ནམ་མཁའ།
ཉེ་བའི་ཆར་བོད་ཀྱི་དུས་བབ་དྲ་ཐོག་ཏུ་བཏོན་པའི་གནས་ཚུལ་ཞིག་ལ། མདོ་སྨད་ཐེ་བོ་ནས་གནས་མཇལ་བ་སྐོར་ཞིག་ལྷ་སར་ཕྱིན་པའི་སྐབས། མདོ་སྟོད་སྨད་ཀྱི་མི་སུ་ཡིན་ཚང་མ་དྲག་དམག་ཚོས་ཞིབ་བཤེར་བྱེད་པར་རྟེན།ཨ་མདོ་ཐེ་བོ་གྲྭ་བ་ཞིག་ལ་ཞིབ་བཤེར་བྱེད་མཁན་གྱི་དྲག་དམག་ཞིག་དང་ཁ་རྩོད་ཤོར་ནས་དྲག་དམག་དེས་ཐེ་ཚོམ་ཅི་ཡང་མེད་པར་གྲྭ་བ་དེ་དམར་གསོད་བྱས་མོད། ཡིན་ཡང་རང་དབང་ལུང་པའི་གཞུང་དང་མི་དམངས་གཉིས་ཀ་གཉིད་ལ་ཤོར་བ་ལྟར་གྲགས་འགུལ་ཅི་ཡང་མི་འདུག་ལ། དེའི་སྐོར་ནས་དྲ་རྩོམ་འབྲི་མཁན་ཚོ་ཡང་ཡིད་སྐྱོ་བའི་གནས་ཚུལ་ལ་གོམས་ལོབ་ལྟ་བུ་ཞིག་ཏུ་གྱུར་ཡོད་པ་འདྲ་བར་ཡིག་འབྲུ་སྣ་གཅིག་ཀྱང་མཐོང་རྒྱུ་མི་འདུག
གཞོན་ནུ་ལ་ཡང་གྲགས་འགུལ་ཅི་ཡང་མེད་པར་བོད་ནང་གི་གནས་ཚུལ་དེ་མ་ཐོས་པ་ལྟར་ངག་བཅད་ཀྱི་ངོ་རྒོལ་བྱས་ཡོད་ན་མ་གཏོགས་གྲགས་འགུལ་མི་འདུག ཡང་ན་གནས་མཇལ་བ་གྲྭ་བ་དེས་མེ་བསྲེགས་མ་བཏང་བས་བོད་གཞུང་གི་སེམས་ནང་ཁོའི་ཚེ་སྲོག་དེ་ནུས་མེད་དུ་ཤོར་བ་རེད་བསམ་གྱི་ཡོད།གནས་མཇལ་བ་ཐེ་བོ་གྲྭ་བ་དེའི་སེམས་ནང་དུ་ཡང་བོད་མི་རིགས་ཀྱི་ཞེན་ཁོག་ཡོད་ལ།གངས་སེང་དར་ཆའི་ལ་རྒྱ་དགུང་ལ་འཕྱར་ཡོད་པ་ཐེ་ཚོམ་ཅི་ཡང་མེད། ང་ཚོ་ཚང་མས་བསམ་གཞིགས་ཞིབ་མོ་ཞིག་བྱས་དང་མི་སྐྱོན་མེད་གནས་མཇལ་བ་ཞིག་འབུ་གྲོག་མའི་ཚེ་སྲོག་གི་འདུ་ཤེས་ཡང་མེད་པར་མེ་མདའ་བྲང་ལ་གཏད་རྐྱང་དང་མཛུབ་མོ་དམར་མོས་མནན་རྐྱང་བྱེད་ཀྱི་འདུག འདི་ནི་རྒྱ་ནག་དམར་ཕྱོགས་ཀྱི་ཁྲིམས་ནང་བོད་མི་སུས་ཁ་འཛིངས་བྱས་ཚེ། དེ་དམར་གསོད་གཏོང་ཆོག་པའི་བཀའ་ཁྲིམས་ཞིག་ཡོད་དམ།
འདིའི་རིགས་ནི་ང་ཚོ་བཙན་བྱོལ་གཞུང་གིས་འཛམ་གླིང་སྟེང་ཁྱབ་བསྒྲགས་ཤུགས་ཆེན་བྱེད་དགོས་ལ།བོད་ནང་གི་ཤེས་ཡོན་པ་ཚོས་ཀྱང་ཁྲིམས་རྩོད་པ་བཙལ་ནས་ཁྲིམས་གཏུགས་བྱེད་ཐུབ་ན་རྒྱལ་ཁ་ཐོབ་མི་སྲིད་པ་མིན་ལ།འདི་ནི་གུང་ཁྲན་ཏང་གི་རྩ་ཁྲིམས་ནང་དུ་ཡང་དྲག་དམག་ཚོས་གང་བྱུང་དུ་མེ་མདའ་རྒྱབ་སྟེ།བོད་མི་སུ་ཡིན་དམར་གསོད་བྱེད་ཆོག་པའི་བཀའ་རྒྱ་ཡོད་མི་སྲིད། ད་ཐེངས་ཀྱི་དོན་རྐྱེན་འདི་བོད་ནང་གི་ཤེས་ཡོན་པ་ཚོས་འབད་བརྩོན་བྱས་ཏེ་ཁྲིམས་གཏུགས་བྱེད་ཐུབ་ན་ཕན་ཐོག་པའི་རེ་བ་ཆེ།དེ་མིན་ད་རུང་ཡང་འདི་འདྲའི་གནས་ཚུལ་འབྱུང་དང་འབྱུང་ངེས་ཡིན།ཡིན་ཡང་ཐབས་སྐྱོ་བ་ཞིག་ལ། བོད་ནང་གི་ཤེས་ཡོན་པ་སྐོར་ཞིག་ནི་གུང་ཁྲན་ཏང་གིས་ཀླད་པ་བཀྲུས་ཟིན་པ་འདྲ། དེ་ཡང་ཉེ་ཆར་འདིར་གོ་ཐོས་ཞིག་ལ།བོད་ནང་གི་ནུབ་བྱང་སློབ་གླིང་གི་དགེ་རྒན་ཚོས་སྤྲོ་སྐྱིད་བཏང་སྟེ།གླུ་ལེན་གར་རྩེད་བྱེད་བཞིན་འདུག་པས་སློབ་གླིང་གི་སློབ་མ་ཚོར་བློ་ཕམ་ཡོད་པའི་གནས་ཚུལ་གླེང་སློང་ཞིག་འདུག སྤྱིར་དགེ་རྒན་ཚོས་ཐུགས་སྤྲོ་བཏང་བ་ཙམ་གྱིས་བོད་མི་རིགས་ཀྱི་དོན་ཤོར་འགྲོ་བའི་ངེས་པ་མེད་ལ།བོད་མི་རིགས་ཀྱི་ཞེན་ཁོག་མེད་པའི་ངེས་པ་ཡང་མེད།
ཡིན་ཡང་རྒྱལ་སྤྱིའི་དཔའ་བོ་དང་དཔའ་མོ་ཚོས་རང་སྲོག་བློས་བཏང་གིས་འཐབ་རྩོད་བྱེད་དང་བྱེད་བཞིན་པའི་དུས་འདི་ལ།ཡིག་ངོ་ཙམ་ཡང་མི་ཆོད་པའི་བོད་མི་དམངས་ཀྱིས་ལོ་གསར་ཙམ་ཡང་གཏོང་གི་མེད་དུས། ཁོང་ཚོས་ཀྱང་ཁོང་ཚོའི་མཛད་རྗེས་ལ་གུས་བཀུར་དང་ཡི་རང་བྱེད་མི་འདོད་ན་ཡང་། ཤུལ་ལུས་ནང་མི་ཚོའི་སེམས་ཀྱི་བདེ་སྡུག་ལ་བརྩི་བཀུར་དང་སྐྱོ་རོགས་བྱས་ན་ཆོག
ཕྱོགས་གཞན་ཞིག་ནས་བཤད་ན་ཁོང་ཚོ་དགེ་རྒན་དེ་ཚོར་བོད་ཀྱི་རིག་གཞུང་ངོ་སྤྲོད་བྱེད་པའི་མི་སྣ་གཙོ་བོ་ཆགས་ཡོད་མོད།ཡིན་ཡང་བོད་ཀྱི་རིག་གཞུང་ནི་སྙན་ངག་ཐ་ཐུན་རེ་ཁྲིད་པ་ཁོ་ན་ག་ལ་ཡིན།ལྷག་པར་དུ་ཡང་མི་ཚང་ཞིག་ལ་ཡིད་སྐྱོ་བའི་གནས་ཚུལ་བྱུང་དུས་གྲོང་སྡེ་ཡོངས་ཀྱིས་མྱ་ངན་གྱི་ལག་རྟགས་སོགས་འབུལ་ཞོར་སེམས་གསོ་བྱེད་པ་འདི་ང་ཚོ་བོད་མི་རིགས་ཀྱི་ཁྱད་ཆོས་ཞིག་ཡིན།
ད་ལོ་ཕྱི་ཟླ་གསུམ་པའི་ནང་རེབ་གོང་གི་དཔའ་བོ་བསོད་ལེ་མཆོག་གིས་མེ་བསྲེགས་བྱས་དུས་བོད་ཆོལ་གསུམ་ནས་མྱ་ངན་གྱི་འཚམས་འདྲི་ཕྱིན་པ་ཁོང་ཚོས་ཀྱང་ཤེས་ཡོད་ལ།ལྷག་པར་དུ་ཡང་ཀན་སུའུ་ཕྱོགས་ནས་བོད་མི་ག་ཚོད་ཞིག་གིས་རང་ལུས་མེ་བསྲེགས་བྱས་པ་རེད། ཐ་ན་བུ་ཕྲུག་བཞི་ཡི་ཨ་མ་རིན་ཆེན་གྱིས་རང་གི་བུ་ཕྲུག་དྭ་ཕྲུག་བཞི་བོ་བཞག་སྟེ། བོད་མི་ས་ཡ་དྲུག་གི་བདེ་སྡུག་ཆེད་རང་ལུས་མེ་བསྲེགས་བྱས་བ་ཁོང་ཚོས་ཤེས་ཡོད་སྲིད། གཅིག་བྱས་ན་དགེ་རྒན་དེ་ཚོས་བོད་མི་རིགས་ཀྱི་ལ་ཞེན་སེམས་སུ་ཡོད་ན་འགྲིག་གི་རེད་ཟེར་སྲིད། ཡིན་ཡང་ཁོང་ཚོའི་སྤུན་མཆེད་ཞིག་གིས་དེ་ལྟར་བྱུང་ཡོད་ཚེ།ཁྱེད་ཀྱི་དགེ་གྲོགས་དང་གྲོགས་པོ་ཚོའི་གླུ་ལེན་གར་རྩེད་བྱས་ན་ཁྱེད་རང་སེམས་པ་ཕམ་མི་སྲིད་པ་མིན།
དེ་རིང་འདིར་ནུབ་བྱང་ཚང་གི་དགེ་རྒན་ཚོའི་བྱ་སྤྱོད་འདི་སྤེལ་འདོད་མེད་ཀྱང་།ཡིན་ཡང་རྒྱལ་སྤྱིའི་དཔའ་བོ་དང་དཔའ་མོ་ཚོའི་སྙིང་སྟོབས་དང་ཤུལ་ལུས་ནང་མི་ཚོའི་སེམས་ཀྱི་བདེ་སྡུག་ལ་བསམ་གཞིགས་བྱས་ཚེ་རང་དབང་མེད་པར་འབྲི་ཤོར་སོང་།གང་ལྟར་བོད་ནང་གི་ཤེས་ཡོན་པ་ཚོས་ནུབ་བྱང་ཚང་གི་ཀླད་མེད་ཚོར་མེད་དགེ་རྒན་ཚོའི་བྱ་སྤྱོད་འདི་འདྲ་ནམ་ཡང་མ་བྱེད་རོགས་ཞུ་རྒྱུ་ཡིན།
ནམ་མཁས་ཡོ་རུབ་ནས་བྲིས།༩/༦/༢༠༡༢
གྲོགས་པོ་ལགས། བཙན་བྱོལ་གཞུང་དང་གཞིས་ལུས་མི་དམངས་ཀྱིས་ད་བར་དུ་སྒང་བ་བོད་པ་ཚང་གི་སྐུ་དོན་ཅི་ཙམ་བསྒྲུབས་དང་སྒྲུབ་བཞིན་པ་ཚང་མས་མཁྱེན་གསལ་ལ། ངན་ཁེགས་དེ་འདྲ་མི་དཀྲི་བར་ཞུ་རྒྱུ་དང། ནམ་མཁས་ཡོ་རོབས་ནས་བྲིས་ཞེས་ཆེ་མདོག་དང་། དབྱིན་ལུགས་ལྟར་ཚེས་གྲངས་གོ་ཟློག་ནས་བྲིས་ཏེ་བོད་མི་རིགས་ལས་བརྒལ་ཟིན་པ་འེ་ཡིན། བཀའ་ཁྲི་མཆོག་དང་རང་ཉིད་ཀྱི་ཁ་རྒྱབ་མི་བསམ་པའི་བཙན་བྱོལ་གཞུང་གི་དབུ་ཁྲིད་དང་མི་མང་གིས། ཨ་རི་དང་ཡོ་རོབ་ཁག ད་དུང་ཉི་ཧོང་སོགས་དང་། གྲོང་དང་གྲོང་ཁྱེར་ཐ་ན་སྡེ་བ་ཁག་གི་ནང་དུའང་ཅི་ཙམ་ཁྱབ་བསྒྲག་དང་འབོད་སྐུལ་ཞུ་བཞིན་པ་དར་ལུང་འོན་པས་མ་ཐོས་པ་འེ་རེད། གཞིས་ལུས་མི་དམངས་ཀྱིས་ད་བར་དུ་ང་ཚོས་བསམ་མི་ཕོད་པའི་ལས་འགུལ་ཅི་ཙམ་བསྒྲུབས་སོང་། ད་དུང་ལས་འགུལ་འདི་སྒྲུབ་ཅེས་ཞུ་ཕོད་པ་འདུག་གམ། ཁྱོད་ཀྱིས་སྐུལ་བའི་ལས་འགུལ་འདིས་ཕན་ཐོག་ན་རྒྱ་ཆེའི་གཞིས་ལུས་མི་དམངས་ཀྱིས་རང་སྲོག་བློས་གཏོང་གིས་རང་ལུས་མེ་རུ་བསྒྲོན་ཏེ་འཛམ་གླིང་ལ་འབོད་སྐུལ་ཞུ་དགོས་འེ་འདུག དགྲ་ནག་རྒྱ་དམར་ཚང་ནི་དབང་དང་བཙན་གྱིས་ཁྲིམས་ལ་རྡོག་རོལ་གཏོང་མཁན་ཞིག་ཡིན་པ་ལས་ཁྲིམས་དང་དམངས་ལ་བརྩི་མཐོང་མེད་པ་ཁྱེད་ཀྱང་ཤེས་ཚོད་རེད། མ་ཤེས་ན་འདི་དང་ཡོ་རོབ་འདྲ་གི་མ་རེད། བཙན་གནོན་འོག་ཡོད་པའི་གཞིས་ལུས་མང་ཚོགས་ཀྱིས་དུས་སྐབས་འདི་འདྲར་ཐུགས་སྤྲོ་མི་འོས་པ་བདེན་མོད། རྒྱབ་ལྗོངས་ཇི་འདྲ་ཞིག་གི་འོག་ཐུགས་སྤྲོ་གཏོང་བ་ཁྱོད་ཀྱིས་འེ་ཤེས། ད་དུང་ཡོ་རོབ་ཏུ་ཐུགས་སྤྲོ་གཏོང་གི་མེད་པའང་ང་ཚོས་མ་ཤེས་ལ། དེ་བས་ཀྱང་སྐུ་ཞབས་ནམ་མཁའ་ལགས་ཀྱིས་ཡོ་རོབ་ཏུ་བོད་དོན་འདི་ལྟ་བུ་སྤེལ་སོང་ཟེར་བའང་མ་གོ་ཐལ།
འབྲི་བརྒྱ་མ་གཡང་ཁོ་རྒྱ་ལགས།
ངས་ཁྱོད་གཅིག་འདྲི་རྒྱུ་ཡིན།གནས་མཇལ་བ་ཐེ་བོའི་གྲྭ་བ་དེ་རྒྱ་གཞུང་གིས་དམར་གསོད་བྱས་པ་ལ་བཙན་བྱོལ་གཞུང་གིས་དེའི་སྐོར་གྲགས་འགུལ་མེད་པར་འཇམ་ཐེངས་ངེར་འདུག་པའི་རྒྱུ་མཚན་ཅི་ཡིན་ནམ།
བོད་ནང་གི་བོད་རིགས་ཚོས་ཁ་གྲགས་དབང་ཡང་མེད་པར་དམར་གསོད་བྱས་ཀྱང་།དེའི་སྐོར་གནས་ལུགས་ལྡན་གཏམ་ཚིག་གཅིག་ཀྱང་མེད་དགོས་དོན་གང་རེད།ཁ་སང་དེ་རིང་བོད་ནང་གི་ཤེས་ཡོན་ལྡན་པ་ཡིན་ཟེར་མཁན་ཚོས་བོད་མི་ས་ཡ་དྲུག་གི་མྱ་ངན་ཚབ་ལ་སྤྲོ་སྐྱིད་གཏོང་དགོས་དོན་ཨེ་ཡོད།
རེད། རང་གི་མི་རིགས་ལ་རང་གིས་ཤ་ཚ་བའི་སྐད་ཆ་རེ་བཤད་ན་དེ་ནི་འགྲིག་པ་རེད། ཡིན་ན་ཡང། གོ་གོ་རིག་རིག་ལ་གསལ་ཆ་མེད་པར་ཁ་རྡུང་གཏོང་བ་ནི་ཐལ་དྲག་པ་རེད་འདོད། ང་ཚོ་ཚང་མ་ལ་ཁྱབ་བསྒྲགས་བྱེད་པའི་འོས་འགན་ཡོད་རེད། འདི་ནི་ཚོགས་པ་ཞིག་ལ་སྒུག་དགོས་དོན་མེད། ཁྱོ་ལ་གསལ་ཆ་ཡོད་ན་གནས་ཚུལ་གང་ལ་བཏང་བཏང་རེད། ལས་དོན་ག་རེ་ལས་ལས་རེད། བོད་ཀྱི་རྩ་དོན་འདི་ཁ་རྒད་ནས་སྒྲུབ་སྟངས་དང་སེམས་སྡུག་ནས་སྒྲུབ་སྟངས་སོགས་ཡོད་ཡོད་པ་རེད་བསམ་སོང་། ཕལ་ཆེར་ང་ཚོས་ང་ཚོ་གཅིག་གིས་གཅིག་ལ་བོད་ཀྱི་ལ་ཞེན་ཡོད་མེད་ཀྱི་རྩོམ་སྙོག་འདི་དུས་ལ་བབ་པ་ཞིག་མ་རེད་འདོད། རང་ས་ནས་ཤི་རེ་བྱེད། རྡོག་རྩ་གཅིག་སྒྲིལ་འདོད་ན་རྡོག་རྩ་གཅིག་སྒྲིལ་གྱི་སྐད་ཆ་བཤོད། ཚིག་གཅིག་ལ་གོ་བ་དང་ཡིག་འབྲུ་གཅིག་ལ་ནུས་བ་ཡོད་པ་རེད།
ནམ་མཁའ་ལཊ་གྱི་གསུངས་པ་དེ་ཡག་པོ་འདུག། ཁོང་གི་འཇོན་ཚོད་དང་དཔག་ཚོད་ཀྱི་དྲན་བསྐུལ་བྱེད་པ་འདི་ཡང་བོད་པ་ཞིག་གིས་བོད་པ་ཞིག་ལ་ཤ་ཚ་དང་ཤ་ཞེན་ཡོད་པའི་རྐྱེན་གྱི་རང་གི་དགྲ་ཤ་ལེན་མ་ཐུབ་ཀྱང། བཙན་བྱོལ་གཞུང་དམངས་ལ་རེ་བསྐུལ་གྱི་ཐ་ན་མར་མེའི་ཁྲོམ་བསྐོར་ལྟར་བུ་ཐབས་ཆག་ཞིག་ཐེ་བོའི་གྲྭ་དཀྲོངས་པ་དེས་ཆེད་དུ་བྱས་ན་བསམ་སྟེ་བྲིས་པ་ཞིག་ཡིན་པ་ལས། ང་ཡོ་རོབ་དུ་བསྡད་ཡོད་མི་ཆེན་པོ་དང་རྒྱུ་ཆེན་པོ་ཡིན། ང་རང་ཡོ་རོབ་དུ་བསྡད་ནས་ངས་ཐེ་བོའི་གྲྭ་དེས་ཆེད་དུ་གང་ཡང་བྱེད་གི་མིན་ཟེར་བའི་ཚིག་གཅིག་མི་འདུག། མ་ཚད་ཁོང་ཡོ་རོབ་དུ་བསྡད་ཀྱང་སེམས་པ་དེ་བོད་པ་ཚང་དང་མཉམ་དུ་གདུང་སེམས་མཉམ་བསྐྱེད་ཡོད་པ་མཚོན་པ་ལས་གཞན་མི་འདུག། དེར་ཁ་བརྡུང་གཏོང་ན་མ་འགྲིག་པ་རེད། གཞན་པ་ཕྱི་རྒྱལ་དུ་ཡོད་པའི་བོད་པ་ཚོའི་འདིའི་བསྐོར་མཐོང་ཐོས་ཡོད་མེད་ཡང་དོག་པ་ཡོད། ནམ་མཁའ་ལཊ་གྱི་སེམས་འཁུར་ཡོད་པ་དེར་དགའ་བསུ་ཡོད། ཁ་བརྡའི་དྲྭ་ཚུགས་དུ་ཕྱི་རྒྱལ་བསྡད་ནས་བོད་དོན་ཐོག་མཆན་འབྲི་མཁན་ཁོང་མ་གཏོག་གཞན་མཐོང་མ་བྱུང། ད་དུང་ཁོང་གིས་བོད་གཞུང་གི་གཞིས་བསྡོད་བོད་པའི་ཆེད་དུ་ལས་ཀ་བྱས་མ་སོང་བོད་ནས་གནས་ཚུལ་ཛ་དྲག་བྱས་པ་དེར་བོད་གཞུང་གི་རྒྱབ་བསྐྱོར་གྱི་ཕྱག་ལས་གནང་མ་སོང་ཟེར་བའི་ཚིག་རྐང་གཅིག་ཀྱང་བཤད་མི་འདུག་པས། དོན་མེད་འུར་འགྲོག་བྱས་ན་རང་འཚང་སྟོན་པ་ལས་གཞན་ཅི། གཞན་ལ་བལྟ་བའི་མིག་ཡོད་ཀྱང། རང་ལ་བལྟ་བའི་མེ་ལོང་དགོས་ཅེས་པ་དེ་སེམས་ལ་ཟུང་ཞིག་མཆན༼༡༽པོ་ལགས། ནམ་མཁའ་ལཊ་ཀྱི་བྲིས་པའི་མཆན་འདི་བོད་དོན་མ་རེད་ཟེར་ཐུབ་གི་ཡོད་པས། བོད་སྤྱི་བའི་ཁེ་ཕན་གི་ཆེད་དུ་ཡིག་ངག་གཉིས་གང་རུང་གི་ཐོག་ནས་བོད་པ་གྲོངས་མཁན་དང་དཀྲུངས་བ་དེ་ཚོར་བརྗེད་པ་ལྟར་བུ་ཡིན་ན་དྲན་གསོ་གནང་བ་དེ་དགའ་དགོས་པ་ལས་ཆོ་མེད་པའི་གཏམ་ལན་སྤྲད་ན་ཁས་ལེན་གི་མིན། ནམ་མཁའ་ལཊ་ཡོ་རོབ་དུ་ཡོད་པ་དེར་སྤྲེལ་ལད་འཁྲབ་པ་དེ་འདྲ་མིན། དྲང་པོ་དང་བདེན་པ་ལ་དྲང་ལན་དང་བདེན་ལན་མེད་ན་མཆན་འགོད་པའི་ཞབས་འདྲེན་མ་རེད་བས། མཐོང་རྒྱ་དང་ཐོས་རྒྱ་མེད་ན་གཏམ་ལན་དེ་འདྲའི་འདྲ་ཞིག་མ་གཏོག་གང་ཤེས། འུར་འགྲོག་ཞིག་ལས་ཅི་ཡང་ཧ་མ་གོ་ཀྱང་ད་དུང་སོ་སོར་སྤྱང་པོ་དང་འཇོན་པོ་ཞིག་ཡིན་འདོག་འདོག་བྱས་ན། དེ་ཡང་འདི་སྐད་དུ། ཞི་མིའི་རང་སྟུག་གསེར་དུ་བསྒོམ། རྡ་ལིའི་རང་འཇེ་སྣུམ་དུ་ལྡག་ཅེས་པ་དེ་ལས་མ་འདས། མཆན་༼༡༽པོ་ལཊ།
ད་དངོས་གནས་ཁག་པོ་རེད། ལུག་གཅིག་ཡིན་ཡང་དོན་མེད་བསད་ན་དོ་བདག་ཡོད་ཀྱང་བོད་མི་གཅིག་དམར་གསོད་བཏང་བ་ཅི་ཡང་འཁོན་ལན་སློག་མི་ཐུབ་པ་ནི་བོད་མི་རིགས་འདི་འཇིག་པའི་སྔ་ལྟས་རེད། འཇར་མན་ནར་ཙི་དེ་ལས་ལྷག་ཅིག་བྱས་བ་ཡོ་རོབ་ཀྱི་ལོ་རྒྱུས་ནང་བྱུང་མེད། བོད་མི་ཚང་མ་སྡར་མ་ཆགས་ཚར་འདུག སྡར་མ་ཞིག་སྲིན་པོའི་མདུན་ནས་འཚོ་ཐབས་མེད། མེད་པ་ཤེས་བཞིན་དུ་འཁོན་ལན་སློག་པ་མ་དགོས་སློག་དགོས་བའི་ཚིག་འབྲི་གཅིག་ཀྱང་ཐོན་དུ་མེད་པ་ནི་མི་རིགས་འདི་འཇིག་པའི་སྔ་ལྟས་རེད། གཅིག་བསད་ཀྱང་དེ་ལྟར་སྣང་མེད་དུ་བཞག་པ་ཡིན་ན་མུ་མཐུད་དུ་མང་དུ་བསད་ངེས་རེད། མི་རིགས་མ་ཚར་བར་དུ་བསད་ངེས། རྒྱ་རུ་མ་ཆགས་བར་དུ་བསད་ངེས་རེད། ང་ཐེ་བའི་བོད་པ་ཚང་མ་སྡར་མ་ཤ་སྟག་རེད། ང་ཚོ་འདི་ལྟར་སྡར་མ་ཆགས་དགོས་དོན་ཅི་ཡིན་ནམ།
ནམ་མཁའ་ལགས།
ཁ་ཚོད་ཡོད་ནང་ནས་གཏམ་ཚོད་མེད་མ་བཤད་ན་ལེགས། གནས་ཚུལ་འདིའི་སྐོར་ལ་གདུང་སེམས་དང་ལས་འགུལ་སྤེལ་མ་འདོད་པ་ག་ལ་ཡིན། བོད་མི་ཞིག་ཡིན་པའི་ཆ་ནས་གནས་ཚུལ་འདི་ལྟ་བུར་མྱ་ངན་དང་རྣམ་འགྱུར་སྟོན་མི་འདོད་པ་སུའང་མེད།
འོན་ཀྱང་། ཐོག་མར་ཁྱོད་ཀྱིས་ཤེས་དགོས་པ་ནི། གནས་ཚུལ་འདི་ལ་ཁ་གསལ་མེད་པ་དང་ཡོངས་ཁུངས་སྣ་གཅིག་ལས་མེད་པས། ད་དུང་རྩད་གཅོད་དང་ར་སྤྲོད་ཁུངས་འཕེར་བྱ་དགོས་སྙམ། གནས་ཚུལ་འདི་ཁུངས་བདེན་ཡིན་པར་ཆ་བཞག་ན། འདི་ནི་ནང་པ་ལའི་དམར་གསོད་ལས་ཀྱང་ཆེས་ཆེར་བརྒལ་བའི་དམར་གསོད་ཀྱི་ཉེས་སྤྱོད་ཡ་ང་བ་ཞིག་ཡིན་པས། ངེས་པར་དུ་གནས་ཚུལ་ཁུངས་སྐྱེལ་བཙན་པོ་བྱ་དགོས།
ཁྱོད་ལ་ས་ཕྱོགས་དེའི་མི་རྒྱུས་ཡོད་ན་ར་སྤྲོད་རེ་གནང་རོགས། དེ་མིན་བོད་མི་ནང་ཁུལ་དུ་འཇོན་མ་འཇོན་གྱི་ཁ་ཟེར་ན་ཕན་ཐོགས་མི་འདུག
མཆན་བུ་༡དང༣-༦ཚོ་ལགས།
ནམ་མཁས་བྲིས་བའི་རྩོམ་ཐུང་གིས་ཁྱེད་ཅག་གི་སྙིང་ལ་ཕོག་ཐུག་སོང་ཡོད་པ་འདྲ།གནས་ཚུལ་འདི་ནི་ང་ཚོའི་བཙན་བྱོལ་གཞུང་གི་ཚད་ལྡན་གསར་ཤོག་དུས་བབ་ཐོག་བཏོན་པའི་གནས་ཚུལ་སྟེང་བྱུང་བའི་གླེང་བརྗོད་ཞིག་རེད།ང་རང་ཉིད་ཀྱི་ཕྱི་ཡི་གསར་ཤོག་ནང་ཚད་ལྡན་དུས་བབ་ཁོ་ན་ངོས་འཛིན་ཡོད།གནས་ཚུལ་འདི་ཁ་གསལ་རུ་འགྲོ་རྒྱུ་དཀའ་བར་འདུག་སྙམ།རྒྱུ་མཚན་ནི་དྲག་དམག་དེས་མི་སྐྱོན་མེད་ལ་དོན་མེད་དུ་མེ་མདའ་རྒྱབ་སྟེ་དམར་གསོད་བྱས་བས་རྒྱ་གཞུང་གིས་འདིའི་དོན་རྐྱེན་འགེབས་སྲུང་གང་ཐུབ་ཐུབ་བྱེད་ངེས་རེད།གང་གིས་ཟེར་ན་གོང་གི་རིག་འབྱུང་རྒྱ་མཚོས་གསུངས་བ་ལྟར་དོན་མེད་དུ་ལུག་ཞིག་ཀྱང་བདག་པོའི་མདུན་ནས་བསད་མི་ཆོག་པ་འཛམ་གླིང་སྤྱིའི་འགྲོ་ལུགས་དང་མི་ཡི་ཆོས་ཉིད་ཞིག་མ་རེད་དམ།གལ་སྲིད་གནས་ཚུལ་གསལ་བོ་ཕྱིར་ཐོན་པའི་ཉིན་མོ་རྒྱ་གཞུང་གིས་གྲྭ་བ་དེའི་ཐོག་ལ་སྐྱོན་ཞིག་བཙལ་ནས་འཇོག་རྒྱུ་ཡིན་པ་ཐེ་ཚོམ་ག་ལ་ཡོད།༢༠༠༨ལོར་བོད་མི་ག་ཚོད་ཞིག་བསད་པ་ད་རུང་ཡང་གསལ་ཁ་མེད།དེའི་རྒྱུ་མཚན་གང་རེད།ནམ་མཁས་དེའི་ཕྱོགས་སུ་གཞུང་དམངས་གཉིས་ལ་འབོད་སྐུལ་དང་བོད་ནང་གི་བོད་མི་དང་དུད་འགྲོ་གཉིས་རྒྱ་གཞུང་གིས་ཐོབ་ཐང་གཅིག་ཏུ་འཛིན་གྱི་འདུག་ཟེར་ནས་གལ་གནད་ཆེ་ས་ཞིག་ལ་འཇུས་སྟེ་གསུངས་འདུག་མོད།ཁྱེད་ཚོ་གསུམ་གྱིས་ཁོ་ལ་ཁ་རྡུང་གཏོང་དགོས་བའི་རྒྱུ་མཚན་ཅི་ཡིན།དེ་ཡིན་ན་ཁྱེད་ཚོས་ཀྱང་གནས་ཚུལ་དེ་ལས་ཀྱང་གསལ་ཁ་ཞིག་བཙལ་རོགས།ཐེ་བོ་གྲྭ་བ་གནས་མཇལ་བ་དེ་ཡང་ང་ཚོ་དང་ཁྲག་རྒྱུད་གཅིག་པ་མ་ཡིན་ནམ།དེ་ཡང་ང་ཚོ་བཞིན་འཇིག་རྟེན་འདིར་འཚོ་ན་འདོད་མཁན་ཞིག་རེད།ད་རུང་ཁྱེད་ཚོས་ནམ་མཁའ་ལ་ཁ་རྡུང་རིམ་པ་འདྲ་མིན་བཏང་འདུག་པ་ལ་ལྟས་ན་ཁྱེད་ཅག་གི་བསམ་བློ་དང་འགལ་བའི་ལས་ཆེན་པོ་ཞིག་བྱས་པ་མཚུངས།ནམ་མཁས་ཀྱང་བོད་མི་རིགས་ཞིག་ཡིན་པས་སེམས་ཀྱིས་མ་བཟོད་པར་བྲིས་པ་གསལ་བོ་རེད།
སྤྱིར་ཕྲན་ཆུང་ངས་གཞུང་དང་ཚོགས་པ་སོགས་ལ་རྩ་ནས་ཁ་རྡུང་བྱེད་མྱོང་མེད་་་་ལྷག་ཏུ་དེ་འདྲ་བྱེད་པའི་བསམ་བློ་ཡང་མེད།
འོན་ཀྱང་དེ་རིང་ཕྲན་ཆུང་གི་འགྲིན་པ་ལས་སྐད་ཆ་འགའ་མི་བཤད་ཐབས་མེད་རེད་་་རྒྱལ་ས་ལྷ་སར་གནས་མཇལ་གྲྭ་བ་ཞིག་གནས་ལུགས་གང་ཡང་མེད་པའི་སྒོ་ནས་དམར་གསོད་བཏང་འདུག་པ་དངོས་གནས་ཡིད་སྐྱོ་བྱེད་ཀྱི་གནད་དོན་ཞིག་རེད།
གནད་དོན་འདིའི་ཕྱོགས་ལ་རང་དབང་ལུང་པར་གནས་པའི་བཙན་བྱོལ་བོད་གཞུང་གིས་བདག་མ་རྒྱབ་པ་འདྲ།
ངོ་བོའི་ཆ་ནས་མི་གཅིག་དམར་གསོད་བཏང་བ་ཡིན་ཡང་རྒྱབ་ཏུ་བོད་མི་རིགས་འདི་མཐོང་ཆུང་དང་གཉའ་གནོན་བྱེད་པའི་རྣམ་པ་ཞིག་ཅི་ལ་མིན། ད་དུང་ཡང་འདི་འདྲའི་གནད་དོན་འབྱུང་མི་སྲིད་པ་མ་རེད་དེའི་ཕྱིར་རྒྱ་གཞུང་གི་བྱེད་ཐབས་འདི་ལ་ཁ་གཏད་གཅོད་བྱེད་ཀྱི་བྱ་བ་ཞིག་ཛ་དྲག་གི་ངང་ནས་སྒྲུབ་དགིས་ཀྱི་འདུག་་་པས་བཙན་བྱོལ་གཞུང་མང་གཉིས་ནས་བསམ་བློ་གཏོང་རོགས་ཞུ།
༡༽ འབྲི་བརྒྱ་མ་གཡང་ཁོ་ལགས། ཁྱོད་འདི་ནོར་རྫི་བྱས་ནས་བསྡད་ཡོད་ན་ཏག་ཏག་རེད་བསམ་པ་དྲན་བྱུང་། སྤྱི་དང་བྱེ་བྲག་གི་དབྱེ་བ་དགར་ནས་སྐབས་ཀྱི་ཚེ་སྲོག་ཤོར་བའི་དོན་རྐྱེན་ཐད་དུ་བསམ་གཞིགས་རེ་བྱས་ཡོད་ན། བཙན་བྱོལ་གཞུང་དམངས་འདིས་གནས་སྟངས་ཆེ་གེ་མོ་མ་གཏོགས་ཁ་ཡ་མི་བྱེད། དཔེར་ན། མེ་བསྲེགས་ཀྱི་དོན་རྐྱེན་ལྟ་བུ། དེ་ཡང་༧གོང་ས་མཆོག་བོད་ཡུལ་དུ་གདན་འདྲེན་ཐུབ་ཐབས་དང་། འཚེ་མེད་ཞུ་བའི་ལྟ་གྲུབ་གཞིར་བཟུང་གིས་བཙན་བྱོལ་བོད་མིའི་ལངས་ཕྱོགས་དང་མཚུངས་ལུགས། དབུ་མའི་ལམ་གཙོར་འདོན་གྱིས་འདས་བོ་རྣམས་ཀྱི་རེ་འདུན་ཡང་དེ་ལས་བརྒལ་མི་རུང་། བྱས་ཙང་རྒྱལ་སྤྱིའི་ཉམས་ཞིབ་པ་དང་ཡུལ་གྱར་བོད་མིའི་བར་ན་མཐོང་སྣང་མི་འདྲ་བའི་ལྟ་ཚུལ་ཞིག་བྱུང་དང་འབྱུང་བཞིན་པ་རེད། དེར་བརྟེན་གཞིས་ལུས་བོད་མིའི་དཀའ་སྡུག་སྤྱི་དང་འདོད་མོས་ཡོངས་ལ་ཁ་གཡེང་མིག་གཡེང་རེ་མི་བྱེད་ཐབབ་མེད་རེད།
ཉེ་སྔོན་འདིར་སོག་པའི་རྩ་ཐང་ན་རྒྱ་ནག་གི་དོལ་སྐྱེལ་རླུང་འཁོར་གྱིས་སོག་པོ་བ་རྣམས་རྩམ་པ་རྫི་རྫི་བྱས། ལུག་རིན་ཙམ་གྱི་ངོ་སོ་ཡང་མི་སྟེར་བར་དབང་ཡོད་བྱས་བ་གོ་མྱོང་ངམ། དེ་དུས་བོད་ཀྱི་བརྙན་འཕྲིན་དང་དྲ་རྒྱ་བརྒྱུད་འཛམ་གླིང་ཟླུམ་པོ་འདིའི་ཕྱོགས་ངོས་ཡོངས་ལ་བསྒྲགས་བས་མ་ཟད། ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་བརྒྱུད་འབྲེལ་ཡོད་སོག་པོའི་མི་སྣ་ལ་རྒྱུས་ལོན་མི་ཆུང་བ་རེ་བྱས་མྱོང་བ་མིན་ནམ། འདི་ལྟར་བསམ་ཡོང་དུས་སྙིང་ཁར་མེ་མདའ་གཏད་ནས་མིག་མིག་ཅེར་ཅེར་ལ་མདེའུ་ཁོག་པའི་ནང་ལ་དེད་པའི་ངང་ཚུལ་དེས་ཁོ་བོའི་གཟུགས་གཞི་ཡོངས་སྤུད་དེ་ཧོན་ཐོར་བཅུག་སོང་།
དེ་ན་ནམ་མཁའ་ལགས་ཀྱིས་བོད་གཞུང་འབངས་ལ་དྲན་སྐུལ་རེ་བྱས་སོང་བ་འདི་ལྟར་ཡ་ལན་སྤྲོད་དོན་ཅི་ཡིན་ནམ། མ་གཞི་ནས་དོན་རྐྱེན་འདི་བྱུང་རྗེས་གྲགས་མེད་འགུལ་མེད་དུ་སྡོད་མཁན་འབྲུ་བརྒྱ་མ་གཡང་ཁོ་གཅིག་པོ་མིན་པར་བརྟེན། ལས་འདེད་འདི་ཁྱོད་གཅིག་པོས་འཁྱོག་ཚོད་མི་འདུག་མོད། སྤྱི་དོན་བསམ་ན་བློ་རྒྱ་ཡངས་དགོས་ནི་རེད། གཞན་ནུབ་བྱང་སློབ་གྲའི་རྒན་རྣམས་པའི་བྱེད་ལས་དེ་ཞོར་འཕྲོས་ཞིག་རེད་འདུག་མོད། ས་ཐག་རིང་ནས་རྒྱུས་མངའ་མེད་པར། དགོས་དོན་མེད་པར། འབབ་སྟེགས་མེད་པར་སྒྲོ་བཏགས་ནས་གླེང་འདེབས་རྒྱུ་མ་རེད།
༢༽སད་ན་ལེགས། ད་རུང་ཅུང་ཐོམས་འདུག གལ་སྲིད་གནས་ཚུལ་འདི་དངོས་ཡོད་དང་འདྲ་བོ་ཞིག་མེད་ན། དེ་ལུགས་ཀྱིས་གནས་ཚུལ་འདིའི་འབྱུང་ཁུངས་དེད། ཁ་ཚོད་ཡོད་ནང་གི་གཏམ་རྒྱུས་ཡོད་དེ་བཤད་ན་འགྲིག་གི་རེད།
སྐབས་སུ་ཅིས་ཀྱང་གླེང་དགོས་བ་ནི་ནང་པ་ལའི་ཁྱི་གསོད་སྟངས་དེ་རེད། སྐབས་དེ་དུས་སྐུ་ཉིད་ཀྱི་སེམས་ཁམས་དེ་ཅི་འདྲ་ཞིག་ཏུ་གྱུར་སོང་། ཅི་ཞིག་འཇོན་སོང་། བོད་གཞུང་དམངས་འདིས་ཚུལ་ཅི་ལྟར་ཕྱི་ལ་བསྒྲགས་སོང་། ནུས་བ་ཅི་ཞིག་ཐོན་སོང་། བདག་གི་བསམ་སྣང་ལ་སྔོན་ཆད་དོན་རྐྱེན་གང་བྱུང་བ་དེ་བོད་གཞུང་འབངས་འདིས་མཐར་སྐྱེལ་མ་ཐུབ་པའི་དབང་གིས་མུ་མཐུད་ནས་བརྙས་བཅོས་འདི་རིགས་བྱུང་དང་འབྱུང་རྒྱུ་རེད། མི་སྐྱིད་ས་དང་མི་འདོད་པའི་རིགས་གླེང་བསྡད་ན་ཅི་སྐྱོན།
རེད། དོན་མེད་དུ་དམར་གསོད་བྱེད་པ་མ་དགོས་ཞི་བའི་ངོ་རྒོལ་པ་གང་བྱུང་གིས་མེ་མདའ་རྒྱབ་ན་རྒྱལ་སྤྱིའི་ཁྲིམས་འགལ་རེད།་དམག་མི་དེས་རང་སྲུང་གི་ཆེད་མིན་པ་གང་འདོད་ཀྱིས་མེ་མདའ་བརྒྱབ་པ་ནི་བོད་རིགས་རྣམས་རི་དྭགས་ལྟ་བུ་འདུ་ཤེས་བཟུང་བ་རེད།