རིགས་སློབ། མཚོ་སྒོ་འཇམ་དབྱངས།
དེ་རིང་ནི་སྤྱི་ལོ་གསར་པའི་ཚེས་བཞི་ཡིན་ལ་གདན་ས་ཆེན་པོ་སེ་ར་ཐེག་ཆེན་གླིང་དུ་༸གོང་ས་སྐྱབས་མགོན་ཆེན་པོ་མཆོག་གི་བྱང་ཆུབ་ལམ་རིམ་ཆེན་མོའི་གསུང་ཆོས་གྲུབ་པའི་རྗེས་ཀྱི་ཉིན་གཉིས་པ་དེ་ཡང་ཡིན།
སྤྱིར་བོད་མི་གཙོ་བོར་གྱུར་པའི་ནང་པའི་རྒྱལ་ཁབ་ཁག་གིས་གནས་མཆོག་རྡོར་གདན་གཙོས། རྒྱ་གར་གྱི་གནས་ཆེན་ཁག་ཏུ་མཇལ་སྐོར་དུ་བསྐྱོད་རྒྱུ་ནི་རྣམ་འདྲེན་བཞི་པ་གཽ་ཏམ་བུ་དྷ་དབུས་བསྟན་འཛིན་གྱི་སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་གནས་མཆོག་འདི་དག་མཇལ་ཏེ། དོན་ཆེན་པོ་གཉིས་འགྲུབ་པའི་ཆེད་དུ་ཡིན་པ་བཤད་མི་དགོས་པ་ཞིག་ཡིན།
དང་པོ་ནི་ང་ཚོས་དུས་རྒྱུན་འཚོ་བའི་ནང་ལས་ཀ་གང་བྱས་དགེ་བ་ལས་མི་དགེ་བ་ཆེས་ཆེ་བས་བསླད་དེ། སྡིག་སྒྲིབ་ཀྱི་ནུས་པ་གོང་འཕེལ་དུ་ཕྱིན་པ་དང་སྔར་བསགས་ཀྱི་བསོད་ནམས་ཉམས་པ་རྣམས་སངས་རྒྱས་ཀྱི་ཞབས་ཀྱིས་བཅགས་པའི་གནས་མཆོག་དེ་དག་ལ་མཆོད་ཅིང་སྐོར་བ་བྱེད་པ་ཙམ་གྱིས་བསོད་ནམས་གོང་དུ་འཕེལ་ཏེ་སྡིག་སྒྲིབ་ཀྱི་ནུས་པ། ཇེ་ཆུང་དུ་ཕྱིན་ཏེ་སངས་རྒྱས་ཀྱི་རྒྱུར་འགྱུར་བ་དང། གཉིས་ནས། གནས་ཆེན་དེ་དག་མཇལ་སྐོར་དུ་ཕྱིན་པའི་མཐུ་ལས་རང་རྒྱུད་ལ་སངས་རྒྱས་ཀྱི་བྱིན་རླབས་ཀྱི་ནུས་པ་འཇུག་སྟེ་ཚེ་འདིའི་ཕྱི་ནང་གི་བར་ཆད་ཞི་བ་དང། ཚེ་ཕྱི་མར་སངས་རྒྱས་ཀྱི་བསྟན་པ་རིན་པོ་ཆེ་དང་མཇལ་ཏེ་ཚེ་རབས་དུ་མར་སངས་རྒྱས་ཀྱིས་རྗེས་སུ་གཟུང་བའི་ཆེད་དུའང་ཡིན།
གུས་པར་མཚོན་ན་གནས་མཆོག་དེ་དག་ལ་མཇལ་སྐོར་དུ་བསྐྱོད་རྒྱུའི་གོ་སྐབས་ནི་ངོ་མ་ཉིན་མོའི་སྐར་མ་དང་ཚེ་འདིར་ཐེངས་གཅིག་ཙམ་རེད་ཅེས་བཤད་ནའང་འུད་ཤོབ་ཏུ་འགྲོ་བར་མི་སེམས། ཡིན་ཡང་ད་ཆ་རྡ་ས་རིགས་ལམ་སློབ་གཉེར་ཁང་དུ་གཞུང་ཆེན་ལྔའི་ཡ་རྒྱལ་ཕར་ཕྱིན་ཐོག་བསླབ་པ་མཐར་སོན་པ་དང་། སློབ་གྲྭའི་ཡིག་ཚང་ངོས་ནས་འགྲོ་གྲོན་བཏང་སྟེ་རྒྱ་གར་གྱི་གནས་ཆེན་ཁག་གིས་གཙོས། བལ་ཡུལ་གྱི་གནས་ཆེན་ཁག་ཏུ་སྐྱོད་པའི་ལམ་སྲོལ་བཟང་པོ་ཞིག་ཡོད་པ་ལྟར། བདག་གིས་ཀྱང་སྐལ་བཟང་གི་གོ་སྐབས་དེ་དམ་འཛིན་ཐོག་འཛིན་གྲོགས་དང་ལྷན་དུ་གནས་མཆོག་དེ་དག་ལ་མཇལ་སྐོར་དུ་བསྐྱོད་པ་ཡིན།
སྤྱིར་ཕྱི་ཕྱོགས་སུ་མི་མང་པོ་དང་མཉམ་དུ་འགྲུལ་སྐྱོད་བྱ་རྒྱུ་དེ་གང་ཟག་སོ་སོའི་ཁམས་དང་དགོས་པའི་དབང་གིས་ཡིན་ལ་དོན་སྙིང་ཡང་མི་འདྲ་བ་མང་དག་ཅིག་ཡོད་ངེས་རེད། ང་དང་འཛིན་གྲོགས་རྣམས་ཀྱི་སྐབས་དེའི་འགྲུལ་སྐྱོད་ནི་ངོ་མ་སྤྲོ་སྣང་དང་དོན་སྙིང་ལྡན་པའི་འགྲུལ་སྐྱོད་དང་པོ་དེ་ཡང་ཡིན་ལ་མཐའ་མ་ལའང་བརྩི་ཆོག་པ་ཞིག་ཡིན།
ནམ་རྒྱུན་སློབ་གྲྭའི་སྒོ་ར་ཆུང་ཆུང་དེའི་ནང་སོ་སོའི་འཛིན་གྲོགས་གཅིག་པ་ལས་གཞན་ལ་ཆ་རྒྱུས་དེ་ཙམ་མེད་པའི་མི་ཞིག་ཕྱི་ཕྱོགས་སུ་དངོས་སུ་བསྐྱོད་དེ་དཀར་ཆ་དོད་པའི་ཐོག་བརྩེགས་ཁང་ཆེན་གྱི་སྒྱུ་རྩལ་གྱི་བཀོད་པ་དང་། ཕྱིའི་ཁོར་ཡུག་གི་རྣམ་པ་རྣམས་འདྲེན་བྱེད་དབང་པོའི་ལོངས་སྤྱོད་ཀྱི་བདུད་རྩིར་གྱུར་དུས་ངོ་མ་སེམས་ནང་དགའ་སྐྱོ་འདྲེས་མའི་ཚོར་བས་ཡོངས་སུ་གཏམས་ཏེ་ཕྱི་ཕྱོགས་ཀྱི་འཇིག་རྟེན་ཟེར་བ་འདི་རང་ཉིད་ཀྱི་བསམ་ཚོད་ལས་འདས་པ་ཞིག་ཡིན་པ། དུས་དེ་ནས་གསལ་པོར་ཤེས་རྟོགས་བྱུང་ལ། ཕྱི་རྒྱལ་གྱི་ཡུལ་སྐོར་བ་དེ་དག་ཅི་ཕྱིར་འཛམ་གླིང་གི་ས་ཕྱོགས་གང་སར་ཡུལ་སྐོར་དུ་སྐྱོད་དགོས་པ་དེ་ཡང་སེམས་ཀྱི་གནད་དོན་ཙམ་མིན་པར་ཕྱི་ཕྱོགས་ཀྱི་ཡུལ་མིའི་གོམས་གཤིས་དང་ཡུལ་ལྗོངས་ཀྱི་བཀོད་པ་སོགས་ལ་ཚོར་སྡུར་བྱས་ཏེ། རང་ཉིད་ཀྱི་མཐོང་རྒྱ་དང་ཐོས་རྒྱ་སོགས་གོང་འཕེལ་དུ་གཏོང་གི་ཡོད་པ་དེར་ངེས་ཤེས་བྱུང་།
མདོར་ན་རང་ཉིད་ལ་དུས་ཚོད་དང་གྲོན་དངུལ་འདང་ངེས་ཤིག་ཡོད་ཚེ་ཕྱི་ཕྱོགས་སུ་གནས་མཇལ་དང་སྤྲོ་གསེང་ལ་སྐྱོད་རྒྱུ་ནི་ངོ་མ་སྤྲོ་སྣང་དང་། དགེ་རྒན་གྱིས་བཤད་འཁྲིད་དང་དཔེ་དེབ་བལྟ་ཀློག་ལས་འདས་པའི་སློབ་སྦྱོང་ཞིག་ཡིན་པ་ཁྱེད་ཀྱིས་ཤེས་རྟོགས་བྱེད་ཐུབ། རྡོར་གདན་གཙོས་རྒྱ་གར་གྱི་གནས་ཆེན་དེ་དག་གཞུང་གི་གནའ་རྫས་གཅེས་ཉར་ཁང་གི་བལྟ་སྐྱོང་འོག་ལ་ཡོད་པས་རིམ་པས་བཅོས་སྒྱུར་བྱེད་ཀྱིན་འདུག་པས། དུས་རབས་གསུམ་པ་དང་བཞི་པ་ཡས་མས་ཀྱི་སྒྱུ་རྩལ་གྱི་བཀོད་པ་རེད་ཟེར་དུས་ངོ་མ་སེམས་ནང་བརྗོད་དུ་མེད་པའི་དོགས་ཆར་དང་། འདི་འདྲ་ཨེ་ཡིན་སྙམ་པའི་དྲི་བ་མང་དག་ཅིག་བདག་གི་སྣང་བར་ངམ་ངམ་ངང་གིས་ཡོང་གི་འདུག
འདིའི་ནང་ནས་ཀྱང་རྒྱ་གར་མོ་བྷེའེ་(Mumbia)གྲོང་ཁྱེར་ནང་ཆགས་པའི་གྲུབ་ཆེན་བརྒྱད་ཅུའི་གྲུབ་ཁང་དང་མ་ཧཱ་ར་ཤི་ཌའི་(Maharashtra)ནང་ཡོད་པའི་ཨ་ཇེན་ཏཱ་དང་ཨི་ལོ་རཱའི་( Ajanta Ellora)གྲུབ་ཁང་དེ་དག་དུས་རབས་གཉིས་པའི་ནང་སྐྱེས་བུ་དམ་པ་རྣམས་ཀྱི་བྱུས་བཀོད་ལས་བྱུང་བའི་སྒྱུ་རྩལ་གྱི་ལག་རྗེས་གསོན་པོ་ཞིག་ཡིན་ལ། གྲུབ་ཁང་དེ་དག་གི་ནང་ཆེས་ཕུལ་དུ་བྱུང་བའི་སྒྱུ་རྩལ་གྱི་རྣམ་པ་འབུར་དུ་ཐོན་པའི་རྡོ་བརྐོས་ཀྱི་སྐུ་བརྙན་གྱི་རིགས་མང་དག་ཅིག་མཇལ་རྒྱུ་ཡོད་པ་དེ་དག་དུས་སྐབས་དེའི་སྐབས་ཀྱིས་མིས་བཟོ་སྐྲུན་བྱས་པའི་སྒྱུ་རྩལ་རེད་ཟེར་ན། ངོ་མ་བློ་ཡུལ་དུ་ཤོང་དཀའ་ལ་དེ་བས་ཀྱང་ཡིད་ཆེས་བྱེད་དཀའ་བ་ཞིག་ཏུ་གྱུར། མ་ཟད་དུས་སྐབས་དེའི་ནང་ཆོས་ལུགས་གྲུབ་མཐའི་རྩོད་རྙོག་ལས་བྱུང་བའི་ཉམས་ཆག་གི་འཇུག་འབྲས་དེ་དག་མཐོང་དུས་སེམས་ན་ཟུག་གིས་མཆི་མས་བརླན་ཞིང་འཕང་སེམས་ཀྱི་གཡོ་འགུལ་ཡང་ཚད་མེད་ཐེབས་བྱུང་།
རྒྱ་གར་ནང་གི་གནས་ཆེན་ཁག་ལེགས་པར་གྲུབ་པ་དང་རྣམ་འདྲེན་བཞི་པ་ཤཱཀྱའི་རྒྱལ་པོ་སྐུ་བལྟམས་པའི་ཡུལ་བཀྲ་ཤིས་ལུམ་བུའི་ཚལ་(དེང་སང་ལུམ་བི་ནི་)མཇལ་རྒྱུ་བྱུང་ལ། དེ་ནི་བལ་ཡུལ་ནང་གི་གནས་མཇལ་གྱི་ཐོག་མའང་ཡིན།
སྤྱིར་འཛམ་གླིང་གི་ལོ་རྒྱུས་ནང་རྒྱ་གར་ནི་རྒྱ་ནག་གཙོ་བོར་གྱུར་པའི་དེང་གི་ནང་པའི་ཡུལ་གྲུ་ཀུན་གྱི་ནང་ཆོས་ཀྱི་འབྱུང་རྩ་ཡིན་ལ། བལ་ཡུལ་ནང་དུའང་དར་ཁྱབ་བྱུང་བ་དང་ཕྱིས་སུ་རིམ་པས་ཉམས་རྒུད་བྱུང་སྟེ། དུས་རབས་བདུན་པའི་ནང་སློབ་དཔོན་རིན་པོ་ཆེ་བོད་ལ་ཕེབས་པ་དང་ལམ་ཞོར་དུ་བལ་ཡུལ་གྱི་ས་ཕྱོགས་མང་པོར་ཞབས་ཀྱིས་བཅགས་སྟེ་དེའི་གདུལ་བྱ་རྣམས་ལ་ཟབ་རྒྱས་ཆོས་ཀྱི་བདུད་རྩི་ཇི་སྙེད་ཅིག་བཀའ་བསྩལ་པ་དང་དུས་ཚུངས་སུ། བལ་ཡུལ་གྱི་ས་ཕྱོགས་མང་པོར་སློབ་དཔོན་རིན་པོ་ཆེ་རང་ཉིད་ཀྱིས་སྒོམ་སྒྲུབ་གནང་སའི་ས་ཆ་རྣམས་ད་ཆ་བལ་ཡུལ་ནང་གི་རྩ་ཆེའི་གནས་མཆོག་ཏུ་གྱུར་ཏེ། མི་རིགས་འདྲ་མིན་གྱི་དད་ལྡན་མང་པོ་མཇལ་སྐོར་དུ་ཡོང་བ་དང་དེའི་གཡས་ཡོན་གྱི་དགོན་པ་དག་ལ་སེམས་ནུས་ཡོད་རྒུས་ཕྱག་མཆོད་འབུལ་བྱེད་པ་མཐོང་དུས་ངོ་མ་སེམས་ནང་དགའ་གུས་ཡིད་རངས་ཀྱི་སྤྲོ་བ་གོང་དུ་བརྟས། ཡིན་ཡང་གནས་མཆོག་དེ་དག་གི་གནས་བབ་དང་འཛིན་སྐྱོང་གང་འདྲ་ཡོད་མེད་རང་ཉིད་ཀྱི་ངོས་ནས་ཉུལ་ཞིབ་བྱས་པ་རྒྱུད་དེ་དག་གི་གནས་བབ་རྒྱ་གར་དང་བསྡུར་ན་ཧ་ཅང་ཞན་པོ་འདུག
སྤྱིར་མི་རིགས་གང་ཞིག་ཡིན་ཡང་སོ་སོའི་འཚོ་གནས་ཀྱི་དགོས་མཁོ་བབ་བསྟུན་ཡོང་ཆེད་རིག་གནས་ངང་ཚུལ་དང་། བསམ་བློའི་འཁྱེར་སོ་འདྲ་མིན་སྣ་ཚོགས་ཤིག་ཡོད་པ་ལྟར་བལ་ཡུལ་གྱི་མི་མང་རྣམས་ལ་ཡང་དེ་ལྟར་ཡོད་པ་སྨྲོས་མེད་རེད། ཡིན་ཡང་བལ་ཡུལ་གྱི་གནས་མཆོག་དེ་དག་བརྒྱ་ཆ་བརྒྱད་ཅུ་ཙམ་ཞིག་ཁྱིམ་ཚང་སྒེར་པའམ་ཡང་ན་ཚོགས་པ་རེ་འགས་བདག་ཏུ་བཟུང་བ་མ་ཟད་གཞུང་ཕྱོགས་ནས་ཆོས་ལུགས་ལ་འཛིན་པའི་ལྟ་སྐྱོང་དང་། ཡུལ་མིའི་ཆོས་ལུགས་ཀྱི་གནས་བབ་ཞན་པོ་ཡོད་པ་དེ་ནས་གསལ་པོར་རྟོགས་ཐུབ། དཔེར་ན། ནང་མིའི་ཆོས་ལུགས་ཧིན་དྷུ་ཡིན་ཡང་ཕྱི་ཕྱོགས་སུ་ནང་པ་ཡིན་ཁུལ་གྱིས་གནས་མཆོག་དེ་དག་ལ་བདག་སྐྱོང་བྱེད་པ་ལྟ་བུ་རེད།
མདོར་ན་བལ་ཡུལ་ནང་གི་གནས་མཆོག་དེ་དག་ཕྱིའི་རྣམ་པའི་ཐོག་ནས་བོད་པའི་ནང་ཆོས་དང་། འབྲེལ་འདྲིས་ཆེ་ཡང་དོན་དངོས་ཐོག་ཧིན་དུའི་ཆོས་ལུགས་ཀྱི་འཚོ་བའི་གོམས་གཤིས་དང་ཡོངས་སུ་འདྲེས་ཏེ་ཁྱིམ་ཚང་དང་ཚོགས་པ་དེ་དག་གི་འཚོ་བའི་གཞི་མར་གྱུར་ཏེ་དད་ལྡན་གྱི་གནས་མཇལ་བ་མང་པོའི་སེམས་སུ་ན་ཟུག་གི་གཟེར་ཁ་སྟེར་བ་མ་ཟད་བརྗེད་པར་དཀའ་བའི་ལོ་རྒྱུས་ཀྱི་བྱུང་བ་བརྗོད་དུ་འཇུག་གི་ཡོད།