ཨ་འབྲུག་དཀོན་མཆོག
འཇིག་རྟེན་ནི་དངོས་པོ་ཞིག་ཡིན་པས་འཚོ་བ་ཡང་དངོས་ཡོད་ཅིག་ཡིན་འོས། དེའི་ཕྱིར་ང་ཚོའི་འཇིག་རྟེན་དང་འཚོ་བའི་ཐད་ཀྱི་ལྟ་ཚུལ་དག་ཀྱང་དངོས་ཡོད་ལ་གཞི་བཅོལ་བའི་ལྟ་ཚུལ་ཞིག་ཡིན་དགོས དེ་ལྟ་ནའང་ང་ཚོ་རང་ཉིད་དང་། ང་ཚོའི་སྤྱི་ཚོགས། ང་ཚོའི་རིག་གནས་བསམ་བློའི་ཁོར་ཡུག་དང༌། ང་ཚོའི་འཚོ་བའི་གོང་ཐང་གཅོད་ཕྱོགས་ཀྱི་ཚད་གཞི། ཐ་ན་ང་ཚོའི་མིའི་རིན་ཐང་གི་ངོ་བོ་འཇོག་ཚུལ། དེ་ལས་ཀྱང་མི་ཆེ་ཆུང་དང་དེའི་གྲལ་རིམ་གྱི་ངོ་བོ་སོགས་འགྲུབ་པར་བྱེད་པའི་ང་ཚོའི་ངོས་འཛིན་གྱི་བསམ་བློ་དང༌། བསམ་བློ་དེའི་སྟེང་དུ་ཆགས་པའི་གོམས་སྲོལ་དང་འབྲེལ་བའི་འདུ་ཤེས་ཐམས་ཅད་དངོས་ཡོད་ཀྱི་བདེན་ལུགས་ལ་གཞི་བཅོལ་བའི་ལྟ་གྲུབ་ཅིག་གི་རྒྱབ་རྟེན་ལས་བྱུང་ཡོད་དམ། ཡང་ན་བདེན་ལུགས་ཀྱི་གྲུབ་གཟུགས་རབ་རིབ་བྲིས་པའི་གཞུང་ལུགས་ཀྱི་ལྟ་བའི་གྲིབ་གཟུགས་འོག་གི་ཞེན་ཕྱོགས་ཐོ་རེ་བའི་སྐྱ་རིས་གསལ་ལ་མི་གསལ་བ་ཞིག་གི་ནང་རོལ་དུ་འཁོར་གྱི་ཡོད། དོན་ངོ་མར་ང་ཚོར་འཇིག་རྟེན་ལྟ་ཚུལ་ཡོད་མེད་ལ་ཐུག་མེད་པར་འཇིག་རྟེན་ལྟ་ཚུལ་གང་འདྲ་ཞིག་དགོས་མིན་ལ་ཐུག་ཡོད་པ་དེ་མཚན་ཉིད་རིག་པ་བ་དག་གིས་སྔ་མོ་ནས་དོ་གལ་ཆེན་པོ་བྱེད་པའི་གནས་ཤིག་ཏུ་གྲུབ་འདུག་པ་དེ་ཡང་མི་དང་སྤྱི་ཚོགས་ཀྱི་ནོར་འཁྲུལ་ཆེ་ཤོས་དག་འཇིག་རྟེན་ལྟ་ཚུལ་མེད་པའི་དབང་གིས་འབྱུང་བཞིན་པ་མ་ཡིན་པར་འཇིག་རྟེན་ལྟ་ཚུལ་གྱི་ནོར་འཁྲུལ་ལ་བརྟེན་ནས་འབྱུང་བཞིན་པའི་དབང་གིས་མ་རེད་དམ།
འཇར་མན་གྱི་མཚན་ཉིད་རིག་པའི་ཆེད་རམས་པ་གྲགས་ཆེན་ཧེ་གེར་གྱིས་གཏན་ཚིགས་རིག་པ་ནི་གྲུབ་གཟིགས་ཀྱི་རྒྱལ་ཁམས་ཤིག་རང་རེད་ཅེས་གསུངས་པ་ལྟར་ན གཏན་ཚིགས་རིག་པའི་རིགས་ལམ་གྱིས་རིགས་བསྒྲུབ་བྱས་པའི་གཞུང་ལུགས་ཀྱི་ལྟ་ཚུལ་དེ་ཡང་གྲུབ་གཟུགས་ཀྱི་འཇིག་རྟེན་ཞིག་ཡིན་ངེས་པ་དེ་རེད། དེ་ལྟ་བུའི་གྲུབ་གཟུགས་དེ་ནི་དངོས་ཡོད་ཀྱི་གྲུབ་གཟུགས་ཡིན་ལ་ང་ཚོ་ནི་གྲུབ་གཟུགས་ཀྱི་ནང་དུ་འཁོར་བསྐྱོད་བྱེད་པ་ལས་གྲུབ་གཟུགས་ཀྱི་སྐས་རིམ་དེ་ནས་དངོས་ཡོད་ཀྱི་ཞིང་སར་སླེབས་མ་ཐུབ་པའི་དབང་གིས་ང་ཚོ་ནི་གཞུང་ལུགས་ཀྱི་གྲུབ་གཟུགས་འོག་ན་མཚར་སྒྲུང་སྣ་ཚོགས་རྩོམ་པའི་རྟོག་བཟོ་བ་ཁྱུ་གཅིག་མ་རེད་དམ། དྲང་མོ་བཤད་ན་ཤེས་བྱ་ཀུན་གཟུགས་དང་ཐམས་ཅད་མཁྱེན་པ་ཆེས་མང་སའི་རང་རེའི་བསམ་བློའི་ཁོར་ཡུག་འདི་གཞུང་ལུགས་ཀྱི་གྲུབ་གཟུགས་འོག་གི་རྟོག་བཟོ་ཞིག་མིན་ན་འགྲོ་བ་མིའི་ཤེས་རིག་གི་དཀྱོགས་མཚམས་ཆེན་པོ་དག་ན་ང་ཚོའི་ཐམས་ཅད་མཁྱེན་པ་དག་གི་མཚན་བྱང་གིས་སྟོང་མི་སྲིད་ལ། གསར་རྙེད་ཤེས་ཡོན་གྱི་འགྲན་བསྡུར་འཛམ་གླིང་གི་གཞི་ཁྱོན་དུ་གཅིག་གྱུར་གྱིས་ཁྱབ་དུས་ང་ཚོའི་ཤེས་བྱ་ཀུན་གཟིགས་དག་ཁ་རོག་གེར་ཁུ་སིམ་མེར་བཞུགས་མི་སྲིད། ངས་འདི་ལྟར་བཤད་པ་སྐུར་འདེབས་ཀྱི་ཆེད་དུ་མིན། འོན་ཀྱང་གཞུང་ལུགས་ཀྱི་གྲུབ་གཟུགས་འོག་ན་དངོས་ཡོད་ཀྱི་ལྟ་བ་དང་ཁ་ཐག་རིང་བ་མ་ཟད་ཐ་ན་གནད་དོན་མང་པོ་ཞིག་གི་ཐད་ནས་གཞུང་ལུགས་ཀྱི་ཚད་འཛིན་དང་ཡང་འགལ་བའི་སྐྱོ་གནས་མང་པོ་སྦས་སྐུང་བྱས་ཏེ་ནག་ཉེས་དང་རུལ་སུངས་ཀྱི་སྤྱོད་ཚུལ་མང་པའི་སྤྱི་ཚོགས་ཤིག་ཏུ་གཞུང་ལུགས་ཀྱང་ཆུད་ཟོས་སུ་འགྲོ་བཞིན་པ་ནི་ངོ་མའི་ཡིད་སྐྱོ་བ་ཞིག་རེད་ཨང༌། ངས་ང་ཚོ་གཞུང་ལུགས་ཀྱི་བསམ་བློ་དང་ཁ་བྲལ་དགོས་པ་རེད་ཅེས་བཤད་ཀི་མེད། འོན་ཀྱང་གཞུང་ལུགས་ཀྱི་བསམ་བློ་དེ་གོ་སྐབས་དང་གོ་གནས་མཐོ་བའི་མི་བུ་རེ་ཟུང་གི་རྫོབ་སྤྱོད་སྦས་སྐུང་བྱེད་སྤྱད་ཀྱི་ཡོལ་བ་རུ་གྲུབ་ན་འགྲིག་གི་མི་འདུག་ལ། ཁོང་ཚོའི་གོ་གནས་དང་གོ་སྐབས་ཀྱི་ཆེད་དུ་ང་ཚོ་དང་གཞུང་ལུགས་མཉམ་གཅིག་ཏུ་ཉམས་ཉེས་སུ་སོང་ན་འགྲིག་གི་མི་འདུག་འདོད་ཀི། དོན་ངོ་མ་གཞུང་ལུགས་ནི་དངོས་ཡོད་མཐོང་བྱེད་ཡིན་དགོས་པ་ལས་དངོས་ཡོད་སྐུང་ས་དེ་ཡིན་མི་འོས་ལ། དེ་ལས་ཀྱང་དངོས་ཡོད་དང་མི་མཐུན་པའི་སྤྱོད་ཚུལ་སྣ་ཚོགས་ཀྱི་ཕྱི་ཁེབས་གཏན་ནས་ཡིན་མི་འོས།
གཞུང་ལུགས་ཕལ་ཆེར་བ་ནི་བློ་རྩལ་ལྡན་པའི་མཁས་པ་དག་གིས་རྣམ་པར་དཔྱོད་པའི་བློ་གྲོས་ཀྱི་གྲུབ་ཆ་ཞིག་རེད་ཅེས་བཤད་ཆོག་ལ་གྲུབ་ཆ་དེ་ཡིས་སྤྱི་ཚོགས་དང་སྒེར་པ་གང་གི་ངོས་ནས་བསམ་གཞིག་བྱེད་ཚེ་འཚོ་གནས་ཀྱི་བདེ་སྐྱིད་དང་ཁེ་ཕན་ལ་ཞབས་ཞུས་མི་ཉུང་བ་ཞིག་བྱས་ཡོད་པ་ནི་བསྙོན་དུ་མེད། འོན་ཏེ་དུས་ཚོད་ནི་སངས་རྒྱས་པས་བཤད་པ་ལྟར་ཆེས་མི་རྟག་པའི་བདག་ཉིད་ཅན་ཞིག་ཡིན་སྟབས་སྐད་གཅིག་སྐད་གཅིག་གིས་འགྱུར་གྱིན་ཡོད་ལ་དེེའི་འགྱུར་འགྲོས་དང་བསྟུན་ནས་བྱ་དངོས་དང་འཇིག་རྟེན་ཆ་ཚང་གཞན་ནས་གཞན་དུ་འཕེལ་འགྱུར་བྱེད་ཀྱིན་ཡོད། རྒྱུ་མཚན་དེར་བརྟེན་ཡར་རྒྱས་དང་སྔོན་ཐོན་ཅན་དུ་འགྱུར་བ་ལ་དུས་རབས་དང་མཐུན་པའི་གསར་བརྗེ་རྙིང་བསྐྱུར་དང་སྙིགས་དོར་བཅུད་ལེན་གྱི་བསྒྱུར་བཅོས་ཤིག་ངེས་པར་བྱེད་དགོས། བསྒྱུར་བཅོས་དེ་བྱེད་པ་ལ་མི་བུ་རྣམས་ཀྱིས་བསམ་བློ་གོ་རྟོགས་སད་དགོས་ཤིང་བསམ་བློའི་རྟོགས་སད་དེ་ཉིད་སློབ་གསོའི་གྲུབ་འབྲས་ཡིན་དུས་མདོར་ན་ད་ལྟ་ང་ཚོའི་སློབ་གསོ་ཁ་ཕྱོགས་ནོར་ཡོད་པ་འདི་ངེས་པར་ཤེས་དགོས་སྙམ།