ཤ་ཀླན་འཇམ་དབྱངས་གྲགས་པ།
ཕ་མའི་རེ་བ་རླུང་ལ་བསྐུར།།
བླ་མའི་གདམས་ངག་ཐོད་ལ་བོར།།
འབངས་ཀྱི་དད་པ་ཆུ་རུ་བསྐྱུར།།
ང་ནི་གཞན་བརྟེན་སྲིན་འབུ་ཞིག །
གྲོགས་ཀྱི་དམ་ཚིག་རྡོག་པས་བརྫིས།།
རྒན་གྱི་ཁ་ཏ་རྣ་རྒྱབ་བཏང༌།།
གཉེན་མིའི་རེ་བཞག་ཐང་ལ་བརྡབས།།
ང་ནི་གཞན་བརྟེན་སྲིན་འབུ་ཞིག །
དགྲ་ཡི་གདུག་རྩུབ་ངས་མ་མཐོང༌།།
གཉེན་གྱི་དྲོད་ཁོལ་ངས་མ་ཚོར།།
དགྲ་གྲོགས་དབྱེ་བ་ངས་མ་ཕྱེད།།
ང་ནི་གཞན་བརྟེན་སྲིན་འབུ་ཞིག །
ཁྲིམས་དང་སྡོམ་པའི་དྲི་མི་གོས།།
དཀོར་ནག་ལྕགས་ལ་ཁ་མི་འབྲལ།།
ཉོན་མོངས་པ་ཡི་ཁོལ་དུ་གྱུར།།
ང་ནི་གཞན་བརྟེན་སྲིན་འབུ་ཞིག །
ཕ་མའི་རྔུལ་ཁྲག་འཛེམ་མེད་འཇིབ།།
དད་འབངས་དཀོར་རྫས་ཆད་མེད་བཟའ།།
བླ་སློབ་དམ་ཚིག་སྣང་མེད་འགལ།།
ང་ནི་གཞན་བརྟེན་སྲིན་འབུ་ཞིག །
ས་ཡི་གོ་ལའི་དཀྱིལ་དབུས་ན།།
དྲང་སྲོང་སྨྲ་བའི་ནགས་ཚལ་དུ།།
རང་མཉམ་སྐྱེས་བོའི་དཔུང་གྲལ་ལ།།
ང་ནི་གཞན་བརྟེན་སྲིན་འབུ་ཞིག །
བརྫུ་ཡིས་གཡོགས་ཤིང་སྟོད་པས་བརྒྱན།།
དག་སྣང་སྦྱངས་ཤིང་དང་བས་མདུད།།
ལུས་རྒྱན་དེ་དག་ཕར་བསལ་ན།།
ང་འདྲའི་གཞན་བརྟེན་སྲིན་འབུ་མང༌།།
༢༠༠༩ ༡༡ ༢༥ཉིན་བྲིས།
ང་དང་ཁྱོད་འདྲའི་གཞན་བརྟེན་ཉུང་།
ཕ་མའི་རེ་བ་སྙིང་ལ་བཅངས། །
བླ་མའི་གདམས་ངག་ཐོད་ལ་བརྒྱན། །
འབངས་ཀྱི་དད་པ་དབྱར་ཆུ་རྒྱས། །
ང་དང་ཁྱོད་འདྲའི་གཞན་བརྟེན་ཉུང་། །
ང་ཁྱོད་བར་གྱི་སྐུ་རྩེད་ཡིན།
གཅིག་གིས་གཅིག་ལ་མ་བརྟེན་པར། །
འཇིག་རྟེན་འདི་ན་འཚོལ་བ་དཀའ། །
བརྟེན་འབྲེལ་འདི་ལས་འདས་པའི་མི། །
སྲོག་ལྡན་སུ་གང་ཡོད་མ་ལགས། །