མགར་འཇམ་དབྱངས།
མེར་གྱིས་ལྟེམས་པའི་རྒྱ་མཚོར་སྔོན་མོར་འཐིམ་ལ་ཉེ་བའི་གྲུ་ཆུང་ཞིག །
ལོ་དང་ཟླ་བར་ཞག་དང་ཉི་མར་རེ་བའི་ངོ་གདོང་སྐམ་ཅིང་རིད། །
དྲག་ཏུ་འཕྱོ་བའི་རླབས་དང་བསྟུན་པའི་སྙིང་གི་འཕར་རྩ་རྟབ་པོར་གྱུར། །
མིག་མདངས་ལྷག་མའི་ཕམ་ཉེས་ཁྲོད་དུ་རྒྱང་མཐའི་ས་མཚམས་རབ་རིབ་ཅིག །
སྨྱུ་གུའི་རྩེ་རུ་དྲོད་ཐིགས་སྨིན་པའི་དབུལ་བོའི་ཚོགས་ཤིག་འཁོན་ཅིང་རྩོད། །
ཆང་དང་བུ་མོའི་འཕོངས་ཚོར་དུངས་པའི་སྐུ་ངོ་རྒྱག་པ་གཉིད་དུ་ཡུར། །
འཆི་བདག་འཇིགས་པོས་གདན་ཞུ་འབྱོར་བའི་ཨ་མ་རྒན་མོ་རེ་བ་བྲལ། །
ཉོག་ཏུ་སོང་བའི་མེས་པོའི་ཁྱིམ་གཞིར་མི་རྐང་ཤོར་བའི་ཚོར་སྣང་སྟེར། །
ཚུལ་འཆོས་འཐུག་པོས་ཧྲིལ་གྱིས་བསྡམས་པའི་མཐོ་སྒང་གྲོང་ཚོ་འཇིགས་ཤིང་ཡེར། །
ངོ་གདོང་དྲེད་པོའི་དཔུང་གི་ཚོགས་ཤིག་གཡག་རོག་འགྲོས་ཀྱི་ངོམ་སོ་བྱེད། །
བདེ་ཐང་མིན་པའི་སྐད་ཆ་སྦོམ་པོས་མཁའ་དབུགས་གཙང་མའི་རྒྱུ་བ་གཅོད། །
སྦམ་མདོག་ཤོར་བའི་མི་རྐྱང་རེ་གཉིས་ཉི་ཤེལ་འོག་ཏུ་ལྐོག་ལྟར་བྲེལ། །
ཆེན་པོའི་ཚོགས་ཀྱིས་ཁ་ཕོ་ཞིག་གིས་ཧེ་བག་ཤོར་བའི་མི་ཞིག་བཟོས། །
གནམ་དང་ས་ཡི་ཚད་ཐིག་བར་དུ་དྲང་སྙོམས་མིན་པའི་མགོ་འཕང་མཐོང་། །
ཕཌ་སྒྲ་རྫིག་པོས་རྒྱུ་ཆེན་བཟོས་པའི་འཁོར་དང་ཟ་ཟའི་རོལ་རྩེད་མང་། །
ཚིགས་ཐུབ་མིན་པའི་དད་འདུན་མོག་པོར་གས་ཆག་གཏོང་བའི་ཆོམ་པོ་མང་། །
ནམ་ཟླ་རྩུབ་པོར་ཡུན་རིང་བཀྱེས་པའི་སྦྲ་རྒན་ནག་པོ་རྒས་ཤིང་འཁོགས། །
པགས་རྩག་འཐུག་པོའི་ཚི་དྲེག་བར་ན་ཡོད་ཚད་གཏམས་པའི་ཆོག་ཤེས་ཤིག །
ནོར་གནག་རྗེས་ཀྱི་ལྕི་འདམ་ཁྲོད་དུ་ཀྰ་ལའི་ཚེ་སྲོག་འཇིགས་པས་བྲེལ། །
སྒོ་ཁྱི་བཙན་པོས་ལུང་སྟོང་སྐྱོམ་པའི་གདོད་མའི་རྣམ་པ་བརྟན་ཅིང་ལྷིང་། །
འཇིགས་རུང་སྤྲིན་པའི་འཕག་འཚག་ཅིག་གིས་ཟླ་བའི་འོད་མདངས་མོག་པོར་བཏང་། །
ཁུ་སིམ་མཚན་མོའི་ལྷིང་འཇགས་དཀྲོག་པའི་མྱོས་གླུ་ཐན་ཐུན་རྣ་བར་གཟན། །
རྨི་ལམ་མཛའ་མོར་རེ་བཞག་བོར་བའི་གླལ་རྒྱིང་རིང་བོ་བསྟུད་མར་ཤོར། །
ཆེན་པོ་མལ་ཁྲིའི་སྒང་གི་མི་ལ་མཚན་ཐུན་གཅིག་གི་གོད་ཆག་ཅིག །