གཟི་མིག
ངག་གིས་བཀུག་པའི་གླུ་སྐད་སྙན་མོ།།
རྒྱུད་མང་སྒྲིམ་པའི་སེན་རྩེར་འཁྱིལ་ནས།།
ངོ་རུ་བཞད་པའི་འཛུམ་ཟེར་འདབ་མས།།
བདག་གི་སེམས་ཆུང་དམ་དུ་བཏགས་ཐལ།།
འཛུམ་པའི་ཞལ་རས་འོད་ཀྱིས་བརྒྱན་ཏེ།།
ཁྲ་ཆུང་མིག་ཟུང་ཞོགས་པའི་སྐར་མདས།།
ཟུམ་ཙམ་འགུལ་བའི་སྟངས་སྟབས་དེ་ཡིས།།
ང་ཡི་མིག་ལ་ཟ་འཕྲུག་བསླངས་བ།།
གོས་སྲབ་ཅིག་གི་སྐུ་ལུས་ཁེབས་ཀྱང་།།
བྲང་དུ་ལྡིང་པའི་མྱོས་བུམ་གཉིས་ཀྱི།།
གོམ་སྟབས་རེ་རེའི་ཐག་སྒྲ་འཇགས་པ།།
ཁྱེད་ཀྱི་ནུ་ཁེབས་ང་རང་ལོས་ཡིན།།
འདོད་པའི་བུ་ཆུང་རི་ལས་འཐེན་ནས།།
སེམས་ཀྱི་སྲེད་པ་ཨ་ལོང་ཐོགས་པས།།
མཚན་མོའི་སྨག་ལ་ངལ་གསོ་མེད་དུས།།
ཁྱེད་ཀྱི་གསང་དོར་ང་རང་ཡིན་ནམ།།
ཐར་ལོ་འཁྲབ་པའི་སྐལ་བ་མེད་རུང་།།
སེམས་ཀྱི་ལ་གཞས་སྙིང་ལ་བསྣགས་ནས།།
སྙིང་གཏམ་ཚིག་འབྲུ་ཁྱེད་ལ་བྲིས་པ།།
ཚངས་དབྱངས་རྒྱ་མཚོའི་གསུང་མགུར་འདྲ་བ།།
དུང་བའི་ན་ཟུག་སྙིང་ལ་སྦས་ནས།།
ལོ་ཟླའི་སྙིང་གཏམ་རྡོ་རུ་བཏབ་སྟེ།།
ཁེར་རྐྱང་མཚན་མོའི་རྨི་ལམ་དྲན་ན།།
གྲྭ་རྐྱང་ར་ལོའི་སྐྱོ་གདུང་ཤེས་པ།།
མི་ཚེ་གཅིག་གི་ཁ་ཕྱོགས་དྲིལ་ཏེ།།
གསེར་མིག་ཉ་མོ་ཁྱེད་རང་འཚོལ་ཡང་།།
ཨ་ལན་མེད་པའི་སྐྱོ་བ་བསམ་ན།།
དགེ་ཆོས་སྨྱོན་པའི་སྐྱོ་གླུ་དྲན་པ།།
ཐ་སྙད་བརྩེགས་པའི་འཕྲིན་ཆུང་དུ་མ།།
སྒམ་ཆུང་ནང་དུ་སྒོ་ལྕགས་བརྒྱབ་ནས།།
ཨམ་གཙིགས་བསྡམས་པའི་སྐྱོ་གར་དེ་ཡང་།།
ཚེ་བརྟན་རྡོ་རྗེའི་སེམས་འཕྲིན་འདྲ་ལེ།།
བརྩེ་དུང་བཤད་ན་བརྩེ་འདང་ཇེ་ཆེ།།
ན་ཟུག་བྲིས་པས་སེམས་རྩ་ཡང་རུང་།།
ཁྱེད་ལ་དགའ་བའི་སྙིང་ཆུང་དབུས་སུ།།
མིག་ཆུ་རློན་པའི་བཅུད་ཅིག་ཡོད་ངེས།།
གཟི་མིག་གིས་བྲིས་པའི་དགའ་གཞས་སྙན་སོང།
རང་མི་རིགས་སྐད་ཡིག་ཟབ་མོ་མ་བརླག་།
འདི་འདྲའི་རྩོམ་འདྲ་ངེས་པར་འབྲི་རོགས།
ང་འདྲ་བོའི་མི་ལ་ངེས་པར་ཕན་ངེས།
ལགས་སོ།། རྒན་ལགས།