སེར་ཤུལ་རིན་ཆེན་དོན་གྲུབ།
༸པཎ་ཆེན་སྐུ་ཕྲེང་བཅུ་གཅིག་པ་མཆོག་གི་སྐུའི་འཁྲུངས་སྐར་ཉེར་ལྔ་བར་ཕུལ།
གྲགས་པས་གླིང་ཁམས་སྒུལ་བའི་སྐད་སྒྲ་དེ།།
བདེན་པའི་བློ་གྲོས་སྟོང་གི་རམ་འདེགས་ལས།།
ཕྱོགས་སུ་འཐོར་བའི་དུས་བཟང་སྟོང་གི་ཆར།།
སྲོག་ཏུ་བརྗེས་པའི་ཁྲི་བདུན་རྡོ་རིང་བཞེངས།།
སྣང་བའི་དཀར་ངོགས་སྒྲིབ་པའི་མཚན་མོ་དེར།།
མིག་ཆུ་ས་ཡ་བསྐྱིལ་བའི་མཐོ་སྒང་ན།།
གདུང་འབོད་རི་ལུང་གང་བའི་འདྲ་རྣམ་ཞིག །
ཡིད་ཁམས་རྒྱ་མཚོ་སྐྱོམ་པའི་གཤེད་ལ་ཞུགས།།
འོད་ཀྱི་དུང་ཟླ་གསར་བའི་སྣང་བ་ཡིས།།
མཐོ་སྒང་འཛུམ་དམུལ་བཞད་པའི་སྐད་ཅིག་མར།།
གྲིབ་ཡོལ་གཅིག་ཏུ་སྤུངས་པའི་འདུ་བྱེད་ལས།།
སླར་ཡང་གདུང་བའི་མིག་ཆུ་མཚོ་ལ་འདྲེས།།
ཉེར་ལྔའི་བགྲང་བྱའི་རེ་སྒུག་རིང་མོ་ལ།།
དུང་ཟླའི་རླབས་གཉེར་སྒྲིབ་མིན་ལ་དོགས་པས།།
སེམས་ཀྱི་མཆོད་སྟེགས་སྟོང་བའི་སྣང་བ་ཡིས།།
གདུང་བ་ཡིད་ལས་འབྲལ་བའི་སྐལ་བ་ཉུང་།།
འོད་ལ་སྣང་བ་སྤྲོ་བའི་བགོ་སྐལ་ཞིག།
དྲང་བདེན་གནམ་གྱིས་སྤྲོད་པའི་རེ་བ་ཡིས།།
བདེན་ལུགས་གསལ་བར་འཆར་བའི་ཞུ་སྙན་སྟོང་།།
རྒྱལ་སྤྱིའི་གར་སྟེགས་རི་མོའི་མཛེས་པར་བཀོད།།
ཁྱོར་བས་གནམ་ལ་བཏེགས་པའི་དད་འདུན་འབུམ།།
སེམས་ཀྱིས་མངོན་པར་བསྟོད་པའི་རིན་ཐང་སྟོང་།།
རིགས་འདིས་ཁྱེད་ལ་ཕུལ་བའི་རྟགས་མ་སྟེ།།
བླ་མེད་ཁྱད་དུ་འཕགས་པའི་རིན་ཐང་དངོས།།
གནམ་ལ་ལག་ཟུང་རྐྱང་བའི་སྤོབས་པ་དང་།།
ལས་ཀྱི་ཁ་ལོ་སྒྱུར་བའི་སྟོབས་ཤུགས་ལ།།
རྒོལ་བའི་ནུས་པས་སྟོང་བའི་བྱིས་པ་ཡིས།།
སེམས་ཀྱི་རེ་སྨོན་བགྲང་ལས་གཞན་དུ་ཅི།།
སྐུ་མཆོག་གསེར་གྱི་ཉི་མ་སྨག་ལས་གྲོལ།།
མཛད་འཕྲིན་འོད་ཀྱི་སྣང་བ་བོད་ལ་ཁྱབ།།
བདེན་སྐྱོང་སྐལ་བའི་མཇུག་མཐུད་ལ་གཞོལ་བའི།།
སྐལ་བཟང་དུས་ལ་མཐོ་སྒང་འགྲོ་བས་སྨོན།།
༢༠༡༤/༤/༢༥/ ལ།
༸པཎ་ཆེན་བཅུ་པ་བཅུ་གཅིག་པ། །
ཨིརྟི་བསྟན་དགེ་གཉིས་སུ་ངེས། །
༸པཎ་ཆེན་བཅུ་པ་བཀྲས་ལྷུན་ལ། །
དུག་གིས་བཀྲོངས་པའི་ཤོད་ཚུལ་འདུག །
ཧམ་པས་བསྐོས་པའི་རྒྱལ་ནོར་གྱིས། །
བོད་རིགས་སེམས་ནང་རྨ་ཁ་གཏོད། །
༸པཎ་ཆེན་དགེ་འདུན་ལོ་དྲུག་སྐབས། །
གར་སོང་ཆ་མེད་སྦས་བཀུང་བྱས། །
ད་ལྟ་ཉེར་ལྔར་སོན་པ་ཁོང་། །
ཐག་རིང་ཡུལ་ནས་འཁྲུངས་སྐར་བཏང་། །
དཔུང་གིས་གཙེས་ལ་བདེན་པས་མཐུས། །
བདེན་པ་ཉིད་ནི་རྒྱལ་འགྱུར་ཅིག །