ཅོག་རོང་བ།
ད་བར་ཨ་རི་དང་ཡུ་རོབ་སོགས་སུ་ཏོག་དབྱིབས་ནད་ཡམས་ཀྱི་གནས་སྟངས་ཛ་དྲག་དང་ཇེ་ཐུ་རུ་གྱུར་བས་གང་སར་མི་ཚོགས་འདུ་འཛོམས་བཀག་འགོག་ནན་མོ་བྱེད་བཞིན་ཡོད། གནས་བབ་འདིས་ས་ཁུལ་དེ་དག་གི་བོད་མི་རྣམས་ཀྱིས་སྲིད་སྤྱིའི་འོས་ཤོག་འཕེན་པར་དཀའ་ངལ་རབ་དང་རིམ་པ་བཟོས། འོས་ཤོག་མ་འཕང་ན་བོད་མི་ཡིན་པའི་འགན་མ་བསྒྲུབ་པའི་གནོངས་འགྱོད་དང་། འོས་ཤོག་འཕེན་དུ་སོང་ན་ས་ཆའི་ཁྲིམས་བཤིག་ཏེ་ཉེས་ཆད་ཕོག་པ་དང་ནད་ཡེམས་འགོས་པའི་དོགས་སྐྲག་གི་སེམས་བྱུང་ལས་བོད་མི་མང་པོ་ཡིད་གཉིས་ཐེ་ཚོམ་གྱི་གནས་སུ་ལྷུང་། ས་ཆ་ལ་ལར་འོས་ཤོག་འཕེན་ས་ནི་གྲང་ངར་གྱིས་ཁེངས་བའི་ཐང་སྟོང་ཡིན་པས་མི་ཆོས་ཀྱི་མཐུན་རྐྱེན་མི་འཛོམས་པའི་རྐྱེན་གྱིས་བགྲེས་སོང་ལོ་ན་མཐོ་བ། ནད་ཀྱིས་མནར་བ། ཡན་ལག་དང་དབང་བོ་སྐྱོན་ཅན་བཅས་པའི་འོས་ཤོག་འཕེན་པའི་མི་རྣམས་ལ་མུ་གེ་སྟེང་ལ་ཟླ་ལྷག་ལྟར་དཀའ་ངལ་བསམ་ལས་འདས་པ་འཕྲད་གྱིན་གདའ། ང་ནི་ས་གནས་ཀྱི་འོས་བསྡུའི་གཟུ་དཔང་ཞིག་ཡིན་པའི་རྐྱེན་གྱིས་གནད་དོན་འདི་དག་བཙན་བྱོལ་བོད་གཞུང་གིས་སྡིག་པ་མིག་བཙུམས་མི་བྱེད་པར་བསམ་བློ་ཞིབ་ཏུ་བཏང་སྟེ་ད་ལོའི་འོས་བསྡུའི་ལས་གཞི་བཅའ་ཁྲིམས་ལྟར་ལོ་གཅིག་གམ་ལོ་ཕྱེད་ལ་ཕྱིར་འགྱང་བྱེད་དགོས་པར་བསམ། ཡང་ན་སྦྲགས་ཐོག་ནས་འོས་ཤོག་བསྐུར་ཆོག་པའི་མཐུན་རྐྱེན་མྱུར་ཏུ་བསྐྲུན་ཏེ་གོང་འཁོད་ཀྱི་ཡུལ་མི་དེ་དག་གིས་ཕྱི་རོལ་ལ་འགྲོ་མི་དགོས་པར་སྦྲགས་ཁང་བརྒྱུད་ནས་འོས་ཤོག་བསྐུར་ཆོག་པའི་འགྲོ་ལུགས་བསྒྲུབ་རན། དེ་ལྟར་མ་བྱས་ན་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་བཅུ་གཅིག་པའི་བོད་མིའི་འོས་བསྡུའི་ཐོབ་ཐང་ལ་གནོད་པས་མི་ཚད། གང་ཟག་གི་མི་ལུས་བདེ་ཐང་དང་བོད་མིའི་སྙན་གྲགས། འོས་འབྲས་ཀྱི་དྲང་བདེན་བཅས་ལ་དངོས་བརྒྱུད་ཀྱིས་གནོད་པར་མཐོང་བས། འོས་འཕེན་པ་ངས་ཀྱང་བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་གོ་བདུན་པའི་ཚན་པ་༦་པ་ནང་༼འོས་བསྡུའི་ལས་དོན་དང་འབྲེལ་བའི་རྩོད་རྙོག་ཇི་ཡོད་ཀྱི་ཞིབ་འཇུག་དང༌། ཐག་གཅོད་ཆ་ཚང་དབུས་འོས་བསྡུ་ལས་ཁང་ནས་བྱ་རྒྱུ་༽ཞེས་བྱ་བ་གཞིར་བཟུང་སྟེ་དབུས་འོས་བསྡུ་ལས་ཁང་གིས་ད་ལོའི་འོས་བསྡུ་དུས་ཚོད་ཕྱིར་འགྱང་བྱེད་པའམ་དང་ཡང་ན་སྦྲགས་ཁང་བརྒྱུད་ནས་འོས་ཤོག་འཕེན་ཆོག་པའི་སྲོལ་བཟང་དམིགས་བསལ་གྱིས་གཏོད་དགོས་པའི་རེ་སྐུལ་ཞུ་བ་ཡིན།