“གཞུང་ལུགས་བྲན་རྒོལ་”ལ་སེན་འཐོག་བྱེད་བཞིན་པའི་ནུབ་བྱང་གི་བྱིས་པ་ཚོར་སྤྲིངས།

བཙན་མེ་སྟག

“བྱིས་པ་”བསམ་བློར་གོ་བས་འཐུས། གཞན་གྱིས་ཅི་བྲིས་མ་གོ་བ། རང་གིས་ཅི་བཤད་མ་རྟོགས་པ_____ཁ་བྱང་གི་འགྲེལ།

མ་གཞི་ནས་འོ་སྐོལ་ཚོ་འུར་བརྗོད་ལ་དགའ་བའི་མི་རིགས་ཤིག་ཡིན་ཚོད་འདུག “ཁོང་ཚོར་དགྲ་བོར་འཐབ་འཛིང་གི་ཐབས་ཇུས་གཅིག་ལས་མེད། དེ་ནི་དགྲ་བོའི་མདུན་སར་ཐོན་ནས་སྐད་ཤུགས་ཡོད་ཚད་ཀྱིས་ཀི་སྒྲ་འདོན་རྒྱུ་དེ་རེད་”ཅེས་ཉི་ཧོང་མི་རིགས་ཊོ་ཀན་ཊཱ་དྷཱ་(Tokan Tada)ཟེར་བ་ཞིག་གིས་(ཏཱ་ལའི་བླ་མ་སྐུ་ཕྲེང་བཅུ་གསུམ་པ་མཆོག)ཅེས་པའི་དེབ་ནང་དུ་བྲིས་འདུག
སྐད་ཆ་དམར་དམར་པོ་བཤད་ན། གཞན་དབང་། སྒེར་གཅོད། བཙན་གནོན་སོགས་ལ་ཞེ་བསམ་པའི་གཏིང་ནས་རྒོལ་བའི་སྙིང་སྟོབས་ཤིག་འཚོལ་བཞིན་ཡོད་ན་དེ་ལ་མི་དགའ་གང་ལ་དགའ།
ལྡོག་སྟེ། རང་དབང་། དམངས་གཙོ། འདྲ་མཉམ་སོགས་ཐོས་ལོ་དང་གོ་ལོ་ཙམ་ཡོད་པས་ཡིན་ན་ནི་རིན་ཐང་ཅི། ཁ་སང་དེ་རིང་དོན་ལ་མི་ཞེན་ཚིག་ལ་ཞེན་པ། ཕུགས་ལ་མི་བལྟ་མདུན་ལ་བལྟ་བའི་ན་གཞོན་མང་བོ་ཞིག་འུར་ཟིང་གི་ཁྲོད་ན་བསྡེབས་ཀྱིས་ལངས་ཡོང་གིན་འདུག འདི་ནི་སྐྱོ་གར་དང་སྤྲོ་གར་གང་དུ་གཏོགས་མིན་ལྐོག་གྱུར་ཡིན་ཙ་ན། སུས་ཀྱང་དཔྱད་གཟོད་མི་ཐུག་རུང་། “རུམ་ན་ཅི་ཡོད། ལག་པས་ཤེས་”ཟེར་བ་ལྟར་གཤིས་ལུགས་ཆིག་རྐྱང་བ་དེའི་ངོས་ཐད་ནས་ཧར་གྱིས་བལྟས་པ་ན། ཆ་མ་འཚལ་བའི་འུར་བརྗོད་དེའི་ངོ་གདོང་རབ་རིབ་ཅིག་མཐོང་ཡོང་བ་མིན་ནམ།
ཁོ་བོས་“གཞུང་ལུགས་བྲན་རྒོལ་”ཞེས་པའི་དཔེ་ཆ་དེ་ལེགས་མིན་དང་འགྲིག་མིན་སོགས་རིན་ཐང་གི་ཚད་གཞི་སྲང་ལ་གཞལ་རྩིས་མེད། འདི་ནི་མི་རིགས་ཤིག་གི་བདེ་སྡུག་དང་རིག་གནས་ཤིག་གི་ཤི་གསོན་ལ་ཐུག་པས། ཁུར་དུ་མི་ཐེག་པའི་ཁུར་བོ་ལྗིད་མོ་ཞིག་ལ་བགྲང་བར་འོས་པ་ན། སྐད་ཆ་ཅི་ཞིག་བསྙད་པར་མོས་པ་དང་གང་ཞིག་འབྲི་བར་མཉེས་པ་ཙམ་གྱིས་ས་རྒྱ་ཅི་ཙམ་ཆོད་ཨང་།

དོན་གྱི་གནས་ལུགས་དང་སྔོན་གྱི་ཉམས་མྱོང་ལས་དཔྱད་ན། ཕྱི་ལོ་༢༠༠༡ ལོར་“སད་རྟོགས་སྡེ་ཡི་རུ་འདྲེན་པ་”སྐུ་ཞབས་ཞོགས་དུང་ལགས་ཀྱིས་བརྩམས་པའི་《དཔྱོད་ཤེས་རྒྱང་འབོད་》ཅེས་པ་མི་ཡུལ་དུ་སྐུ་འཁྲུངས། སྐབས་དེར་ཡང་བབ་ཅོལ་དང་བྱུང་རྒྱལ་ལ་དགའ་བའི་དཔུང་སྡེ་དེས་“བག་ཆགས་རྙིང་པ་”ཞེས་པའི་ཐ་སྙད་འདི་ཁ་ཤའི་བར་ནས་དབུགས་ཚ་བོ་དང་འགྲོགས་ནས་རྫོགས་མེད་ཅིག་བཤད་པ་རེད་མོད།
དོན་དངོས་ཐོག་“བག་ཆགས་རྙིང་པ་”ཞེས་པའི་བརྡ་ཆད་འདི་ཚེ་སྲོག་ཞུགས་པའི་ཐ་སྙད་གསོན་པོ་ཞིག་ནས་འགུལ་སྐྱོད་བྲལ་བའི་བརྡ་ཆད་ཤི་རོ་ཞིག་གི་བར་དུ་བསྐྱལ་བ་མ་ཡིན་ནམ། ཅི་ཞིག་དཔྱོད་ཤེས་པ་ནས་གང་ཞིག་རྒྱང་ནས་འབོད་དགོས་པའི་འཕེལ་རིམ་དེའང་དཔུང་སྡེ་དེར་མཚོན་ན་ཤིན་ཏུ་གསང་བ་ལྐོག་གྱུར་གྱི་སྐད་ཆ་མ་ཡིན་ནམ། འདི་ནི་བསམ་བློ་མ་སྨིན་པའི་ཁྱུ་ཚོགས་དེས་མ་ཤེས་ཤེས་ཁུལ་བྱས་པའི་འུར་བརྗོད་ཀྱི་འབྲས་བུ་རེད། མ་གཞི་བྱིས་པའི་ན་ཚོད་ལ་གཏོགས་པའི་དཔུང་སྡེ་ཚོ་སློབ་དུས་ཀྱི་གསར་བུ་རྐྱང་རྐྱང་ཡིན་པས་ཅི་ཁག རང་ཚོད་རང་གིས་མ་ཟིན་པར་ཡར་ལྡིང་མར་ལྡིང་མང་བོ་ཞིག་བྱས་པ་ནི་གུ་ཡངས་ཀྱི་ཁྱབ་ཁོངས་ནས་སྙོམ་སྒྲིག་བྱེད་སླ་ཡང་། དཔུང་སྡེ་འདི་མྱིག་རྡོག་ཡོད་ཡོད་ལ་འོབས་དོང་ལ་མཆོངས་མཁན་ཏག་ཏག་ཡིན་གཤིས། ཁོ་བོར་“མི་རིགས་རིང་ལུགས་”ཀྱི་ལྟ་བ་ལ་རྫོང་མཐུག་པས་མ་བཟོད་ཨང་།

“གཞུང་ལུགས་ཀྱི་བྲན་རྒོལ་”ཞེས་པ་ལས་འཕྲོས་པའི་ངག་ཐོག་གི་སྐད་ཆ་མང་བོ་ཞིག་གནད་ལ་ཁེལ་ཡོད་མེད་ཇི་ལྟར་ཡང་། ཡིག་ཐོག་ལ་འཐིམ་ནས་“ན་གཞོན་གསར་བ་”ཞེས་པའི་དྲ་ཚིགས་སྟེང་ལ་འཕྲོ་རིམ་འཕྲོར་མུ་འགོད་བྱེད་བཞིན་འདུག ཁོ་བོས་དབུགས་ཐུན་གཅིག་གིས་བམ་ཀློག་ཐེངས་གཅིག་བྱས་པ་ན། དེ་མ་ཐག་དབུགས་ཐུན་གཉིས་པ་ཞིག་ཞོར་དུ་ཤོར་སོང་ཡང་། སྡེ་ཚན་ག་གེ་མོ་ཞིག་གིས་ཅིག་ལ་དང་ལེན་བྱེད་མ་ཐུབ་པ་དང་། ཉིག་ལ་བསམ་གཞིག་བྱེད་མ་ཐུབ་པ། གསོ་ཐེ་ཞེས་སོགས་ཐ་སྙད་སྐམ་པོ་རྐྱང་རྐྱང་གིས་གྲུབ་པའི་རྩོམ་ཡིག་ཡིན་ཁུལ་གྱི་ཡ་མ་ཟུང་གི་ཚིག་རོ་མང་བོ་ཞིག་སྤུངས་འདུག
ལྡོག་སྟེ་བརྗོད་ན་ཁོ་བ་ཚོའང་སློབ་དུས་ཡིན་ཙ་ན། ཕ་མ་དང་གཉེན་ཉེ་གང་ཞིག་གིས་གསོ་ཐེ་ཡིན་ལ། གཞན་གྱི་སྐད་ཆར་དང་ལེན་མ་ཐུབ་པར་ཞེ་སྤོ་གཏིང་ནས་ལངས་པའི་ཀླད་རྙིང་མཁྲེགས་འཛིན་ཅན་ཞེ་གཅིག་ཡིན། དེ་ལྟར་བཤད་ན་འདི་ལྟར་འགྱུར་འགྲོ་བས་སློབ་དུས་ཀྱི་གོ་སྐབས་དམ་དུ་གཟུང་ན་མི་དགའམ། ད་དུང་འུར་བརྗོད་ཀྱི་བྲེལ་འཚུབ་ལངས་པ་ལས་བསམ་གཞིག་གི་མལ་སར་ལོག་ན་མི་དགའམ།
“བསམ་བློ་གསར་བའི་སྣེ་ཤན་པ་”སྐུ་ཞབས་ཞོགས་དུང་ལགས་ཀྱི་《གང་ལ་ལྟ་དང་ཇི་ལྟར་ལྟ་》ཞེས་པའི་རྩོམ་ཡིག་དེའི་ནང་དུ། “ཁོ་བོ་རྩོམ་པ་པོ་ཞིག་ཡིན་པའི་ཆ་ནས། བོད་ཡིག་གི་དཔེ་ཆར་ལྟ་དུས་གཙོ་བོ་རྗོད་བྱེད་དམ་ཚིག་ལ་ལྟ་ཡི་ཡོད། སྟབས་ལེགས་ནས་རྩོམ་འབྲིའི་རྒྱུ་ཆ་རེ་ལོན་བྱུང་ན། ཡིད་རབ་ཏུ་དགའ་བས་ཚོད་རེད་”ཅེས་པའི་སྐད་ཆ་འདི་གོང་བཞིན་བརྡ་ཆད་སྐམ་པོ་ཞིག་མ་ཡིན་པ་དེ་རིང་གཞི་ནས་རྟོགས་པ་ཁྱེད་ཚོའི་བཀའ་དྲིན་ལོས་ཡིན། དེ་མིན་རྩོམ་གྱི་བརྗོད་བྱའི་ཆ་ལ་ལྟ་རིན་དང་གླེང་རིན་ཡོད་པ་ཞིག་ཅི་ནས་ཀྱང་མ་ཡིན་རུང་། དཔྱད་རིན་དང་དགག་རིན་མཆིས་པ་ཞིག་དེ་བས་ཀྱང་མ་ཡིན་རུང་།
སློབ་དུས་ལ་བྲེལ་བའི་ཁོ་བ་ཚོའི་རང་ངོ་རང་གིས་ཟིན་པའི་ཕྱིར་དུ། བསམ་བློ་མ་སྨིན་པའི་དཔུང་སྡེ་དེས་རང་ཚོད་ཟིན་པའི་དོན་དུ། རང་ཉིད་རང་ཉིད་ཡིན་པ་གསལ་བོར་རྟོགས་སླད་དུ། ཁོ་བོས་ཅིས་ཀྱང་གླེང་དགོས་པ་ནི་རང་ཉིད་ཀྱི་འགན་འཁྲི་ཞིག་ཏུ་སེམས་ཡོད།

“ཁྱི་རྒན་ཤེས་ནས་ཟུག ཁྱི་ཕྲུག་མ་ཤེས་པར་ཟུག་”ཅེས་པའི་དཔེ་ལྟར་དེང་སང་ཁ་ཐོགས་ཚད་པོས་“རྙིང་གཏོར་གསར་བརྗེ་”ཞེས་པའི་ཐ་སྙད་འདི་ཅི་མི་སྙམ་པར་གླེང་རྐྱང་བྱེད་པ་ནི་དོན་གྱི་གནས་ལུགས་ཤིག་མ་རྟོགས་པས་ཡིན། གནས་ལུགས་འདི་རྟོགས་དགོས་ན་“རྟོགས་སད་པའི་སྡེ་ཁོངས་ནས་བཀྲམ་པའི་《དཔྱོད་ཤེས་རྒྱང་འབོད་》དང་《ང་ཚོ་སད་རན་》ལ་སོགས་པའི་དཔེ་ཆ་དག་ལ་ཡང་དང་བསྐྱར་དུ། མནོ་བསམ་ཀྱང་ཡང་དང་བསྐྱར་དུ། དེ་ལྟར་བྱུང་ན་ད་གཟོད་ངོས་སྲབ་ས་ཞིག་ནས་གཏིང་ཟབ་ས་ཞིག་ལ་འཇུ་ཐུབ་རྒྱུ་རེད། དེ་ལྟར་མ་ཡིན་ན་ལད་ཟློས་བྱ་ཡུལ་དང་ལད་ཟློས་བྱེད་མཁན་གཉིས་ཀྱིས་“རྙིང་གཏོར་གསར་བརྗེ་”ཞེས་པའི་སྒྲ་ཆིག་རྐྱང་བ་ཞིག་ལས་དོན་གྱི་གོ་བས་ལམ་ལུགས་གཉིས་ལ་འདེད་ཀྱིན་མི་འདུག་གམ། སློབ་དུས་ཀྱི་དཔུང་སྡེ་དེས་“རྙིང་གཏོར་གསར་བརྗེ་”ཞེས་པའི་བརྡ་ཆད་འདི་ལ་གོ་བ་ངོ་མ་ཞིག རྣལ་མ་ཞིག ཡང་དག་ཅིག་དངོས་གནས་ལོན་གྱི་མི་འདུག
རྒྱུ་མཚན་འདི་དང་དེ་ལ་བརྟེན་ནས་དེ་རིང་ཡང་“གཞུང་ལུགས་བྲན་རྒོལ་”ལས་འཕྲོས་པའི་སྐད་ཆ་འདི་དག་ཀྱང་ཚེ་སྲོག་ལྡན་པ་ཞིག་ཡིན་མིན་ཅི་ཆ། གཏིང་ཟབ་སར་གནས་པའི་གོ་བ་དེ་བསྙད་ནས་ཤེས་རྒྱུ་ཞིག་མ་ཡིན་པར་བསམས་ནས་རྙེད་རྒྱུ་ཞིག་ཡིན་པས། ད་ནི་སློབ་ཆེན་པ་ཞིག་གི་མིང་འོག་ནས་འདི་ལྟར་ཐོལ་བྱུང་གི་ཚོར་བ་དང་དུ་བླང་བར་བྲེལ་བའི་སྐབས་ཤིག་མ་ཡིན་རུང་། ད་ནི་ལག་ལ་ཅི་ཡོང་ལེན་རྐྱང་དང་སེམས་ལ་ཅི་ཤར་བཤད་རྐྱང་མ་ཡིན་རུང་། ད་ནི་གཏིང་ཟབ་ས་ལས་ངོས་ཡངས་ས་ཞིག་ནས་འདུག་ཚོད་མ་ཡིན་རུང་། ད་ནི་བློ་རིག་གཅིག་ཏུ་སྒྲིལ་བ་ལས་རྒྱ་ཡན་དུ་གཏོང་བའི་དུས་ཤིག་མ་ཡིན་རུང་། ད་ནི་གནས་ལུགས་ལ་གཞོལ་བ་ལས་འུར་བརྗོད་ལ་བྲེལ་བའི་དུས་ཤིག་མ་ཡིན་རུང་། དེང་སང་གནས་ལུགས་དང་གནས་ལུགས་དག་ལ་གོ་ས་ཁྱོན་ནས་མེད་པས་རང་རང་གི་འདོད་པ་བྱོས།

ནུབ་བྱང་གི་སློབ་མ་མང་བོ་ཞིག་གིས་དེབ་གསར་“གཞུང་ལུགས་བྲན་རྒོལ་”ལས་འཕྲོས་པའི་རྩོམ་ཡིག་མང་བོ་ཞིག་ན་གཞོན་གསར་བའི་དྲ་ཐོག་ལ་བཀོད་པ་མཐོང་འཕྲལ་བྲིས་པ་ཡིན།