་བྱེད་ཐུབ་པ་ཞིག་གཏན་ནས་མིན་པར་འདོད། གཡུལ་འགྱེད་འདི་དོན་དངོས་སུ་ལོ་མང་པོའི་སྔོན་ནས་མགོ་བརྩམས་པ་ཞིག་རེད་ལ། ད་སྐབས་ནི་ཆེས་མཐའ་མཇུག་གི་རྒྱལ་ཕམ་དང་ཤི་གསོན་འཐབ་འཛིང་གི་རིམ་པར་སླེབས་ཡོད། འཐབ་འཛིང་འདི་ཨ་རིའི་ནང་ཁུལ་གཅིག་པུ་མ་ཡིན་པར། ཡུ་རོབ་ཀྱིས་གཙོ་བྱས་ཏེ་རྒྱལ་ཁབ་མང་པོ་ལ་འབྲེལ་བ་ཆགས་པས། དེ་རིང་ཁ་སང་ཡུ་རོབ་ཕྱོགས་ནས་མཐོ་རིམ་མང་པོས་གློ་བུར་དུ་གཅིག་རྗེས་གཉིས་མཐུད་ཀྱིས་རྩ་དགོངས་ཞུ་དོན་ཡང་འདི་དང་འབྲེལ་བ་ཟབ་མོ་ཡོད་པ་གསལ་བོ་རེད། ད་དུང་རྒྱལ་ས་ཝ་ཞིན་ཊོན་ལ་དམག་དཔུང་ཁྲི་གཉིས་ལྷག་སླེབས་པ་དེ། ཕྱི་ཚུལ་ལ་བདེ་འཇགས་ཀྱི་ཆེད་དུ་ཡིན་ཞེས་བཤད་ཀྱིན་ཡོད་མོད། དོན་གྱིས་རུལ་སུངས་པ་ཚང་མ་དུས་གཅིག་ཏུ་འཛིན་བཟུང་བྱ་རྒྱུའི་ཆེད་མ་ཡིན་པའི་ངེས་པ་མི་འདུག་སྙམ།

མཐའ་དོན། ཁོ་བོས་བསམ་པར། ཆེས་མཐའ་མཇུག་གི་གཡུལ་འགྱེད་འདི་ཐུང་ན་བདུན་ཕྲག་རེ་འགའ་དང་། རིང་ན་ཟླ་གསུམ་ནས་བཞི་ཡས་མས་འགོར་སྲིད་པས། སྤྱི་ཟླ་དང་པོའི་ཚེས་ཉི་ཤུའི་ཉིན་ཨ་རིའི་སྲིད་འཛིན་སུ་ཆགས་ཡོད་མེད་དེ་གལ་ཆེན་པོ་མ་རེད་བསམ། གང་ཡིན་ཞེ་ན་“Q” ཚོགས་ཁག་དང་གཏིང་རིམ་སྲིད་དབང་གཉིས་ཀྱི་གཡུལ་འགྱེད་དེ་ག་དུས་མཇུག་སྒྲིལ་ན། དེ་དུས་མ་གཏོགས་ཐག་གཅོད་དང་གྲུབ་འབྲས་ཐོབ་ཁག་པོ་རེད། གང་ལྟར་ང་ཚོའི་ཐད་ནས་རང་རང་གིས་གང་ནུས་ཀྱིས་བདེན་པ་ལ་ཡིད་ཆེས་དང་རྒྱབ་སྐྱོར་བྱ་རྒྱུ་ཧ་ཅང་གལ་ཆེན་པོར་མཐོང་ལ། དེ་དང་མཉམ་དུ་སོ་སོའི་བདེ་འཇགས་ལ་གཟབ་རྒྱུ་གལ་ཆེ། མཇུག་མཐར། རྗེས་ཕྱོགས་རང་དབང་གི་འཁོར་ཡུག་གསར་པ་ཞིག་ནས་མཇལ་བའི་རེ་བ་དང་སྨོན་མདུན་ཡོད། བདེན་པ་ཉིད་རྒྱལ་གྱུར་ཅིག ཨ་རི་རྒྱལ་ལོ།། བོད་རྒྱལ་ལོ།།

༢༠༢༡-༡-༡༦ ནམ་གུང་ཆུ་ཚོད་དང་པོར་མལ་ཁྲིའི་ཐོག་བྲིས་པ་དགེའོ།།