གནམ་གྱི་མིག་ལམ་ན།

(དུས་ནི་མི་འགྱུར་མི་རྣམས་འགྱུར་བ་ཡིན།)

ཉི་མ་འཚོ།

“ཁྱེད་གཉིས་བཟའ་ཚང་ཡིན་པའི་དཔང་རྟགས་འདྲ་བསྟན་རྒྱུ་ཡོད་དམ།”
གཞུང་ཚབ་ཀྱི་ལས་བྱེད་དེའི་སྐད་ཆ་གོ་མ་ཐག བློ་བཟང་འཚབ་འཚུབ་ཏུ་གྱུར་བ་དང་ཟུར་མིག་གིས་ལས་བྱེད་དེར་ལྟ་བཞིན་རང་གི་སྲིང་མོའི་མ་ནེ་ལ་འཇུས་ནས་མཆུ་འདབ་སྦྱར། ལས་བྱེད་དེའི་ངོ་གདོང་ལས་ཡིད་ཆེས་སོང་བསམ་བསམ་གྱི་རྣམ་འགྱུར་གང་ཡང་མ་མངོན་པས། ཁོ་དེ་བས་འཚབ་འཚུབ་ཏུ་གྱུར་ནས་སྲིང་མོའི་མཆུ་ཏོ་ཤུགས་ཀྱིས་འཇིབ་འགོ་བརྩམས། བློ་ཡིད་ལས་འདས་པ་ཞིག་ལ་སྲིང་མོའི་ངོ་གདོང་དམར་ནག་ཏུ་གྱུར་ཏེ་ཕྱི་ལ་བྲོས་སོང་། སྐད་ཅིག་མའི་དུས་ཚོད་དེའི་ནང་ཁ་སང་རང་འགོ་བཙུགས་པ་ལྟ་བའི་བྱས་ཇུས་གང་མང་ཞིག་འཚང་ཁ་ཤིག་ཤིག་གིས་བློ་བཟང་གི་ཀླད་པ་རུ་འཛུལ་འོང་། “ཕུ་བོ་ཁྱེད་ཀྱིས་ང་ངེས་པར་དུ་ཨ་རི་ལ་ལེན་ཐབས་བྱོས།” “སེམས་ལ་བཟུང་ཡོད། གོ་སྐབས་ཡག་པོ་ཞིག་ལ་སྒུགས།” “གོ་སྐབས་དང་གོ་སྐབས་ཟེར་ནས་ང་རྒས་འགྲོ་གི་འདུག ལོ་ལོན་རྗེས་ཨ་རིར་སླེབས་ནའང་རིན་ཐང་མེད་ཀི” “ཤེས་སོང་། ཕུ་བོས་གང་མགྱོགས་ཐབས་ཤེས་བྱ་ངེས། ད་ལས་ཀར་འགྲོ་རན་སོང་། ” བློ་བཟང་གིས་གློག་ཀླད་ཀྱི་ཁ་ཕྱེས་མ་ཐག་སྲིང་མོས་བསྐུར་ཡོང་བའི་སྐད་ཆ་རྙིང་བ་དེ་ཡང་བསྐྱར་སླེབས་སོང་། སྲིང་མོས་ནམ་རྒྱུན་བཞིན་ཨུ་ཚུགས་བྱས་པས་བློ་བཟང་གིས་སུན་སྣང་ལྟ་བུའི་སྐད་ཆ་ཞིག་གིས་མཇུག་བསྡུས་སོང་མོད། “ལོ་ལོན་རྗེས་ཨ་རིར་སླེབས་ནའང་རིན་ཐང་མེད་ཀི སྲིང་མོིའི་སྐད་ཆར་གནས་ལུགས་མེད་པ་གཏན་ནས་མ་རེད། ” ལས་ཀར་འགྲོ་བའི་ལམ་ཁ་ནས་ཁོས་བསམ་བློ་གཏོང་བཞིན་ཆིག་ལབ་ཤོར།

༢

“ཟླ་བ་ཡིན་ནམ། ”
“ཡིན།”
“ང་ཁྱེད་ལ་འདྲི་རྒྱུ་ཞིག་ཡོད།”
“དྲིས་དང་།”
“ཁྱེད་ཀྱིས་སྲིང་མོ་ཨ་རི་འཐེན་པའི་བརྒྱུད་རིམ་དེ་ང་ལ་ཡང་བསྐྱར་ཐེངས་ཤིག་ཤོད།”
“ག་རེ། ཤི་དགོས་རུང་སྲིང་མོ་དང་གཉེན་སྒྲིག་མི་བྱེད་ཟེར་བ་བརྗེད་སོང་བ་རེད་དམ། དེ་རིང་ཁ་པར་གཏོང་རྒྱུར་ངོ་མི་ཚའམ། ཧཧཧཧ”
“མ་རེད། ཨ་་་་་མ་རེད། ད་ཐབས་ཤེས་དེ་ལས་མི་འདུག གྲོགས་པོ།”

༣

“ཕུ་བོ་ཁྱེད་ཀྱིས་ང་ངེས་པར་དུ་ཨ་རི་ལ་ལེན་ཐབས་བྱོས།”
“ཨུམ་་་་། ངས་ལྟ་ཡ།”
“ད་ངས་སྒུག་ཐུབ་ཀྱི་མི་འདུག”
“སྲིང་མོ། ཐབས་ཤེས་གཅིག་འདུག”
“ཤོད་དང་།”
“ཁྱོད་དང་ངེད་གཉིོས་་་་་་་་་་་།”
“ཕུ་བོ་ཤོད་དང་།”
“ངེད་གཉིས་གཉེན་སྒྲིག་བྱས་ན་ད་གཟོད་འཐེན་ཐུབ།”
“གཉེན་སྒྲིག་་་་་་་་།”
“རེད། གཉེན་སྒྲིག་གི་ཡིག་ཆ་ཐོག་ཡོང་ན་ད་གཟོད་སྒོར་མོའི་འགྲོ་སོང་མང་པོ་མེད་ལ། སྟབས་བདེའང་རེད།”
“གཉེན་སྒྲིག་་་་་་་་་་་་།”
“རེད། སྲིང་མོ། ཡོང་འདོད་ན་ཐབས་ཤེས་དེ་ལས་མི་འདུག ད་ང་ལས་ཀར་འགྲོ་རན་སོང་།”
བློ་བཟང་གིས་འཚབ་འཚུབ་ངང་གློག་ཀླད་སྒོ་བརྒྱབ་རྗེས་རང་གི་སྙིང་གི་འཕར་ལྡིང་ལ་ཉན།

༤
“སྔ་དྲོ་བདེ་ལེགས།”
“ཁ་ཡག་མ་བཤད། དེ་ལས་ཐབས་ཤེས་དེ་ག་འདྲ་འདུག་ཤོད་དང་།”
“ཕུ་བོ་དང་གཉེན་སྒྲིག་ན་ངའི་་་་་་་་་་་། ངའི་དགའ་རོགས་ལ་ཇི་ལྟར་བཤད་དགོས།”
“དེར་སྐྱོན་མེད། གཉེན་སྒྲིག་རྫུན་མ་རེད་མོད།”
“གཉེན་སྒྲིག་རྫུན་མ་་་་་་་།”
“རེད། ལོ་ཁ་ཤས་ཀྱི་རྗེས་ནས་འཐོར་ཆོག་གི་རེད། དེ་ནས་་་་་་་་་་་་་།”
“ད་ཤེས་སོང་། ང་འཐད་པ་ཡིན།”
“ཡ་ཤེས་སོང་། ད་ཕུ་བོ་ལས་ཀར་འགྲོ་རན་སོང་།”
བློ་བཟང་གཞི་ནས་ལྷོད་ལ་བབ་སོང་། གློག་ཀླད་ཀྱི་སྒོ་བརྒྱབ་མ་ཐག སྔོན་མ་ནས་ཡོད་པའི་ན་ཚ་ཞིག་སང་དྲགས་སུ་སོང་བ་བཞིན་ལྷོད་ལ་བབ་སོང་།

༥
བློ་བཟང་རྨི་ལམ་ལྟ་བུའི་བསམ་གཞིགས་དེ་ལས་སད་མ་ཐག ཤུགས་རིང་ཞིག་བཏོན་རྗེས་ངོ་གདོང་གི་རྔུལ་ཆུ་ཕྱི་བཞིན་གཞུང་ཚབ་ཕྱི་ལ་རྒྱུགས་སོང་།