གཞིས་བྱེས་སྙན་ངག་ལྷན་འཛོམས།

འབའ་སྲས།

——-སྙན་ངག་གི་ཕ་ཁྱིམ་ལོ་དེབ་ཐོག་མར་བྲིས།

གཞིས་དང་བྱེས་ཀྱི་རྣམ་དཔྱོད་ཡངས་པའི་མཁའ།།
སྙན་ངག་ཕ་ཁྱིམ་སྤྲིན་ཕུང་དཀྲིགས་པ་ཡིས།།
ཚོར་བའི་འཇའ་དང་བསྡོངས་པའི་སྙན་ངག་ཆར།།
དབྱངས་འགྲོས་ཟིལ་དང་འགྲོགས་ཏེ་ས་ལ་བབས།།

ཨེ་མ་གངས་དཀར་རི་བོའི་རྒྱབ་མདུན་ན།།
ཚོན་རིས་སྣ་ལྔ་ལྷན་གཅིག་འདྲེས་པ་ཅན།།
སུ་ཡིས་མཐོང་ན་ཡིད་འོང་ཉིད་སྟེར་བ།།
སྙན་ངག་ཕ་ཁྱིམ་ལོ་དེབ་འཇའ་ཡིས་མཚོན།།

མཁའ་དབྱིངས་མཛེས་པ་ཉི་ཟླ་སྐར་མའི་ཚོགས།།
ས་གཞིར་བརྒྱན་པ་རི་ཆུ་མེ་ཏོག་ཤིང་།།
མི་ཡི་སེམས་ལ་མཛེས་པའི་སྙན་ངག་གི །
གཞིས་བྱེས་ལྷན་འཛོམས་དབྱངས་རྟ་དང་པོ་ཐོས།།

གངས་རིའི་མདུན་ནས་འབྲུག་སྒྲ་སིང་སིང་གྲགས།།
གངས་རིའི་རྒྱབ་ཏུ་རྨ་བྱའི་སྒྲོ་མདོངས་མཛེས།།
རྨ་འབྲུག་ཁ་འཕྲོད་རྟེན་འབྲེལ་འགྲིག་པ་ཡིས།།
གཞིས་བྱེས་སྙན་ངག་ཆར་གྱིས་མེ་ཏོག་འཛུམ།།

ཕ་ཡུལ་དྲན་པའི་སྡུག་གཏམ་བྱེས་ལ་མང་།།
ཕེབས་ཤོག་ཕེབས་ཤོག་སྙན་ངག་གཞིས་ལ་མང་།།
གཞིས་བྱེས་གཉིས་ཀྱི་ཚོར་བའི་རྟོག་འགྱུ་ལས།།
སེམས་དང་སེམས་འདྲེས་སྙན་ངག་དང་པོ་ཡིན།།

གཞིས་ཀྱི་རེ་བའི་སྙན་དངགས་བྱེས་ལ་སྤྲིངས།།
མ་ཤི་བྱེས་ཀྱི་རྣམ་ཤེས་གཞིས་ལ་འཁོར།།
གཞིས་བྱེས་ས་ཆུ་འཐིམས་པའི་སྙན་དེབ་འདི།།
གཞིས་བྱེས་ལྷན་འཛོམས་ཐུབ་པའི་རྟེན་འབྲེལ་ཡིན།།

ཁོ་ཡི་རྔུལ་ཆུ་ཐིགས་པས་དེབ་འདི་དཔར།།
ཁྱེད་ཀྱིས་འཚོ་བའི་བརྗོད་བྱ་བདག་ལ་གནང་།།
ང་དང་ཁྱེད་ཀྱི་ལག་འཇུ་དང་པོ་འདི།།
གངས་རིའི་རྒྱབ་མདུན་གཉིས་ན་ཤིན་ཏུ་དམ།།

དེ་བས་ཁྱེད་ཀྱིས་ཡིད་ཆེས་བདག་ལ་གནོངས།།
ང་ཡི་ལྷག་བསམ་གཙང་མ་ཁྱེད་ལ་འབུལ།།
གོ་ལ་ཟླུམ་པོ་འདི་ཡི་གཡས་གཡོན་ནས།།
ང་ཚོ་ཚང་མ་ནམ་ཡང་བསྡོངས་ཏེ་འགྲོ །

༡༤/༠༣/༢༥ མཚན་ནང་དུ་བསླེབས་མ་ཐག