གངས་རིའི་ཉི་མ། ཨེ་མི་ཏྲི་གཙུག་ལག་སློབ་ཆེན།(Amity University)
སྟོན་མཇུག་གི་གུང་གསེང་སླེབས་བྱུང་།
རྒྱ་གར་གྱི་སློབ་གྲོགས་ཚོ་རང་ཁྱིམ་དུ་ལོག
སྤང་ཐང་དང་ལྗོན་ཤིང་གསེབ་ན་འགྱིངས་བའི་ཨེ་མི་ཏྲི་གཙུག་ལག་སློབ་ཆེན་ང་དང་མཉམ་ཁེར་རྐྱང་དུ་ལྷག
ལྷིང་འཇགས་དང་དལ་རླུང་བསིལ་པོ་དེ།
ངེད་གཉིས་ཀྱི་འདུག་རོགས་ཡིན་ནམ།
དཔེ་མཛོད་ཀྱི་སྒོ་ཕྱེ་ནས་ཡུན་རིང་འགོར་སོང་།
ནམ་རྒྱུན་ལྟར་གློག་སྒྲོན་ཁྲ་ཆིལ་ཆིལ་དེས།
སུ་ཞིག་ཕེབས་པར་བསུ་མ་གནང་གི་ཡོད་པར་འདོད།
དཔེ་མཛོད་དོ་དམ་པ་དང་ལས་རོགས།
ཞབས་ཞུ་བ་དང་སྒོ་སྲུང་ཚོས་ཀྱང་སུ་ཞིག་ལ་རེ་ཞིང་སྒུག་ཨང་།
དཔེ་ཆ་སྟོང་ཕྲག་དུ་མས་ཁེངས་པའི་དཔེ་སྒྲོམ་དག་གི་བར་གསེང་།
རྐུབ་སྟེགས་དང་གློག་ཀླད་དུ་མས་བརྒྱན་པའི་ཐོག་བརྩེགས་གསུམ་གྱི་བར་སྟོང་།
སྟོང་ཆ་འདིས་ངར་གཞལ་ཐབས་དཀའ་བའི་ཚོར་བ་ཞིག་སྐྱེས་བས།
རྒྱུན་ལྡན་གྱི་འཚོ་བ་བརླག་སོང་བ་ཡིན་ནམ།
འདུག་རོགས་ཀྱི་ཁ་པར་འབྱོར་སོང་།
མཐར་ལག་བརྡ་དང་སྐྱེལ་མའི་ཁྲོད་ནས།
ཁོ་རང་ཡང་ཁྱིམ་དུ་བུད་སོང་།
ང་དང་མཉམ་དུ་སུ་ལྷག་ཡོད་རེད།
གློག་ཀླད་དང་ཁ་པར།
དཔེ་དེབ་དག་ལས་གང་ཡང་ལྷག་མེད།
གཞན་སྐྱབས་བཅོལ་བར་གནས་ཚང་ཞེས་འབོད་ས་མེད་པ་ལོས་ཤེས།
ངས་སྔར་ནས་ཚོར་ཀྱང་ཡོད།