ཁྲིམས་རྩོད་པ་ཟུར་བ་ཕུར་བུ་རྡོ་རྗེ།
ཕྱི་ལོ་༢༠༡༡ ལོའི་ཟླ་༣ པའི་ཚེས་༡༤ ཉིན་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས་ཞེས་བཀའ་ཕེབས་ཡོད། དེར་བརྟེན། ༧གོང་ས་མཆོག་གིས་ཆབ་སྲིད་ཀྱི་འགན་དབང་མི་བཞེས་རྒྱུའི་ཐུགས་ཐག་བཅད་པ་དེར་གཞིས་བྱེས་བོད་མི་ཡོངས་ལ་སེམས་འཚབ་བྱུང་བ་ཇི་བཞིན་དུ་བོད་མི་མང་སྤྱི་འཐུས་ལྷན་ཚོགས་ནས་གསོལ་བ་ཕུར་ཚུགས་བཏབ་པ་དེ་ནི་ཧ་ཅང་གི་དགོས་ངེས་ཤིག་དང་བསྟོད་བསྔགས་བྱེད་འོས་པ་ཞིག་ཀྱང་རེད།
ད་དུང་ཡིན་ནའང་བོད་ཀྱི་ཆབ་སྲིད་སོགས་གང་ཅིའི་དངོས་ཡོད་གནས་སྟངས་ལ་གཞིགས་ཏེ་ཚོགས་ཆེན་དང་གྲོས་ཚོགས་ཀྱི་ངོས་ནས་བསྐྱར་དུ་བོད་མིའི་དབུ་ཁྲིད་ཀྱི་ཐུགས་འགན་བསྐྱར་བཞེས་ཡོང་བའི་གསོལ་འདེབས་ནན་ཞུ་དགོས་པ་གལ་ཆེན་དུ་མཐོང་།
གལ་སྲིད་༧གོང་ས་མཆོག་གིས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་རྩ་བ་ནས་མ་གནང་ཚེ་བཙན་བྱོལ་བོད་གཞུང་གི་འཛིན་སྐྱོང་དབུ་ཁྲིད་ཀྱི་འགན་དབང་དེ་རང་བཞིན་གྱིས་བཀའ་བློན་ཁྲི་པར་ཡོད་དགོས།
ད་ཡོད་བཅའ་ཁྲིམས་དོན་ཚན་༥༥ རུ། ཁྲིམས་ལུགས་དང། སྒྲིག་གཞི་རྣམས་ཀྱི་འཆར་ཟིན་སྤྱི་འཐུས་ལྷན་ཚོགས་ཀྱིས་གཏན་འབེབས་ཟིན་འཕྲལ་༧གོང་ས་མཆོག་གིས་ཆོག་མཆན་བསྩལ་ཚེ་ཁྲིམས་ཡིག་ཏུ་རྩ་འཛིན་བྱ་རྒྱུ་ཞེས་བཀོད་པ་དང་། དེ་ནི་༧གོང་ས་མཆོག་ནི་འཛིན་སྐྱོང་གི་དབུ་ཁྲིད་ཡིན་པའི་རྒྱུ་མཚན་གྱིས་རེད། འོན་ཀྱང་ཐེངས་འདིའི་བཅའ་ཁྲིམས་བསྐྱར་བཅོས་ཟིན་བྲིས་སྙན་ཐོ་ལྟར་ན་༧གོང་ས་མཆོག་གི་ཚབ་ཏུ་སྤྱི་འཐུས་ཚོགས་གཙོས་མིང་རྟགས་བཀོད་ཚེ་ཁྲིམས་ཡིག་ཏུ་རྩ་འཛིན་བྱ་རྒྱུ་ཞེས་བཀོད་འདུག སྤྱིར་བཏང་འཛམ་གླིང་མང་གཙོའི་འགྲོ་ལུགས་ལྟར་ན། འཛིན་སྐྱོང་དབུ་ཁྲིད་ཀྱིས་མིང་རྟགས་འགོད་དགོས་པ་ལས་སྤྱི་འཐུས་ཚོགས་གཙོས་མིང་རྟགས་བཀོད་སྲོལ་མེད། སྲིད་འཛིན་ལམ་ལུགས་དང་གྲོས་ཚོགས་ལམ་ལུགས་ཀྱི་རྒྱལ་ཁབ་གང་ཡིན་ཡང་ཁྲིམས་ལུགས་གཏན་འབེབས་ཀྱི་མཐའ་མིའི་མིང་རྟགས་དེ་འཛིན་སྐྱོང་དབུ་ཁྲིད་ཀྱིས་འགོད་རྒྱུ་ལས་སྤྱི་འཐུས་ཚོགས་གཙོས་འགོད་སྲོལ་མེད། རྒྱ་གར་ལ་མཚོན་ན་སྤྱི་འཐུས་ཚོགས་གཙོ་དེ་ཕར་ཞོག་འཛིན་སྐྱོང་གི་སྣེ་མོ་བ་གཙོ་བོ་སྲིད་བློན་ལའང་མཐའ་མའི་མིང་རྟགས་འགོད་རྒྱུའི་དབང་ཆ་མེད་པར་སྲིད་འཛིན་གྱིས་འགོད་ཀྱི་ཡོད། སྲིད་འཛིན་ལམ་ལུགས་ལྟ་བུ་ཡིན་ན་སྲིད་འཛིན་གྱིས་མཚན་རྟགས་འགོད་དགོས་པ་ཡིན།
ཡང་ད་ཡོད་བཅའ་ཁྲིམས་དོན་ཚན་༢༡ ནང་། སྐབས་བཅུ་གཅིག་པའི་བོད་མི་མང་སྤྱི་འཐུས་ལྷན་ཚོགས་ཀྱིས་བཅའ་ཁྲིམས་འདི་གཏན་ལ་ཕབ་པའི་སྐབས་སུ་དགོས་པ་་རྒྱུ་མཚན་ཆེན་པོ་མཐོང་ནས་བཅའ་ཁྲིམས་ནང་བཀའ་བློན་ཁྲི་པའམ་བཀའ་བློན་གྱི་ལས་ཁུར་དུས་ཡུན་གཉིས་བསྟུད་མར་གནང་རྗེས་བར་མཚམས་འཇོག་དགོས་པ་གསལ་བོར་བཀོད་ཡོད་པ་རེད། དེ་ནི་གཞི་རིམ་མང་གཙོའི་རྩ་ཆེའི་ལྟ་གྲུབ་གཞི་ལ་བཞག་པ་ཞིག་དང་། དེང་གི་དུས་སུ་ཚད་ལྡན་མང་གཙོའི་དཔེ་ལྟ་ས་ཨ་རི་ལ་མཚོན་ནའང་སྲིད་འཛིན་གྱི་ཞབས་ཞུ་དུས་ཡུན་བསྟུན་མར་སྐབས་གཉིས་ལ་མ་གཏོགས་ཞུ་གནང་གིན་མེད་པ་རྩ་ཁྲིམས་ནང་གསལ་བོར་བཀོད་ཡོད། འཛིན་སྐྱོང་དབང་ཚད་ལ་དུས་ཡུན་གྱིས་ཚོད་འཛིན་མ་བྱས་ན་མང་གཙོ་ལྟ་གྲུབ་དང་མི་མཐུན་པ་དང་དབང་ཆ་རུལ་སུངས་སུ་འགྱུར་རྒྱུའི་ཉེན་ཁ་མཐོང་ནས་དུས་ཡུན་གཏན་འཁེལ་བྱས་པ་ཞིག་རེད། ཆབ་སྲིད་འཛིན་སྐྱོང་གི་དུས་ཡུན་ལ་ཚོད་འཛིན་བྱས་པ་དེ་ནི་མང་གཙོའི་ལམ་ལུགས་ཁྲོད་གང་ཅིའི་ཐད་ནས་གལ་ཆེན་པོ་ཡིན་པ་སྨྲས་མ་དགོས།
བཀའ་ཤག་ནི་ཆེས་མཐོའི་འཛིན་སྐྱོང་གི་དབང་འཛིན་གཅིག་པུ་དེ་ཡིན་སྟབས། དེ་དང་དབང་ཚད་མཉམ་པའི་སྟངས་འཛིན་བྱེད་མཁན་མེད་རྐྱེན་དུས་ཡུན་ལ་ཚད་བཀག་ཡོད་དགོས་པ་ཧ་ཅང་གལ་ཆེན་ཡིན། དཔེར་ན། འཛིན་སྐྱོང་དབང་འཛིན་ལ་དུས་ཡུན་ཚད་བཀག་མེད་པ་ཡིན་ན། དངོས་ཤུགས་ནས་འོས་བསྡུའི་ལས་རིམ་ལ་སྟངས་འཛིན་དོ་ཕོག་འབྱུང་གིན་ཡོད་པ་སྲིད་དོན་ཉམས་ཞིབ་ཚོས་བཤད་འདུག དབྱིན་ཇི་དང་རྒྱ་གར་ལྟ་བུ་སྲིད་དོན་ཚོགས་པས་གཞུང་འཛིན་ལ་ཁ་གཏད་བྱས་ཀྱི་ཡོད་སྟབས་དུས་ཡུན་ལ་ཚད་བཀག་མེད་ཀྱང་ཁེ་ཉེན་ཆེན་པོ་མེད།
གཞུང་འཛིན་དུས་ཡུན་ལ་ཚད་བཀག་མེད་པར་རྒྱུན་རིང་བྱས་པ་ཡིན་ན། འཛིན་སྐྱོང་གི་དབང་ཤུགས་ཆེས་ཐལ་དྲགས་ནས་ཕྱོགས་དཔུང་བསྒྲིགས་པ། རང་ཕྱོགས་ལ་གོ་སྐབས་བསྐྲུན་པ། འོས་བསྡུ་ལ་སྟངས་འཛིན་བྱེད་པ། དབང་ཆ་རུལ་སོངས་སོགས་ཀྱི་དཀའ་རྙོག་མང་པོ་འབྱུང་གིན་ཡོད་པར་བཤད།
འོན་ཀྱང་། ད་རེས་བཅའ་ཁྲིམས་བསྐྱར་བཅོས་རགས་ཟིན་ནང་འཛིན་སྐྱོང་བཀའ་ཁྲི་དང་བཀའ་བློན་ཀྱི་ཞབས་ཞུ་དུས་ཡུན་དེ་བསྟུན་མུར་སྐབས་གཉིས་ལ་མ་གཏོགས་ཞུ་ཆོག་གིན་མེད་པའི་གལ་ཆེའི་ཚིག་འབྲུ་དེ་དག་ཕྱིར་བསྡུ་བྱས་འདུག དེའི་རྐྱེན་པས་རང་རེའི་མང་གཙོ་དེ་མདུན་དུ་སྐྱོད་རྒྱུ་ལས་ཕྱིར་ནུར་བྱེད་བཞིན་ཡོད་པ་ཚོར་ནས་སེམས་འཚབ་ཆེན་པོ་བྱུང་།
གཞན་ཡང་བཅའ་ཁྲིམས་དོན་ཚན་༢༢ ནང། འོས་ཐོན་ཐོག་བསྐོ་གཞག་དམ་འབུལ་ཟིན་པའི་བཀའ་བློན་ཁྲི་པ་དེས་རང་གི་བཀའ་ཤག་ལྷན་ཚོགས་སུ་བཀའ་བློན་ཇི་དགོས་མང་མཐའ་བདུན་ལས་མ་བརྒལ་བའི་མི་འགྲོའི་མིང་དང་ལོ་རྒྱུས་བཅའ་ཁྲིམས་དོན་ཚན་༢༡ པའི་ནང་གསེས་༣ པར་གསལ་བའི་འོས་ཆོས་ཚང་ལུགས་བཅས་སྤྱི་འཐུས་ལྷན་ཚོགས་སུ་གསལ་བཤད་དང་སྦྲགས་འབུལ་རྒྱུ་དང་། དེའི་ཐོག་སྤྱི་མོས་བྱུང་ན་སྨོས་མེད། མ་བྱུང་ཚེས་སྤྱི་མོས་མ་བྱུང་བའི་འོས་གཞི་སོ་སོའི་ཐོག་ངོ་ཡོད་སྤྱི་འཐུས་ཡོངས་རྫོགས་ཀྱིས་གསང་བའི་འོས་ཤོག་འཕེན་ཏེ་འོས་འདེམས་བྱ་དགོས། ངོ་ཡོད་སྤྱི་འཐུས་ཀྱི་བརྒྱ་ཆའི་ལྔ་བཅུ་ལས་མ་ཉུང་བའི་འོས་ཤོག་ཐོབ་ན་བཀའ་བློན་དུ་འོས་ཐོན་གསལ་བསྒྲགས་བྱ་རྒྱུ། གྲོས་ཚོགས་སུ་སྤྱི་མོས་སམ་མང་མོས་ཐོན་པའི་རིགས་ལ་༧གོང་ས་༧སྐྱབས་མགོན་ཆེན་པོས་བཀའ་བློན་དུ་བསྐོ་གཞག་བསྩལ་རྒྱུ། བཀའ་བློན་ཁྲི་པས་བཏོན་པའི་འོས་གཞི་ཡོངས་རྫོགས་སམ་གང་རུང་ལ་མང་མོས་མ་ཐོབ་ཚེ་འོས་གཞི་གསར་པ་བཀའ་བློན་ཁྲི་པས་གོང་བཞིན་སྤྱི་འཐུས་ལྷན་ཚོགས་སུ་འབུལ་རྒྱུ། ཞེས་བཀོད་འདུག ༧གོང་ས་མཆོག་གིས་འཛིན་སྐྱོང་གི་འགན་བཞེས་མ་གནང་ཚེ་གྲོས་ཚོགས་སུ་སྤྱི་མོས་སམ་མང་མོས་ཐོན་པའི་རིགས་ཆེས་མཐོ་ཁྲིམས་ཞིབ་ཁང་གི་ཁྲིམས་ཞིབ་པ་ཆེན་མོའི་མདུན་དུ་དམ་འབུལ་ཞུ་རྒྱུ་ལྟ་བུ་འགོད་འོས་ལས་གཞན་འགྱུར་བ་གཏོང་དགོས་མ་མཐོང་།
འོན་ཀྱང་། བཅའ་ཁྲིམས་བསྐྱར་བཅོས་ཟིན་ཐོའི་ནང་གསལ་བཞིན་བཀའ་བློན་ཁག་འོས་འདེམས་ལ་སྤྱི་འཐུས་ཀྱི་བརྒྱུད་རིམ་དེ་མེད་པ་ཡིན་ན། གཞི་རིམ་མང་གཙོའི་ལྟ་གྲུབ་མཇིང་སྙོམས་སྟངས་འཛིན་ (checks and balances) ཐུབ་ཀྱི་མེད་པས་མང་གཙོའི་ཀ་བ་གསུམ་གྱི་ནུས་པ་ཚད་ལྡན་ཞིག་ཡོང་གི་མེད་པ་དང་འཛིན་སྐྱོང་བཀའ་ཤག་སྡེ་ཚན་དུ་ཚད་དང་ལྡན་པའི་སྐྱེས་བུ་ཞིག་བསླེབ་ཐུབ་མིན་ལའང་སེམས་ཁྲལ་སྐྱེ་དགོས་པ་རེད།
བཀའ་བློན་ཁྲི་བ་ནི་མི་མང་གིས་བདམས་པ་ཡིན་སྟབས། ཕྱག་རོགས་བཀའ་བློན་ཁག་ཁོང་གིས་ཐད་ཀར་གདམས་འོས་པར་བཤད་ན། སྤྱི་འཐུས་ཀྱང་མི་མང་གིས་བདམས་པ་ཡིན་པས་དེ་སྒྲུབ་བྱེད་ཡང་དག་ཏུ་འགྲོ་མི་ཐུབ།
བཙན་བྱོལ་བོད་གཞུང་ཞེས་པའི་མིང་ཚིག་དེ་བཙན་བྱོལ་བོད་མིའི་གཞུང་གི་སྒྲིག་འཛུགས་སུ་བསྒྱུར་བ་ནི་ཕན་ལས་གནོད་ཆེ་བར་མཐོང་བས་སྔར་མུས་སོར་འཇོག་བྱས་ན་ལེགས་བསམ།
གོང་ས་མཆོག་གིས་ཆབ་སྲིད་ཀྱི་འགན་དབང་མི་མང་གི་འོས་འདེམས་གནང་བའི་དབུ་ཁྲིད་ཚོར་རྩིས་སྤྲོད་གནང་རྒྱུའི་གལ་ཆེའི་གནད་དོན་འདི་འདྲའི་སྐབས། དུས་ཡུན་ལ་མ་བལྟས་པར་ཆེད་མཁས་པ་བསྡུ་རུབ་ཀྱིས་བགྲོ་གླེང་ལྷུག་པོ་བྱས་ཏེ་མ་ནོར་མ་འཁྲུལ་བ་ཞིག་གཏན་འབེབ་བྱ་རྒྱུ་ནི་གལ་ཆེན་དུ་མཐོང་། གུས་མེ་སོར་བོད་མིའི་ས་གནས་ཁྲིམས་ཞིབ་ཁང་གི་ཁྲིམས་ཞིབ་པ་ཟུར་པ་ཕུར་བུ་རྡོ་རྗེ་ནས་ཕྱི་ལོ་༢༠༡༡ ཟླ་༥ ཚེས་༢༡ ལ་ཕུལ།།
བོད་གཞུང་གི་མིང་བརྒྱུར་བཅོས་བཏང་མ་བཏང་དང་བྲེལ་བ་ཚུབས་ཚུབས་ཀྱི་བཅའ་ཁྲིམས་
བསྒྱུར་བ་སོགས་ལས་དཀའ་ཅི་ཞིག་བྱས་ཀྱང་ནད་གཞི་ངོ་མ་དེ་ངོས་ཟིན་པ་དང་དོན་གནད་ཅན་གྱི་ལས་
དོན་སྣ་མང་ཞིག་ལ་གདོང་ལེན་བྱེད་མ་ཐུབ་བར་དུ་ལས་གཞི་འདི་དག་ནི་ཕྲུ་གུ་རྩེད་མོ་བཞིན་དུས་ཚོད་
སྐྱེལ་བ་ཙམ་རེད་
ཁྲིམས་ཞིབ་པ་ཟུར་པ་ཕུར་བུ་རྡོ་རྗེ་ལགས་ནས་རང་གི་ཤེས་ཡོན་གྱི་ནུས་པ་དེ་ང་ཚོའི་བོད་པའི་སྤྱི་ཚོགས་ནང་བེད་སྤྱད་ནས་བཞུགས་པ་དེ་ལ་ངོས་ནས་ཐུགས་རྗེ་ཆེ་ཞུ། གོ་ཐོས་ལ་བཙན་བྱོལ་ནང་ནས་དོན་ངོ་མར་རྒྱ་གར་གྱི་ཁྲིམས་ཁང་ནང་ཕྱག་ལས་ནང་མཁན་ཁྱེད་གཅིག་པུ་ཐོན་པ་གོ་ཐོས་བྱུང་། ངོ་མ་ཡག་པོ་རེད། བོད་མི་རིགས་ལ་མི་དེ་འདྲ་གང་མང་ཐོན་ཐུབ་པ་དགོས། བཀའ་ཁྲིའི་རྐུབ་སྟེགས་མ་རག་པ་ཡིན་ན་ཡང་གང་ཡང་ཡོད་མ་རེད། མཚམས་རེས་རྐུབ་སྟེགས་དེ་འདྲ་མ་རག་པ་ཡིན་ན་ཡང་མི་རིགས་ལ་ཕན་རླབས་ཆེ་བ་བསྒྲུབ་ཐུབ་པ་དེ་འདྲ་མང་པོ་ཡོད།
ཁྱེད་ཀྱི་རྩོམ་ལ་དགའ་བསུ་ཡོད། མུ་མཐུད་ཁྲིམས་ཀྱི་སྐོར་དང་འབྲེལ་བའི་རྩོམ་ཡིག་གང་མང་སྤེལ་རོགས། གཙོ་བོ་ང་ཚོ་རྒྱ་གར་བཙན་བྱོལ་ནང་ཡོད་པས་གནས་ཡུལ་གྱི་ཁྲིམས་ཀྱི་འགྲོ་ལུགས་ཤེས་དགོས་པ་ནི་གནད་ཀྱི་དོན་པོ་ཡིན། གནས་ཡུལ་གྱི་ཁྲིམས་ཀྱི་འགྲོ་ལུགས་ལེགས་པར་མ་ཤེས་པའི་རྐྱེན་གྱིས་ཁྲིམས་འགལ་གྱི་ལས་ཀ་གང་མང་ཐོན་གྱིན་ཡོད། དཔེར་མཚོན་ནི། ཀརྨ་པའི་དངུལ་གྱི་རྙོག་དྲ་ཙམ་ལས་མི་དགོས། དེང་སང་རྒྱ་གར་ནང་ཁྲིམས་འགལ་གྱི་ལས་ཀ་དང་ལྐོག་ཟས་ཀྱི་རིགས་ལ་མཐོ་དམན་བར་གསུམ་ཡོངས་རྫོགས་ལ་ཞིབ་འཇུག་ཚ་བསྣན་གཏོང་བཞིན་པའི་སྒང་ཡིན་པས་ངེད་ཅག་བོད་རིགས་དེའི་ནང་དུ་མི་ཚུད་པའི་ངེས་པ་མེད་པས་གཟབ་དགོས།
བཀའ་བློན་ཁྲི་པའམ་བཀའ་བློན་གྱི་ལས་ཁུར་དུས་ཡུན་གཉིས་བསྟུད་མར་གནང་རྗེས་བར་མཚམས་འཇོག་དགོས་པ་ལ་རྒྱབ་སྐྱོར་ཡོད་ཀྱང་། བཙན་བྱོལ་བོད་གཞུང་ཞེས་པའི་མིང་ཚིག་དེ་བཙན་བྱོལ་བོད་མིའི་གཞུང་གི་སྒྲིག་འཛུགས་སུ་བསྒྱུར་བ་ནི་ཕན་ལས་གནོད་ཆེ་བར་འདོད་པ་ནི། མི་ཐད་དེ་གཉིས་སྨན་དབུས་ལམ་པའི་མཚན་ཉིད་ཡོངས་སུ་ཚང་བ་ལ་བཙན་བྱོལ་བོད་མིའི་གཞུང་གི་སྒྲིག་འཛུགས་ཞེས་སུ་བསྒྱུར་བ་འདི་ཉིད་བོད་རྒྱ་གྲོས་མོལ་གྱི་གནད་དོན་ལ་ཧ་ཅང་ཕན་ཐོགས་ཆེ་བ་ཡོད་རེད། ད་དུང་གཞུང་ཞེས་པའི་ཚིག་འདིས་ཀྱང་གྲོས་མོལ་ལ་བར་ཆད་་བཟོ་མི་སྲིད་པ་མ་རེད་སྙམ་ལགས།
ཕུར་རྡོར་ལགས། དོན་དང་ལྡན་པ་བྲིས་འདུག་་་ལྷག་པར་བཙན་བྱོལ་བོད་གཞུང་ཞེས་པའི་མིང་འདི་
མ་བསྒྱུར་ན་བཟང་རབས་བཤདཔ་ལེགས་སོ་ཡིན། དབུ་མའི་ལམ་ཞེས་པ་དང་བོད་གཞུང་མ་མ་སྲེས།
བོད་རྒྱ་གཉིས་སྨན་དབུ་མའི་སྲིད་འཇུས་ཀྱིས་དངོས་གནས་རྒྱ་བོད་ཞི་འགྲིགས་ཞི་འཇགས་ལ་འབད་བརྩོན་མྱུར་དུ་བྱ་འདོད་ཡོད་ན། རྒྱ་གཞུང་ལག་དམར་བདུག་རྩུབ་ཅན་ལ་དྭོགས་འགྲོགས་མེད་པ་གཅིག་དང་། ཝ་མོ་ལྟ་བུའི་རྒྱའི་ངན་གཡོའི་སྲིད་འཇུས་གྱི་ཁག་དཀྲིས་བྱ་ཡུལ་མེད་པ་གཅིག་དགོས་གནད་ཆེན་པོ་མཐོང་ལགས།
དེ་མིན་རང་བཙན་ལམ་ལ་འགྲོ་འདོད་གྱིས་མང་མོས་བྱུང་བ་ཡིན་ན། དེ་དེའི་ཚེ་འགྲན་ཐུབ་པའི་ཆབ་སྲིད་མིང་དོན་མཚུངས་པའི་བཙན་བྱོལ་སྲིད་གཞུང་གི་མིང་དང་། རྒྱལ་དར་རྒྱལ་གླུ་དང་བཅས་གསར་བཟོ་བྱ་དགོས་ཀྱང་འགོར་ཡུན་གང་ཡང་ཡོད་མ་རེད་སྙམ་ལགས། དགེའོ། །
པུར་རྒྱལ་བོད་རྒྱལ་ཁབ་ཆེན་པོའི་མིང་དེ་བཙན་བྱོལ་བོད་མིའི་གཞུང་དུ་བསྒྱུར་ན་ང་ནི་ནད་འཁྱོལ་ས་མ་རེད།
ང་ཚོས་དཀའ་ཚེག་གི་གོམ་པ་རེ་རེ་སྤོས་ནས་བོད་རྒྱལ་ཁབ་དེ་འཛམ་གླིང་ནང་ཁྲིམས་མཐུན་ཡོང་ཐབས་ཀྱིས་མདུན་དུ་སྐྱོད་དགོས་པ་ལས་ཨ་ཞང་ཚང་གི་གནོད་ཤུགས་ལ་བརྟེན་ནས་རྒྱབ་བཤིབས་བྱས་ན། ང་ཚོ་མེས་པོ་གོང་མའི་ཚོའི་ཞབས་འདྲེན་ཞུ་མཁན་ཞིག་ཆགས་པ་མ་ཡིན་ནམ།
མིང་བསྒྱུར་བ་ལ་ཁྱད་པར་གང་ཡང་མེད།
སངས་རྒྱས་ཀྱིས་ཀྱང་དེ་ཡི་ཚེ་དེ་ཡི་དུས་ཞེས་གསུངས་ཡོད་དུས་དེ་ཡི་ཚེ་དེ་ཡི་དུས་ལ་དཔགས་པའི་མིང་དོན་གང་ཡིན་རུང་བསྒྱུར་ཆོག་སྙམས།
གཙོ་བོ་ཡུལ་དུས་སྐབས་བབས་ཀྱི་གནས་སྟངས་ལ་གཞིགས་ཏེ་བཟོ་བཅོས་རྒྱབ་དགོས་པ་མ་གཏོགས་སྔར་སྲོལ་ཡིན་ཅེས་བཤད་དེ་ཨུ་བཙུགས་བྱེད་དེ་བསྡད་ན་ཡར་རྒྱས་ཡོང་ཐབས་མེད།
དེས་ན་༧གོང་ས་༧་མཆོག་གི་ཐུགས་ཀྱི་བཞེད་དོན་དེ་དག་འགྲུབ་ཅིང་བོད་དོན་བདེན་པའི་ཉི་གཞོན་གསར་པ་མྱུར་དུ་འཆར་བར་ཤོག
ངས་ཀྱང་། ༸གོང་ས་༸མཆོག་གི་ཐུགས་ཀྱི་བཞེད་དོན་དེ་དག་འགྲུབ་ཅིང་། བོད་དོན་བདེན་པའི་ཉི་གཞོན་གསར་པ་མྱུར་དུ་འཆར་བར་སྨོན་བཞིན་ལགས། །
རྩོམ་ཡིག་ཡག་པོ་བྲིས་འདུག འོན་ཀྱང་འབྲི་མཁན་ངོ་མ་སུ་ཡིན་བརྩད་གཅོད་བྱེད་དགོས་སྙམ།
ཁྲིམ་རྩོད་པ་ཟུར་པ་སྐུ་ངོ་ཕུར་བུ་རྡོ་རྗེ་མཆོག་ལ།
གཞི་རིམ་མང་གཙོའི་ལྟ་གྲུབ་ལ་སྲུང་སྐྱོབ་དགོས་ན་བཀའ་བློན་ཁྲི་པའི་ལས་རོགས་བཀའ་བློན་བདུན་དེ་ཁོངས་དང་ཆ་ཐུན་ངེས་པར་དགོས་དབང་ཆེ་བ་ཡིན་དེ་ལྟར་བྱུང་ཚེ་བཙན་བྱོལ་བོད་གཞུང་གི་ལས་དོན་ཆེ་ཁྲ་ཆུང་གསུམ་གང་ཡོད་ཐམས་ཅད་བསྒྲུབ་ཐུབ་གྱི་ཡོད། དེ་དང་ཆབ་གཅིག་བཀའ་བློན་ཁྲི་པ་དུས་ཚོད་ངེས་མེད་ཞེས་པ་དེ་མི་མང་གི་ལགས་གཏུ་ཡོད་འཚར་གཉིས་གསུམ་ཡགས་པོ་བྱུང་ན་འཚར་ལྔ་བྱེད་མཆོག་གི་རེད་དེ་ལ་ཕྱོག་སྒྲིགས་དང་སྤུང་སྒྲིགས་གི་ཞེ་གནང་བྱེད་མཁན་གི་གང་ཟག་དེ་ལ་ངེས་པར་ང་ཚོའི་སྟགས་སྤྲོད་བྱེད་གིས་ཡིན་དེ་སྔ་གང་ཟག་ཁོངས་རང་རྒྱུད་ལ་དེ་འགྲ་བའི་ཕྱོད་སྒྲིགས་དང་སྤུང་སྒྲིགས་ཡོད་པའི་རྣམས་པ་རེད་གཞི་རིམ་མང་གཙོའི་ལྟ་གྲུབ་སྲུང་སྐྱོབ་ཞེས་པ་དེ་གཞི་ལ་བཞག་ནས་གསུང་ན་དེ་འགྲ་ཡན་ནམས།
བཙན་བྱོལ་བོད་མིའི་གཞུང་ཟེར་ནའང་འདྲ། བོད་བཙན་བྱོལ་གཞུང་ཟེར་ནའང་འདྲ། བོད་སྤྱི་མཐུན་རྒྱལ་ཁབ་ཟེར་ནའང་འདྲ། བོད་ཆོལ་གསུམ་སྤྱི་མཐུན་རྒྱལ་ཁབ་ཟེར་ནའང་འདྲ། གང་ལྟར། ཆོལ་ཁ་དང་ཆོས་ལུགས་ཀྱི་འཐེན་འཁྱེར་ཁྲག་རྩར་ཁྱབ་ནས་ཡོད་པ་འདི་མ་དྲགས་ན་ནི་དོན་ལ་གཅིག་པ་རེད་དོ། །