(སྐད་ཆའི་ཟུར་ཞིག་ལས་སྙན་ངག་པས་སྐད་ཆ་ལ་རྒྱན་སྤྲས་བྱེད་སྟངས་ཐད་ཀྱི་ལྟ་ཚུལ། )
འགར་ཚེ་རྒྱལ།
མི་སུ་ཞིག་ཡིན་ན་རང་ཉིད་ཀྱིས་ཡག་སྡུག་ཅི་ཞིག་བརྗོད་པའི་སྐད་ཆས་རང་འཚོ་གནས་ཀྱི་སྤྱི་ཚོགས་ཁྲོད་གོ་བརྡ་སྤྲོད་མ་ཐུབ་པ་ཡིན་ན། མི་དེ་ནི་གླེན་ལྐུག་ཅིག་གམ། ཡང་ན་མི་དེས་བཤད་པའི་སྐད་ཆ་ནི་གཏེར་སྒྲོམ་དུ་བཅུག་པའི་ཅ་དངོས་ལྟ་བུ་ཞིག་ལས་མ་འདས་སོ།།
སྔོན་དུ་གླེང༌བའི་དོན་གནད།
སྤྱིར་མིའི་རིགས་ཀྱི་སྐད་ཆ་ཇི་ལྟར་གྲུབ་སྟངས་ཀྱི་ཆ་ནས་བལྟས་ན་དེ་ནི་ཡུལ་དུས་ངེས་ཅན་ཞིག་སྟེ། མི་རྣམས་སྤྱི་ཚོགས་ཟེར་བའི་རྙོག་འཛིངས་ཅན་ཞིག་ཏུ་འཚོ་གསོན་དགོས་པའི་བརྒྱུད་རིམ་ལས་རང་ལུས་ལ་གྲི་ཡིས་གཙགས་ནའང་ཨ་ཚ་ཟེར་མི་ཤེས་པའི་གླེན་ལྐུག་ཅིག་ཏུ་སྡོད་མ་ཚུགས་པའི་རྩོལ་སྒྲུབ་ནུས་ཤུགས་ལ་བརྟེན་ནས། ད་གཟོད་ཕན་ཚུན་བར་ཤེས་རྟོགས་ཀྱི་གོ་བརྡ་སྤྲོད་ཐུབ་པའི་སྐད་ཆ་དེ་ཚུར་མངོན་ཞིང༌། རིམ་ཅན་དུ་མིའི་ཤོག་སྡེ་སོ་སོའི་སྤྱི་ཚོགས་འཕེལ་འགྱུར་དང་བསྟུན་གཏན་འཇགས་གཅིག་གྱུར་གྱི་སྒོ་ནས་མི་རིགས་གང་དེའི་འཚོ་བའི་དགོས་མཁོ་སྒྲུབ་པའི་ལག་ཆ་ལྟ་བུ་ཞིག་ཏུ་གྱུར་ཡོད་པས། སྐད་ཆ་ནི་མིའི་རིགས་ཀྱི་སྤྱི་ཚོགས་འཚོ་བའི་ཁྲོད་ནས་བཙོ་སྦྱངས་དང་ཐོན་སྐྱེད་བྱས་པ་ཞིག་རེད་ཟེར་ཆོག
དེ་ལ་སྐད་ཆ་ནི་མིའི་རིགས་ཀྱི་ངག་སྒོ་ལས་ཐོན་ཞིང་ཐོག་མ་ཉིད་ནས་མཛེས་སྤྲས་སྒྱུ་རྩལ་གྱིས་ཕྲ་རྒྱན་བཏབ་པ་ཞིག་མིན་པར། མིའི་རིགས་ཀྱི་འཚོ་གནས་ཚེ་སྲོག་དང་འབྲེལ་དུས་རབས་ངེས་ཅན་ཞིག་བརྒྱུད་འོང་མཐར། ངལ་རྩོལ་ལ་རོལ་བའི་མི་རྣམས་ཀྱིས་རང་ཉིད་ཀྱི་འཚོ་བའི་ཁྲོད་དགའ་སྡུག་སྐྱོ་གསུམ་གྱི་ཚོར་ཤེས་སྣ་ཚོགས་ཀྱི་ཀློང་ནས་སྐད་ཆ་ལ་རྒྱན་སྤྲས་བྱེད་མགོ་ཚུགས་ཤིང༌། དེ་ནི་སྤྱིར་བཏང་གི་སྐད་ཆའི་འགྲོས་དང་མི་མཚུངས་པར་ཁོ་ཚོའི་དགའ་བ་དང་སྐྱོ་བའི་ཚོར་འདུ་དངོས་ཀྱིས་བཏེགས་ཤིང༌། དབྱངས་རྟ་གཅིག་ཏུ་གྱེར་འགྲོས་ཀྱིས་མཛེས་བཟོ་དང་རྒྱན་སྤྲས་བྱས་པའི་སྐད་ཆ་ཞིག་སྟེ། མིའི་རིགས་ཀྱི་འཚོ་བའི་ཟབ་ན་ཉན་པར་སྤྲོ་ཞིང་སྒྱུ་རྩལ་གྱི་བྲོ་བ་འབུར་དུ་ཐོན་པའི་སྐད་ཆ་ཞིག་ཏུ་གྲུབ་ཡོད་སྟབས། ད་ཆ་ལོ་རྒྱུས་སྨྲ་བ་ཚོའི་ངོས་ནས་བཤད་ན་དེ་ནི་སྤྱི་ཚོགས་ཀྱི་འཕེལ་རིམ་ངེས་ཅན་ཞིག་ལས་མིའི་རིགས་ཀྱི་བསམ་བློའི་གོ་རྟོགས་ཀྱི་མཐོ་རླབས་ཤིག་ལ་ངོས་འཛིན་བྱེད་ཀྱིན་ཡོད་པ་དང༌། ཡང་རིག་གནས་སྨྲ་བ་ཚོའི་ངོས་ནས་བཤད་ན་མིའི་རིགས་ཀྱི་སྐད་ཆའམ་འཚོ་བའི་ཁྲོད་སྙན་ངག་གི་རྒྱུན་ཚུགས་པ་ལ་ངོས་འཛིན་བྱེད་ཀྱིན་ཡོད།
གང་ལྟར་ང་ཚོ་སྟེ་བོད་མི་རིགས་ལ་མཚོན་ནའང་སྐད་ཆ་ལ་རྒྱན་སྤྲས་བྱེད་པའི་རིམ་པ་ངེས་ཅན་ཞིག་བརྒྱུད་འོང་བ་ལོ་རྒྱུས་ལ་ཕྱིར་ལྟོས་ཀྱིས་ཤེས་རྟོགས་ཐུབ་པ་ཞིག་ཡིན། དེ་ལྟར་སྤྱི་ཚོགས་ཀྱི་གནས་རིམ་མང་པོ་ཞིག་བརྒྱུད་འོང་བའི་དེང་གི་དུས་སྐབས་འདིར། ང་ཚོའི་སྐད་ཆ་ནི་ཆེས་འཐུས་ཚང་ཞིག་ཏུ་གྱུར་ཏེ་སྐད་ཆའི་བརྡ་ཡི་གྲུབ་སྟངས། ཚིག་གི་འདོགས་སྟངས། དོན་གྱི་འགྲེལ་སྟངས། དབྱངས་ཀྱི་གྱེར་སྟངས་བཅས་གཏན་འཇགས་རང་བཞིན་དང༌། སྐད་ཆའི་གདངས་ལ་ཁྱབ་པའི་མཛེས་བཀོད་རྒྱན་སྤྲས་བྱེད་སྟངས་དེའང་སྒྱུ་རྩལ་སྒེག་འཕྱོར་གྱིས་ཕྱུགས་པའི་ཚད་དུ་སླེབས་ཡོད། ཡིན་ནའང༌། དེང་གི་སྐབས་ང་ཚོའི་སྐད་ཆའི་བབ་དང་བསྟུན་ཞིབ་ཏུ་བསམ་བློ་ཞིག་བཏང་ན། ང་ཚོའི་སྤྱི་ཚོགས་ནང་སྐད་ཆའི་ཁེབས་སྙོམས་སམ་ཁྱབ་ཚད་མཐོ་དམན་གྱི་ཡོ་གཟུར་ཡོད་པའི་གནས་རིམ་གཉིས་ན་རྒྱང་བཀྱེད་ཀྱིས་འཁོར་རྒྱུགས་བྱེད་ཀྱིན་པའི་སྣང་ཚུལ་ཞིག་མཐོང་འདུག་པས།། དེ་ནི་རིག་གནས་སློབ་པའི་ཤེས་ཡོན་པའི་སྡེ་དང་ཤེས་དམན་གྱི་ངལ་རྩོལ་མང་ཚོགས་གཉིས་ཀྱི་བར་གནས་གནད་དོན་ཅིག་སྟེ། དོན་དམ་དུ་བརྗོད་ན་ཤེས་ཡོན་པའང་ལྷག་པར་དུ་སྙན་ངག་པ་རྣམས་ཀྱིས་ངལ་རྩོལ་མང་ཚོགས་ཀྱི་འཚོ་བའི་ཁྲོད་ཐུན་མོང་སྤྱི་བཀོལ་གྱི་སྐད་ཆ་མང་པོ་ཞིག་ཚུར་བཏུས་ཤིང༌། ཁོ་ཚོས་དབྱངས་ལ་བཏེགས་ཏེ་སྐད་ཆ་ལ་མཛེས་རྟོག་གསར་གཏོད་ཀྱི་ཚུགས་ཀ་བཏོད་པའི་རྒྱན་སྤྲས་བྱེད་སྟངས་དེས་སྙན་ངག་ཏུ་བཏགས་པའི་སྐད་ཆ་མང་པོ་ཞིག་ངལ་རྩོལ་མང་ཚོགས་དང་འབྲེལ་འདྲེས་མི་ཐུབ་པར་གཏེར་སྒྲོམ་དུ་འཇུག་བཞིན་ཡོད་པ་དེ་རེད།
དེ་ནི་བོད་རང་གི་རིག་གནས་སྨྲ་བའི་མཐོ་རིམ་གྱི་གྲས་སུ་གཏོགས་ཤིང༌། མི་རིགས་རང་གི་སྐད་ཆར་མཛེས་སྤྲས་ཀྱིས་དབྱངས་ལ་གྱེར་བའི་སྙན་ངག་པའི་སྡེ་ན་མངོན་བཞིན་ཡོད་པའི་སྐྱོན་ཉེས་ཤིག་རེད། སྤྱིར་སྙན་ངག་པ་ཞིག་ཡིན་ན་སྐད་ཆ་ལ་རྒྱན་སྤྲས་ཀྱི་མཛེས་ཆ་སྤུད་རྒྱུ་དེ་ནི་ཁོ་རང་གིས་སྙན་ངག་འབྲི་ཐབས་ཀྱི་མཛེས་ཉམས་དང་སྒྱུ་རྩལ་གྱི་ཆ་ཞིག་ཡིན་པས། དེ་ནི་སྙན་ངག་སྨྲ་བ་ཞིག་ལ་ངེས་པ་དོན་གྱིས་ཚང་དགོས་པའམ་ཡོད་དགོས་པའི་ཆ་རྐྱེན་ནམ་ཁྱད་ཆོས་ཤིག་རེད། ཡིན་ནའང༌། ལ་ཤས་ཀྱིས་སྐད་ཆ་ལ་རྒྱན་སྤྲས་བྱེད་པར་སྒེར་གཤིས་ཚ་བོ་ཞིག་བཟུང་སྟེ། རང་ཉིད་ཀྱི་གང་ཞིག་བྲིས་པ་དེ་སྒམ་ཚུགས་ཀྱི་བཟོ་ལྟས་རང་ཉིད་ལས་བརྒལ་མི་ཐུབ་པའི་གཏེར་སྒྲོམ་ནང་འཇུག་བཞིན་ཡོད་པ་ནི་ཆེས་ནོར་འཁྲུལ་ཞིག་རེད།
ང་ཚོའི་དེང་རབས་སྙན་ངག་པ་ཞིག་གིས་ཁོ་བས་བྲིས་པའི་སྙན་ངག་གི་དོན་ནི་མ་འོངས་པར་མ་གཏོགས་སུས་ཀྱང་ཤེས་རྟོགས་མི་ཐུབ་པར་བརྗོད་པའི་སྐད་ཆ་ཞིག་ང་ཚོའི་སྤྱི་ཚོགས་ཁྲོད་ཡན་པོར་གནས་ཡོད་པས། དེ་ཡང་དོན་དུ་ཚུལ་འདི་བཞིན་གྱིས་རང་གི་སྙན་ངག་དེ་གཞན་ལས་ཐུན་མོང་མ་ཡིན་པ་ཞིག་གམ་སྒམ་ཚུགས་ཟབ་བརླིང་གི་རྒྱན་སྤྲས་བྱེད་སྟངས་ཀྱི་བློ་རྟོག་དེ་ལས་འདའ་མ་ཐུབ་པ་རེད།
རྒྱུ་མཚན་དེ་བཞིན་དེང་སྐབས་ང་ཚོའི་གསར་བྱུང་སྙན་ངག་པ་རྣམས་ཀྱི་ཁྲོད་དུའང་ཆེས་སྤྱིར་བཏང་མ་ཡིན་པའི་ཟོལ་བཅོས་ཀྱི་ལྟ་བ་རེ་འཛིན་སྟངས་ཀྱི་ཞོར་ནས། རང་ཉིད་ཀྱིས་གསར་བཞེངས་བྱས་པའི་སྙན་ངག་དེ་རྡོ་ཡིས་བཀབ་པ་ལྟར་གྱི་རྒྱན་སྤྲས་བྱེད་སྟངས་དེས་ནི། རང་ཉིད་ཀྱིས་སྤྱི་ཚོགས་འཚོ་བའི་ནང་རེ་རེ་བཞིན་བཏུས་ཤིང་གསོག་འཇོག་བྱས་པའི་སྐད་ཆ་མང་པོ་ཞིག་གཟེས་ནས་ངལ་རྩོལ་མང་ཚོགས་དང་འབྲེལ་འདྲེས་བཙན་གྱིས་བཅད་དེ་གཏེར་སྒྲོམ་ནང་བཅུག་བཞག་པ་རེད།
སྙན་ངག་པའི་སྐད་ཆའམ་རྒྱན་སྤྲས་བྱས་པའི་སྐད་ཆ་དེ་དག་ནི་རིག་གནས་ཀྱི་ཆུ་ཚད་ཞན་པའི་དམའ་རིམ་ངལ་རྩོལ་མང་ཚོགས་ལས་ཚུར་བཏུས་ཤིང༌། སྦྱོར་སྡེབ་དང་དབྱངས་འགྲོས་སོགས་རྒྱན་སྤྲས་བྱས་མཚམས་ནས་རྩོམ་པ་པོའམ་སྙན་ངག་པ་ཁོ་ནར་དབང་ཞིང་ཁྱབ་ཚད་དེ་ལས་ཁོངས་རྒྱ་བསྐྱེད་མ་ཐུབ་པ་ཡིན་ན། སྤྱི་ལ་ཁྱབ་པའི་ཤོད་སྲོལ་ཞིག་སྟེ། རྩོམ་པ་པོའམ་སྙན་ངག་པ་ནི་༼མི་མང་གི་མགྲིན་ཚབ་པ་ཡིན་༽ཟེར་བའི་སྐད་ཆ་ཞིག་ཡོད་པ་དེ་ཡང་གནས་ལུགས་མེད་ཅིང༌། ཚད་ཐུབ་མིན་པའི་སྒྲོ་བཏགས་ཀྱི་སྐད་ཆ་བདག་མེད་ཅིག་ཏུ་གྱུར་སོང་བ་མ་ཡིན་ནམ།
ཚུལ་དེ་ལ་མོས་གོམས་ཀྱིས་སྙན་ངག་འབྲི་མཁན་ཞིག་ཡིན་ན་རང་ཉིད་ཀྱིས་རྒྱན་སྤྲས་བྱས་པའི་སྐད་ཆ་དེ་གསེག་དང་འཕྲེད། གྱེན་དང་ཐུར། གོ་ལྡོག་ལྟ་བུའི་ངང་ཚུལ་གང་འདྲ་ཞིག་ཏུ་བྲིས་ཡོད་ཀྱང༌། རང་ཉིད་ཀྱི་སྣང་ངོར་གཟེས་ནས་འབབ་ས་ཞིག་ཡོད་པ་དེར་དམིགས་གཏད་ཀྱིས་ལུགས་ལྡོག་ལྟ་བུའི་འགྲེལ་བཤད་རེ་རྒྱག་ཏུ་ཡོད་ནའང༌། རང་ཉིད་ཁོ་ནར་རྟོག་བཟོས་ཀྱི་མྱོང་སྣང་ཚོར་རྟོགས་དེ་ལས་བརྒལ་མ་ཐུབ་པ་ཡིན་ན། སྐད་ཆ་དེ་སྤྱི་ཚོགས་ཁྲོད་མར་ཁྱབ་སྤེལ་བྱས་ཀྱང་གཞན་སུ་ཞིག་ལ་དགོས་མཁོ་མེད་པའི་ཅ་དངོས་ཤིག་དང་མཚུངས་པར་ཟུར་ཞིག་ཏུ་གཡུགས་འཇོག་པ་རེད། དེ་བས་རང་ཉིད་ཀྱིས་རྡོ་བ་ལྟར་བཙན་གྱིས་རྒྱན་སྤྲས་བྱས་པའི་སྐད་ཆ་དེ་དག་རང་ཉིད་ཀྱིས་གཏེར་སྒྲོམ་ནང་བཅུག་བཞག་པ་དང་གཅིག་མཚུངས་རེད་ཟེར་བ་ཡིན།
གཞན་ཡང་ཚུལ་འདི་བཞིན་གྱིས་རྒྱན་སྤྲས་བྱས་པའི་སྐད་ཆའམ་སྙན་ངག་ལ་དོན་དུ་ང་ཚོ་སྙན་ངག་པ་ཡིན་ཟེར་མཁན་ཚོའི་ཁྲོད་དུ་ཚོར་ཤེས་ཀྱིས་དྲངས་ཏེ་རོལ་མྱོང་གཏིང་གསལ་ཞིག་བྱེད་ཐུབ་ཀྱི་ཡོད་མེད་གང་ལྟར། མང་པོ་ཞིག་གིས་མྱོང་རྟོགས་བྱས་ཡོད་མདོག་གིས་བྲོ་བ་ཚད་ཐུབ་ཅིག་གིས་སིམ་ནས་འདུག་ཅེས་འུར་སྒྲོགས་ཀྱི་ཆོ་ལོ་སྩོལ་བའི་སྲོལ་ཞིག་ཆེ་ཆུང་མེད་པར་ཁྱབ་འདུག་མོད། འོན་ཀྱང་ཁ་བཤད་ཙམ་ལས་རྒྱན་སྤྲས་བྱས་པའི་སྐད་ཆ་དེའི་ཁྱད་ཡོན་དང་སྒྱུ་རྩལ་མཚོན་ཐབས་བཅས་ཀྱི་རིན་ཐང་འབུར་འདོན་གྱིས་༼ཕྲན་དཔྱད་༽དམ་མྱོང་ཚོར་གྱི་སྐད་ཆ་རྒྱས་འབྲི་བྱེད་མཁན་ནི་གཅིག་ཀྱང་མེད་པ་དེ་ཡང་སྙན་ངག་པ་ཡིན་ཟེར་མཁན་ཚོའི་ཁྲོད་ཀྱི་གནད་དོན་ཞིག་ཏུ་སེམས་སོ།།
མཐའ་དོན་སྤྱི་རྡོག་ཏུ་བཤད་ན་འགན་འཁྲི་ཡོད་པའམ་མི་མང་གི་མགྲིན་ཚབ་པ་ལྟ་བུའི་སྙན་ངག་པ་ཞིག་བྱེད་རྒྱུ་དེ་རེད། དེ་ལྟར་བྱེད་ན་རང་ཉིད་དང་རང་ཉིད་ཀྱིས་རྒྱན་སྤྲས་བྱས་པའི་སྐད་ཆའམ་སྙན་ངག་དེ་མགོ་བཙུགས་པ་ནས་སྒམ་བརླིང་གི་བཟོ་ལྟ་བཏོད་སྟངས་དེས་སུས་ཀྱང་མི་ཚོར་བའི་གཏེར་སྒྲོམ་དུ་མ་བཅུག་པར། ཀུན་ལ་ཁྱབ་མཉམ་གྱི་དབྱངས་འགྲོས་སྙོམས་པོ་ཞིག་གིས་ངལ་རྩོལ་མང་ཚོགས་དང་བར་ཐག་ཉེ་ཞིང་འབྲེལ་ལམ་ཟབ་པའི་སྒོ་ནས། ཁོར་ཡུག་གི་ཁྱབ་རྒྱ་ཆེ་རུ་གཏོང་ཐབས་ལ་ཚང་མས་བསམ་བློ་གཏོང་དགོས་པ་ཞིག་རེད་ཅེས་རང་ཉིད་ཀྱི་ལྟ་ཚུལ་ཙམ་ཞིག་གླེང་བ་ཡིན་ལགས།