མགར་མཁྱེན་རབ་འོད་གསལ། ༼སུ་ཇཱ་བོད་ཁྱིམ། འཛིན་རིམ་དགུ་པ།༽
༡༽ ཕ་མའི་ལས་འགན།
རང་རེ་བོད་པའི་ཁ་རྒྱུན་དུ་ཕ་མ་བཟང་པོའི་བུ་ཕྲུག་དང་དགེ་རྒན་བཟང་པོའི་སློབ་ཕྲུག་ཅེས་པའི་དཔེ་ལྟར། ཕ་མ་དང་དགེ་རྒན་གཉིས་ནི་ཆེས་རླབས་ཆེ་བའི་མི་སྣ་གལ་ཆེན་ཞིག་ཡིན་པར་རང་རེ་བོད་པའི་སྤྱི་ཚོགས་སུ་མཁས་བླུན་ཀུན་གྱི་བཞེད་ཚུལ་མཐུན་མོད། འོན་ཀྱང་ཕ་མ་དང་དགེ་རྒན་གཉིས་ཀྱིས་སོ་སོར་འཁྲི་བའི་ལས་འགན་དེ་གཙང་བཞེས་མ་གནང་བའམ་ཡང་ན་མ་འཁུར་བ་ཡིན་ན། གཞོན་སྐྱེས་ཚོའི་ཁ་ཕྱོགས་ལོག་པར་འཁྲིད་ཉེན་ཆེ་བ་དང་ལམ་ལོག་མགོ་རྨོངས་སུ་འགྱུར་ཉེན་ཆེ་བས་ཕ་མས་སོ་སོའི་བུ་ཕྲུག་དག་ལ་ཆུང་དུས་ནས་སློབ་གསོ་དང་ལམ་སྟོན་གང་ལེགས་གནང་གལ་ཆེ་བར་སེམས།
གང་ལགས་ཤེ་ན། རང་རེ་བཙན་བྱོལ་བོད་མིའི་སྤྱི་ཚོགས་སུ་ཕ་མའི་སློབ་གསོ་ཡིས་མ་འདང་བའི་རྐྱེན་གྱིས་གཞོན་སྐྱེས་ཉུང་ཤས་ཤིག་གིས་བོད་པའི་སྐད་ཡིག་དང་རིག་གཞུང་སོགས་ཀྱི་རིན་ཐང་མ་རྟོགས་པས་གཙིགས་སུ་མི་འཛིན་པ་དང་། དེར་གཙིགས་སུ་མི་འཛིན་པས་སྦྱངས་འདོད་ཀྱི་བློ་མི་སྐྱེས་བས་བོད་མི་རིགས་ཀྱི་ངོ་བོ་མཚོན་བྱེད་བོད་སྐད་ཡིག་གཉིས་དང་། ལྷག་པར་དུ་ཆོས་རིག་གཞུང་དང་བཅས་པ་གོང་འཕེལ་དུ་གཏོང་བ་ལས་ཉམས་དམས་སུ་བཏང་བའི་རྐྱེན་དུ་འགྲོ་ཉེན་ཆེ། དེར་བརྟེན་དཔྱོད་ལྡན་ཕ་མ་རྣམས་ཀྱིས་གཅེས་སུ་འཛིན་པའི་སོ་སོའི་བུ་ཕྲུག་དག་ལ་བོད་སྐད་རྒྱག་རྒྱུ་དང་བོད་ཡིག་སྦྱངས་དགོས་ཚུལ་སོགས་ཀྱི་སློབ་གསོ་རྒྱག་རྒྱུ་ནི་ཤིན་ཏུ་ནས་གལ་ཆེན་ནང་གི་དོན་ཆེན་ཞིག་ཡིན།
༢༽ དགེ་རྒན་གྱི་ལས་འགན།
དགེ་རྒན་ནི་ཡོན་ཏན་ཀུན་གྱི་འབྱུང་ཁུངས་དང་གཞན་རྣམས་སྒོ་གསུམ་དགེ་ལ་སྦྱོར་མཁན་གྱི་མི་སྣ་གལ་ཆེན་ཞིག་ཡིན་པས་འཛིན་ཁང་དུ་སློབ་ཚན་གཅིག་པོ་ཁྲིད་པ་ཙམ་མ་ཡིན་པར་དེ་ལས་ལྷག་པའི་བོད་གནའ་དེང་གི་ཤེས་ཡོན་ཟུང་འབྲེལ་གྱིས་བོད་ཀྱི་གནའ་རབས་ལོ་རྒྱུས་དང་ཡུལ་གོམས་གཤིས་ལུགས་སོགས་རང་མི་རིགས་ཀྱི་སྲོལ་རྒྱུན་རིག་གནས་ཀུན་ལ་བྱང་ཆ་ལྡན་པའི་སློབ་ཕྲུག་གང་མང་སྐྱེད་སྲིང་བྱེད་དགོས་པ་ལས་སློབ་ཚན་ཁྲིད་ཐུབ་ཙམ་དང་ལས་འགན་འགྲུབ་ཐུབ་ཙམ་གྱིས་དུས་ཚོད་སྐྱེལ་ཐབས་ནམ་ཡང་བྱས་མི་རུང་།
སྤྱིར་དགེ་རྒན་གྱི་ལས་འགན་ནི་ལས་སློ་བོ་ཞིག་གཏན་ནས་མིན་ནའང་སོ་སོར་བོད་པའི་དགེ་རྒན་ཞེག་གི་འགན་འཁུར་ཡོད་ཕྱིན་གཞན་ལས་ལྷག་པའི་འགན་འཁྲི་ལྕི་མོ་ཞིག་ཡོད་པ་ངོས་ཟིན་ཐོག་སློབ་ཕྲུག་རྣམས་ཀྱི་མངོན་འདོད་འགྲུབ་ཕྱིར་སྐུ་ངལ་ཇི་ལྟར་འཕྲད་ཀྱང་མི་མཐུད་དུ་མདུན་སྐྱོད་ཀྱི་བློ་སྤོབས་མངའ་བ།བཟོད་སྒོམ་ཐུབ་པ་སོགས་ཀྱིས་སློབ་ཕྲུག་རྣམས་བོད་མི་རིག་རང་ཉིད་ཀྱི་སྐད་དང་ཡི་གེ། ཆོས་དང་རག་གཞུང་བཅས་ལ་གཙིགས་མཐོང་དང་སྤོབས་སེམས་སྐྱེ་རུ་བཅུག་དགོས་པ་ལས་ཕམ་སེམས་གཏན་ནས་སྐྱེ་བཅུག་མི་ཉན།
༣༽ ཤེས་ཡོན་འགན་འཛིན་པའི་ལས་འགན།
ཤེས་ཡོན་འགན་འཛིན་རྣམས་པའི་ལས་འགན་འཙོ་བོ་གཅིག་ནི་སློབ་གྲྭ་ཁག་གི་ཤེས་ཡོན་སྲིད་བྱུས་ཀྱི་ལག་བསྟར་ཐད་གཟིགས་རྟོགས་གནང་བ་དེ་ཡིན་པ་དང་། སློབ་གྲྭ་ཁག་ཏུ་སློབ་མ་རྣམས་ཀྱི་ཤེས་ཡོན་གྱི་ཆུ་ཚད་སྤུས་དག་ཞིག་ཡོང་མིན་སྐོར་ཞིབ་འཇུག་བྱེད་པ་དེ་ཡིན་པ་ལས་ཡིག་རྒྱུགས་ཀྱི་གྲུབ་འབྲས་གཅིག་པོར་བློ་འཁེལ་བ་དང་འདོདོ་བློ་ཁེངས་བ་སོགས་ཀྱི་མི་འགྲིག་པར། སྤྱིར་བཏང་གི་ཤེས་ཡོན་གྱི་སྤུས་ཚད་ཅི་ཡོད་དང་ལེགས་ཆ་གང་ཡོད་གཞིར་བཅོལ་ཏེ་ད་གཟོད་གཞི་ནས་ཐག་གཅོད་བྱེད་གལ་ཆེ་སྙམ།
ལོ་ཤས་སྔོན་ལག་བསྟར་བྱས་པའི་སྲིད་སྐྱོང་གི་སློབ་ཡོད་ཞེས་པའི་ཤེས་ཡོན་གྱི་སྲིད་ཇུས་དེས་རང་རེ་བཙན་བྱོལ་བོད་མིའི་སློབ་གྲྭ་ཁག་གི་སློབ་ཕྲུག་གང་མང་ལ་སེམས་འགུལ་ཐེབས་པ་དང་ཕན་པ་ཅུང་ཟད་རེ་བསྒྲུབས་ཡོད་ཀྱང་། མང་ཆེ་བར་སེམས་ངལ་སྤྲད་པ་དང་ཉུང་ཤས་ཤིག་ལ་གནོད་པ་ཡང་སྐྱེལ་ཡོད། གང་ལགས་ཤེ་ན་སློབ་ཕྲུག་མང་ཆེ་བས་ཆེ་འདོད་དང་གྲགས་འདོད་ཀྱི་དབང་གིས་ཡིག་རྒྱུགས་གཅིག་པོ་གཙིགས་སུ་འཛིན་པ་ལས་གཞན་རྣམས་གལ་ཆེན་དུ་མི་མཐོང་བ་དང་། ཉུང་ཤས་ཤིག་ནི་ཁ་ཡོད་ལག་ཡོད་བོད་སྤྱི་པའི་རྩ་དོན་ལ་སེམས་འཁུར་དང་བོད་གནའ་དེང་གི་ཤེས་ཡོན་སྤུས་ལེགས་ཡོད་མཁན་ཞིག་ཡིན་རུང་ཤེས་ཡོན་གྱི་གོ་སྐབས་སོགས་དང་སྲིད་སྐྱོང་གི་སློབ་ཡོན་འབུལ་གྱི་མེད་པས་སེམས་ཤུགས་ཆགས་ཡོད་མཁན་ཡང་མང་པོ་མཆིས།
ཡིན་ནའང་ཤེས་ཡོན་གྱི་སྲིད་བྱུས་དེ་གཏན་ནས་འགྲིག་གི་མི་འདུག་ལབ་བ་མིན།དེས་ན་གང་འགྲིག་གི་མི་འདུག་ལབ་ན། སྲིད་སྐྱོང་གི་སློབ་ཡོན་སྤྲད་སྟངས་ཀྱི་ཐད་ལ་ཏོག་ཙམ་འགྲིག་གི་མི་འདུག་སྙམ། སྲིད་སྐྱོང་གི་སློབ་ཡོན་ནི་སློབ་ཚན་ཚང་མ་ཆ་མཉམ་བརྒྱ་ཆ་དགུ་བཅུ་གོ་ལྔའི་ཡན་ལོན་དགོས་པ་ཡོངས་གྲགས་ཡིན་ཡང་། བོད་ཡིག་བརྒྱ་ཆ་དགུ་བཅུ་མ་ལོན་ནའང་སྲིད་སྐྱོང་གི་སློབ་ཡོན་སྤྲད་པ་བྱུང་ཡོད་པ་མངོན་སུམ་ལས་བསྙོན་དུ་མེད།
མདོར་ན་བོད་མི་རྒན་རབས་རྣམས་ཀྱིས་སོ་སོའི་སྐད་ཡིག་ལ་གཙིགས་ཆེན་དུ་འཛིན་དགོས་ཞེས་པ་དང་སློབ་ཕྲུག་དག་ལ་ཡང་བོད་པའི་སྐད་ཡིག་གཉིས་པོར་དོ་སྣང་ཡོང་ཕྱིར་མིག་དཔེ་བཟང་པོ་བསྟན་དགོས་ཟེར་བ་ལས་རྒྱུ་མཚན་གཞན་མ་མཆིས་སོ།
༤༽ སློབ་གྲྭའི་འགན་འཛིན་རྣམས་ཀྱི་ལས་འགན།
སློབ་གྲྭ་ཆེ་ཕྲ་ཆུང་གསུམ་གང་ཞིག་ཡིན་རུང་འགན་འཛིན་ལྷན་ཚོགས་ཀྱི་ལས་འགན་གཙོ་བོ་གཅིག་ནི་སློབ་མའི་འཕྲོད་བརྟེན་དང་ཤེས་ཡོན་ཐད་ཤུགས་སྣོན་རྒྱག་རྒྱུ་དེ་ཡིན་པ་དང་། སློབ་མའི་ལུས་སེམས་གཉིས་ཀྱི་འཚར་ལོངས་ལ་དོ་གལ་ཆེ་བཞེས་ཀྱིས་ཆ་རྐྱེན་གང་ལེགས་བསྐྲུན་དགོས་པ་དེ་རང་ཡིན། ལྷག་པར་དུ་སློབ་གྲྭའི་མཛད་རིམ་གང་ཡོད་ལ་ནུབ་ཕྱོགས་པའི་ལྟད་མོ་ཁེ་མཚར་ཅན་བསྟན་པ་དང་དེང་རབས་ཀྱི་དབྱིན་གཞས་རྐྱང་རྐྱང་བཏང་བའི་ཚབ་ཏུ་བོད་པའི་རྩོ་དོན་དང་འབྲེལ་ཡོད་ཀྱི་གཏམ་གཤད་དང་། གཞས་སྣ། བགྲོ་གླེང་། བཀའ་སློབ་སོགས་ཀྱི་ལྟད་མོ་སྟོན་རྒྱུ་དང་སློབ་གསོ་རྒྱག་རྒྱུ་གལ་འགངས་ཆེ་བར་སྙམ། གང་ལགས་ཤེ་ན། དེ་ནི་བོད་རིགས་གཞོན་སྐྱེས་ཚོས་བོད་པའི་ངོ་བོ་རྒྱུན་འཛིལན་ཡོང་བར་དགོས་ངེས་ཀྱི་ཆ་རྐྱེན་གཙོ་བོ་ཞིག་ཡིན་པས་སོ།
བོད་རིགས་གཞོན་སྐྱེས་ཚོས་བོད་པའི་ངོ་བོ་རྒྱུན་འཛིན་ཡོང་བར་ལམ་འགག་དེ་རང་བརྒྱུད་དགོས་ཟེར་བ་མིན་ནའང་། ཕྱི་གླིང་པའི་ལྟས་མོ་དང་རོལ་གཞས་མང་དག་ཅིག་ལ་དོན་སྙིང་དེ་ཙམ་མ་མཆིས་པ་དང་གཞོན་སྐྱེས་ཚོའི་རྒྱུད་ལ་ཉོན་མོངས་འཕེལ་བྱེད་ཀྱི་རྒྱུ་རུ་འགྱུར་བར་དོགས་ནས་རེ་སྐུལ་གྱི་འབོད་བརྡ་ཞིག་གི་ཚུལ་དུ་འདིལྟར་ཞུས་པར་འདོད། འོན་ཀྱང་ངའི་ཨ་མའི་ཕོར་པ་གཙང་མ་ཡིན་ཞེས་པའི་དཔེ་ལྟར། ཡིན་གཅིག་མིན་གཉིས་དེ་ལྟར་བྱེད་དགོས་ཞེས་བཙན་བརྡ་བཏང་བའམ་ཨུ་ཚུགས་བྱས་པ་གཏན་ནས་མ་ཡིན་ནོ།
སྤྱི་ལོ་༢༠༡༦ ཟླ་བ་༥ ཚེས་༡༢ ཉིན
ཤེས་ཡོན་ལ་དོ་སྣང་ཅན་གྱི་བུ་རབས་ཞིག་རེད་འདུག་རྒྱབ་སྐྱོར་ཡོད་།
དངོས་གནས་སེམས་ཚོར་ཡོད་པའི་སྐད་ཆ་བཤད་འདུག་ཐུགས་རྗེ་ཆེ་ཞུ་ཡ་དང་ཁྱེད་རང་སློབ་སྦྱོང་ལ་འབྲས་བུ་གཡུལ་དུ་ཐོབ་པའི་སྨོན་འདུན་ཞུ།