གནས་ཚུལ་མཁོ་སྤྲོད་པ། ཀླུ་རྒྱལ་དོན་འགྲུབ།
དབུས་བོད་མིའི་སྒྲིག་འཛུགས་ཀྱིས་པན་ཆེན་སྐུ་ཕྲེང་བཅུ་གཅིག་པ་རྒྱ་ནག་གི་བཙོན་དུ་བཅུག་པའི་ཉིན་མོར་བོད་མི་གནས་སྡོད་བྱེད་སའི་རྒྱལ་ཁབ་ཚང་མར་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་དགོས་པར་བཀའ་གནང་བ་བཞིན། སུད་སིའི་བོད་རིགས་ཚོགས་པའི་ངོས་ནས་གོ་སྒྲིག་གིས་དེ་རིང་ས་གནས་ཀྱི་ཆུ་ཚོད་དྲུག་པའི་ཐོག་བོད་མི་ཉིས་བརྒྱ་ཡར་མར་ཞིག་མཉམ་འཛོམས་ཀྱིས་རྒྱ་གཞུང་ལ་ངོ་རྒོལ་ཁྲོམ་སྐོར་བྱས།
དང་ཐོག་སུད་སིའི་བོད་རིགས་ཚོགས་པའི་ཚོགས་གཞོན་བསམ་པ་དོན་འགྲུབ་ཀྱིས་དེར་འདུས་ཀྱི་མི་མང་ལ་མཚམས་འདྲི་དང་འབྲེལ་ལས་འགུལ་འདི་སྤེལ་དགོས་པའི་དམིགས་ཡུལ་དང་དགོས་པ་རྒྱུ་མཚན། དབུས་བོད་མིའི་སྒྲིག་འཛུགས་ཀྱི་བཀའ་ཁྱབ་གནང་པའི་བརྒྱུད་རིམ་སོགས་ངོ་སྤྲོད་གནང་བ་རྗེས་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་རྣམས་ཀྱིས་རང་ཉིད་ཀྱི་ཚོགས་པའི་ཚབ་མཚོན་གྱི་གཏམ་བཤད་གནང་སོང་། མཐར་ས་གནས་སྲིད་གཞུང་གིས་མཆོག་མཆན་ཐོབ་པའི་ས་གནས་burckliplazt ནས་རྒྱ་མའི་གཞུང་ཚབ་བར་དུ་འབོད་སྒྲ་གཅིག་གི་འོག་ཏུ་སྐད་འབོད་བྱས་སོང་།
དེ་རྗེས་བོད་དོན་དྲིལ་བསྒྲགས་ཆེད་རྐང་འཁོར་བསྐོར་སྐྱོད་བྱེད་མཁན་རིན་པོ་ལགས་དེ་རིང་ས་གནས་དེར་ཆེད་ཕེབས་སྐབས་ཚོགས་གཞོན་མཆོག་ནས་འཚམས་འདྲི་དང་། རིན་པོ་ལགས་སུ་སྐར་མ་ལྔའི་རིང་མི་མང་ལ་གཏམ་བཤད་བྱེད་རྒྱའི་གོ་སྐབས་བྱུང་བར་ཁོང་གིས་སྔོན་མ་ཨ་རིའི་ནང་གི་མངའ་སྡེ་ཁ་ཤས་སུ་བོད་དོན་དྲིལ་བསྒྲགས་ཆེད་རྐང་འཁོར་བསྐོར་སྐྱོད་ཀྱི་ལས་འགུལ་ཐེངས་ཁ་ཤས་སོང་བའི་མྱོང་ཚོར་དང་། བོད་མི་ཞིག་གི་ངོས་ནས་བོད་དོན་ཐད་འགན་ཞིག་ལེན་གིན་ཡོད་པ། གཞན་ད་རུང་དེར་འདུས་ཀྱི་བོད་པ་རྣམས་གཙོའི་ཕྱི་སྡོད་བོད་མི་སྤུན་ཟླ་རྣམས་ལ་བོད་པ་ཞིག་ཡིན་ཕྱིན་རང་ཉིད་ཀྱིས་འགན་ཞིག་ལེན་དགོས་པའི་འབོད་སྐུལ་ཡང་གནང་སོང་།
མཐར་རི་ཀོན་དགོན་གྱི་མཁན་རིན་པོ་ཆེས་དབུ་མཛད་ནས་ཚད་མེད་ཡོན་ཏན་དང་རྒྱལ་བའི་གསོལ་འདེབས་གནང་རྗེས་སུད་སིའི་བོད་ཀྱི་ཟློས་གར་ནས་བོད་ཆེན་མོའི་རྒྱལ་གླུའི་དབྱངས་རྟའི་ཁྲོད་ལས་འགུལ་མཇུག་བསྡུས།