གནས་ལུགས་ངོ་སྤྲོད།

ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས།

 
ལྷ་ཁང་རྫིག་པོ་ཆོས་ཀྱི་ཞིང་ས་མིན།།
སེམས་པ་བཟང་པོ་ཆོས་ཀྱི་ཞིང་ས་ཡིན།།
ཕྱག་དང་སྐོར་བ་ཆོས་ཀྱི་ཞིང་ས་མིན།།
བྱམས་དང་སྙིང་རྗེ་ཆོས་ཀྱི་ཞིང་ས་ཡིན།།

གསེར་སྐུ་རིན་ཆེན་ནང་པའི་བསྟན་པ་མིན།།
བསླབ་པ་སློབ་གཉེར་ནང་པའི་བསྟན་པ་ཡིན།།
ལག་ཏུ་ཕྲེང་བ་ཡོད་ཚད་ཆོས་པ་མིན།།
སེམས་ལ་ཉེ་རིང་མེད་ན་ཆོས་པ་ཡིན།།

གཞུང་ལུགས་ཤེས་པ་ཙམ་གྱིས་མཁས་པ་མིན།།
བླང་དོར་གནས་ལུགས་ཤེས་ན་མཁས་པ་ཡིན།།
ཕ་སྐད་ཤེས་པ་ཙམ་གྱིས་ལ་རྒྱ་མིན།།
ནང་ཁུལ་མཛའ་མཐུན་ཡོད་ན་ལ་རྒྱ་ཡིན།།

རང་ལུས་དོར་བ་ཙམ་གྱིས་དཔའ་བོ་མིན།།
དགྲ་ལ་དམར་རྫིང་ཐུབ་ན་དཔའ་བོ་ཡིན།།
རྒྱུ་ནོར་ཡོད་པ་ཙམ་གྱིས་ཕྱུག་པོ་མིན།།
ནོར་ལ་ཆོག་ཤེས་ཐུབ་ན་ཕྱུག་པོ་ཡིན།།

འབྲི་ཀློག་ཐུབ་པ་ཙམ་གྱིས་ཡིག་མཁན་མིན།།
ཐ་སྙད་གསལ་སྟོན་ཐུབ་ན་ཡིག་མཁན་ཡིན།།
ཁ་དམག་བསྒྲགས་པ་ཙམ་གྱིས་ཆབ་སྲིད་མིན།།
གོ་སྐབས་དམ་འཛིན་ཐུབ་ན་ཆབ་སྲིད་ཡིན།།

སྙན་པོ་ཐམས་ཅད་སྙན་ངག་མིན།།
ཚིག་དོན་མཐུན་ན་སྙན་ངག་ཡིན།།
ཞིམ་པོ་ཐམས་ཅད་ཁ་ཟས་མིན།།
ཟས་བཅུད་འཛོམས་ན་ཁ་ཟས་ཡིན།།

འགན་འཁུར་ཐམས་ཅད་ལྷག་བསམ་མིན།།
ཁྲིམས་དང་མཐུན་ན་ལྷག་བསམ་ཡིན།།
བཤད་ཚད་གཏམ་ལ་ཉན་མཁན་མེད།།
ཉན་མཁན་ཡོད་ཀྱང་སྙན་ཆ་མེད།།

ཟ་རྒྱུ་མང་ན་སྐྱུག་རྒྱུ་མང་།།
འགྲོ་རྒྱུ་མང་ན་སྡོད་ས་ཤོར།།
ལབ་གླེང་མང་ན་རྩོད་གླེང་མང་།།
ཧམ་བཤད་མང་ན་རང་མཚང་བརྡོལ།།