འཇམ་དབྱངས་བསྟན་དར་ནས།
༄༅།།རྣོན་པོའི་རྣམ་དཔྱོད་མདོ་རྒྱུད་ཉིང་ཁུས་ཚིམས།།
སྙོམས་པོའི་བྱམས་བརྩེས་འགྲོ་ཀུན་བདག་གིར་བཞེས།།
ཞི་བའི་ལམ་སྟོན་སྲིད་པའི་མིག་གཅིག་པུ།།
ངེས་དོན་བླ་མ་གངས་རིའི་མགོན་དེས་སྐྱོངས།།
༡ རྗེ་འབངས་ཀྱི་འབྲེལ་བ་གསེར་ནག་གི་མདུད་པ།
གངས་རི་ཤེལ་གྱི་མེ་ཏོག་གིས་ཁོར་ཡུག་མཛེས་པར་བརྒྱན་པའི་རང་ཅག་ཁ་བའི་ཡུལ་གྱི་སྣོད་བཅུད་དར་རྒུད་དམ་ཆགས་འཇིག་གནས་གསུམ་གྱི་བྱུང་བ་གང་ཡིན་ན་ཡང་རྒྱུ་རྐྱེན་རྟེན་འབྲེལ་གྱི་ཚོན་སྣ་མང་པོ་ཞིག་གིས་གྲུབ་པའི་རི་མོ་ཡིན་པ་ལས་སྣ་གཅིག་རྐྱང་བས་འབུར་དོད་དུ་བྱུང་བ་ཞིག་ག་ལ་ཡིན། ལར་ནས་ཕྱི་སྣོད་ཀྱི་བཀོད་པའི་གྲུབ་ཆའི་རྡུལ་ཕྲན་རེ་རེའི་སྒྲིག་རིམ་མི་འདྲ་བ་དང་། ནང་བཅུད་ཀྱི་སེམས་ཅན་རེ་རེའི་ལུས་ཕུང་གི་བཟོ་དབྱིབས་མི་འདྲ་བ་སྣ་ཚོགས་ཤིག་ཡོད་པ་འདི་ལ་རང་རང་གི་ཐུང་མོང་མ་ཡིན་པའི་རྒྱུ་རྐྱེན་བྱེ་བྲག་པ་ཞིག་གི་ཤུགས་རྐྱེན་ངེས་པར་ཚང་དགོས་ལ། དེ་ཡང་དཔེར་ན་དེང་དུས་ཀྱི་རྫས་རྡུལ་སྒྲིག་སྦྱོར་སྣ་ཚོགས་ལས་གྲུབ་པའི་འཕྲུལ་རིགས་ཁག་གང་ལ་ཡང་རང་རང་གི་བཟོ་བསྐྲུན་པ་དག་གི་སེམས་པའི་ཤུགས་རྐྱེན་ངེས་པར་དུ་སྔོན་དུ་སོང་བ་ལ་ལྟོས་དགོས་པ་དང་ཆེས་འདྲའོ།། དེ་བས་ན་རང་ཅག་ཁ་བ་རི་བའི་སྣོད་བཅུད་དང་འཕགས་པ་སྤྱན་རས་གཟིགས་ཀྱི་ཐུགས་བསྐྱེད་དམ་ཡང་ན་རྒྱལ་དབང་ན་རིམ་བར་གྱི་འབྲེལ་བ་ཡང་གཞི་དངོས་པོའི་གནས་ཚུལ་ལ་ཧ་ཅང་དམ་དུ་སྦྲེལ་བ་ཞིག་ལས་རྟོག་བཟོའི་ལྷ་སྒྲུང་ལྟ་བུར་མ་སེམས་ཤིག ཁྱད་པར་དུ་རྒྱལ་དབང་བཅུ་བཞི་བ་རྒྱལ་བ་བསྟན་འཛིན་རྒྱ་མཚོ་ནི། དང་བོ་ངོས་འཛིན་ཡང་དབུས་གཙང་ནས་ཁད་རིང་བ་ཟླ་ཤས་ཀྱིས་འགྲུལ་བཞུད་བྱེད་དགོས་པའི་ཡུལ་མདོ་ཁམས་སྨད་ཀྱི་ཨ་མདོའི་ཁྱེའུ་ཞིག་རྒྱལ་བའི་ཁྲི་ཁར་འཁོད་ཐུབ་པ་འདི་ཡང་ལྷ་མོའི་བླ་མཚོའི་མཚོ་གཟིགས་སོགས་ཡ་མཚན་པའི་བྱུང་རབས་ཁག་ཅིག་གིས་གྲུབ་ཡོད་ལ། རིམ་གྱིས་ནར་སོན་པའི་བརྒྱུད་རིམ་ལས་ཀྱང་སྐུ་ཕྲེང་གོང་མ་དག་དང་མི་མཚུངས་པར་དགུང་ལོ་བཅུ་དྲུག་ཙམ་ནས་ཆོས་སྲིད་ཀྱི་འགན་དབང་ལྕི་མོ་ཕྲག་ཏུ་བཞེས་དགོས་བྱུང་ཞིང་། བོད་མིའི་སེམས་གཏིང་གི་བདེ་སྡུག་ཞུ་སའི་བླ་མ་དང་སྐྱིད་སྡུག་བཅོལ་སའི་དཔོན་པོ་ཁོང་གཅིག་པུར་གྱུར་པ་དེ་ནས་བཟུང་། དྲང་བདེན་ནམ་དངོས་ཡོད་གནས་ཚུལ་ལ་གཞི་བཅོལ་ནས་ལྟ་སྤྱོད་ངོ་ལྐོག་མཚུངས་ཤིང་། ལག་ལེན་རྙིང་ཞེན་དང་ཨ་གསར་མེད་པར་གསར་རྙིང་གི་བཅུད་བསྡུ་མཁས་པའི་སྒོ་ནས་བོད་ཀྱི་སྤྱི་ཚོགས་ཀྱི་སྒྲོམ་གཞི་ཟུངས་ཟད་ཀྱི་ནད་པ་ལྟ་བུ་དེ་ཕྱོགས་ཡོངས་ནས་ལེགས་བཅོས་བྱེད་པའི་ལས་ཁུངས་བོད་ཀྱི་ལེགས་བཅོས་ལྷན་ཚོགས་ཟེར་བ་(༡༩༥༢)གསར་འཛུགས་གནང་སྟེ། ཁྲིམས་དོན་བསྐྱར་ཞིབ་དང་། བོད་ས་ཡོངས་ལ་འབྲེལ་མཐུད་ཆེད་འགྲུལ་བཞུད་འཁོར་ལམ་བཟོ་བ། ཤེས་ཡོན་གྱི་བསྟི་གནས་དགོན་པ་ལས་མེད་པས་སློབ་སྦྱོང་གི་ལས་རིམ་གསར་བཟོ་སོགས་གནད་འགག་ཆེ་བའི་འཆར་གཞི་ཁག་བཟོ་བ་དང་། དངོས་སུ་ལག་བསྟར་གནང་བ་མི་རྒྱུད་ལ་འཇགས་པའི་བུ་ལོན་སྤྲོད་ལེན་བྱ་སྲོལ་རྩ་མེད་དང་། སྐྱིན་པ་སྤྲོད་མ་ཐུབ་པའི་དངུལ་བུན་ཆག་ཡང་བཏང་བ། ས་ཞིང་དབང་སྲོལ་ལ་བསྐྱར་བཅོས་སོགས་གནང་སྟེ། བོད་འདི་བརྒྱ་ཕྲག་ཉི་ཤུའི་དུས་རབས་ཀྱི་རྗེས་ཟིན་པ་ཞིག་བཟོ་རྒྱུའི་འབད་བརྩོན་གང་ནུས་བྱ་རྒྱུའི་ཐུགས་ཐག་དེ་དུས་ནས་བཅད་འདུག ༡༩༥༩ ལོར་ཟིང་འཁྲུགས་ཀྱི་མེ་ལྕེ་འབར་ཆོག་ཆོག་གི་རྒྱུ་རྐྱེན་ཡོངས་སུ་ཚང་བའི་སྐབས་སུ་ཡང་ཁོང་གི་སྒོ་གསུམ་གྱི་ཉམས་ལེན་དང་བོད་མིའི་བདེ་སྡུག་ལ་སེམས་པའི་ཐུགས་ཁུར་ཉམས་པ་མེད་པ་ནི། གསུང་ལས། བོད་མི་ས་ཡ་དྲུག་གི་བདེ་ཐབས་འགན་ཁུར་རང་ཐོག་ལ་ཡོད་པའི་དྲན་ཤེས་དེ་དང་ངའི་ཡིད་ཆེས་ཀྱིས་རང་གི་བྱ་སྒོ་རྒྱུན་སྐྱོང་བྱེད་པར་ཕན་སོང་། ཞེས་པ་དེས་གསལ་ལ། ཡང་རྒྱ་གཞུང་གི་དམག་སྤྱི་ཁང་དུ་ཟློས་གར་གྱི་ལྟད་མོ་ལ་སྐུ་སྲུང་མེད་པར་ཕེབས་དགོས་ཀྱི་མགྲོན་འབོད་དེའི་སྐོར་གསུང་དོན། ངའི་འགྲུལ་བཞུད་སྐོར་གསང་ཐབས་རྩ་བ་ནས་མེད་ངེས་ཡིན་པར་མ་ཟད། རྒྱ་དམར་གྱིས་དེ་འདྲ་བྱ་འདོད་ཡོད་པ་དེས་ངའི་ཡུལ་མི་ཚང་མར་དངངས་སྐྲག་ཆེན་པོ་བཟོས་པ་དང་། ངའི་སྲོག་ལ་ཉེན་ཁ་ཡོང་དོགས་ཀྱི་དངངས་སྣང་ཆེན་པོ་བྱུང་ཡོད་པ་རེད། ཞེས་དང་། ནོར་བུ་གླིང་ཀའི་རྒྱལ་སྒོའི་ཕྱི་ལ་འཛོམས་པའི་མི་ཚོགས་ཚོས་ཕྱིར་འཐེན་མི་བྱེད་པའི་བློ་ཐག་གཙང་གཅོད་བྱས་ཡོད་ཚོད་འདུག ངས་དེའི་དགོང་མོ་རྒྱ་དམར་གྱི་དམག་སྒར་ལ་འགྲོ་གི་མིན་ཞེས་ངོས་རང་གིས་ཁས་ལེན་མ་བྱས་བར་དུ་མི་ཚོགས་ཚོས་རང་སར་མི་ལོག་ཐག་ཆོད་རེད། རྒྱ་ཕྱོགས་ནས་ངའི་སྲོག་ལ་ཉེན་ཁ་ཡོད་པའི་སྐོར་བོད་ཀྱི་མི་དམངས་དང་འགོ་ཁྲིད་ཚོས་སེམས་ཁྲལ་ཆེན་པོ་བྱེད་ཀྱི་ཡོད་འདུག ཅེས་གསལ་བ་ལྟར་བོད་མིས་རང་གི་གཅེས་པའི་སྲོག་ལས་ཀྱང་རྒྱལ་བའི་སྐུ་དོན་རྩ་ཆེ་བའི་འདུ་ཤེས་འཛིན་སྟངས་འདི་འདྲ་ཞིག་རང་ཆས་སུ་ཡོད་པ་ཡང་བོད་ཀྱི་རྗེ་འབངས་བར་གྱི་འབྲེལ་བ་དམིགས་བསལ་བ་ཞིག་ཅིས་མ་ཡིན། ཡང་ཁོང་གིས་ ༡༩༩༢ ལོར་རྩ་ཁྲིམས་སྙིང་དོན་ཟེར་བར་ལྔ་དགུ་ལོའི་རྗེས་ཀྱི་གནས་བབས་གསུང་དོན། ༡༩༥༩ ལོར་བོད་མཐའ་དབུས་ཡོངས་རྫོགས་དྲག་ཤུགས་ཀྱིས་མནན་པའི་དུས་སྐབས་བོད་ཀྱི་ལོ་རྒྱུས་ནང་མ་གྲགས་པའི་དུས་འགྱུར་མི་བཟད་པ་ཞིག་བྱུང་། སྐབས་དེར་ངོས་རང་བསྟན་སྲིད་བདེ་ཐབས་སླད་རྒྱ་གར་འཕགས་པའི་ཡུལ་དུ་བཙན་བྱོལ་དུ་མི་ཡོང་མཐུ་མེད་བྱུང་ཞིང་། དེ་འཕྲལ་གཞིས་ཆགས་དང་། ཤེས་ཡོན་སོགས་རང་དབང་སླར་གསོའི་ལས་སྒོ་མང་པོ་ཞིག་སྒྲུབ་མུས་ནས། རེ་འདོད་སྔོན་ཡོད་ལྟར་བོད་ཀྱི་ཆབ་སྲིད་ལམ་སྲོལ་མང་གཙོའི་ངོ་བོར་བསྒྱུར་ཐབས་གལ་ཆེར་བཟུང་སྟེ། ༡༩༦༠ ལོར་བོད་མི་དམངས་སྤྱི་འཐུས་ལྷན་ཚོགས་ཀྱི་སྒྲིག་འཛུགས་གསར་གཏོད་བྱས་ཏེ་སྐབས་བཅུ་གཅིག་སོང་། ཞེས་ཀྱི་ཆབ་སྲིད་ལམ་ལུགས་དེ་མང་གཙོ་ཡང་དག་པའི་ངོ་བོར་བསྒྱུར་རྒྱུ་དེ་ཁོང་གི་ཆབ་སྲིད་ལམ་ལུགས་ཐད་ཀྱི་ཕུགས་རེ་ཉག་གཅིག་ཏུ་བཟུང་འདུག་ཅིང་། དེའི་ཆེད་དུ་སྔོན་གྱི་ལམ་སྲོལ་རྙིང་བ་ཕྱིར་བསྡུ་དང་། དེང་གི་ཆབ་སྲིད་པ་ཕལ་མོ་ཆེའི་འདོད་བྱ་དང་བསྒྲུབ་བྱ་མཐར་ཐུག་རང་གི་སྤྱི་ཚོགས་ཀྱི་གོ་གནས་མཐོ་ཤོས་ཀྱི་གནས་བབས་དེ་ཁོང་ལ་རང་ཆས་ལྟ་བུར་ཡོད་པ་དེ་ཡང་མང་གཙོའི་ལམ་སྲོལ་དང་མི་མཐུན་པར་དགོངས་ནས་དེ་དུས་ནས་འགན་དབང་དེ་མི་འཁུར་བར་ཐག་ཆོད་ན་ཡང་། དེ་དུས་ཀྱི་རྩ་ཁྲིམས་ཟིན་བྲིས་སུ་གཞུང་གི་འགན་དབང་གཙོ་བོ་ཁོང་ལ་ཡོད་པ་བཀོད་པ་ནི་དེའི་སྐབས་ཀྱི་མི་དམངས་ཀྱི་བསམ་ཚུལ་དབང་བཙན་པར་བྱས་ཏེ་གསུང་བ་ཡིན་ཞིང་། དེ་ཡང་ ༡༩༩༢ ལོའི་རྩ་ཁྲིམས་སྙིང་དོན་དུ་འདི་ལྟར། ༡༩༦༣ ལོར་རྩ་ཁྲིམས་ཟིན་བྲིས་རྒྱས་པ་ཞིག་གསལ་བསྒྲགས་དང་འབྲེལ་བཙན་བྱོལ་བོད་གཞུང་གི་ཆབ་སྲིད་འཛིན་སྐྱོང་མང་གཙོའི་ལམ་སྲོལ་གང་ཐུབ་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་འགན་ཁུར་འོག་དེ་སྔའི་རྩེ་སྐོར་དང་། ཤོད་སྐོར་ཞེས་པའི་གཞུང་ཞབས་སེར་མོ་བ་དང་། སྐྱ་བོའི་ཡོང་སྟངས་ལམ་སྲོལ་དང་། གོ་མིང་རྙིང་བ་བཅས་ཕྱིར་བསྡུ་བྱས་ཐོག མང་གཙོའི་གཞུང་གི་སྒྲིག་སྲོལ་དང་མཐུན་པའི་གཞུང་ཞབས་བཀོད་སྒྲིག་ལམ་སྲོལ་གསར་གཏོད་བྱས། རྩ་ཁྲིམས་ཀྱི་ཟིན་བྲིས་དེའི་ནང་དུ་རྒྱལ་ཁབ་ཀྱི་ཁེ་ཕན་ཆེ་ཤོས་ཀྱི་དོན་དུ་ཏཱ་ལའི་བླ་མའི་འགན་ཁུར་ཁྲིམས་ལུགས་ལྟར་སྡེ་སྲིད་ལྷན་ཚོགས་ཀྱིས་བླངས་ཆོག་རྒྱུ་བཀོད་ཡོད། སྐབས་དེའི་མང་ཚོགས་ཀྱི་བློ་འཚམས་གནས་བབས་དང་བསྟུན་ཏེ་གཞུང་གི་འགན་དབང་གཙོ་བོ་ཏཱ་ལའི་བླ་མར་ཡོད་པ་བཀོད་པར་བརྟེན་མང་གཙོའི་ལམ་སྲོལ་ངོས་ཀྱི་རེ་འདོད་ཡོངས་སུ་ཁེངས་པ་ཞིག་བྱུང་མེད། ཅེས་དང་། ཡང་དེ་ཉིད་ལས། མ་འོངས་པར་ངོས་ནས་བོད་གཞུང་གི་འགན་ཁུར་དང་། ལམ་ལུགས་རྗེས་འབྲེལ་ཆབ་སྲིད་ཀྱི་གོ་གནས་གང་ཡང་ལེན་རྒྱུ་མིན་པ་སྔོན་ནས་ཐག་བཅད་ཟིན་པ་ཡིན། ཞེས་དང་། ཡང་ ༨༨ ལོར་ཡོ་རོབ་གྲོས་ཚོགས་ལ་གནང་བའི་གསུང་འཕྲིན་དུ། ངོས་ནས་བོད་གཞུང་གི་ནང་དུ་འགན་ཁུར་རྐང་ལེན་གྱི་ལས་གནས་གང་ཡང་འཛིན་འདོད་མེད། འོན་ཀྱང་ངོས་ནས་བོད་མི་དམངས་ཀྱི་ཁེ་ཕན་དང་བདེ་སྐྱིད་ཀྱི་ཆེད་དུ་དགོས་པ་ནམ་བྱུང་བར་འབད་བརྩོན་ཡོད་རྒུ་རྩལ་སྤྲུགས་ཀྱིས་མུ་མཐུད་ལས་ཀ་བྱ་རྒྱུ་ཡིན། ཞེས་ཁོང་བོད་མི་སྤྱི་བོ་གནམ་བསྟན་ཡོངས་ཀྱི་མེ་ཏོག་གང་ལ་ཕོག་པའི་ལྷ་སྐལ་དུ་བཀུར་བ་ནས་ཁོང་གིས་ཀྱང་མ་ཎི་འདོན་མཁན་རྩམ་པ་ཟ་མཁན་གྱི་བོད་མི་ཚོའི་ཆེད་དུ་འདི་ལྟར་ཐུགས་བསྐྱེད་ཀྱི་གོ་ཆ་བགོས་ཏེ་ང་ཚོའི་མགོན་དཔུང་དམ་པར་བཞུགས་པ་འདི་ཡང་རྗེ་འབངས་ཀྱི་འབྲེལ་བ་གསེར་ནག་གི་མདུད་པ་མི་ཤིགས་གཡུང་དྲུང་གི་རི་མོ་དེ་ཅིས་མ་ཡིན།
༢ གནས་ལུགས་རྗེན་པ་ལ་འཇུས་པའི་ལྟ་གྲུབ་ཀྱི་རྣོ་དབལ།
ངའི་ཤེས་ཡོན་དང་རིག་གནས་སྦྱོང་བརྡར་གྱི་རྨང་གཞི་ནི་ནང་ཆོས་ཡིན་པས། ཞེས་ཁོང་གི་རླབས་ཆེན་ལྟ་གྲུབ་ཀྱི་རྨང་གཞི་ནི་ནང་ཆོས་ལས་འཁྲུངས་པར་གསུངས་ཤིང་། ལྟ་བ་རྟེན་འབྱུང་དང་སྤྱོད་པ་འཚེ་བ་མི་བྱེད་པ་ནི་ནང་ཆོས་ཀྱི་སྙིང་བོ་དང་མི་ཆོས་ཀྱི་ཁྲིམས་ཡིག་ཏུ་བསྒྲགས། དེ་ལྟར་ནང་བའི་ལྟ་གྲུབ་ཟབ་མོ་ལ་གཞི་བཅོལ་བའི་བློ་སྟོབས་ཀྱིས་ཁོང་གོ་ལ་ཟླུམ་པོ་འདིའི་སྣོད་བཅུད་རྒུད་པ་གསོ་བའི་ཆོས་སྲིད་ལུགས་གཉིས་ཀྱི་མགོན་དཔུང་དམ་པར་བཞེངས། དེ་ཡང་བདེ་སྡུག་གི་ཚོར་བ་རང་ཆས་སུ་ཡོད་པའི་སྲོག་ལྡན་སྤྱིའི་མངོན་འདོད་བདེ་བ་འདོད་པ་དང་སྡུག་བསྔལ་མི་འདོད་པའི་གཞི་རིམ་གྱི་བསམ་པའི་འཁྱེར་སོ་འདི་གང་ཟག་སུ་ལ་ཡང་སྒྲུབ་བྱེད་ཀྱི་ངལ་བ་བསྟེན་མི་དགོས་པར་མྱོང་བའི་གྲུབ་པ་ཡིན་ལ། འདོད་བྱའི་བདེ་བ་དང་སྤང་བྱའི་སྡུག་བསྔལ་ལ་ཕྲ་རགས་ཀྱི་རིམ་པ་མང་དུ་ཡོད་ན་ཡང་རྒྱུ་འབྲས་རྟེན་འབྲེལ་གྱི་རིམ་པ་ལས་འདར་མེད་པས་ཕན་ཚུན་ལྟོས་གྲུབ་བམ་ལྟ་བ་རྟེན་འབྱུང་གི་རྒྱ་ལས་ནམ་ཡང་འགོངས་སུ་མེད། བདེ་སྡུག་གི་སྤང་བླངས་ནི་དེ་གཉིས་ཀྱི་རྒྱུ་ལ་འཇུག་ལྡོག་བྱེད་པ་ལ་རག་ལས་ཤིང་། གང་ལ་འཇུག་པ་དང་གང་ལས་ལྡོག་པའི་གཞི་བདེ་སྡུག་གི་རྒྱུ་གཉིས་གསལ་བོ་ཞིག་ངོ་འཕྲོད་ནས་བདག་གཞན་མཉམ་བརྗེ་ཡི་སྤྱོད་པར་འཇུག་པ་མ་གཏོགས་བདག་རྒྱལ་གཞན་ཕམ་གྱི་ལས་ལ་གཞར་ཡང་འཇུག་ཏུ་མེད་པ་སྟེ་ནམ་ཡང་འཇུག་མི་ཤེས་པ་ཞིག་ཡིན་པས། སྤྱོད་པ་འཚེ་བ་མི་བྱེད་པ་ནི་རང་བྱུང་ཆོས་ཉིད་ཀྱིས་གྲུབ་པའི་སྲོལ་ཡིག་བཙན་པོ་ཞིག་ལས་མི་འདོད་ཨུ་ཚུགས་ཀྱིས་བཙུགས་པའི་ཁྲིམས་སྲོལ་རྙིང་བ་ཞིག་ག་ལ་ཡིན། ནང་བའི་གཞུང་ལས་གཞི་དབུ་མ་དང་། གཞུང་དབུ་མ། ལམ་དབུ་མ། འབྲས་བུ་དབུ་མ་ཞེས་དབུ་མའི་ཐ་སྙད་མང་དུ་མཛད་པ་ལྟར་གནས་སྐབས་གང་འདྲ་ཞིག་ཡིན་ན་ཡང་དབུ་མར་གནས་རྒྱུ་ནི་ཧ་ཅང་གལ་འགངས་ཆེ་སྟེ། དབུ་མ་ནི་དབུས་མ་སྟེ་དཀྱུས་མ་ལ་གོ་དགོས་ཤིང་འདིའི་དཀྱུས་མ་ནི་དངོས་ཡོད་ཀྱི་གནས་ཚུལ་རྗེན་པ་དེ་ཡིན་ལ་དེ་ལ་སྒྲོ་སྐུར་གྱི་མཐའ་གཉིས་དང་མ་བྲལ་བར་ལག་ལེན་གྱི་རིམ་པ་ཅི་འདྲ་ཞིག་ཡིན་ན་ཡང་དེའི་འཕྲལ་ཕུགས་ཀྱི་འབྲས་བུ་ཡང་དག་པ་ཞིག་རྩ་བ་ནས་ཡོང་ཐབས་མེད། དེའི་ཕྱིར་ལག་ལེན་གྱི་རིམ་པ་གང་ལ་ཡང་དངོས་ཡོད་ཀྱི་གནས་སྟངས་དང་མི་མཐུན་ཚེ། རྒྱལ་བོའི་ཁྲིམས་སྲོལ། སྔོན་གྱི་ལམ་སྲོལ། བླ་མའི་བཀའ་གསུང་སོགས་གང་ལ་ཐུག་ཀྱང་འདོར་འོས་དེ་ལ་བྱེད་པ་ལས་དངོས་ཡོད་ཀྱི་བདེན་པ་ནམ་ཡང་དོར་བར་འོས་པ་མ་ཡིན་པས། ཁོང་གིས་གསུང་རྒྱུར་ང་ཚོའི་སྔར་ལམ་གོམས་སྲོལ་ལ་ལེགས་པའི་ཆ་མང་པོ་ཡོད་པ་རེད་དེ། ཉེས་པའི་ཆ་ཡང་མང་པོ་ཡོད། དངོས་ཡོད་གནས་ཚུལ་དང་མ་འཚམས་པ་དང་། མ་དག་རྒྱུན་འཇགས་སུ་ཕྱིན་པ་ཇི་སྙེད་ཡོད། དེ་ཚོ་སྔར་ལམ་དུ་མ་བཞག་པར་བསྒྱུར་བཅོས་གཏོང་དགོས། ཞེས་བདེན་པའི་གནས་ལུགས་ལ་འཇུས་པའི་མྱོང་བ་ཟབ་མོའི་གདམས་ངག་དེ་ང་ཚོར་བརྩེ་བས་འདོམས་པར་མཛད། སྤྱིར་ནང་བ་སངས་རྒྱས་པ་ལ་བསམ་པ་རྒྱ་ཆེ་ཆུང་གིས་ཐེག་པ་མཆོག་དམན་དང་། ལྟ་གྲུབ་མཐོ་དམའ་ཡིས་གྲུབ་མཐའ་བཞི་བཞག་པ་དེ་དག་ཀྱང་མོས་ཁམས་སྣ་ཚོགས་པའི་རང་རང་གི་གདུལ་བྱའི་རིགས་ལ་ཕན་པ་ཡོད་པ་ཤ་སྟག་ཡིན་པས། གསུང་བ་བོ་སྟོན་པ་གཅིག་གིས་རང་ལུགས་མཐར་ཐུག་གང་ཡིན་ལ་མ་ལྟོས་པར་གྲུབ་མཐའ་དང་ཐེག་པ་སྣ་ཚོགས་ཤིག་གསུང་དགོས་བྱུང་བའི་ཆོས་ཉིད་གཞི་ལ་བཞག་སྟེ། ང་ཚོ་འཚོ་སའི་གོ་ལ་ཟླུམ་པོ་འདིའི་སྟེང་གི་ཆོས་ལུགས་མི་འདྲ་བ་རྣམས་ལའང་རང་རང་གི་རྗེས་སུ་འཇུག་པ་དག་ལ་ཕན་པ་དང་བདེ་བ་སྟེར་བ་རྒྱུ་མཚན་དུ་བཀོད་དེ་ཕན་ཚུན་ལ་གུས་བརྩི་དགོས་པ་ལས་ལྟ་གྲུབ་མི་འདྲ་བའི་རྒྱུ་མཚན་གྱིས་ཕན་ཚུན་ལ་སྡང་ཟུག་དང་རྩོད་པ་བྱེད་པ་དོན་མེད་ཡིན་པའི་ལམ་སྟོན་གནང་ཞིང་། དངོས་སུ་ཕྱག་ལེན་ལ་བསྟར་བཞིན་པ་འདི་ལས་ལྷག་པའི་ཆོས་ཀྱི་མིང་ཐོག་ནས་འབྱུང་ཉེ་བའི་རྩོད་རྙོག་ཁག་ཞི་བར་བྱེད་པའི་ཐབས་ཚུལ་ཡང་དག་པ་སུ་ཞིག་གིས་རྙེད་ནུས། ང་ཚོ་བོད་ཁ་བ་ཅན་དུ་ཆོས་དར་ནས་མི་ལོ་དུ་མ་འདས་ཤིང་སངས་རྒྱས་ཀྱི་བསྟན་པ་ས་དར་རྡོ་དར་ཟེར་སྲོལ་ཡོད་ན་ཡང་། མི་དམངས་སྤྱི་བྱིངས་ལ་ཆོས་ཀྱི་གོ་རྟོགས་ཧ་ཅང་དམའ་བའི་རང་བཞིན་ལ་དགོངས་ནས་ལོ་ཚོད་སོགས་ཀྱི་ཁྱད་པར་མེད་པར་ཚང་མས་ཆོས་ལ་སློབ་སྦྱོང་བྱས་ཏེ། གང་ལ་སྐྱབས་སུ་འགྲོ་བའི་ཡུལ་དཀོན་མཆོག་དེས་རང་ཉིད་ཇི་ལྟར་སྐྱོབ་ཚུལ་སོགས་ལ་རྒྱུ་མཚན་མཐོང་བའི་སྒོ་ནས་སྐྱབས་སུ་འགྲོ་དགོས་པ་དང་། བཀའ་བསྟན་གྱི་གསུང་རབ་རྣམས་ལ་སློབ་དེབ་ཀྱི་འདུ་ཤེས་བཟུང་སྟེ་སློབ་སྦྱོང་བྱེད་དགོས་པ་ལ་ང་ཚོས་མཆོད་གཤོམ་གྱི་ཡུལ་ཙམ་དུ་བཟུང་བ་ནོར་བ་ཡིན་པ་དང་། དེང་དུས་ཀྱི་ཤེས་ཡོན་དེ་དག་རང་གིས་ཚུལ་བཞིན་དུ་ལོངས་སུ་སྤྱོད་ཐུབ་པའི་སྟེང་ནས་དམ་པའི་ཆོས་ལ་རྒྱུ་མཚན་མཐོང་བའི་དད་པ་ཐོབ་པ་སྟེ་དུས་རབས་ཉེར་གཅིག་པའི་ནང་བ་ཞིག་བྱེད་དགོས་པ་སོགས་ཀྱིས་མཚོན་པའི་ལམ་སྟོན་འཕྲལ་ཕུགས་ཀུན་ལ་གཅིག་ཏུ་སྨན་པ་འབའ་ཞིག་མཛད་པ་རྣམས་ལ་ཞིབ་ཏུ་བརྟག་ཅིང་དཔྱད་དེ་ངེས་པ་རྙེད་པར་མཛད་དེ་རང་ཉམས་ལ་དཔག་པའི་ལག་ལེན་རེ་བསྟར་ན་འད ི་ཕྱི་ཀུན་དུ་དགེ་བ་གདོན་མི་ཟའོ།། འཇིག་རྟེན་གྱི་བྱ་དངོས་གང་ལ་ཡང་སྐྱོན་ཡོན་གྱི་ངོས་གཉིས་རེ་ཡོད་པ་ནི་ཁོ་རང་གི་རང་གཤིས་སུ་གྲུབ་པས་དེ་ལ་རྟོག་པ་པོའི་ངོས་ནས་ཕྱོགས་གཅིག་ཁོ་ནར་སེམས་པ་མ་ཡིན་པར་ངོས་གཉིས་ཀ་ནས་བལྟ་རྒྱུ་གལ་ཆེ་བའི་རང་བཞིན་ཐུགས་ལ་བརྣག་ཏེ་གསུང་རྒྱུར། ང་རང་ཚོས་རང་ཉིད་ཀྱི་ཞན་ཆ་གླེང་རྒྱུ་གལ་ཆེ་བཟང་གི་ཕྱོགས་གཞན་གྱིས་བརྗོད་ཡོང་ཞེས་དང་། དེ་ལྟར་ངོ་གཉིས་མའི་ལྕགས་སྒོར་གནམ་གཡུགས་ཀྱིས་ངོས་གང་རང་ལ་གཏོད་མི་ཤེས་པས། རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་པའི་ལམ་སྟོན་མཛད་དེ་ས་མཐཪ་བཙན་བྱོལ་བའི་མིང་བྱང་འོག་ཏུ་མི་ལོ་དྲུག་ཅུ་བརྒལ་ཡང་ད་དུང་རང་རིགས་ཀྱི་ངོ་བོ་དང་རྣམ་འགྱུར་མ་ཡལ་བར་ཆོས་སྲིད་ལུགས་གཉིས་ཀྱི་རྩ་བ་གནའ་དེང་ཤེས་རིག་གི་གཞི་མ་ཁག་སྲ་བརྟན་དུ་ཚུགས་ཐུབ་པ་བྱུང་བ་འདི་ཡང་གནས་ལུགས་ཀྱི་ཟབ་སར་ཟུག་པའི་ལྟ་གྲུབ་ཀྱི་རྣོ་དབལ་ཅིས་མ་ཡིན། ཡང་ད་ལྟའི་ཚན་རིག་གི་ཤུགས་རྐྱེན་སྐོར་གསུང་དོན། དེང་སྐབས་ཚན་རིག་དང་འཕྲུལ་ལས་ཀྱིས་ཤུགས་རྐྱེན་མ་ཐེབས་པའི་འགྲོ་བ་མིའི་འཚོ་བའི་ཆ་ཞིག་ཕལ་ཆེར་མེད། ཅེས་ཚན་རིག་དང་འཕྲུལ་ལས་ཀྱིས་ང་ཚོ་འགྲོ་བ་མིའི་འཚོ་གནས་ལ་ཤུགས་རྐྱེན་ཟབ་མོ་བྱུང་དང་འབྱུང་བཞིན་པའི་དངོས་ཡོད་གཞི་ལ་བཞག་སྟེ། བདེ་སྡུག་གི་ཚོར་བ་རྣོ་བའི་སྲོག་ལྡན་སྤྱིའི་འབྱུང་འགྱུར་ལ་ཤུགས་རྐྱེན་འདིས་ཕན་གནོད་ཅི་འབྱུང་ལ་ངེས་པར་དུ་བསམ་གཞིགས་བྱེད་དགོས་པ་དང་། ང་ཚོའི་འཇིག་རྟེན་ལྟ་ཚུལ་གྱི་ཁྱབ་ཁོངས་ཧྲིལ་བོ་ཚན་རིག་གི་ལྟ་བ་གཅིག་པུར་བསྐྱལ་བཅོལ་ན་ཅི་ཙམ་གྱིས་ཉེན་ཁ་ཆེ་བ་དང་། དེ་ཡང་ཕྱོགས་ཞེན་གྱིས་མ་ཡིན་པར་ང་ཚོས་བདེ་སྡུག་མྱོང་སའི་གཞི་ལུས་གཅིག་པུ་མ་ཡིན་པར་ལུས་སེམས་གཉིས་ཀ་ལ་བརྟེན་ནས་སྐྱིད་སྡུག་ཉམས་མྱོང་བྱེད་པས་ན་འགྲོ་བ་མིའི་གཞི་རྩའི་རང་བཞིན་གྱི་སྙིང་རྗེ་དང་བརྩེ་བ་སོགས་ལ་ཡང་རིན་ཐང་གི་འདུ་ཤེས་ངེས་པར་དུ་སྟེར་དགོས་མོད་ཀྱང་། དེ་དག་ཚན་རིག་གི་ཁྱབ་ཁོངས་སུ་འདུས་མེད་པ་གསུང་རྒྱུར། ཚན་རིག་གི་འཚོལ་ཞིབ་ཀྱི་བཟོ་བཀོད་འདིའི་ནང་དུ་ཀུན་སྤྱོད་རིག་པ་དང་། སྒྱུ་རྩལ་གསར་གཏོད་ཀྱི་རིག་སྟོབས། སེམས་དོན་རིག་པ། དེ་བཞིན་གཟུགས་འདས་རིག་པའི་གནད་དོན་ཕྲ་མོ་སོགས་འགྲོ་བ་མིའི་ཁྱད་ཆོས་མི་ཉུང་བ་ཞིག་ཚུད་མེད། ཚན་རིག་གི་ཁྱབ་ཁོངས་སུ་མ་ཚུད་པའི་འཚོ་གནས་ཀྱི་ཆ་དང་ཤེས་ཡོན་གང་མང་ཡོད། ཅེས་གསལ་སྟོན་གནང་སྟེ། ང་ཚོས་ཚན་རིག་གི་ཡང་དག་པའི་ལྟ་སྟངས་རྣམས་དང་ནང་དོན་རིག་པའི་ལྟ་ཚུལ་ཟུང་འབྲེལ་གྱི་སྒོ་ནས་འཇིག་རྟེན་གྱི་ཡང་དག་པའི་ལྟ་བ་ཞིག་བཙལ་ཏེ་ཚན་རིག་དང་འཕྲུལ་ལས་ལ་ཁ་ལོ་བསྒྱུར་ན་ད་གཟོད་བདེ་སྐྱིད་དང་བག་ཕེབས་ཀྱི་གོ་ལའི་ཁྱིམ་ཚང་ཞིག་བསྐྲུན་ཐུབ་པའི་ཡིད་ཆེས་དང་རེ་བ་བྱེད་ཆོག་ཅེས་བརྩེ་བའི་འཛུམ་ཞལ་ནམ་ཡང་ཟུམ་པ་མེད་པར་ང་ཚོར་གཟིགས་པ་འདི་ཡང་གནས་ལུགས་ལ ་འཇུས་པའི་བརྩེ་བ་དྲོན་མོ་དེའི་རྣོ་དབལ་ཁོ་ནའོ།།
༣ ལོ་རྒྱུས་ཀྱི་ཟིན་ཐོ་འོད་རིས་སུ་འབུར་བ།
བོད་ཁ་བ་ཅན་གྱི་བྱུང་རབས་དེབ་ཐེར་གྱི་ངོས་དང་གོ་ལ་ཟླུམ་པོ་འདིའི་ལོ་རྒྱུས་ཀྱི་ཟིན་ཐོའི་ཁྲོད་ན་མཚན་གྱི་རི་མོ་མཇལ་བ་ཙམ་གྱིས་ཡིད་ལ་དགའ་བདེའི་གྲུ་ཆར་ཟད་མེད་དུ་འཇོ་བའི་ང་ཚོའི་བླ་མ་སྟེ་སྤྱི༷་ཡི་ནོ༷ར་བུ་གོང་ས་ལྷ་མིའི་རྣམ་འདྲེན་ཁོང་གིས། ཇི་སྐད་དུ། ས་དང་ཆུ་དང་མེ་དང་རླུང་།། སྨན་དང་དགོན་པའི་ཤིང་བཞིན་དུ།། རྟག་ཏུ་སེམས་ཅན་ཐམས་ཅད་ཀྱིས།། རང་དགར་དགག་མེད་སྤྱོད་པར་ཤོག།། ཅེས་པའི་སྨོན་ལམ་གྱི་ཚིགས་སུ་བཅད་པ་འདི་རྟག་ཏུ་ཞལ་འདོན་དུ་སྐྱོར་བཞིན་ཆེད་དུ་བྱ་བ་སེམས་ཅན་གྱི་དོན་ལ་གཅིག་ཏུ་བརྩོན་པའི་འོད་ཟེར་གྱི་སྣང་བས་འཇིག་རྟེན་འདིའི་ཆེ་རྒུ་ཀུན་གྱི་ཡིད་རབ་དབང་མེད་དུ་འཕྲོག་སྟེ། རང་རང་གི་ཆེ་བསྟོད་ཞུ་བྱེད་རབ་དང་ཕུལ་དང་གྱ་ནོམ་པ་གང་ཡོད་ཀྱིས་མགོན་པོ་མཆོག་ལ་བསྙེན་བཀུར་བའི་རྣམ་གྲངས་ཟད་དུ་མེད་པ་ནི་རེ་རེ་བཞིན་བགྲང་བའི་ངལ་བ་བསྟེན་མི་དགོས་པར་རང་རེའི་མངོན་སུམ་གྱི་ཡུལ་དུ་གྱུར་བ་འདིའོ།།
ལོ་རྒྱུས་ནི་འདས་དོན་གྱི་གཏམ་རྒྱུད་ཡིན་ལ་གཏམ་རྒྱུད་ཀྱིས་གྱེར་བའི་འདས་དོན་ནི་དངོས་བྱུང་གི་འཇིག་རྟེན་ཞིག་གི་སྣང་བརྙན་ཡིན་པས། བཞུད་ཟིན་པའི་ནམ་ཟླ་ལ་རེ་སྒུག་གིས་གདུང་བ་དང་། ཤོར་ཟིན་པའི་ལང་ཚོ་ལ་ཞེན་ཆགས་ཀྱིས་བཟི་བ། ཕམ་ཟིན་པའི་ནག་ཉེས་ལ་གཡོ་རྫུན་གྱིས་འགེབས་པ་རྣམས་ནི་ནམ་མཁའ་ལ་རི་མོ་འབྲི་འདོད་ལྟར་རང་ཉིད་ངལ་བ་ཙམ་གྱི་རྒྱུ་རུ་ཟད། དེའི་ཕྱིར་བོད་རྒྱ་ནག་གི་ཆ་ཤས་ཡིན་པའི་ཁས་ལེན་ནམ་ཡང་བྱེད་མ་མྱོང་བ་ནི་ཁོང་གིས་གསུང་རྒྱུར། ཕྱི་ལོའི་གོང་གི་ལོ་ ༡༢༧ སྐབས་ང་ཚོའི་རྒྱལ་ཁབ་དབུ་བརྙེས་པ་ནས་བཟུང་ང་ཚོ་བོད་མི་ཚོས་ཕྱི་རྒྱལ་གྱི་སྟོབས་ཤུགས་ཇི་འདྲ་ཞིག་ལ་ཡང་ང་ཚོའི་བདག་དབང་སྤྲོད་རྒྱུའི་ཁས་ལེན་ནམ་ཡང་བྱེད་མྱོང་མེད། ཅེས་ལོ་རྒྱུས་ཀྱི་བདེན་པའི་ང་རོ་གཟེངས་མཐོར་བསྒྲགས་ཤིང་། འབྱུང་འགྱུར་ཁེ་ཉེན་གྱི་ལྕི་ཡང་ཞིབ་ཏུ་གཞལ་ཏེ་ད་ལྟའི་ལག་ལེན་གྱི་གོམ་ཁ་བཟང་ངན་གྱི་མཐའ་ལ་མ་ཟག་པའི་གཉིས་སྨན་དབུ་མའི་ལམ་ལ་སྣེ་ཁྲིད་དང་ལམ་སྟོན་གནང་། དབུ་མའི་ལམ་གྱིས་འདས་ཟིན་བྱུང་རབས་ཀྱི་ཐོབ་ཐང་ལ་ཧ་ཅང་གི་བློས་གཏོང་ཆེན་པོ་དང་། གལ་སྲིད་དུས་འགྱངས་བྱུང་ན་འབྱུང་ངེས་པའི་ཛ་དྲག་གི་ཉེན་ཁ་ལ་རྒྱང་གཟིགས་གནང་སྟེ། ད་ལྟའི་ས་ཆེན་པོ་འདིའི་སྟེང་དུ་འཚོ་བའི་མིའི་རིགས་ཀྱི་ཆ་ཤས་སུ་གྱུར་པའི་ང་ཚོ་བོད་པའི་རིགས་རྒྱུད་ཚོ་ཁག་འདི་ཡང་ཆོས་རིག་གི་ནང་བཅུད་མ་ཉམས་པར་གསོན་གནས་ཡུན་རིང་ཡོང་ཆེད་དུ་རང་གཞན་གྱི་མྱི་ཁའི་བར་ནས་འདི་ལྟར་ལམ་ལ་ཆས། དུས་རབས་ཀྱི་དཀྱོགས་མཚམས་མང་གཙོའི་གཟི་དཔལ་ལ་དུང་བའི་འཛམ་གླིང་གི་ལོ་ཟླའི་འཁོར་ཕྱོགས་འདི་ལྟར་གྱུར་ཞིང་། བོད་པ་ཚོའི་སེམས་ཁམས་ཀྱི་མང་གཙོའི་འདུ་ཤེས་ཀྱང་ཚད་མཐོར་ཕྱིན་པའི་སྐབས་འདིར། ‘’ངས་རང་ཉིད་གང་ཟག་མཆོག་ཏུ་གྱུར་བ་ཞིག་ཆགས་ཐུབ་པ་བྱ་རྒྱུ་དེ་ངའི་མི་དམངས་ཚོས་ངོས་ལ་དད་འདུན་དེ་ཙམ་བྱེད་པ་དེའི་དྲིན་ལན་ཡིན། ཞེས་རང་ཉིད་ཀྱི་ཡོད་རྒུ་རང་ཉིད་ལ་རེ་ལྟོས་བྱེད་པའི་མི་མང་ལ་ཕུལ་ཟིན་པའི་ཁོང་གིས་ལོ་ངོ་བརྒྱ་ཕྲག་དུ་མའི་ལོ་རྒྱུས་ཀྱི་རྒྱབ་ལྗོངས་ཅན་གྱི་དགའ་ལྡན་ཕོ་བྲང་གི་སྲིད་གཞུང་དང་དེའི་དབུ་ཁྲིད་ཀྱི་མཚན་གནས་ཡོངས་རྫོགས་འཕྲལ་ཕུགས་ཀྱི་དགོས་པ་རྒྱུ་མཚན་དུ་མར་གཟིགས་ནས་རང་གི་མང་ཚོགས་ཀྱིས་མི་འདོད་བཞིན་དུ་ཕྱིར་བསྡུ་གནང་སྟེ། རང་ཉིད་ཀྱི་ཆབ་འབངས་ཙམ་མ་ཡིན་པར་གོ་ལའི་ཁྱོན་ལ་གནས་པའི་སྐྱེ་འགྲོ་ཡོངས་ཀྱི་ཆེད་དུ། མཛད་ཁུར་ཆེན་པོ་གསུམ་ཇི་སྲིད་ནམ་གནས་ཀྱི་བར་དུ་སྐྱོང་བའི་ཐུགས་བསྐྱེད་མཛད་འཕྲིན་དགེ་བ་འདི་ལྟ་བུའི་རླབས་ཆེན་གྱི་དབུ་ཁྲིད་ནི། ལོ་རྒྱུས་ཀྱི་དེབ་ཐེར་ན་ནམ་ཡང་གཟིམ་པ་མེད་པའི་གཟི་བརྗིད་ཀྱི་ཉི་མ་ཆེན་པོ་ལགས།།
རྒྱལ་བ་སྟོན་པའི་གདུང་འཚོབ་རྗེ།།
ཁ་བ་རི་བའི་སྤྱི་ནོར་མགོན།།
ཆེར་སྙིགས་དུས་ཀྱི་ཆིག་ཐུབ་སྨན།།
ཁམས་གསུམ་བླ་མ་རྒྱལ་གྱུར་ཅིག།།
ཅེས་ ༢༠༡༡ ལོའི་ཟླ་ ༧ ཚེས་ ༥ ལ་མཇུག་གྲུབ་པར་བགྱིས་པའོ།།
མངོན་པར་བསྟོད་དོ། རྗེས་སུ་ཡི་རང་ཡོད།
ཐུགས་རྗེ་ཆེ། ཤིན་ཏུ་ཡག་པོ་ཞིག་བྲིས་གནང་འདུག།
བརྗོད་བྱ་དང་རྗོད་བྱེད་གཉིས་ཀའི་སྒོ་ནས་ལེགས་པར་དགའ་བསུ། ཚིག་འགའ་ཞིག་ལ་བདག་རང་གི་འདོད་ཚུལ་གྱིས་དཔྱད་པར་བྱ་སྟེ། ཁ་བ་རི་བའི་སྔོན་བོད་སིལ་བུར་མ་སོང་བའི་སྐད་དང་ཚིག་བཀའ་བསྟན་གསུང་འབུམ་སོགས་ན་སི་ཏུས་གཟིགས་ཏེ། བདག་སྒྲ་ལ་པ་ཡིག་གཅིག་པུ་ངོས་འཛིན། དེ་བཞིད་བོད་ནུབ་ཕྱོགས་པས། བདག་སྒྲ་ལ་ལ་པ་ཡིག་གཅིག་པུ་བཀོལ་བ་བོད་སིལ་བུར་མ་སོང་བའི་སྒྲ་དེ་ལུས་པ་ལྟར། ཁ་བ་རི་བ་ཞེས་པ་ལ་ཁ་བ་རི་པ་ཞེས་བཀོལ། བདག་སྒྲ་མ་ཡིན་ཀྱང་། རིམ་བར་གྱི་འབྲེལ་བ་ བཀའ་བསྟན་སོགས་ན་གསལ་བ་ལྟར་། རིམ་པར་གྱི་འབྲེལ་པ་ཞེས་པ་བདག་གིས་འདོད། གཞན་ཡང་གནང་བ་ཞེས་པ་ལ་བོད་ནུབ་ཕྱོགས་པས་མཛད་དང་སྩོལ་དང་སྩལ་སོག་བཀོལ་བ་བཀའ་བསྟན་ན་ཡོད་པའི་ཚིག་དག་དང་མཐུན། ཡོང་ཞེས་པ་ངའི་ལུང་པར་ཡང་བཀོལ། འོན་ཀྱང་ཁམས་ཡུལ་དུ་འོང་ཞེས་བཀོལ་གྱི་་ཡོང་ཞེས་མི་བཀོལ་ཞེས་པ་ཐོས། དེ་བདེན་པ་ཡིན་ན། འོང་ཞེས་པ་བཀའ་བསྟན་དང་མཐུན་པར་མ་ཟད་བོད་ཡུལ་གཅིག་ཏུ་སྒྲིལ་བའི་སྐད་ལ་ཡང་ཕན་ནོ། སེར་མོ་བ་ ནང་བ་ དག་ལ་སེར་མོ་པ་དང་ནང་པ་ཞེས་འདོན་ཅིང་འབྲི་ཞིང་འདོན་ན་བོད་སྐད་གཅིག་འགྱུར་འོང་བར་ཕན། རྣོ་དབལ་ཅིས་མ་ཡིན། ཞེས་པའི་དབལ་གྱི་དོན་བདག་གིས་མ་གོ། ཡོད་རྒུ་ཞེས་པ་ད་ཡིག་སྔོན་འཇུག་དེ་རའམ། ས་རུ་འབོད་པ་ལས་འདིར་ཡོད་དགུ་ཞེས་པ་ཡོད་རྒུར་གྱུར་པ་མཁྱེན་པར་འཚལ་ལོ།།
ཐུགས་རྗེ་ཆེ། དངོས་གནས་རྩོམ་ཡིག་ཡག་པོ་བྲིས་འདུག མགོ་ནས་མཇུག་བར་ཏུ་བཀླགས་པ་ཡིན། བཀླག་པའི་ཆུ་ཚོད་བཏང་གོ་ཆོད་སོང་།