འཇམ་གཅེས།
མི་ཡུལ་ས་མཐར་འགྲིམ་དགོས་བསྐོས་པའི་ལས།།
རང་ཡུལ་བདེ་སྡུག་བསམ་ཤེས་རིགས་ཀྱི་འགན།།
རང་གཞན་གང་གི་ཡུལ་དུ་གནས་བཅས་རུང་།།
གཞན་དབང་སྟབས་བསྟུན་ཡིན་པར་ཀུན་ནས་མཚུངས།།
དགྲ་གཉེན་མ་ནོར་དགོས་པ་གནས་ལུགས་ཞིག །
ཀུན་ལ་མཉམ་པར་འཛིན་དགོས་སྟོན་པའི་བཀའ།།
བཀའ་དང་གནས་ལུགས་འགལ་འདུར་མ་འཛིན་པར།།
གཉིས་ཀར་གཅེས་སྤྲས་དགོས་པ་ཤིན་ཏུ་གལ།།
དགྲ་ལ་དགྲ་རུ་འཛིན་ནས་རྒོལ་བ་དང་།།
གཉེན་ལ་གཉེན་དུ་སེམས་ནས་སྐྱོང་བ་གཉིས།།
འཇིག་རྟེན་མི་ཆོས་ལུགས་དང་མཐུན་ན་ཡང་།།
དམ་པའི་ལྷ་ཆོས་ལུགས་དང་རྒྱབ་འགལ་ཡིན།།
དགྲ་ལ་སྡང་དང་གཉེན་ལ་ཆགས་པ་གཉིས།།
ཕྱི་ཚུལ་མི་གཅིག་སོ་སོར་ཡིན་ན་ཡང་།།
རང་ཉིད་ཕྱིར་དུ་རང་ཉིད་ཕུང་བ་ནི།།
ཞིབ་ཏུ་བརྟགས་ན་དོན་གཅིག་ཁོ་ནར་ངེས།།
ཆོས་ལྡན་བོད་པའི་རིགས་ཞིག་ཡིན་གྱུར་ན།།
དམ་ཆོས་རིན་ཐང་སེམས་ནས་མ་བོར་དགོས།།
བཙན་པོའི་རྒྱུད་འཛིན་དྭངས་མ་ཡིན་གྱུར་ན།།
རིགས་ལ་བཅངས་པའི་ལྷག་བསམ་མ་བོར་དགོས།།
སྤྱི་མཐུན་བདེ་སྐྱིད་དཔལ་ལ་སྤྱོད་འདོད་ན།།
ཆིག་སྒྲིལ་འདུན་པར་ནམ་ཡང་བག་ཡོད་དགོས།།
རྣམ་དཔྱོད་རལ་གྲི་དགྲ་ལ་གཡུག་འདོད་ན།།
དུས་འགྱུར་གོ་ཁྲབ་བཙན་པོ་ངེས་པར་གྱོན།།
ཆོས་སྲིད་ལུགས་གཉིས་ལྡན་པའི་གངས་ཅན་པས།།
དེ་གཉིས་འགལ་འདུར་བསམ་སྦྱོར་མང་དྲག་ན།།
ནམ་ཞིག་མཚན་གཞིར་མེད་པའི་མི་རིགས་ཞིག།
ས་སྟེང་འདི་རུ་བསྐྲུན་པར་ཐེ་ཚོམ་ཅི།།
རང་ཉིད་འཇིག་རྟེན་བྱེད་པོར་རློམས་སེམས་ཀྱིས།།
དུས་ཀྱི་འགྱུར་བར་ཁ་གཏད་ལངས་པ་ནི།།
བླུན་པོ་ཞིག་གི་བྱ་སྤྱོད་ཡིན་པ་ལས།།
དཔའ་མཛངས་ཅན་གྱི་སྤྱོད་ཚུལ་ཅིའི་ཕྱིར་ཡིན།།
མང་དུ་བཤད་ན་སྙིང་དོན་མི་རྟོག་པས།།
རེ་ཞིག་སྨྱུག་གུའི་གར་རྩེད་འདི་ནས་འཇོག།
གནས་ལུགས་ལྡན་མིན་གཟུར་གནས་བློ་ཡིས་དཔྱོད།།
ཁྱི་སྤྱང་ངུ་ཟུག་དག་ལ་འགྲེལ་བ་མེད།།
མི་ཡུལ་ས་མཐའ་འགྲིམ་པའི་སྐྱེས་བུ་འགས་
དགྲ་གཉེན་བཅེས་སུ་བཟུང་བའི་གནས་ལུག་ཞིག་
ཁ་ནས་གང་བྱུང་རྒྱུན་དུ་བཤད་མོས་ཀྱང་
རང་གི་དགྲ་གཉེན་བཅེས་སུ་བཟུང་བར་འགྱུར་