གཞུང་པ་ཚེ་དབང་བསོད་ནམས།
རྒྱ་བལ་འབྲུག་གསུམ་ནང་ཡོད་པའི་བཙན་བྱོལ་བོད་མིའི་གཞིས་ཆགས་ཁག་ནི་བོད་ཀྱི་ཆོས་དང་། སྐད་ཡིག རིག་གཞུང་། མི་རིགས་དང་བཅས་པ་སྲུང་སྐྱོབས་ཐུབ་པའི་བཙན་བྱོལ་བོད་མིའི་བཅའ་ཁྲིམས་དོན་ཚན་བཅོ་ལྔ་ནང་འཁོད་པའི་བོད་དོན་བདེན་མཐའ་གསལ་ཐབས་ལ་ཕྱོགས་ཡོངས་ནས་འགན་འཁུར་ནས་བོད་མིའི་ངོ་བོ་འཛམ་གླིང་ཡོངས་ལ་སྟོན་ཐུབ་པའི་བཙན་བྱོལ་བོད་མིའི་སྒྲིག་འཛུགས་ཀྱི་ནང་ནས་བླ་ན་མེད་པ་དེ་ཡིན་པ་དང་། གཞིས་ཆགས་སོ་སོའི་སྒྲིག་འཛུགས་ནང་ཕ་མེས་ནས་དར་པའི་བོད་མིའི་མཐུན་མོང་མ་ཡིན་པའི་སྐད་ཡིག་དང་། ནང་ཆོས། རིག་གཞུང་། སྒོམ་པའི་བཤིས་ལུགས་སོགས་མི་ཉམས་རྒྱུན་འཛིན་དང་ཉམས་པ་སླར་གསོ་ཞུ་རྒྱུ་སོགས་བོད་མིའི་ངོ་བོ་ཟུར་དུ་འབུར་འཐོན་ཐུབ་པའི་ལས་འགུལ་འཆར་ཅན་སྤེལ་བཞིན་པ་དང་། ལོ་རབས་དགུ་བཅུའི་ནང་དབུས་བོད་མིའི་སྒྲིག་འཛུགས་ནས་བོད་མི་གཅིག་སྟོང་ཨ་རིར་གཞིས་སྤོ་གནང་བ་ནས་གཞིས་ཆགས་ཁག་ནང་གཞིས་མི་གཏན་སྡོད་བྱ་མཁན་ལོ་རེ་ནས་ལོ་རེ་བཞིན་ཉུང་དུ་འགྲོ་བཞིན་པ་དང་། ཉིན་སློབ་ནང་སློབ་ཕྲུག་ཉུང་དུ་འགྲོ་བཞིན་པ་དང་། གཞིས་ཆགས་ནང་ཞིང་ལས་བྱ་མཁན་དང་བ་ཕྱུགས་གསོ་སྐྱོང་བྱ་མཁན་སོགས་ལོ་རེ་ནས་ལོ་རེ་བཞིན་ཉུང་དུ་འགྲོ་བཞིན་པ་དང་། གཞིས་ཆགས་སོ་སོའི་ནང་ནས་ཕྱི་རྒྱལ་ལ་རང་མཚམས་འགྲོ་མཁན་ཚོའི་ས་ཁང་ཕྱིར་བསྡུ་གནང་ནས་གཞིས་ཆགས་ནང་ལྷག་པའི་ནང་མི་ཚོ་ལ་རང་ཐོབ་ས་ཞིང་ལས་མེད་སྟབས་ས་ཞིང་ཉུང་དུ་ཕྱིན་ནས་ས་ཞིང་འདེབས་ལས་ལ་དཀའ་ངལ་མང་བས་ས་ཞིང་གཞན་ལ་བོགས་གཏོང་བྱེད་བཞིན་པ་ནས་དེང་སྐབས་བོགས་མ་ལེན་མཁན་ཡང་མེད་པ་ནས་ཞིང་ས་མང་པོ་ས་སྟོང་ལ་བཞག་པ་ཡང་མཐོང་རྒྱུ་འདུག་ལ་ན་གཞོན་ཚོ་ཕྱི་རྒྱལ་ལ་འགྲོ་རྒྱུའི་བསམ་བློ་ལས་གཞིས་ཆགས་ནང་བསྡད་ནས་ཞིང་ལས་དང་བ་ཕྱུགས་གསོ་སྐྱོང་བྱ་རྒྱུའི་བསམ་བློ་ཞན་པ་དང་། གཞིས་ཆགས་སྲ་བརྟན་དང་རྒྱུན་གནས་ཐུབ་པའི་ཆེད་ཁྱིམ་ཚང་ཆ་ཚང་ཕྱི་རྒྱལ་ལ་ཕྱིན་པའི་ས་ཁང་ཕྱིར་བསྡུ་མ་བྱས་རང་བྱས་ལས་དེ་མིན་ཁྱིམ་ཚང་གཅིག་ནས་ནང་མི་གཉིས་གསུམ་ཕྱི་རྒྱལ་ལ་འགྲོ་མཁན་ཚོའི་ས་ཁང་ཕྱིར་བསྡུ་མ་དགོས་པ་ཁྱིམ་ཚང་དེ་ག་རང་ལ་བཞག་ནས་ས་ཁང་གཉིས་ལ་བོགས་ཁྲལ་སྣེ་སེལ་ཞིག་གཏན་འབེབས་གནང་ནས་དབུས་བོད་མིའི་སྒྲིག་འཛུགས་ལ་འབུལ་དགོས་པའི་ལམ་ལུགས་སམ་སྒྲིག་གཞི་བཟོ་ཐུབ་ན་ནང་མི་ཕྱི་རྒྱལ་ལ་འགྲོ་མཁན་ཚོའི་ས་ཞིང་གཞིས་སྡོད་ཁྱིམ་ཚང་རང་ལ་བདག་ཉར་ཆོག་པ་ནས་དེ་སྔོན་གཞིས་ཆགས་ནང་ཁྱིམ་ཚང་དེའི་འཛུགས་བསྐྲུན་ལས་གཞི་ལ་དོ་ཕོག་མི་འགྲོ་བ་དང་གཞིས་ཆགས་སྲ་བརྟན་དང་བརྒྱུན་གནས་ཐུབ་པའི་དགེ་ཚན་ཆེ་བ་ཡོང་རྒྱུ་དང་། དེ་མིན་ལྔ་ཁང་ཡོད་པའི་ཁྱིམ་ཚང་ནས་མི་གསུམ་ཕྱི་རྒྱལ་ལ་ཕྱིན་ན་གཞིས་ཆགས་ནང་མི་གཉིས་ལས་མེད་པ་ནས་མི་གསུམ་གྱི་ས་ཁང་ཤོར་ནས་མི་གཉིས་ཀྱི་ས་ཁང་ལས་མེད་པ་ནས་དེ་སྔོན་འཛུགས་བསྐྲུན་བྱས་པ་ལ་དོ་ཕོག་ཡོང་བཞིན་པ་ནས་སྤྱི་སྒེར་གཉིས་ལ་དོ་ཕོག་དང་གྱོང་གུན་ཕོག་བཞིན་པ་སོགས་ལ་འགན་འཁུར་ནས་ཁྲིམས་བཟོ་སྤྱི་འཐུས་གྲོས་ཚོགས་ནས་གཞིས་ཆགས་ཁག་གི་ས་ཁང་གི་སྒྲིག་གཞི་ལ་བསྐྱར་བཅོས་གནང་ནས་གཞིས་ཆགས་སྲ་བརྟན་དང་རྒྱུན་གནས་ཐུབ་པའི་འགན་འཁུར་བཞེས་དགོས་པ་དེ་མི་མང་གི་འཐུས་མིའི་ཐུགས་འགན་ཞིག་ཡིན་པའི་ངོས་འཛིན་ཞུ་གི་ཡོད། དེ་མིན་དེ་སྔོན་གཞིས་ཆགས་ཁག་གི་ས་ཁང་གི་སྒྲིག་གཞི་མུ་མཐུད་ནས་ལག་ལྟར་བྱས་ནས་ཕྱི་རྒྱལ་ལ་འགྲོ་མཁན་ཚོའི་ས་ཁང་ཕྱིར་བསྡུ་གནང་ཀྱང་བྱས་ཚེ་ནམ་ཞིག་གཞིས་ཆགས་ནང་མི་སྡོད་མཁན་མེད་པ་ས་སྟོང་དང་ཁང་སྟོང་ལྷག་རྒྱུ་ཡིན་པ་ལོང་བས་བལྟས་ཀྱང་ཁམས་གསུམ་གྱི་དཔེ་ལྟར་ལས་མ་མཐོང་ན་རྒྱ་བལ་འབྲུག་གསུམ་ནང་ཡོད་པའི་བཙན་བྱོལ་བོད་མིའི་གཞིས་ཆགས་ཁག་སྲ་བརྟན་དང་རྒྱུན་གནས་ཐུབ་པའི་ཐབས་ལམ་བཟང་ཤོས་དེ་ཕྱི་རྒྱལ་ལ་འགྲོ་མཁན་ཚོའི་ས་ཁང་སོ་སོའི་ནང་མི་གཞིས་ཆགས་ལ་ཡོད་མཁན་ཚོར་རང་འཇགས་བཞག་ནས་ས་ཁང་གཉིས་ལ་བོགས་ཁྲལ་སྣེ་སེལ་དབུས་བོད་མིའི་སྒྲིག་འཛུགས་ལ་འབུལ་དགོས་པའི་ལམ་ལུགས་སམ་སྒྲིག་གཞི་གཏན་འབེབས་གནང་ཐུབ་ཚེ་སྤྱི་སྒེར་ཚང་མར་ཕན་ཐོགས་དང་དགེ་ཚན་དུ་མ་ཡོང་རྒྱུ་མ་ཟད་གཞིས་ཆགས་སྲ་བརྟན་དང་རྒྱུན་གནས་ཐུབ་རྒྱུར་ཐེ་ཚོམ་སྤུ་ཙམ་ཡང་ཟ་མི་དགོས་པ་བཅས་རེ་ཞིག་འདིར་འཇུག་བསྡུས་པའོ།