ནམ་མཁའ་ནས།
ཀུན་གྱིས་སྨོན་པའི་སྡུག་བསྔལ་མེད་པའི་ཞིང་།།
ཞིང་གི་མཆོག་གྱུར་དགའ་བ་ལྡན་པའི་ཡུལ།།
ཡུལ་དེར་བགྲོད་ལ་སྒྲིབས་གཉིས་སྤངས་བའི་ཐབས།།
ཐབས་ཤེས་ཟུང་ལྡན་མཆོག་ལ་སྙིང་ནས་འདུད།།
ཤྰཀྱའི་བརྟུལ་ཞུགས་མིང་ཅན་སྤྲུལ་སྐུ་ཚོས།།
ཐུབ་པའི་གསུང་གི་ཆོས་ཀྱི་དྭངས་མ་ལ།།
རྫུན་མའི་གཏམ་གྱིས་རྙོག་མར་མ་བཏང་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
སྲིད་ཀྱི་གྲོས་ལ་ཞུགས་པའི་གཡོ་ཅན་ཚོས།།
དམངས་ཀྱི་བདེ་སྡུག་ཅི་བྱུང་མེ་ལོང་ལ།།
གཡོ་སྒྱུ་རྡུལ་གྱིས་ཡོངས་སུ་མ་གཡོགས་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
ངུར་སྨྲིགས་གོས་ཀྱིས་གཡོགས་པའི་གྲྭ་བཙུན་ཚོས།།
འཚེ་བ་སྤངས་ཕྱིར་བཅོས་བའི་འདུལ་བའི་ཁྲིམས།།
མངོན་ལྐོག་གཉིས་སུ་མི་བྱེད་ལེགས་བསྡམས་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
རང་ཉིད་མཁས་བར་རློམ་པའི་སྨྱུག་ཐོག་ཚོས།།
མི་མཐོང་སེམས་ཀྱི་ཕྲག་དོག་སྦར་མོ་ཡིས།།
རང་གི་རིགས་ཀྱི་གདོང་པ་མ་རལ་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
རང་གི་རིགས་ལ་འཁྲུངས་བའི་ན་གཞོན་ཚོས།།
གང་ཞིག་ཤེས་བ་སྟོན་པའི་ང་རྒྱལ་གྱིས།།
ར་མ་ལུག་གི་སྐད་རིགས་མ་བཤད་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
རང་བཞིན་ཡང་བའི་གངས་རིའི་མ་སྲུ་ཚོས།།
མཛེས་བའི་སྒེགས་ཉམས་ཕྱི་རུ་སྟོན་པའི་སླད།།
ཡ་མ་ཟུང་གི་ཆ་ལུགས་མ་མཛད་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
ཁྱིམ་གྱི་རྒན་པོ་སྐྱོངས་བའི་མནའ་མ་ཚོས།།
དྲིན་དང་རྒས་བའི་སྡུག་བསྔལ་མ་ཤེས་བར།།
ཁྱིམ་གྱི་རྒན་པོར་སྡུག་གི་མཆི་མ་མ་སྦྱིན་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
ཕྱི་རུ་འཁྱམས་པའི་གངས་ཅན་ཕོ་མོ་ཚོས།།
མི་མཐུན་སེམས་ཀྱི་ཚིག་གི་མཚོན་ཆ་འདིས།།
ཆོལ་གསུམ་སྤུན་ལ་རྨ་ཁ་མ་བྱས་ཚེ།།
འདི་ནི་གནམ་ལོ་གསར་བའི་ལག་རྟགས་ཡིན།།
མདོར་ན་སྲོག་ལྡན་གང་ཞིག་འཚོ་བའི་འཇིག་རྟེན་འདིར།།
མིས་བཟོས་མཚོན་གྱིས་སྦྱིན་པའི་མི་འདོད་འཇིགས་པ་དང་།།
སྣོད་བཅུད་གང་ཡིན་འཇིག་པའི་འབྱུང་བཞི་མི་འཁྲུགས་པའི།།
སེམས་ཀྱི་ལག་རྟགས་འདི་ནི་ཡོ་རུབ་གླིང་ནས་ཕུལ།།